Olketa Tank wea No Savve Keepim Wata

LONG taem bilong Bible, olketa tank wea man wakem for keepim wata insaed hem stap andanit long graon. For samfala taem long Promis Land, datwan nomoa hem wei for olketa keepim wata wea hem important samting for laef.

Taem hem raetem wanfala toktok wea kam from God, long tokpiksa wei profet Jeremiah tok abaotem olketa tank hia, taem hem sei: “Tufala nogud samting nao pipol bilong mi duim: Olketa lusim mi, Datwan wea givim living wata, and olketa wakem olketa tank, olketa tank wea brek, wea kanduit keepim wata.”—Jeremiah 2:13.

Taem olketa Israelite lusim God bilong olketa, Jehovah—“Datwan wea givim living wata”—olketa mekem agreement witim olketa army bilong olketa heathen nation wea man no fit for trustim and worshipim olketa false god wea no garem paoa. Olketa ples hia wea olketa tingim olsem sef ples, for fitim tokpiksa bilong Jeremiah, hem olsem datfala tank wea leak wea no garem eni paoa for protectim or sevem man.—Deuteronomy 28:20.

Waswe, iumi lanem eni leson distaem from disfala really example bilong olketa samting wea olketa duim bifor? Olsem long taem bilong Jeremiah, datfala God bilong olowe, Jehovah, hem nomoa datwan wea givim wata wea bae givim laef. (Psalm 36:9; Revelation 4:11) Olketa man fit for kasem laef olowe from Jehovah nomoa, thru long son bilong hem Jesus Christ. (John 4:14; 17:3) Bat, olsem olketa wea stap long semtaem witim Jeremiah, distaem staka pipol chus for rejectim and againstim toktok bilong God wea stap long Bible. And olketa putim trust bilong olketa long politik, olketa toktok bilong man wea no mek sense, and olketa iusles idea and tingting wea no honorim God. (1 Corinthians 3:18-20; Colossians 2:8) Hem klia nomoa for chus. Wea nao bae iu putim trust bilong iu? Waswe bae iu putim trust bilong iu long “Datwan wea givim living wata,” Jehovah, or bae iu putim long “olketa tank wea brek wea kanduit keepim wata”?

[Piksa long page 32]

Idol bilong mami woman god wea olketa wakem from clay and faendem long Israelite grev

[Credit Line]

Photograph taken by courtesy of the British Museum