Olketa Gilead Graduate Go Aot Olsem Strong Harvest Wakman!

“HARVEST hem big, bat olketa wakman no staka. Dastawe, askem Masta bilong harvest for sendem aot olketa wakman long harvest bilong hem.” (Matthew 9:37, 38) Toktok hia garem spesol mining for olketa student wea graduate long mek-116 class bilong Watchtower Bible Skul Bilong Gilead taem olketa prepare for go long missionary assignment bilong olketa.

Long Saturday, March 13, 2004, total bilong 6,684 pipol hipap long Watchtower Educational Center long Patterson, New York, and long olketa nara ples for datfala graduation program, wea datfala class kasem encouragement and kaonsel for helpem olketa. Iumi evriwan savve kasem gud samting from advaes wea olketa kasem taem iumi waka witim strong long spiritual harvest.

Firstfala tok wea Theodore Jaracz duim, wea hem member bilong Governing Body and wanfala graduate bilong mek-seven class bilong Gilead, hem mekhae long toktok bilong Jesus for: “Go . . . and mek disaepol long pipol bilong evri nation.” (Matthew 28:19, 20) Datwan hem fitim bikos olketa sendem olketa graduate for serve long 20 difren kantri! Hem remindim olketa student hao instruction from Word bilong God hem mekem olketa fit for waka strong long disfala barava important spiritual harvest.—Matthew 5:16.

Hao for Duim Gudfala Waka Long Harvest

First speaker long program hem Robert Wallen, wea waka long klos wei witim Gilead Skul for staka year. Theme bilong hem “Wei Wea Fasin for Kea Hem Nambawan.” Hem sei: “Fasin for kea hem wanfala languis wea nomata olketa wea earpas olketa savve herem and olketa wea blind savve lukim.” Jesus hem barava luksavve long wei wea pipol safa and hem duim samting for helpem olketa. (Matthew 9:36) Olketa student bae lukim staka chance for duim sem samting—long preaching waka, long kongregeson, long missionary hom, and insaed marit bilong olketa seleva. Speaker encouragem olketa for “letem disfala fasin for kea wea hem nambawan showaot insaed laef bilong iu taem iu servem olketa narawan. Saed long wei for stap long missionary hom, best fasin bilong iu nomoa hem fitim. So disaed strong for showimaot fasin for kea.”—Colossians 3:12.

Next part long program, Gerrit Lösch, wanfala member bilong Governing Body and wanfala graduate bilong mek-41 class bilong Gilead, hem storyim subject “Olketa wea Talemaot Salvation.” (Isaiah 52:7) For pipol sev taem disfala world hem distroe, olketa mas kasem stretfala savve from Word bilong God, talemaot faith bilong olketa long pablik, and baptaes. (Romans 10:10; 2 Timothy 3:15; 1 Peter 3:21) Bat, main reason for talemaot salvation, hem no for sevem olketa man, bat for praisem God. So, Brata Lösch encouragem olketa missionary hia for: “Tekem disfala Kingdom message go long olketa  farawe ples long earth, and for kamap olketa wea strong for talemaot salvation, wea bae givim praise long Jehovah.”—Romans 10:18.

“Hao Braet Nao Iu?” Hem nao kwestin wea Gilead instructor Lawrence Bowen hem askem. Hem storyim toktok bilong Jesus long Matthew 6:22 and encouragem olketa student wea graduate for keepim eye bilong olketa “simpol” mekem olketa savve “shaenim go spiritual laet wea givim glory long Jehovah and wea givim gud samting long olketa man.” From taem hem startim ministry bilong hem, Jesus showimaot perfect example long diswan long wei for no letem eni samting pullim hem from wei for duim will bilong God. Wei wea hem ting raonem olketa nambawan samting wea Father bilong hem teachim hem long heven helpem Jesus for go ahed strong taem hem kasem olketa test from Satan long wilderness. (Matthew 3:16; 4:1-11) Jesus showimaot wei for barava depend long Jehovah taem hem fulfillim samting wea God assignim long hem. Olsem tu, for deal witim olketa challenge wea stap long front, olketa missionary mas go ahed for studyim gud Bible and barava depend long Jehovah.

Mark Noumair, wanfala Gilead instructor and wanfala graduate bilong mek-77 class bilong Gilead, finisim disfala part bilong program witim tok wea garem theme “Mifala Hia Long Hand Bilong Iu.” (Joshua 9:25) Hem encouragem olketa student for followim fasin bilong olketa Gibeonite bifor. Nomata Gibeon hem “wanfala  bigfala taon . . . and olketa man long hem olketa maeti,” olketa Gibeonite no ask strong for kasem hae position or expectim evriwan for duim samting followim tingting bilong olketa. (Joshua 10:2) Olketa willing for serve olsem “olketa man for hipimap wood and karem wata” anda long direction bilong olketa Levite for sapotim worship bilong Jehovah. (Joshua 9:27) Hem olsem olketa member bilong disfala class wea graduate sei long datfala Bigfala Joshua, Jesus Christ, “Mifala hia long hand bilong iu.” So taem olketa start for waka long assignment bilong olketa long nara kantri, olketa need for acceptim eni waka wea datfala Bigfala Joshua hem givim long olketa.

