God Really Tingim Iu

HEM wei bilong iumi olketa man for askem God for helpem iumi taem iumi kasem trabol. From hem nao “nambawan and garem bigfala paoa; savve bilong hem barava winim samting wea iumi talem.” (Psalm 147:5) Hem nao best wan for helpem iumi deal witim olketa problem bilong iumi. And tu, Bible hem invaetem iumi for ‘pourimaot heart bilong iumi’ long hem. (Psalm 62:8) Sapos olsem, why nao planti pipol feel God no savve ansarem prea bilong olketa? Waswe, diswan minim hem no tingim iumi?

Winim wei for kwiktaem blamem God from iumi tingse hem no duim eniting for help, ting go bak long taem wea iu pikinini. Taem parents bilong iu no evritaem followim tingting bilong iu, waswe, iu enitaem tingse olketa nating lovem iu? Planti pikinini ting olsem. Bat taem iu kamap big, iu luksavve hao love hem showaot long planti difren wei and wei for agree olowe long olketa samting wea pikinini askem hem no really showimaot love.

Long sem wei tu, sapos Jehovah no evritaem ansarem olketa prea bilong iumi followim wanem iumiseleva laekem, hem no minim hem les for herem iumi. Tru nao, God showim long planti wei hao hem tingim iumi evriwan.

“From Hem Nao Givim Iumi Laef”

First samting, God nao “givim iumi laef and iumi savve wakabaot and stap.” (Acts 17:28) Wei wea hem givim iumi laef hem showimaot hem lovem iumi!

And tu, Jehovah givim olketa nara samting wea iumi needim for mekem iumi laef. Iumi readim: “Hem mekem green grass grow for olketa animal, and plant for olketa man iusim, for mekem kaikai kamaot from earth.” (Psalm 104:14) Bat, Creator bilong iumi duim moa samting winim wei for provaedem samting wea iumi needim nomoa. Hem givim tu “rain from heven and olketa taem bilong harvest, mekem heart bilong [iumi] fulap witim kaikai and hapi.”—Acts 14:17.

Nomata olsem, samfala maet ting olsem, ‘Sapos God barava lovem iumi, why nao hem letem iumi for safa?’ Waswe, iu savve long ansa bilong datfala kwestin?

Waswe, God Nao Mekem Problem Kamap?

Planti taem wei wea man safa hem kamap from samting olketa seleva duim. Olsem example, klosap evriwan savve hao hem danger tumas for duim samfala samting. Nomata olsem, pipol go ahed for duim dirty fasin, iusim alcohol and nara drug long rongfala wei, iusim tobacco, tekpart long olketa sports wea danger, draev fast tumas, and kaen samting olsem. Sapos gogo olketa kaen fasin olsem mekem man safa, hu nao garem blame? God or man wea no duim samting long wisefala wei? Word bilong God hem sei: “No giamanim iufala seleva: Iufala no savve mekful long God. Eni samting man hem plantim, datwan nao bae hem harvestim.”—Galatians 6:7.

And tu, olketa man savve spoelem each other. Taem wanfala nation hem faetem narawan, God no fit for kasem blame for safaring wea kamap from datwan. Taem wanfala criminal attakim wanfala man, waswe, iumi fit for blamem God sapos man hia hem garekil or dae? Barava nomoa nao! Taem wanfala ruler hem putim hevi, spoelem, and killim dae pipol wea hem rul ovarem, waswe, iumi shud blamem God? Datwan bae no fitim stretfala tingting.—Ecclesiastes 8:9.

Bat, waswe long olketa million pipol wea poor and hangre? Waswe, God nao fit for garem blame saed long diswan? Nomoa. Earth bilong iumi hem provaedem staka kaikai for fitim evriwan. (Psalm 10:2, 3; 145:16) Wei for hangre and poor hem kamap from wei for no sharem gud  olketa samting wea God provaedem. And selfish fasin bilong olketa man nao mekem hard for stretem datfala problem.

