Challenge for Trainim Pikinini Distaem

LONG wanfala evening, wanfala man wea garem ples for kaikai hem redy for satem ples hia and go bak long haos. Then tufala woman witim wanfala pikinini kam insaed and orderim kaikai. Man hia barava taed and hem laek talem olketa hao disfala ples for kaikai hem sat finis, bat then hem disaed for mekem kaikai for olketa. Taem tufala woman hia go ahed for story and kaikai, disfala pikinini ran olobaot insaed disfala ples, foldaonem kaikai long floor and smasem witim leg bilong hem. Mami no tok long pikinini hia bat hem just smile nomoa. Taem olketa finis kaikai and go, disfala man wea ownim ples hia wea barava taed, mas klinim evri rabis.

Olsem iu maet savve, diskaen samting wea happen hem showimaot hao long planti famili olketa no win for trainim gud pikinini. Olketa didifren reason stap for diswan. Samfala parents letem pikinini for disaed seleva, from olketa tingse pikinini mas growap long kaen wei for free olsem. Or, maet from parents busy tumas, olketa no garem taem for stap witim olketa and givim training wea pikinini needim. Samfala parents ting long education bilong pikinini olsem barava important samting. So olketa letem pikinini free for go ahed duim samting wea hem laekem sapos long semtaem hem kasem gud mark long skul and kasem education long skul wea garem gud nem.

Bat samfala sei olketa standard bilong parents and bilong evriwan saed long fasin need for change. Olketa sei wei wea olketa pikinini go ahed for join insaed enikaen criminal fasin and raf fasin long skul hem kakamap moa worse. Dastawe, wanfala hedmasta long wanfala junior hae skul long Seoul, Republic of Korea, talem hao hem important tumas for olketa pikinini mas kasem training for kamap moabeta saed long fasin. Hem sei: “Firstaem, teachim pikinini for garem gudfala fasin and then givim savve long hem.”

Staka parents wea laekem pikinini for go long college and kasem gud laef, no laek herem olketa warning. Sapos iu wanfala dadi or mami, iu laekem pikinini bilong iu for kamap olsem wanem kaen man? Full-grown man wea garem stretfala fasin and pipol fit for trustim? Samwan wea tingim nara pipol, wea isi for change and garem gudfala tingting? Sapos olsem, plis readim next article.