Tinghae Long Laef wea Hem Wanfala Present
Tinghae Long Laef wea Hem Wanfala Present
“Blood bilong Christ bae barava klinim conscience bilong iumi from olketa waka wea iusles mekem iumi savve givim holy service long datfala God wea laef!”—HEBREWS 9:14.
1. Wanem nao pruvim iumi tinghae long laef?
HAO important nao laef bilong iu? Iumi barava tinghae long laef—laef bilong iumiseleva and laef bilong nara pipol. Wei wea iumi go long doctor taem iumi sik or for chekap, hem pruvim iumi tinghae long laef. Iumi want for stap laef and healthy. Nomata pipol wea olo or disable, olketa no laek dae; olketa want for stap laef.
2, 3. (a) Proverbs 23:22 showimaot iumi mas duim wanem? (b) Hao nao Proverbs 23:22 showimaot iumi mas lisin long God?
2 Tingting bilong iu abaotem laef hem affectim tu wei wea iu fren witim nara pipol. Olsem example, Word bilong God sei: “Lisin long dadi bilong iu wea givim iu laef, and no spoelem mami bilong iu from hem olo distaem.” (Proverbs 23:22) For “lisin” hem minim moa samting winim wei for herem olketa word; mining bilong disfala proverb hem for iumi mas herem samting and then obeyim datwan. (Exodus 15:26; Deuteronomy 7:12; 13:18; 15:5; Joshua 22:2; Psalm 81:13) Why nao Word bilong God sei iumi mas lisin long dadi and mami bilong iumi? Nomata tufala olo winim iumi and garem moa savve, hem no datwan nomoa. Reason hem bikos olketa nao “givim iu laef.” Iumi savve minim hao, sapos iu tinghae long laef bilong iu, iu feel olsem iu mas givim ansa long datwan wea givim iu laef.
3 Sapos iu wanfala tru Christian, iu luksavve long Jehovah olsem Datwan wea really Givim laef long iu. From hem iu “garem laef;” iu savve “wakabaot,” garem feeling; and iu “stap” distaem and savve tingim and plan for future, wea insaed diswan hem laef olowe. (Acts 17:28; Psalm 36:9; Ecclesiastes 3:11) For fitim toktok long Proverbs 23:22, hem stret for iumi “lisin” long God and obey, and for want for minim and followim tingting bilong hem abaotem laef winim wei for laekem tingting bilong eni difren man abaotem laef.
Showimaot Respect for Laef
4. Long start bilong history bilong olketa man, wanem nao mekem man luksavve laef hem important tumas?
4 Long start long history bilong olketa man, Jehovah talem klia hao hem no letem olketa man for iusim (or spoelem) laef for enikaen reason nomoa. Cain fulap witim kros from hem jealous, so hem killim dae brata bilong hem Abel wea no garem blame. Waswe, iu tingse Cain garem right for mekem disison olsem abaotem laef? God no ting olsem. God askem Cain for givim ansa for samting hem duim: “Wanem nao iu duim? Herem! Blood bilong brata bilong iu hem singaot long mi from graon.” (Genesis 4:10) Lukim hao blood bilong Abel long graon hem piksarem laef bilong hem wea end long raf wei, and datfala blood hem singaot long God for hem changem bak.—Hebrews 12:24.
5. (a) Wanem tambu nao God putim long taem bilong Noah, and datwan for hu? (b) Long wanem wei nao datfala tambu hem wanfala important step?
5 Bihaen long Flood, olketa man garem niu start witim eitfala pipol nomoa. Long wanfala toktok wea fitim evri man, God talem moa samting abaotem tingting bilong hem saed long laef and blood. Hem talem hao olketa man savve kaikaim meat bilong olketa animal, bat hem putim disfala tambu: “Iufala savve kaikaim evri animal wea wakabaot and garem laef. Saed long olketa green plant, mi givim evri samting long iufala. Bat meat witim soul bilong hem—blood bilong hem—iufala mas no kaikaim.” (Genesis 9:3, 4) Samfala Jew tingse datfala verse minim olketa man mas no kaikaim meat or blood bilong wanfala animal wea laef yet. Bat bihaen, hem showaot klia hao long datfala verse God tambuim wei for kaikaim blood for keepim man laef. And tu, toktok bilong God thru long Noah hem wanfala important step saed long wei wea blood join insaed purpose bilong hem—wanfala purpose wea bae openem wei for olketa man kasem laef olowe.