Samting wea Kosim

Bat hu nao fit for garem blame taem samwan hem sik or dae from hem olo? Waswe, bae iu sapraes sapos iu faendaot hao God no garem blame for datwan tu? God no creatim man for kamap olo and dae.

Taem first man and woman, Adam and Eve, stap long garden bilong Eden, Jehovah givim olketa chance for laef olowe long wanfala paradaes earth. Bat, hem klia hao hem laekem disfala earth for fulap nomoa witim olketa man wea bae tinghae long samting hem givim. Dastawe, hem letem nomoa Adam and Eve for stap insaed paradaes sapos tufala go ahed for stap anda long Creator bilong olketa wea lovem olketa.—Genesis 2:17; 3:2, 3, 17-23.

Sorre tumas, Adam and Eve tufala bighed. Eve chus for lisin long Devil Satan. Satan laea long Eve and sei God holem bak gud samting from hem. So Eve start for followim independent tingting and hem trae for “kamap olsem God, savve long gud and nogud samting.” Adam join witim hem for bighed.—Genesis 3:5, 6.

Taem Adam and Eve sin olsem, tufala showim hao olketa no fit for kasem laef olowe. Olketa safa from nogud samting wea kamaot from sin. Strong bilong tufala start for katdaon, and gogo tufala dae. (Genesis 5:5) Bat, samfala nara important samting kamap from wei wea tufala bighed. Iumi distaem still safa from samting wea kamaot from sin bilong Adam and Eve. Aposol Paul raet olsem: “Thru long wanfala man [Adam] sin hem kam insaed long world and dae hem kam from sin, dastawe dae hem kasem evri man bikos evriwan sin.” (Romans 5:12) Tru nao, from Adam and Eve tufala bighed, sin and dae spred go kasem evri man, olsem wanfala nogud sik wea savve killim man dae.

Barava Main Pruv wea Showimaot God Tingim Iumi

Waswe, datwan minim olketa man wea God creatim olketa nogud for olowe nao? Nomoa, and diswan helpem iumi for lukim barava main pruv wea showimaot God tingim iumi. Nomata hemseleva bae feel nogud tumas, God provaedem wanfala wei for baem  bak olketa man from sin and dae. Datfala price for baem bak man hem nao perfect laef bilong Jesus, wea hem willing for givim for iumi. (Romans 3:24) Dastawe, aposol John raet olsem: “God lovem world tumas dastawe hem givim only-born Son bilong hem, mekem evriwan wea showimaot faith long hem no need for dae bat kasem laef olowe.” (John 3:16) From disfala barava spesol wei for showimaot love, iumi man kasem bak datfala hope for laef olowe. Paul raet olsem long olketa long Rome: “Thru long wanfala wei bilong justice evri difren kaen man kamap raeteous for kasem laef.”—Romans 5:18.

Iumi savve sure hao long taem wea God markem, no eni wei for safa or dae bae stap long earth. Winim datwan, samting wea buk bilong Revelation storyim nao bae kamap: “Lukim! Tent bilong God hem stap witim olketa man, and hem bae stap witim olketa, and olketa bae kamap pipol bilong hem. And God bae stap witim olketa. And hem bae aotem krae from eye bilong olketa, and dae bae nomoa, sorre and singaot and pain bae nomoa tu. Evri samting bifor hem finis nao.” (Revelation 21:3, 4) Maet iu tingse, ‘mi bae hard for laef kasem taem datwan happen.’ Bat, really, maet bae iu laef yet long datfala taem. And nomata sapos iu dae, God savve mekem iu laef bak moa. (John 5:28, 29) Datwan nao purpose bilong God, and datwan nao samting wea bae kamap. So hem barava no tru taem man sei God no tingim iumi olketa man!

“Kam Klos Long God”

Iumi savve kasem comfort taem iumi savve hao God hem startim finis wanfala plan for finisim evribit wei wea olketa man safa. Bat, waswe long distaem? Wanem nao iumi savve duim sapos samwan wea iumi lovem hem dae or pikinini bilong iumi kasem sik? Hem no kasem yet taem bilong God for finisim sik and dae. Bible showimaot hao iumi mas weit lelebet yet bifor iumi kasem datwan. Bat God bae helpem iumi. Disaepol James sei: “Kam klos long God, and hem bae kam klos long iufala.” (James 4:8) Tru nao, Creator invaetem iumi for garem klos wei for fren witim hem, and olketa wea duim diswan bae olowe feelim hao hem sapotim olketa nomata olketa kasem barava hard taem.

