“Faendem Bigfala Hapi Bilong Iu Long Jehovah”
“Faendem Bigfala Hapi Bilong Iu Long Jehovah”
“Faendem bigfala hapi bilong iu long Jehovah, and hem bae givim olketa samting wea heart bilong iu wantem.”—PSALM 37:4.
1, 2. Trufala hapi Start kam from hu, and hao nao King David storyim diswan?
“HAPI nao olketa wea luksavve long spiritual need bilong olketa, . . . hapi nao olketa wea showimaot mercy, . . . hapi nao olketa wea mekem peace kamap.” Witim nara sixfala toktok abaotem olketa wea hapi, thrifala toktok antap nao part long nambawan introduction long Sermon bilong Jesus long Maunten, wea Matthew hem recordim. (Matthew 5:3-11) Toktok bilong Jesus mekem iumi sure hao wei for hapi hem samting wea iumi savve kasem.
2 Wanfala holy song wea King David bilong Israel bifor raetem hem talemaot hao Start bilong trufala hapi hem kam from Jehovah. David sei: “Faendem bigfala hapi bilong iu long Jehovah, and hem bae givim olketa samting wea heart bilong iu wantem.” (Psalm 37:4) Bat hao nao man bae mekem wei for savve long Jehovah and evri fasin bilong hem kamap wanfala “bigfala hapi”? Hao nao wei for tingim olketa samting wea hem duim finis and bae duim long future for fulfillim purpose bilong hem givim iu hope for kasem “samting wea heart bilong iu wantem”? Wei for studyim gud Psalm 37, verse 1 go kasem 11 bae givim ansa.
“No Jealous”
3, 4. Wanem advaes nao David hem givim long Psalm 37:1, and why nao hem fitim for iumi followim datwan distaem?
3 Iumi stap long olketa “nogud taem wea hard for deal witim,” and wicked fasin hem kamap big. Iumi lukim disfala toktok bilong aposol Paul hem kamap tru: “Olketa wicked man and man for laea bae go ahed for moa worse, for laea long pipol and olketa seleva tu.” (2 Timothy 3:1, 13) Hem isi tumas for feel nogud from hem luk olsem wicked pipol win and garem isi living! Evri samting hia savve tanem tingting bilong iumi, mekem spiritual eye bilong iumi kamap no klia. Lukim hao first toktok bilong Psalm 37 mekem iumi luksavve long diskaen danger: “No showimaot iu kros bikos olketa badfala pipol stap. No jealous long olketa wea duim fasin wea no raeteous.”
4 Evriday olketa niusman reportim planti samting wea no followim justice. Olketa bisnisman wea no honest go ahed nomoa long raverave fasin bilong olketa. Olketa criminal mekius long pipol wea isi for olketa switim. Pipol no faendem olketa wea killim dae nara pipol or olketa hia no kasem panis. Evri example hia bilong wei for spoelem justice savve mekem man feel kros and spoelem peace long mind. Wei wea luk olsem olketa wicked pipol stap gud maet mekem feeling for jealous kamap. Bat waswe, wei wea iumi feel nogud bae duim eni gud samting? Waswe, wei for feel jealous long olketa naes samting wea wicked pipol enjoyim bae changem samting wea bae kasem olketa bihaen? Barava nomoa nao! And for tok stret, iumi no need for “kros.” Why?
5. Why nao wicked pipol semsem olsem grass?
5 Man wea raetem psalm hem ansa olsem: “Olsem grass, olketa bae kwiktaem dae, and olsem niufala green grass, olketa bae finis.” (Psalm 37:2) Niufala green grass maet luk naes, bat kwiktaem nomoa olketa kamap old and dae. Hem semsem tu witim wicked pipol. Nomata hem luk olsem olketa kasem naes living, diswan hem bae no for olowe. Taem olketa dae, riches wea olketa kasem from raverave fasin bae no helpem olketa nao. Gogo, evriwan kasem justice. Paul hem raet: “Pei bilong sin hem dae.” (Romans 6:23) Olketa wicked pipol and evriwan wea no raeteous bae kasem “pei” bilong olketa. No eni gud samting savve kamaot from diskaen living!—Psalm 37:35, 36; 49:16, 17.