Olketa Experience and Interview

“Barava Talemaot Mining Bilong Olketa Scripture” hem theme bilong wanfala wei for story tugeta wea Wallace Liverance, wea hem wanfala graduate bilong mek-61 class bilong Gilead and wanfala instructor duim witim wanfala grup bilong olketa student. Olketa talem and actim samfala experience wea olketa enjoyim long field ministry taem skul hem go ahed. Hem showaot klia hao deepfala study wea olketa duim long Bible insaed datfala faev month hem kasem heart bilong olketa and muvim olketa for sharem witim olketa narawan samting olketa lanem. (Luke 24:32) Insaed datfala faev month wanfala student hem fit for sharem witim brata bilong hem samting hem lanem. Diswan encouragem brata bilong hem for kaban witim kongregeson and start for studyim Bible. Distaem hem kasem mark olsem wanfala unbaptaes pablisa.

Bihaen olketa experience hia, Richard Ashe and John Gibbard interviewim samfala wea bin servem Jehovah for longfala taem, wea insaed olketa hia hem samfala traveling overseer wea kam long Watchtower Educational Center for kasem spesol training. Olketa hia graduate tu long samfala Gilead Skul bifor. Wanfala talem hao Brata Knorr hem sei long class bilong hem: “Long Gilead iu bae duim staka study. Bat sapos long end bilong skul iu bighed, mifala fail nao. Mifala laekem for taem iu kasem end bilong skul iu garem big heart.” Olketa traveling overseer encouragem olketa student for interest and kea long pipol, for deal witim narawan long sem wei wea Jesus duim, and for acceptim long hambol wei eni assignment wea olketa kasem. For sure, wei for followim disfala kaonsel bae helpem olketa niu missionary for duim gudfala waka long assignment bilong olketa.

Go Aot Olsem Olketa Strong Harvest Wakman!

Audience garem chance for herem tok from Stephen Lett, nara member bilong Governing Body. Hem givim main tok bilong program, wea garem title “Go Aot Olsem Strong Harvest Wakman!” (Matthew 9:38) Long wanfala really harvest, taem wea stap for duim datfala harvest hem short. Olketa harvest wakman need for waka hard. Diswan hem barava moa important from iumi stap long end bilong disfala system! Long bigfala spiritual harvest, laef bilong pipol stap long danger. (Matthew 13:39) Brata Lett encouragem olketa graduate, for no ‘lesy long waka bilong olketa,’ bat for “shaen witim spirit” and for “waka hard for Jehovah” long disfala harvest wea bae no kamap moa. (Romans 12:11) Speaker hem talem toktok bilong Jesus: “Liftimap eye bilong iufala and lukluk long olketa field, olketa redy finis for harvest.” (John 4:35) Then hem encouragem olketa graduate for showim strong wea olketa garem for harvest waka long wei for duim best for kasem pipol long ples and long taem wea olketa savve kasem olketa and long wei for mekius long evri chance for duim enitaem witnessing. Taem olketa luk aotem eni chance wea olketa garem, olketa bae fit for givim gudfala witness long pipol. Jehovah hem wanfala God wea garem strong for duim samting, and hem laekem iumi evriwan for followim example bilong hem and waka hard long disfala spiritual harvest.—2 Kings 19:31; John 5:17.

Brata Jaracz, taem hem endim program, sharem olketa greeting from olketa branch office and givim olketa diploma long olketa student. Wanfala wea graduate hia readim leta from class wea talemaot bigfala thankiu for training wea olketa kasem. Tru nao, graduation program bilong mek-116 class mekem evriwan wea attend disaed strong go moa for go ahed olsem olketa strong harvest wakman.

[Piksa long page 25]

INFORMATION ABAOTEM CLASS

Haomas kantri olketa kam from: 6

Haomas kantri olketa bae go long hem: 20

Haomas student: 46

Average age: 34.2

Average year insaed truth: 17.2

Average year insaed full-taem ministry: 13.9

[Piksa long page 26]

Mek-116 Class Bilong Watchtower Bible Skul Bilong Gilead

List long daon start long front and go bihaen, and olketa nem start long left go long raet bilong each laen.

(1) Ceansu, R.; Sparks, T; Piña, C; Turner, P; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux,  J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.