Why Pipol Go Long Church

“DISTAEM olketa Presbyterian long Republic of Korea hem klosap foa taems moa big winim America.” Datfala toktok long Newsweek magasin maet mekem olketa wea readim for sapraes, from staka pipol tingim Korea olsem wanfala ples bilong Confucian or Buddhist religion. Distaem, wanfala visitor bae faendem staka “Christian” church long there, wea garem mark bilong cross wea garem red laet raonem. Long olketa Sunday, bae olketa grup bilong tu or thri pipol, wakabaot go long church witim Bible long hand. Olsem wanfala 1998 survey talem, klosap 30 percent bilong pipol long Korea go long Catholic or Protestant church, winim olketa wea sei olketa Buddhist.

Long distaem, hem niu samting for lukim bigfala namba bilong pipol olsem gogo long church evritaem. Diswan hem go ahed for happen no long Korea seleva bat tu long olketa nara kantri long Asia, and tu long Africa and Latin America. Why nao planti pipol sei olketa biliv long God taem wei for no interest long religion hem kamap big tumas? Why nao olketa go long church?

Wanfala survey showimaot hao winim haf long olketa bilong Korea wea gogo long church go ahed for luk aotem peace long mind; samting olsem wan long evri thrifala hope for kasem laef olowe bihaen olketa dae; and 1 long evri 10-fala luk aotem health, olketa rich samting, and wei for win.

Planti pipol long China go long church from olketa hope for faendem samting wea bae satisfaem emti feeling long spiritual saed wea kamap from wei wea olketa isisi kamap free from olketa Communist idea and olketa savve disaed seleva. Evri year, olketa printim and givimaot planti million copy bilong Bible long China, and luk olsem olketa readim long sem wei wea olketa readim smol red buk bilong Mao.

Samfala Catholic long Brazil, especially olketa young wan, no satisfae witim promis bilong hapi laef long future—olketa laekem hapi laef long distaem. Wanfala nius magasin Tudo, talem olsem: “Sapos  idea for kamap free long future muvim pipol long olketa year bilong 1970, idea for garem gudfala living tuday nao muvim pipol distaem.” Wanfala survey long Britain askem olketa church member for talem wanfala samting wea olketa laekem abaotem church bilong olketa. Planti sei wei for kaban tugeta nao wanem olketa laekem.

Evri samting hia showimaot hao nomata planti pipol biliv long God, planti long olketa tingim nomoa wanem olketa savve kasem distaem winim wei for tingim future—or for ting abaotem God. Wanem nao iu tingim hem stretfala reason for biliv long God? Wanem nao Bible talem abaotem diswan? Bae iu faendem ansa long nextfala article.