6. Wanem leson nao iumi savve kasem from Psalm 37:1, 2?
6 So waswe, iumi shud letem gudfala living for lelebet taem bilong wicked pipol for mekem iumi feel nogud? Leson from tufala first verse bilong Psalm 37 hem olsem: No letem wei wea olketa win hem mekem iu go difren from gogo bilong iu for servem Jehovah. Bat, tingting strong long olketa spiritual blessing and goal bilong iu.—Proverbs 23:17.
“Trust Long Jehovah and Duim Gudfala Samting”
7. Why nao iumi shud trust long Jehovah?
7 Man wea raetem psalm hem encouragem iumi olsem: “Trust long Jehovah and duim gudfala samting.” (Psalm 37:3a) Taem iumi wari or maet garem samfala daot, iumi need for strongim trust bilong iumi long Jehovah. Hem nomoa Wan wea givim spiritual sef living evribit. Moses hem raet olsem: “Eniwan wea stap long secret ples bilong Most Hae bae stap haed anda long shadow bilong Olmaeti Wan.” (Psalm 91:1) Taem iumi feel nogud from fasin for brekem law hem kamap big tumas long disfala system, iumi need for depend moa strong long Jehovah. Sapos leg bilong iumi hem miss, iumi hapi taem wanfala fren helpem iumi. Olsem tu, taem iumi trae for faithful long gogo bilong iumi, iumi needim saport bilong Jehovah.—Isaiah 50:10.
8. Hao nao wei for tekpart long Christian ministry helpem iumi for stap klia long wei for ova tumas for feel nogud long naesfala living bilong wicked pipol?
8 Wanfala samting wea savve helpem iumi sapos iumi feel nogud long naesfala living bilong wicked pipol hem for busy for luk aotem and helpem olketa wea olsem sheep for kasem stretfala savve abaotem purpose bilong Jehovah. From wicked fasin hem kamap big tumas distaem, iumi need for busy evribit for helpem nara pipol. Aposol Paul hem sei: “No forget for duim gudfala samting and sharem samting witim pipol, from God hem hapi tumas long sakrifaes olsem.” Best “gudfala samting” iumi savve duim hem for sharem nambawan gud nius abaotem Kingdom bilong God witim nara pipol. Waka bilong iumi for preach long pablik hem wanfala “sakrifaes bilong praise.”—Hebrews 13:15, 16; Galatians 6:10.
9. Wanem nao toktok bilong David “stap long earth” hem minim?
9 David hem sei moa: “Stap long earth, and duim samting witim faithful fasin.” (Psalm 37:3b) “Earth” long taem bilong David hem territory wea Jehovah givim long Israel, datfala Promis Land. Taem Solomon rul, olketa spialaen bilong datfala ples hem start from Dan long north go kasem Beer-sheba long south. Datwan nao ples wea Israel stap. (1 Kings 4:25) Distaem, long eni ples wea iumi stap long earth, iumi luk forward long taem wea full earth bae kamap wanfala paradaes long niu world bilong raeteous fasin. And go kasem datfala taem, iumi stap sef long spiritual wei.—Isaiah 65:13, 14.
10. Wanem nao bae happen taem iumi “duim samting witim faithful fasin”?
10 Wanem nao bae happen taem iumi “duim samting witim faithful fasin”? Disfala proverb hem sei: “Man wea duim faithful waka bae kasem staka blessing.” (Proverbs 28:20) Wei wea iumi faithful for go ahed preach long evriwan iumi meetim and long eni ples iumi stap savve mekem iumi kasem planti reward from Jehovah. Olsem example, 40 year go finis Frank and waef bilong hem Rose acceptim pioneer assignment long wanfala taon long north saed bilong Scotland. Tu-thri wea bin interest long truth olketa bakslaed. Diswan no stopem pioneer hasband and waef hia for start preach and mek disaepol. Distaem wanfala strong kongregeson hem stap long datfala taon. Jehovah hem blessim faithful fasin bilong tufala. Frank hem talem hambol toktok hia: “Barava bigfala blessing nao hem wei wea mifala still stap insaed long truth and Jehovah iusim mitufala.” Tru nao, taem iumi “duim samting witim faithful fasin,” iumi kasem and thankiu long planti blessing.
