Barava Nambawan Present wea Eniwan Savve Givim

GOGO for end long laef bilong hem, aposol John wea olo raet olsem: “No eni samting hem mekem mi garem feeling for thankiu winim diswan, wei wea mi herem hao olketa pikinini bilong mi go ahed for wakabaot long truth.”—3 John 4.

Datfala faithful aposol story abaotem olketa spiritual pikinini bilong hem. Bat, staka parents tu bae garem diskaen sem feeling for olketa pikinini bilong olketa. Olketa waka hard for bringimap olketa pikinini “long discipline and wei for stretem tingting wea kam from Jehovah,” and distaem olketa hapi for lukim olketa full-grown pikinini “wakabaot long truth.” (Ephesians 6:4) Tru nao, taem iu teachim olketa pikinini wei for kasem laef olowe, iu givim olketa barava nambawan present. Hem olsem bikos fasin for lovem God, wea hem tu wei for garem laef wea Jehovah laekem for olketa Christian, hem “garem promis bilong laef distaem and datwan wea bae kam.”—1 Timothy 4:8.

Jehovah, Dadi wea perfect, barava tinghae long parents wea fraet long God and wea trae hard for teachim olketa spiritual samting long olketa pikinini. Taem olketa pikinini acceptim diswan, olketa kasem bigfala hapi for worship tugeta witim parents bilong olketa. Taem olketa kamap full-grown, olketa tingim staka naes samting abaotem diswan. Samfala hapi for tingim go bak firstaem wea olketa joinim Theocratic Ministry Skul. * Or maet olketa tingim go firstaem wea olketa readim wanfala scripture from Bible long haos-tu-haos ministry witim dadi or mami. Olketa pikinini no savve forgetim taem wea parents read from Bible Story Buk Bilong Mi or from Listening to the Great Teacher buk. * Gabriel rememberim samfala part insaed long buk wea hem laekem tumas: “Taem mi foa year nomoa, mami singsing for mi evriday taem hem kuki. Mi still rememberim witim bigfala hapi feeling wanfala Kingdom song. Bihaen, Kingdom song hia helpem mi for luksavve hao wei for servem Jehovah hem barava important.” Maet iu tu rememberim naesfala song wea Gabriel story abaotem. Hem song namba 68 long songbuk Singim Praise Long Jehovah, and hem garem title “Worshipim Jehovah Taem Iu Young Yet.”

Disfala song start olsem: “Mouth bilong pikinini praisem God; They mekhae long Jesus tu witim voice.” Tru nao, samfala pikinini garem privilege for kaban witim Jesus, and for  sure hem hapi for lukim naesfala fasin bilong olketa. Jesus iusim tu wei wea olketa young pikinini willing for lane olsem example for olketa follower bilong hem. (Matthew 18:3, 4) So olketa pikinini garem part insaed long worship bilong Jehovah. Tru nao, olketa word insaed datfala song go ahed olsem: “Yes, baby tu savve mekhae long God.”

From gudfala fasin wea olketa showimaot—long haos, skul, and long olketa nara ples—staka pikinini honorim God and famili bilong olketa. Hem wanfala blessing for olketa garem “Christian dadi mami wea lovem truth.” (Deuteronomy 6:7) God hem wanfala loving Dadi wea teachim olketa wea hem creatim for wakabaot long road wea olketa shud wakabaot long hem, and parents wea lovem God duim samting hem talem for olketa. From diswan parents kasem bigfala blessing! Taem parents teachim olketa young wan insaed famili, olketa hapi tumas for garem olketa pikinini wea “mas obeyim them tu”! (Isaiah 48:17, 18) Angélica, wea distaem serve long branch office bilong Olketa Jehovah’s Witness long Mexico sei: “Parents bilong mi evritaem waka hard for followim olketa Bible principle. Datwan mekem taem wea mi smol pikinini hem wanfala naes taem. Mi hapi.”

Olketa Christian olsem agree hao hem important for keepim gud spiritual wei bilong laef wea parents givim long iu. Maet iu wanfala young wan wea growap insaed famili wea garem tru Christian fasin. Sapos olsem, datfala sem song encouragem iu: “Youngfala Christian mas keepim wei klin.” Taem bae kam for iu mas disaed seleva, so distaem “lane for trust long Jehovah taem iu young. For kasem bignem long world hem nogud.”

Sapos iu putim olsem first samting long laef bilong iu wei for garem bignem, evri training iu kasem bae iusles nomoa and iu maet spoelem olketa gud samting for future bilong iu. Feeling for laek garem bignem savve mekem iu for no stap wekap long spiritual wei. Samfala gogo kaban witim pipol wea luk olsem naes, garem gudfala fasin, bat no interest long olketa Christian standard. Hem nao samting wea kasem Tara, wanfala girl long video Young People Ask—How Can I Make Real Friends? Olsem Tara, eni young Christian wea kaban witim pipol wea no tinghae long tru worship bae luksavve hao no longtaem bihaen “badfala fren bae spoelem gud fasin,” olsem song talem. Man needim staka year for waka hard for mekem grow olketa gud fasin, bat kwiktaem nomoa hem savve spoelem.

For tok stret, for garem laef wea respectim God hem no isi. Nomata olsem, song go ahed for sei, sapos iu “tingim God long taem iu youngfala yet, And servem God witim spirit and truth,”  iu bae buildimap wanfala strong faondeson for trufala wei for win. And “taem iu kamap old bae iu hapi moa.” Iu bae start for luksavve hao anda long loving kea bilong Jehovah, no eniting savve stopem iu for duim stret samting long eye bilong hem. Datwan nao hem wei for kamap full-grown man wea mature and fraet long God. And tu, for wise for lanem olketa samting iu kasem from Christian training givim iu chance for “mekem heart b’long God hapi tumas.” No eni privilege hem winim diswan!—Proverbs 27:11.

Dastawe, olketa young wan, evritaem rememberim hao training wea kam from Jehovah and Christian parents hem gud tumas. Bigfala love bilong olketa for iu shud muvim iu for duim wanem Jehovah hem hapi long hem. Olsem Jesus Christ and young Timothy wea faithful, iu bae mekem Dadi bilong iu long heven and parents bilong iu long earth hapi. And sapos gogo iu kamap wanfala dadi or mami, iu maet agree witim Angélica, wea iumi storyim firstaem, wea sei: “Sapos mi garem pikinini, mi bae barava trae hard for mekem grow love for Jehovah insaed heart bilong hem taem hem baby yet, mekem datfala love nao kamap barava important samting for leadim hem long laef.” Tru nao, stretfala road wea lead go long laef olowe hem barava nambawan present!

[Olketa Footnote]