Stretfala Reason for Biliv

WANFALA buk bilong Korea, 31 Reasons Why Young People Leave the Church showimaot hao planti pipol stop for gogo long church from olketa no faendem ansa wea mekem olketa satisfae for olketa kwestin bilong olketa. Olsem example, olketa ask, ‘Why nao pipol wea biliv long God safa?’ and ‘Why nao iumi acceptim evriting wea olketa church teachim taem planti long olketa teaching no agree and mekem man konfius?’

From olketa no hapi witim ansa wea olketa bigman bilong church talem, planti pipol tingim Bible no garem eni ansa. Taem wanfala bigman bilong church explainim samting wea kam from tingting bilong hemseleva, diswan savve lead go for man no minim, and tu for rejectim God and Bible.

Hem nao experience bilong Abel, wea growap olsem wanfala Lutheran long South Africa. Hem sei: “Church teachim hao evriwan wea dae God nao ‘tekem.’ Bat mi no savve minim why nao wanfala God bilong love bae ‘tekem’ pikinini from parents bilong hem. Long Africa wea mi growap, mifala savve killim dae wanfala kokorako only bihaen olketa baby bilong hem big finis. Sapos mifala faendem wanfala buluka hem babule, mifala bae weitim hem bornem and feedim gud baby bilong hem bifor mifala killim dae. Mi no savve minim why nao wanfala God bilong love no savve showimaot semkaen tingting olsem for pipol.”

Aram, from Canada, garem semkaen tingting. Hem sei: “Taem mi 13 year, dadi bilong mi dae. Insaed long funeral service, wanfala bigman bilong church minim hao God laekem dadi bilong mi for dae mekem hem bae savve kamap klos long God long heven. Hem sei, ‘God tekem go olketa gudfala pipol, bikos Hem  lovem olketa raeteous pipol.’ Mi no savve minim why nao God selfish olsem.”

Gogo, Abel and Aram meetim Olketa Jehovah’s Witness, studyim Bible witim olketa and, bihaen, faendem ansa long olketa kwestin bilong tufala. Tufala mekem grow love for God and strongfala faith long hem. Bihaen, tufala dedicatem laef bilong tufala long Jehovah and kamap olketa loyal servant bilong hem.

Stretfala Savve—Wanfala Key for Biliv Long God

Wanem nao iumi savve lanem from olketa experience hia? Olketa talem iumi hao saed long wei for biliv long God, stretfala savve hem important. Aposol Paul talem olketa Christian long Philippi bifor: “Diswan nao mi go ahed for prea for hem, for love bilong iufala evritaem kamap moa big long stretfala savve and fasin for luksavve evribit.” (Philippians 1:9) Long hia Paul joinim love for God and olketa Christian brata and sista, witim stretfala savve abaotem God and fasin for luksavve long will bilong hem.

Diswan hem stret, from bifor iu fit for trustim wanfala man, first samting iu mas savve long datfala man—taem iu savve gud long hem then bae iu fit for trustim hem. Long sem wei, iu needim stretfala savve bifor diswan savve muvim iu for biliv long God. Paul sei, “Faith hem wei wea man sure bae hem kasem samting wea hem hope for hem, kliafala pruv bilong really samting nomata hem no lukim yet.” (Hebrews 11:1) Wei for biliv long God nomata man no garem stretfala savve hem olsem wanfala haos wea olketa buildim witim olketa card. Smolfala wind savve mekem hem foldaon.

Wei for studyim Bible savve helpem iu for kasem ansa long olketa kwestin olsem diswan wea mekem Abel and Aram konfius for longfala taem, Why nao pipol dae? Bible minim hao “thru long wanfala man sin hem kam insaed long world and dae hem kam from sin, dastawe dae hem kasem evri man bikos evriwan sin.” (Romans 5:12) Olketa man kamap olo and dae, no from God tekem olketa for stap witim hem, bat bikos Adam nao sin. (Genesis 2:16, 17; 3:6, 17-19) And tu, Bible showimaot trufala hope wea Jehovah God offerim. Thru long Son bilong hem, Jesus Christ, hem provaedem hope bilong resurrection for olketa man wea sin.—John 5:28, 29; Acts 24:15.