6. Thru long Noah, hao nao God showimaot klia tingting bilong hem hao laef hem important tumas?
6 God go ahed for sei: “Blood bilong soul bilong iufala mi bae askem bak. From hand bilong evri samting wea laef mi bae askem bak; and from hand bilong man, from hand bilong each wan wea hem brata bilong hem, mi bae askem bak soul bilong man. Eniwan wea kapsaetem blood bilong man, narafala man bae kapsaetem blood bilong hem, from God wakem man long image bilong hem.” (Genesis 9:5, 6) Iu savve lukim from disfala toktok wea God talem for evri man hao long tingting bilong God, blood bilong man piksarem laef bilong man. Creator nao givim laef long man, and no eniwan shud endim datfala laef, wea blood nao piksarem. Sapos samwan killim dae narawan olsem Cain duim, Creator garem raet for “askem bak” laef bilong man wea guilty.
7. Why nao iumi shud interest long samting wea God talem Noah abaotem blood?
7 Long disfala toktok, God komandim olketa man for no iusim blood long rong wei. Waswe, eni taem iu ting raonem why nao God givim komand olsem? And tu, why nao God garem tingting olsem abaotem blood? For tok stret, ansa bilong diswan hem join witim wanfala main important teaching insaed Bible. Hem wanfala teaching wea hem barava faondeson bilong Christian message, bat staka lotu no laek tingim datwan. Wanem nao datfala teaching, and hao nao hem affectim laef bilong iu, olketa disison wea iu mekem, and samting iu duim?
Blood—Wanem Nao Stretfala Wei for Iusim?
8. Insaed long Law, wanem tambu nao Jehovah putim saed long wei for iusim blood?
8 Jehovah givim moa information abaotem laef and blood taem hem givim Law Bilong Moses long Israel. Wei wea hem duim datwan, hem olsem next step long wei for fulfillim purpose bilong hem. Maet iu savve finis hao long datfala Law olketa Israelite mas givim olketa sakrifaes long God, olsem grain, oil, and wine. (Leviticus 2:1-4; 23:13; Numbers 15:1-5) Olketa mas givim olketa animal olsem sakrifaes tu. God sei olsem abaotem diswan: “Soul bilong flesh hem insaed long blood, and miseleva nao putim antap long altar for iufala for kavarem sin bilong soul bilong iufala, bikos blood nao hem kavarem sin from soul hem stap insaed long hem. Dastawe mi talem olketa son bilong Israel: ‘No eni soul bilong iufala shud kaikaim blood.’ ” Jehovah talem tu hao sapos man for hunt or wanfala farmer killim dae wanfala animal for kaikaim, hem mas aotem blood bilong datwan and kavarem blood witim graon. Earth hem stul for God putim leg bilong hem antap long hem, and taem datfala man pourimaot blood long graon, hem showimaot hem luksavve hao datfala laef hem go bak long Datwan wea Givim Laef.—Leviticus 17:11-13; Isaiah 66:1.
9. Wanem nao only wei wea Law bilong God letem pipol iusim blood, and wanem nao reason for diswan?
9 Datfala law hem no wanfala kastom saed long religion nomoa wea no important for iumi. Waswe, iu luksavve reason why olketa Israelite mas no kaikaim blood? God hem sei: “Dastawe mi talem olketa son bilong Israel: ‘No eni soul bilong iufala shud kaikaim blood.’ ” Why nao olsem? “Miseleva nao putim [blood] antap long altar for iufala for kavarem sin bilong soul bilong iufala.” Waswe, iu luksavve hao diswan showim iumi why nao God talem Noah olketa man mas no kaikaim blood? Creator hem chus for ting long blood olsem samting wea barava important, and hem markem datwan for iusim long wanfala spesol wei wea savve sevem staka pipol. Blood bae barava important tumas saed long wei for kasem forgiveness for olketa sin. So anda long Law, only wei wea God letem pipol iusim blood hem long altar for kavarem sin bilong laef bilong olketa Israelite wea luk aotem forgiveness bilong Jehovah.
10. Why nao blood bilong animal no savve mekem man kasem full forgiveness, bat olketa sakrifaes anda long Law remindim olketa long wanem?