Hao nao iumi savve kam klos long God? Samting olsem thri thousand year bifor, King David askem semkaen kwestin. Hem sei: “O Jehovah, . . . hu nao bae stap insaed long holy maunten bilong iu?” (Psalm 15:1) David ansarem kwestin bilong hemseleva taem hem sei moa: “Man wea wakabaot long stretfala wei and duim raeteous fasin and talem trufala toktok insaed long heart bilong hem. Hem no tok spoelem man witim tongue bilong hem. Long fren bilong hem, hem no duim eni badfala samting.” (Psalm 15:2, 3) So diswan showimaot Jehovah acceptim olketa wea followim samting wea Adam and Eve rejectim. Hem savve kam klos long olketa wea duim will bilong hem.—Deuteronomy 6:24, 25; 1 John 5:3.

Hao nao iumi savve duim will bilong God? Iumi need for lanem samting wea “gud and fitim front long Datwan wea Sevem iumi, God,” and then chus for duim samting followim datwan. (1 Timothy 2:3) Datwan minim iumi mas kasem stretfala savve bilong Word bilong God, Bible. (John 17:3; 2 Timothy 3:16, 17) Wei for readim nomoa Bible hem no inaf. Iumi need for followim example bilong olketa Jew long Beroea long first century wea herem taem Paul hem preach. Iumi readim diswan abaotem olketa: “Olketa barava willing tumas for kasem word, and olketa lukluk gud long olketa Scripture evriday for pruvim evri samting hia.”—Acts 17:11.

Distaem tu, wei for studyim gud Bible savve strongim faith bilong iumi long God and helpem iumi for garem klos wei for fren witim hem. (Hebrews 11:6) Hem helpem iumi tu for minim wei wea Jehovah deal witim olketa man—no for helpem olketa for lelebet taem nomoa bat especially for givim gud samting for olowe long evriwan wea garem fasin wea fitim.

Tingim toktok bilong samfala Christian wea garem klos wei for fren witim God. Danielle wea 16 year hem sei: “Mi lovem tumas Jehovah, and mi thankiu tumas long hem from hem givim staka samting. Hem givim parents  wea lovem mi and wea lovem hem tu and wea teachim mi for followim Word bilong hem.” Wanfala Christian man long Uruguay hem raet olsem: “Heart bilong mi fulap witim thankiu, and diswan muvim mi for thankiu long Jehovah from kaenfala fasin bilong hem wea mi no fit for kasem and for wei wea hem fren witim mi.” God acceptim tu olketa young wan. Gabriela wea seven year hem sei: “Mi lovem God winim eniting long full world! Mi garem Bible bilong miseleva. Mi laekem tumas for lane abaotem God and Son bilong hem.”

Distaem, planti million pipol evriwea long world agree witim full heart long toktok bilong man for raetem psalm wea sei: “Wei for kam klos long God hem gudfala samting for mi.” (Psalm 73:28) Olketa kasem help for deal witim olketa problem wea olketa feisim distaem, and olketa barava sure long hope bilong olketa for laef olowe insaed wanfala Paradaes long earth. (1 Timothy 4:8) Waswe sapos iu mekem goal for “kam klos long God”? Tru nao, iumi kasem disfala promis: “Hem no farawe from iumi wanwan.” (Acts 17:27) Tru tumas, God really tingim iumi!

[Olketa Piksa long page 5]

Iumi savve lukim long planti difren wei hao Jehovah tingim iumi

[Piksa long page 7]

Nomata olketa young pikinini savve kam klos long God

[Olketa Piksa long page 7]

Distaem, Jehovah helpem iumi for stand strong. Gogo, bae hem finisim sik and dae