For helpem iumi minim truth abaotem resurrection, Bible garem samfala example bilong samfala pipol wea Jesus mekem olketa laef bak moa. (Luke 7:11-17; 8:40-56; John 11:17-45) Taem iu readim olketa Bible story hia, lukim hapi wea olketa famili and fren bilong olketa wea resurrect kasem. Lukim tu hao olketa garem feeling for praisem God and putim faith long Jesus.

Stretfala savve abaotem God and olketa purpose bilong hem savve duim sem samting long pipol distaem. Planti konfius, garem hevi, and stambol tu long olketa important kwestin wea olketa no savve faendem ansa wea mekem olketa satisfae. Bat taem olketa studyim Bible, olketa faendem ansa, and datwan barava changem laef bilong olketa.

Love for God—Main Reason for Servem Hem

Nomata stretfala savve nao important for garem faith long God, man need for duim moa samting for obeyim and servem hem. Taem samwan askem Jesus wanem nao nambawan komandment from God, Jesus sei: “Iu mas lovem Jehovah, God bilong iu witim full heart bilong iu and witim full soul bilong iu and witim full mind bilong iu and witim full strong bilong iu.” (Mark 12:30) Sapos wanfala man lovem God olsem hao Jesus talem, bae hem barava willing for obeyim and servem Hem. Waswe, iu olsem?

Rachel, wea serve olsem wanfala missionary long Korea for planti year, talem disfala reason for faith bilong hem: “Mi tingim wei wea Jehovah givim staka samting long iumi, wei wea hem forgivim pipol bilong hem, and hao hem laekem iumi for kasem gud samting long wei wea hem talem iumi wanem hem laekem from iumi. Evri samting olsem mekem love bilong mi for God hem grow. And datfala love mekem mi laek for servem hem.”

 Martha, wanfala widow woman long Germany, servem Jehovah for 48 year finis. Hem sei: “Why nao mi servem Jehovah? Bikos mi lovem hem. Evri evening mi story long Jehovah insaed prea and talem hem hao mi barava thankiu for evri blessing bilong hem, especially for ransom sakrifaes.”

Tru nao, love for God mekem iumi want for servem hem from heart. Bat hao nao for mekem grow diskaen love? Strongfala samting wea savve muvim iumi for mekem grow love for God nao for iumi barava tinghae long love wea hem showimaot for iumi. Lukim disfala nambawan toktok from Bible: “Man wea no showimaot love hem no savve long God, from God hem love. Thru long diswan love bilong God hem showaot long iumi, bikos God sendem only-born Son bilong hem long world mekem iumi savve kasem laef thru long hem. Disfala love hem olsem, no from iumi lovem God, bat from hem lovem iumi and sendem kam Son bilong hem olsem wanfala sakrifaes for kavarem olketa sin bilong iumi.”—1 John 4:8-10.

Waswe, iu luksavve hao disfala love hem nambawan? Tingim sapos wantaem iu stragol long wanfala wata wea flood and wanfala man putim laef bilong hem long danger for sevem iu. Waswe, bae iu forgetim hem, or bae iu barava tinghae long hem? Bae iu willing for duim eni samting for hem. Love wea God showimaot long wei wea hem givim Son bilong hem, Jesus Christ, olsem wanfala ransom sakrifaes hem barava big tumas. (John 3:16; Romans 8:38, 39) Taem love bilong God muvim heart bilong iu, bae diswan muvim iu for lovem and servem hem witim full heart.

Olketa Blessing Distaem and Long Future

Nomata love bilong iumi for God nao mas main reason for iumi duim will bilong hem, iumi hapi for savve hao God givim reward long olketa wea servem hem. Aposol Paul sei olsem: “Sapos man no garem faith hem kanduit mekem hem hapi, from man wea kam long God  mas biliv hem stap and hem kamap datwan wea givim reward long olketa wea barava luk aotem hem.”—Hebrews 11:6.