10 Disfala wei wea blood kavarem sin hem samting wea olketa Christian tu savve long hem. Christian aposol Paul storyim datfala part long Law bilong God taem hem raet: “Anda long Law klosap evri samting kamap klin thru long blood, and sapos no eni blood hem kapsaet, no eni wei for forgive hem stap.” (Hebrews 9:22) Paul talem klia hao olketa sakrifaes wea olketa Israelite givim no mekem olketa perfect and no aotem sin. Hem raet: “Olketa sakrifaes hia mekem olketa rememberim evri year wei wea olketa sin, from blood bilong olketa buluka and olketa goat no fit for aotem sin evribit.” (Hebrews 10:1-4) Nomata olsem, olketa sakrifaes olsem garem purpose. Hem remindim olketa Israelite hao olketa sinner and olketa needim moa samting for kasem full forgiveness. Bat sapos blood wea stand for laef bilong olketa animal no savve kavarem evribit sin bilong olketa man, waswe, blood bilong eniwan moa savve duim?
Ansa From Datwan wea Givim Laef
11. Hao nao iumi savve olketa sakrifaes bilong blood bilong olketa animal hem point go long difren samting?
11 Law hem point go long samting wea barava moa fit winim blood bilong olketa animal for fulfillim will bilong God. Paul ask olsem: “Why nao datfala Law?” Hem ansa: “Hem addim go datwan for showimaot klia olketa sin, go kasem taem wea seed bae kam wea long datwan nao Hem talem promis bifor; and datfala promis kam thru long olketa angel long hand bilong wanfala mediator [Moses].” (Galatians 3:19) Olsem tu, Paul hem raet: “Law hem wanfala shadow bilong olketa gudfala samting wea bae kam, bat hem no datfala really samting.”—Hebrews 10:1.
12. Saed long blood, hao nao iumi lukim purpose bilong God hem isisi showaot?
12 So iumi lanem hao long taem bilong Noah God letem olketa man kaikaim olketa animal, bat olketa mas no kaikaim blood bilong olketa. Bihaen, God talem hao “soul bilong flesh hem insaed long blood.” Tru nao, hem chus for ting long blood olsem samting wea piksarem laef and hem sei: “Miseleva nao putim [blood] antap long altar for iufala for kavarem sin bilong soul bilong iufala.” Bat, long nambawan wei, moa samting abaotem purpose bilong God hem showaot bihaen. Law hem shadow bilong olketa gud samting wea bae kam. Wanem nao olketa gud samting hia?
13. Why nao dae bilong Jesus hem important?
13 Really samting wea diswan hem point go long hem nao hem dae bilong Jesus Christ. Iu savve finis hao Jesus hem safa and olketa nilam hem long post. Hem dae olsem wanfala criminal. Paul hem raet: “Taem iumi wik yet, Christ hem dae long taem wea God markem, for olketa man wea no followim God. . . . God showim love bilong hem long iumi long wei wea, taem iumi sinner yet, Christ hem dae for iumi.” (Romans 5:6, 8) Taem hem dae for iumi, Christ provaedem ransom for kavarem olketa sin bilong iumi. Datfala ransom nao faondeson bilong Christian message. (Matthew 20:28; John 3:16; 1 Corinthians 15:3; 1 Timothy 2:6) Hao nao ransom hem join witim blood and laef, and hao nao diswan affectim laef bilong iu?
14, 15. (a) Hao nao samfala transleison bilong Ephesians 1:7 mekhae long dae bilong Jesus? (b) Wanem point long Ephesians 1:7 maet hem isi for missim?
14 Samfala lotu mekhae long dae bilong Jesus, olketa sei “Jesus hem dae for mi.” Lukim wei wea samfala Bible transleitim Ephesians 1:7: “Long hem and thru long dae bilong hem iumi kamap free, hem nao, hem aotem sin bilong iumi.” (The American Bible, by Frank Scheil Ballentine, 1902) “Thru long dae bilong Christ iumi kamap free, and kasem forgiveness for sin bilong iumi.” (Today’s English Version, 1966) “Long Christ and thru long Christ and sakrifaes bilong laef bilong hem iumi kamap free, wei for free wea minim forgiveness for olketa sin.” (The New Testament, by William Barclay, 1969) “Thru long dae bilong Christ iumi kasem forgiveness for olketa sin bilong iumi and iumi kamap free.” (The Translator’s New Testament, 1973) Iu savve lukim long olketa transleison olsem hao olketa mekhae long dae bilong Jesus. ‘Bat,’ samfala maet sei, ‘Dae bilong Jesus hem barava important. So, why nao olketa transleison long hia no barava stret?’
