“Redy for Evri Gudfala Waka”

“GO AHED for remindim olketa for stap anda and obeyim olketa gavman and olketa wea garem paoa olsem ruler, and for redy for evri gudfala waka.” (Titus 3:1) Wanem gudfala waka nao aposol Paul tingim taem hem raetem olketa toktok hia long nara Christian? Man wea skulim Bible E. F. Scott storyim wankaen gud waka, taem hem sei: “Olketa Christian need for obeyim olketa wea garem paoa, and mas redy tu for eni gud waka. . . . Taem need kamap, olketa Christian shud main wan wea showim kea for community. From fire, sik, enikaen trabol savve kamap planti taem, olketa gudfala citizen bae want for helpem neiba bilong olketa.”

Olketa Christian savve join long samfala waka for helpem pipol sapos diskaen waka no brekem eni law bilong God. (Acts 5:29) Olsem example, evri year branch office bilong Olketa Jehovah’s Witness long Japan, wea stap long Ebina, practice for deal witim fire. Diswan followim kaonsel bilong fire department. Long taem olsem, evriwan insaed Bethel famili sidaon tugeta for lisin long instruction bilong man bilong fire department.

And tu, for winim ten year, datfala branch office waka witim gavman for tekpart long wanfala show wea mekhae long wei for stanbae for fire. Long datfala show, olketa bisnis long taon showimaot hao olketa savve faetem and kontrolem fire. Planti savve tok hae long wei wea branch garem savve and hem waka tugeta witim olketa long diswan. Long 2001, olketa kasem first prize long datfala show. Olketa redy for duim gudfala waka wea savve sevem laef sapos fire kamap.

Wanfala Important Help

Bat, Olketa Jehovah’s Witness interest long wankaen gud waka wea moa important, wea savve sevem laef tu. Olketa evritaem visitim neiba for storyim gud nius abaotem Kingdom bilong God. (Matthew 24:14) Olketa Witness encouragem pipol for lanem and live followim olketa Bible kaonsel mekem laef bilong olketa kamap moabeta and for garem hope for laef olowe long world wea trufala peace and sef living bae stap.

Samfala maet no luksavve long disfala help bilong Olketa Jehovah’s Witness, and maet ting olketa krangge. Bat, Justice Jean Crepeau from Quebec Superior Court long Canada garem difren tingting. Olketa Jehovah’s Witness long there no agree witim law bilong Blainville, Quebec, wea sei olketa needim permit bifor olketa savve visitim haos bilong olketa neiba. Long disison bilong kot, Justice Crepeau sei: “Visit bilong Olketa Jehovah’s Witness hem waka wea Christian duim for helpem community and . . . buk wea olketa Witness offerim long olketa wea interest hem  important, and savve story abaotem samting olsem religion, Bible, drug, alcohol, education for young pipol, problem bilong marit and divorce.” Disison hia go ahed for sei: “Disfala kot lukim klia hao wei for ting Olketa Jehovah’s Witness semsem olsem pipol wea sellim samting hem nating stret, diswan hem daonem, and tok spoelem man.”

Olketa Jehovah’s Witness helpem community wea olketa stap long hem taem olketa helpem pipol for winim problem insaed laef and givim pipol hope for future. Bible helpem olketa for duim datfala waka. “Evri Scripture hem kam from God and hem gud for teach, for givim kaonsel, for stretem evri samting, for givim discipline long raeteous fasin, mekem man bilong God hem fit evribit, barava redy for duim evri gudfala waka.”—2 Timothy 3:16, 17.

Waswe, iu laek for savve hao Olketa Jehovah’s Witness “redy for evri gudfala waka”? Mifala invaetem iu for iusim help bilong olketa for lanem moa samting abaotem Bible, and kasem gud samting from disfala gudfala help wea olketa duim long area bilong iu and long full world.

[Olketa Piksa long page 30, 31]

Olketa Jehovah’s Witness trae for waka witim olketa nara department

[Piksa long page 31]

Pipol luksavve hao olketa Witness helpem neiba bilong olketa