Olketa wea lovem and obeyim God barava kasem blessing from hem. Planti garem gudfala health bihaen olketa followim Bible principle. (Proverbs 23:20, 21; 2 Corinthians 7:1) Olketa wea followim Bible principle saed long honest fasin and wei for waka hard kasem trust from olketa boss bilong olketa and from diswan olketa garem gudfala waka. (Colossians 3:23) Taem olketa servant bilong God putim trust bilong olketa long Jehovah, olketa kasem blessing bilong peace long mind nomata taem living kamap hard. (Proverbs 28:25; Philippians 4:6, 7) Winim evri samting, olketa luk forward long blessing bilong laef olowe insaed Paradaes earth wea bae kam.—Psalm 37:11, 29.

Hao nao feeling bilong olketa wea kasem olketa blessing olsem from Jehovah? Jacqueline, wanfala Christian woman long Canada, talemaot hao hem thankiu long God olsem: “Hem evritaem givim iumi olketa nambawan present, and hem givim hope bilong laef olowe.” Abel wea iumi storyim firstaem, storyim feeling bilong hem olsem: “Hope for laef olowe long paradaes earth hem samting wea mi nating herem bifor, and mi luk forward long hem. Bat, nomata sapos no eni Paradaes, bae mi still hapi for showimaot love bilong mi for God long wei for servem hem.”

Iu Tu Savve Garem Trufala Faith

Bible sei: “Jehovah bilong olketa army hem judge witim raeteous fasin; hem lukluk gud long kidney and heart.” (Jeremiah 11:20) Tru nao, Jehovah lukluk long really feeling bilong iumi wea stap haed insaed long iumi. Man wanwan mas lukluk gud long wanem nao muvim hem for biliv long God. Olketa rong biliv and idea abaotem God maet mekem iumi duim olketa rong samting bifor. Bat stretfala savve long Bible savve lead go long stretfala wei for fren witim Creator, Jehovah God.—1 Timothy 2:3, 4.

Thru long arrangement for garem free hom Bible study, Olketa Jehovah’s Witness helpem pipol for kasem stretfala savve bilong God. (Matthew 28:20) Planti wea acceptim diskaen help lovem God and mekem grow trufala faith long hem. Thru long wei for studyim Bible, olketa kasem “wisdom wea helpem man and wei for tingting gud,” wea helpem olketa for “wakabaot gud” long olketa danger taem hia. (Proverbs 3:21-23) Winim evri samting, distaem olketa garem “sure and stedy” hope for future. (Hebrews 6:19) Iu tu savve garem trufala faith and kasem olketa blessing hia.

[Box long page 6]

Olketa Kwestin wea Mekem Man Konfius wea Needim Ansa

“Taem mi kasem training olsem medical student long hospital, mi lukim olketa gudfala pipol go ahed for krae from pain bilong olketa sik and nogud samting. Sapos God hem stap, why nao olketa samting olsem happen? Waswe, religion hem wei for kasem peace long mind nomoa?”—Wanfala wea Presbyterian bifor long Korea.

“Planti taem mi savve tingim sapos dadi bilong mi, wanfala man for drinkim alcohol tumas, hem go long hell or long heven. Mi fraetem olketa wea dae and for tingim hellfire. Mi no savve minim hao wanfala God bilong love savve sendem samwan for safa for olowe long hell.”—Wanfala wea Catholic bifor long Brazil.

“Wanem nao future for earth and olketa man? Hao nao man fit for laef olowe? Hao nao olketa man bae kasem trufala peace?”—Wanfala wea Catholic bifor long Germany.

“Teaching bilong reincarnation no here stret long mi. Olketa animal no savve worship, so sapos iu kasem reincarnation for kamap wanfala animal for pei for olketa sin bilong iu, hao nao iu bae stretem olketa samting and go ahed moa?”—Wanfala wea Hindu bifor long South Africa.

“Mi growap long famili wea Confucianist, and mi savve tekpart long ceremony for mekem olketa laen dadi bilong mifala stap long peace. Taem mi go ahed for tekpart for redyim tebol bilong sakrifaes and bow daon, mi savve tingting sapos olketa laen dadi wea dae bae kam for kaikaim kaikai and lukim mifala bow daon long olketa.”—Wanfala wea Confucianist bifor long Korea.

Evriwan hia faendem ansa long olketa kwestin bilong olketa taem olketa studyim Bible witim Olketa Jehovah’s Witness.