15 Sapos iu readim olketa transleison hia nomoa, maet iu missim wanfala barava important point, and diswan maet stopem iu for minim gud message bilong Bible. Olketa transleison olsem haedem wei wea firstfala raeting bilong Ephesians 1:7 garem wanfala Greek word wea minim “blood.” Dastawe, planti Bible olsem New World Translation, followim firstfala raeting long wei wea moa stret: “Thru long hem, iumi kamap free thru long ransom from blood bilong datwan, yes, wei for forgivim olketa sin bilong iumi, fitim nambawan kaeness bilong hem wea man no fit for kasem.”
16. Datfala toktok “blood bilong datwan” shud mekem iumi tingim wanem samting?
16 Datfala toktok “blood bilong datwan” hem garem bigfala mining and shud mekem iumi tingim staka samting saed long blood. Dae bilong wanfala man hem no inaf, nomata dae bilong datfala perfect man Jesus. Jesus fulfillim samting wea datfala Law piksarem, especially long Day Bilong Atonement. Long datfala spesol day, olketa sakrifaesim olketa animal wea Law markem. Then hae priest tekem samfala blood bilong olketa insaed long Most Holy rum bilong tabernacle or temple, and long there hem offerim long God, olsem hem stap front long hem.—Exodus 25:22; Leviticus 16:2-19.
17. Hao nao Jesus fulfillim samting wea Day Bilong Atonement hem piksarem?
17 Jesus fulfillim samting wea Day Bilong Atonement hem piksarem, olsem Paul explainim. First samting, hem storyim hao wantaem evri year hae priest long Israel tekem blood and go long Most Holy for offerim datwan “for hemseleva and for olketa sin wea pipol no savve olketa duim.” (Hebrews 9:6, 7) Long sem wei, bihaen hem resurrect olsem wanfala spirit, Jesus go long heven. From hem wanfala spirit wea no garem flesh and blood, hem savve go “front long God for iumi.” Wanem nao hem offerim long God? No eni physical samting bat samting wea garem bigfala mining. Paul go ahed for sei: “Taem Christ hem kam olsem wanfala hae priest . . . , hem go insaed, no witim blood bilong olketa goat and bilong youngfala buluka, bat witim blood bilong hemseleva, wanfala taem for olowe long holy ples and kasem wei for sevem iumi for olowe. From sapos blood bilong olketa goat and olketa buluka . . . mekem man kamap holy long wei wea body kamap klin, blood bilong Christ, wea thru long spirit bilong olowe offerim hemseleva olsem perfect sakrifaes long God, bae barava klinim conscience bilong iumi from olketa waka wea iusles mekem iumi savve givim holy service long datfala God wea laef!” Tru nao, Jesus offerim long God price bilong blood bilong hem.—Hebrews 9:11-14, 24, 28; 10:11-14; 1 Peter 3:18.
18. Why nao evri samting wea Bible talem saed long blood shud important long olketa Christian distaem?
18 Disfala tru samting helpem iumi minim evri nara samting wea Bible talem abaotem blood—reason for tingting bilong God abaotem blood, hao iumi shud ting long blood, and why iumi mas respectim spialaen wea God markem saed long blood. Taem iu readim olketa buk bilong Christian Greek Scripture, bae iu lukim hao staka taem olketa storyim blood bilong Christ. (Lukim box.) Diswan showimaot klia hao evri Christian shud garem faith “long blood bilong hem [Jesus].” (Romans 3:25) Only wei wea iumi savve kasem forgiveness and peace witim God hem “thru long blood wea hem [Jesus] pourimaot.” (Colossians 1:20) Diswan hem barava tru for olketa wea Jesus mekem spesol covenant witim olketa for rul witim hem long heven. (Luke 22:20, 28-30; 1 Corinthians 11:25; Hebrews 13:20) Hem tru tu for datfala “big crowd” distaem, wea bae stap laef thru long datfala “big trabol” and kasem laef olowe long paradaes long earth. Long tokpiksa wei, olketa ‘wasim kaleko bilong olketa long blood bilong Lamb.’—Revelation 7:9, 14.