“Faendem Bigfala Hapi Bilong Iu Long Jehovah”
11, 12. (a) Long wanem wei nao iumi savve ‘faendem bigfala hapi long Jehovah’? (b) Wanem goal nao iu savve markem saed long wei for study seleva, and wanem nao maet kamaot from diswan?
11 For strongim wei wea iumi fren witim Jehovah and go ahed for trust long hem, iumi mas “faendem bigfala hapi . . long Jehovah.” (Psalm 37:4a) Hao nao iumi duim datwan? Winim wei for interest tumas long iumiseleva, iumi ting strong long Jehovah, nomata maet diswan hem no isi for duim. Wanfala wei for duim diswan hem for iusim taem for readim Word bilong hem. (Psalm 1:1, 2) Waswe, Bible reading bilong iu hem givim iu hapi? Hem bae givim iu hapi sapos iu readim witim goal for lanem moa samting abaotem Jehovah. Hem gud for stop lelebet bihaen iu readim samfala verse and askem iuseleva, ‘Wanem nao mi lanem abaotem Jehovah from olketa verse hia?’ Maet hem gud sapos iu redyim notebuk or pepa taem iu readim Bible. Each taem iu stop for ting raonem mining bilong samting iu readim, raetem daon toktok or word wea mekem iu tingim wanfala long olketa nambawan fasin bilong God. Long nara song, David hem sing olsem: “Mi laekem toktok wea mi talem and samting wea heart bilong mi ting raonem for mekem iu hapi, O Jehovah Rok bilong mi and Datwan wea Baem mi Bak.” (Psalm 19:14) Diskaen wei for ting strong long Word bilong God hem samting wea Jehovah “hapi” long hem and iumi tu bae kasem hapi.
12 Wanem nao savve mekem iumi kasem hapi from wei wea iumi study and ting raonem samting? Iumi savve putim goal for lanem staka samting abaotem Jehovah and olketa wei bilong hem. Olketa buk olsem Nambawan Man wea Winim Evri Otherfela Man and Draw Close to Jehovah * garem planti information wea iumi savve ting raonem witim wei for thankiu. Then, David sei olketa raeteous pipol bae sure hao Jehovah “bae givim olketa samting wea heart bilong iu wantem.” (Psalm 37:4b) From aposol John biliv strong long diswan, dastawe hem maet raetem disfala toktok: “Iumi garem disfala wei for trustim hem, hao, nomata wanem samting iumi askem wea fitim will bilong hem, hem herem iumi. And tu, sapos iumi savve hem herem iumi taem iumi askem eni samting, iumi savve iumi bae kasem olketa samting wea iumi askem bikos iumi askem from hem.”—1 John 5:14, 15.
13. Insaed olketa year wea just go pas, wanem wei for grow saed long waka for preachim Kingdom nao hem kamap long planti kantri?
13 From iumi pipol wea faithful, samting iumi hapi tumas for lukim nao hem for sovereign rul bilong Jehovah kamap hae. (Proverbs 27:11) Heart bilong iumi fulap witim hapi taem iumi herem bigfala preaching waka wea olketa brata bilong iumi duim long olketa kantri wea stap anda long raf rul bifor! Iumi luk forward long samfala wei for free moa wea maet kamap bifor disfala system hem finis. Planti servant bilong Jehovah wea stap long kantri wea no againstim Christian preaching waka, strong for preach long olketa student, refugee and pipol bilong nara kantri wea kam stap long kantri bilong olketa and free for worship. Iumi hope taem olketa hia go bak long hom, bae olketa go ahed for shaenim laet bilong truth long olketa ples wea waka hem tambu.—Matthew 5:14-16.
