Television Program wea Muvim Hem for Givim God Glory
Report Bilong Olketa wea Talemaot Kingdom
Television Program wea Muvim Hem for Givim God Glory
APOSOL Paul hem sei: “Samfala preach abaotem Christ thru long fasin for jealous and for winim narawan, bat nara pipol thru long wei for willing.” (Philippians 1:15) Samfala taem, olketa wea trae for spoelem pipol bilong Jehovah maet no minim, bat olketa mekem pipol wea garem stretfala heart for interest long truth.
Long television wea gavman bilong datfala kantri ownim, long November 1998, wanfala program showim olketa piksa bilong Bethel, wea hem branch building bilong Olketa Jehovah’s Witness long Louviers, France. Nomata pipol garem planti difren kaen tingting abaotem datfala program, gudfala samting kamaot from datwan long olketa wei wea iumi no expectim.
Wanfala long olketa pipol wea lukim datfala program hem Anna-Paula, wea stap 60 kilometer from Bethel. Anna-Paula, wanfala mami wea divorce wea garem tufala pikinini, hem luk aotem waka. So long next morning, hem ringim Bethel and ask for waka long there. Hem sei: “Datfala television program givim mi idea hao Bethel hem naes ples and waka wea olketa duim long there hem important.” Hem sapraes fogud for savve hao evriwan wea serve long Bethel olketa minister wea volunteer for givim taem bilong olketa! Bihaen olketa story witim hem for shortfala taem abaotem waka bilong Olketa Jehovah’s Witness, hem agree for wanfala Witness visitim hem.
Taem Léna, wanfala full-taem minister long kongregeson visitim hem, tufala story for longfala taem, and Anna-Paula acceptim datfala buk Savvy wea Lead Go Long Laef Olawe. * Long nextfala visit, Anna-Paula readim finis datfala buk and hem garem staka kwestin. Hem willing for acceptim wanfala Bible study. Anna-Paula sei: “Long mi, diswan hem wanfala chance for mi lanem Word bilong God. Mi nating holem eni Bible bifor long hand bilong mi.”
Long January, Anna-Paula visitim Bethel, and long week bihaen hem attendim wanfala Christian meeting for firstaem. No longtaem bihaen, hem startim Bible study witim olketa pikinini bilong hem and witness long olketa fren bilong hem. Hem sei: “Mi no savve stopem miseleva for story long nara pipol abaotem olketa tru samting insaed Bible wea mi lanem. Mi laek for sharem witim pipol and comfortim olketa.” Bihaen hem trae hard for winim samfala problem bilong hemseleva, Anna-Paula start for evritaem attendim olketa meeting. Hem muv ahed kwiktaem and baptaes long May 5, 2002.
And nara samting moa, from Anna-Paula showimaot gudfala example and wei wea hem strong for preach, mami bilong hem start studyim Bible and no longtaem bihaen hem baptaes. Anna-Paula sei: “Mi no savve hao for explainim hapi wea mi garem. Evriday mi thankiu long Jehovah for letem mi savve long hem and servem hem and for evri blessing wea hem givim mi.”
[Footnote]
^ par. 6 Olketa Jehovah’s Witness nao pablisim.
[Olketa Piksa long page 8]
Antap: Anna-Paula
Long daon: Gate for go insaed branch office long France