19, 20. (a) Why nao God disaed for putim spialaen long wei for iusim blood, and hao nao iumi shud feel abaotem datwan? (b) Iumi shud interest for savve long wanem?
19 Hem klia, blood hem garem spesol mining long God. Hem shud garem spesol mining for iumi tu. Creator, wea barava interest long laef, garem right for putim spialaen saed long hao olketa man savve iusim blood. From hem barava interest long laef bilong each wan long iumi, hem disaed for markem blood for wanfala important purpose nomoa, for mekem olketa man savve kasem laef olowe. Spesol blood bilong Jesus join witim datfala purpose. Iumi barava thankiu hao Jehovah God tingim iumi taem hem iusim blood—blood bilong Jesus—long disfala wei wea sevem laef bilong man! And iumi barava thankiu long Jesus tu for wei wea hem willing for pourimaot blood bilong hem olsem sakrifaes for iumi! Iumi barava minim toktok bilong aposol John: “Long hem wea lovem iumi and wea mekem iumi free from sin bilong iumi witim blood bilong hemseleva—and hem mekem iumi kamap wanfala kingdom, olketa priest long God and Father bilong hem—tru nao, glory and paoa olowe stap long hem. Amen.”—Revelation 1:5, 6.
20 For longfala taem God bilong iumi wea wise evribit and wea Givim laef hem tingim disfala wei for sevem laef bilong olketa man. So, maet iumi ask, ‘Hao nao diswan shud affectim olketa disison bilong iumi and wanem iumi duim?’ Nextfala article bae deal witim disfala kwestin.
Hao Nao Bae Iu Ansa?
• Wanem nao iumi savve lanem abaotem tingting bilong God saed long blood from olketa story abaotem Abel and Noah?
• Wanem tambu nao God putim long blood insaed long Law, and why nao hem duim olsem?
• Hao nao Jesus fulfillim samting wea Day Bilong Atonement piksarem?
• Hao nao blood bilong Jesus savve sevem laef bilong iumi?
[Olketa Kwestin]
[Box long page 18]
BLOOD BILONG HU NAO SAVVE SEVEM LAEF?
“Lukluk gud long iufala seleva and long evri sheep, wea holy spirit appointim iufala olsem olketa overseer, for shepherdim kongregeson bilong God, wea hem baem witim blood bilong Son bilong hem.”—Acts 20:28.
“And, from iumi kamap raeteous thru long blood bilong hem, bigfala reason moa stap for iumi sev from kros, thru long hem.”—Romans 5:9.
“Iufala no garem eni hope and no savve long God. Bat distaem long wei wea wan mind witim Christ Jesus iufala wea stap farawe bifor, kam klosap thru long blood bilong Christ.”—Ephesians 2:12, 13.
“God laekem olketa fasin bilong hemseleva for stap evribit long Christ, and for bringim tugeta long hemseleva, thru long Christ, evri narafala samting long wei for mekem peace thru long blood wea hem pourimaot long torture stake.”—Colossians 1:19, 20.
“Dastawe, olketa brata, . . . iumi no fraet for go insaed long holy ples thru long blood bilong Jesus.”—Hebrews 10:19.
“Hem no iusim olketa samting wea savve rotten. . . for baem iufala from olketa nogud wei wea iufala kasem thru long kastom bilong olketa laen dadi bilong iufala. Bat hem iusim spesol blood, olsem bilong wanfala lamb wea perfect and klin evribit, hem nao bilong Christ.”—1 Peter 1:18, 19.
“Sapos iumi wakabaot insaed long laet olsem hemseleva insaed long laet, iumi garem wei for share witim each other, and blood bilong Son bilong hem Jesus klinim iumi from evri sin.”—1 John 1:7.
“Iu nao fit for tekem disfala scroll and openem olketa seal bilong hem, from olketa killim iu dae and witim blood bilong iu nao iu baem pipol for God from evri tribe and languis and pipol and nation.”—Revelation 5:9.
“Olketa torowem kam daon finis man wea accusim olketa brata bilong iumi . . . And olketa winim hem from blood bilong Lamb and from word bilong witness wea olketa givim.”—Revelation 12:10, 11.
[Piksa long page 16]
Thru long Law, God showimaot klia hao blood barava important tumas saed long wei for kasem forgiveness for olketa sin
[Piksa long page 17]
Thru long blood bilong Jesus, planti pipol savve sev