Report Bilong Olketa wea Talemaot Kingdom

Olketa Kingdom Hall Open for Evriwan

TAEM hem trainim olketa disaepol bilong hem for duim pablik ministry, Jesus Christ encouragem olketa for “preach from antap long ruf bilong haos.” (Matthew 10:27) Tru nao, olketa mas duim Christian ministry front long evriwan, long wei wea evriwan savve lukim. From olketa followim disfala kaonsel, Olketa Jehovah’s Witness duim waka bilong olketa front long evriwan. Diswan hem mekem olketa Witness fit for winim wei wea pipol againstim olketa and for mekem pipol tinghae long olketa.

Nomata olketa kongregeson meeting bilong Olketa Jehovah’s Witness hem open for eniwan long pablik, wei for garem nogud tingting againstim olketa mekem samfala pipol no feel free for go insaed wanfala Kingdom Hall. Diswan nao happen long Finland. Olketa narawan savve hol bak for go long olketa niu ples. Taem olketa buildim wanfala niu Kingdom Hall or fixim moa wanfala old wan, olketa savve arrange for eniwan kam luk raon and enjoyim lelebet kaikai. Olketa barava interest for invaetem olketa neiba for visitim Kingdom Hall and faendaot abaotem waka bilong Olketa Jehovah’s Witness.

Long wanfala area, olketa Witness arrangem wanfala magasin campaign long sem day wea olketa duim open haos long niu Kingdom Hall bilong olketa. Tufala Witness meetim wanfala olo man wea sei hem enjoyim wei for readim olketa Wastaoa and Wekap! magasin. Tufala brata hia talem hem abaotem open haos hia and sei tufala willing for tekem hem go long Kingdom Hall. Datfala man sei bae hem hapi for go witim tufala. Waef bilong hem wea lisin long story tu sei: “Mi tu laek go!”

Taem olketa go insaed Kingdom Hall, datfala man luk raon and sei: “Bat diswan hem no blak kala. Hem luk naes fogud and laetfala kala. Pipol talem mi Kingdom hall hem blak kala!” Datfala hasband and waef stap long there for lelebet longtaem and askem samfala pablikeson wea olketa lukim long there.

Wanfala kongregeson want for announcem insaed niuspepa abaotem open haos wea olketa bae duim long dedication bilong niu Kingdom Hall bilong olketa. Taem hem herem diswan, woman wea boss long niuspepa sei for olketa raetem wanfala article abaotem datwan. Olketa brata agree for duim olsem, and lelebet taem bihaen, wanfala haf-page article kamap insaed long niuspepa, wea storyim samting wea happen and olketa waka bilong datfala kongregeson bilong Olketa Jehovah’s Witness.

Bihaen datfala article kamaot, wanfala olo Witness meetim wanfala neiba wea sei long hem: “Wanfala barava naes article abaotem Olketa Jehovah’s Witness stap insaed niuspepa tuday!” Datfala sista witness long hem and bihaen offerim brochure Jehovah’s Witnesses in the Twentieth Century long hem.

Olketa arrangement for garem open haos and dedication program for olketa niu Kingdom Hall hem kliarem samfala rong idea abaotem Olketa Jehovah’s Witness and tu hem muvim olketa pablisa for invaetem moa pipol for attendim olketa meeting. Tru nao, long planti kantri, and Finland tu, pipol lanem hao olketa Kingdom Hall bilong Olketa Jehovah’s Witness open for evriwan.