“Putim Gogo Bilong Iu Long Jehovah”
14. Wanem nao pruvim hao iumi savve depend long Jehovah?
14 Iumi feel gud tumas for savve dat olketa samting iumi wari abaotem and olketa samting wea feel olsem hevi savve aot from iumi! Long wanem wei? David hem sei: “Putim gogo bilong iu long Jehovah, and depend long hem, and hem nao bae duim samting.” (Psalm 37:5) Long olketa kongregeson bilong iumi, planti pruv showimaot iumi savve depend long Jehovah for saportim iumi. (Psalm 55:22) Olketa wea duim full-taem ministry, olsem olketa pioneer, traveling overseer, missionary, or volunteer wea waka long Bethel, savve talemaot wei wea Jehovah hem lukaftarem man. Iu trae story witim olketa wea iu savve and askem hao Jehovah helpem olketa finis. Iu bae herem planti experience wea showimaot hao nomata long olketa hard taem, hand bilong Jehovah hem no short. Hem evritaem provaedem olketa need long living.—Psalm 37:25; Matthew 6:25-34.
15. Hao nao raeteous fasin bilong pipol bilong God hem shaen go aot?
15 Taem iumi putim trust bilong iumi long Jehovah evribit, bae iumi kasem samting wea man wea raetem psalm hem talem: “Hem bae mekem raeteous fasin bilong iu kamap olsem datfala laet, and justice bilong iu kamap olsem midol day.” (Psalm 37:6) From iumi olketa Witness bilong Jehovah, planti taem pipol talem laea samting abaotem iumi. Bat Jehovah openem eye bilong olketa wea garem honest heart for helpem olketa luksavve hao love for Jehovah and neiba nao muvim iumi for duim ministry long pablik. Long semtaem, stretfala fasin bilong iumi, nomata planti talem laea samting abaotem, hem no savve haed. Jehovah strongim iumi nomata iumi kasem evri difren wei for againstim iumi and persecution. From diswan, raeteous fasin bilong pipol bilong God hem shaen go aot olsem sun long midol day.—1 Peter 2:12.
‘Stap Kwaet . . . Weit Witim Feeling for Barava Wantem’
16, 17. Olsem Psalm 37:7 hem talem, distaem hem taem for wanem, and why nao olsem?
16 Next toktok bilong man wea raetem psalm hem olsem: “Stap kwaet front long Jehovah and weit for hem witim feeling for barava wantem. No kros long eniwan wea win long wanem hem duim, long man wea duim samting followim idea bilong hemseleva.” (Psalm 37:7) Long hia David mekhae long need for iumi weit long patient wei for Jehovah duim samting. Nomata end bilong disfala system hem no kam yet, diswan no givim iumi reason for komplen. Waswe, iumi lukim hao mercy and patient fasin bilong Jehovah hem moa big winim wanem iumi tingim firstaem? Waswe, iumi savve showimaot distaem hao iumi tu patient for weit taem iumi go ahed busy for preachim gud nius bifor end hem kam? (Mark 13:10) Hem taem nao for stap klia long wei for duim krangge samting from iumi no ting abaotem firstaem, wea savve aotem hapi and spiritual sef living bilong iumi. Hem taem nao for barava againstim nogud paoa long world bilong Satan. And hem taem nao for keepim klin fasin and no putim long danger wei wea iumi stap raeteous front long Jehovah. Iumi mas aotem dirty tingting and stap klia long dirty akson witim narawan nomata hem man or woman.—Colossians 3:5.
17 David hem givim disfala kaonsel: “Let go long kros and lusim bigfala kros; no kamap hot witim kros gogo iu duim nogud samting. Olketa wea duim nogud samting bae finis, bat olketa wea hope long Jehovah bae kasem earth.” (Psalm 37:8, 9) Tru nao, iumi savve luk forward long taem—wea klosap tumas—taem Jehovah bae aotem evrikaen raverave fasin and olketa wea duim datwan.
“Lelebet Taem Nomoa Stap”
18, 19. Wanem encouragement nao iu kasem from Psalm 37:10?
