Waswe, Olketa Prea Bilong Iu Savve Changem Eniting?

IUMI evriwan feisim samfala bigfala problem wea iumi no fit for deal witim. Bible showim iumi hao aposol Paul savve hao prea savve affectim samting wea kamaot from bigfala problem olsem.

Taem olketa putim Paul long prison long Rome long wei wea no followim justice, hem askem olketa brata for prea for hem, and hem sei tu: “Mi barava strong for askem iufala for duim diswan, mekem mi maet kwiktaem kam bak long iufala.” (Hebrews 13:18, 19) Long narataem, Paul talemaot wei wea hem barava sure hao God bae ansarem olketa prea for hem kamap free. (Philemon 22) No longtaem bihaen, Paul kamap free and go ahed moa long missionary waka.

Bat waswe, prea savve really changem samting wea kamaot from olketa problem bilong iu? Maet olsem. No forget, prea hem no just kastom bilong religion nomoa. Hem wei for story long really wei witim loving and strong Dadi bilong iumi long heven. Iumi shud no hol bak for talem full story insaed prea bilong iumi, bat then long patient wei iumi weit for lukim hao nao bae Jehovah ansarem iumi.

God maet no ansarem evri prea stretawe, and evritaem no ansa long wei or taem wea iumi expectim. Olsem example, Paul prea evritaem abaotem “nila long body” bilong hem. God no aotem datfala problem bilong Paul, and iumi no savve wanem nao datwan, bat hem comfortim Paul witim toktok hia for strongim hem: “Kaeness bilong mi wea man no fit for kasem hem inaf for iu; bikos paoa bilong mi kamap perfect long man wea wik.”—2 Corinthians 12:7-9.

Iumi tu fit for trustim hao nomata God nating aotem wanfala problem wea iumi garem, hem bae “mekem wei for [iumi] savve stand strong” long datwan. (1 Corinthians 10:13) Klosap nao, God bae finisim evribit evri samting wea mekem man safa. Go kasem datfala taem, letem iumi tan go long “Datwan wea Herem prea” wea fit for barava helpem iumi.—Psalm 65:2.