18 “Lelebet taem nomoa stap, and wicked wan bae finis; and iu bae luk aotem ples bilong hem, bat hem bae no stap.” (Psalm 37:10) Toktok hia encouragem iumi taem iumi kam klosap long end bilong disfala system wea bae finisim wei for stap separate from Jehovah wea barava spoelem man! Nomata wanem kaen gavman or paoa nao man wakem, hem fail evribit. And distaem iumi klosap long taem wea rul bilong God bae kam bak, wea hem nao datfala Kingdom bilong Jehovah wea Jesus Christ rulim. Hem bae tekova evribit long olketa samting bilong world and aotem evriwan wea againstim Kingdom bilong God.—Daniel 2:44.
19 Long niu world anda long Kingdom bilong God, nomata sapos iu luk aotem, bae iu no faendem “wicked wan.” Yes, sapos eniwan hem bighed for againstim Jehovah, bae Jehovah kwiktaem aotem hem. No eniwan wea againstim rul bilong hem or no want for acceptim rul bilong God bae stap long there. Evri neiba bae garem wan mind for mekem Jehovah hapi. Datwan bae mekem sef living kamap—no eni lok, no eni bolt, no eniting bae spoelem wei for trust and hapi evribit!—Isaiah 65:20; Micah 4:4; 2 Peter 3:13.
20, 21. (a) Hu nao “olketa wea garem kwaet fasin” wea Psalm 37:11 hem storyim, and wea nao olketa faendem “bigfala peace”? (b) Wanem kaen blessing nao bae iumi garem sapos iumi followim example bilong Bigfala David?
20 Then, “olketa wea garem kwaet fasin bae kasem earth.” (Psalm 37:11a) Bat hu nao “olketa wea garem kwaet fasin”? Datfala word wea olketa transleitim “kwaet” hem kam from word wea minim “safa, hambol, mekful.” Tru nao, “olketa wea garem kwaet fasin” nao olketa wea hambol for weitim Jehovah for stretem evri nogud samting wea kasem olketa. “Olketa bae kasem nambawan hapi long bigfala peace.” (Psalm 37:11b) Nomata distaem tu, iumi faendem bigfala peace long spiritual paradaes wea stap insaed long tru Christian kongregeson.
21 Nomata iumi still kasem olketa problem, iumi saportim each other and comfortim olketa wea feel sorre. Samting wea kamaot from diswan nao hem trufala peace long heart wea stap midolwan pipol bilong Jehovah. Olketa brata wea kasem appointment for olsem shepherd lukaftarem long loving wei spiritual—and samfala taem physical—need bilong iumi, and diswan helpem iumi for go ahed strong nomata iumi kasem hardfala taem from wei for followim raeteous fasin. (1 Thessalonians 2:7, 11; 1 Peter 5:2, 3) Iumi tinghae tumas long peace wea iumi garem! Iumi garem tu hope for laef olowe long Paradaes bilong peace wea klosap for kam. So, letem iumi followim example bilong Bigfala David, Christ Jesus, wea strong bilong hem for Jehovah muvim hem for serve long faithful wei go kasem end. (1 Peter 2:21) Sapos iumi duim olsem, bae iumi go ahed for hapi and givim praise long wan wea iumi faendem bigfala hapi long hem, God bilong iumi, Jehovah.
[Footnote]
^ par. 12 Olketa Jehovah’s Witness nao pablisim.
Waswe, Iu Savve Ansa?
• Wanem nao olketa leson wea iu lanem from Psalm 37:1, 2?
• Hao nao iu savve “faendem bigfala hapi bilong iu long Jehovah”?
• Wanem nao pruvim iumi savve depend long Jehovah?
[Olketa Kwestin]
[Piksa long page 9]
Olketa Christian “no jealous long olketa wea duim fasin wea no raeteous”
[Piksa long page 10]
“Trust long Jehovah and duim gudfala samting”
[Piksa long page 11]
Faendem bigfala hapi long Jehovah taem iu lanem evri samting iu fit for lanem abaotem hem
[Piksa long page 12]
“Olketa wea garem kwaet fasin bae kasem earth”