Iusim Olketa Spiritual Goal for Givim Glory Long Creator Bilong Iu

“TAEM man no savve wanem harbor hem sail go for hem, hem no warim wea nao wind hem blow from.” Disfala toktok bilong wanfala savveman from Rome long first century hem mekhae long wei wea sapos man laek for kasem samting long laef, hem mas garem olketa goal.

Bible givim iumi olketa example bilong samfala wea markem olketa goal. Noah hem waka for samting olsem 50 year for “wakem wanfala ark for sevem famili bilong hem.” Datfala profet Moses “barava luk forward long reward wea hem bae kasem.” (Hebrews 11:7, 26) Joshua, man wea changem Moses for lead, kasem goal wea God markem for tekova long land bilong Canaan.—Deuteronomy 3:21, 22, 28; Joshua 12:7-24.

Long first century C.E., toktok bilong Jesus hao “olketa bae talemaot disfala gud nius bilong kingdom evriwea long earth” hem barava affectim olketa spiritual goal bilong aposol Paul. (Matthew 24:14) From hem kasem encouragement from olketa message and vision from Lord Jesus, and tu, datfala assignment for “talemaot nem bilong [Jesus] long olketa nation,” Paul duim important part for startim planti niu Christian kongregeson long Asia Minor and long Europe.—Acts 9:15; Colossians 1:23.

Tru nao, insaed history, olketa servant bilong Jehovah markem and kasem olketa gudfala goal wea givim glory long God. Hao nao iumi distaem savve markem olketa spiritual goal? Wanem nao samfala goal wea iumi savve trae hard for kasem, and wanem nao iumi savve duim for kasem olketa hia?

Stretfala Samting nao Mas Muvim Iumi

Olketa man savve markem goal saed long planti samting long laef, and staka pipol long world aftarem olketa goal. Bat olketa theocratic goal hem difren from olketa goal bilong pipol long world. Main samting wea muvim pipol long world for garem olketa goal hem feeling wea ova tumas for laek kasem riches, and greedy feeling for laekem hae position and paoa. Hem barava no stret for aftarem wanfala goal for kasem paoa and bignem! Olketa goal wea givim glory long Jehovah God join witim wei wea iumi worshipim hem and olketa samting iumi duim saed long Kingdom. (Matthew 6:33) Olketa goal olsem kam from love bilong iumi for God and olketa man and givim chance for showimaot iumi lovem and servem God.—Matthew 22:37-39; 1 Timothy 4:7.

Stret samting nao mas muvim iumi taem iumi markem and aftarem olketa spiritual goal, nomata hem goal for kasem samfala moa privilege long service or for muv ahed long spiritual wei. Nomata olsem, samfala taem nomata stret samting nao muvim iumi, iumi no kasem samfala goal. Hao nao iumi savve markem olketa goal and garem moa chance for kasem olketa?

Iumi Mas Barava Want for Kasem Olketa

Tingim wei wea Jehovah creatim universe. For showimaot taem wea hem creatim olketa difren samting, Jehovah talem datfala toktok “evening hem kamap and morning hem kamap.” (Genesis 1:5, 8, 13, 19, 23, 31) Each taem hem start for creatim samting, hem garem klia idea abaotem goal bilong hem for datfala day. And God fulfillim purpose bilong hem for creatim olketa samting. (Revelation 4:11) Datfala laen dadi Job hem sei: “Soul bilong [Jehovah] laek for duim samting, and bae hem duim.” (Job 23:13) Jehovah mas barava satisfae for lukim “evri samting wea hem wakem” and talemaot hao hem “gud tumas”!—Genesis 1:31.

 For mekem olketa goal bilong iumi kamap really samting, iumi tu mas barava want for kasem olketa. Wanem nao savve helpem iumi for garem strongfala feeling olsem? Nomata taem earth hem no garem eni sheip and hem stap nating, Jehovah luksavve hao long future hem bae gud tumas—wanfala spesol samting wea barava luk naes, wea givim glory and honor long hem. Long sem wei, feeling bilong iumi for barava want for kasem goal wea iumi aftarem savve kamap moa strong taem iumi ting raonem olketa gud samting wea kamaot from wei for kasem datfala goal. Diswan nao samting wea kasem Tony wea hem 19 year. Hem nating forgetim first samting hem tingim taem hem visitim wanfala branch office bilong Olketa Jehovah’s Witness long Western Europe. Start long datfala taem, Tony hem ting raonem disfala kwestin: ‘Waswe sapos mi stap and serve long ples olsem?’ Tony tingim datwan olowe, and hem go ahed for reach aot for datfala goal. Hem hapi fogud samfala year bihaen taem olketa appruvim application bilong hem for serve long datfala branch!

Wei for kaban witim olketa narawan wea kasem finis wanfala goal savve strongim feeling bilong iumi for laek kasem datwan. Jayson, wea 30 year, hem no laekem field ministry taem hem teenager. Bat bihaen hem finisim hae skul education, hem hapi tumas for join insaed pioneer service, wea minim hem preachim Kingdom full taem. Wanem nao helpem Jayson for mekem grow feeling for pioneer? Hem ansa: “Wei for story witim olketa narawan wea pioneer and waka tugeta witim olketa long ministry hem barava affectim mi.”

Raetem Olketa Goal Long Pepa Savve Help

Idea wea iumi garem savve kamap moa klia taem iumi talemaot. Solomon talem hao olketa stretfala word savve olsem olketa sharp stik for directim iumi long laef. (Ecclesiastes 12:11) Taem iumi raetem olketa word hia long pepa, olketa savve barava affectim mind and heart bilong iumi. Dastawe Jehovah komandim olketa king bilong Israel for raetem copy bilong Law for olketa seleva! (Deuteronomy 17:18) So hem gud sapos iumi raetem long pepa olketa goal bilong iumi and hao for kasem olketa, and for raetem tu olketa problem wea maet kamap and hao for winim olketa. Hem gud tu for luksavve long olketa subject wea iumi need for garem savve abaotem, olketa teknik wea iumi need for lanem, and hu nao fit for helpem and sapotim iumi.

For markem olketa spiritual goal hem helpem Geoffrey, wea spesol pioneer for longfala taem long farawe territory long wanfala kantri long Asia. Barava nogud samting kasem hem taem seknomoa, waef bilong hem dae. Bihaen lelebet taem, Geoffrey disaed for busy evribit long pioneer ministry bilong hem long wei for markem olketa goal. Bihaen hem raetem finis olketa goal bilong hem long pepa, witim help bilong prea hem markem goal for startim thrifala niu Bible study insaed datfala month. Evri day, hem reviewim waka wea hem duim and evri mek-ten day, hem chekim sapos hem muv ahed for kasem datfala goal. Waswe, hem kasem goal bilong hem? Hem hapi tumas for sei yes, hem kasem fofala niu Bible study!

Markem Olketa Smol Goal Tu

Firstaem, samfala goal maet luk olsem hard tumas. Long tingting bilong Tony, wea iumi storyim bifor, for serve long wanfala ples olsem hem olsem wanfala dream nomoa. Hem  garem tingting olsem bikos laef bilong hem bifor hem olobaot, and hem nating dedicate long God yet. Bat Tony disaed for changem laef bilong hem fitim olketa wei bilong Jehovah and hem markem goal for baptaes. Taem hem kasem datfala goal finis, hem markem goal for auxiliary pioneer and regular pioneer, and hem markem date for startim datwan long kalenda bilong hem. Bihaen hem pioneer finis for samfala year, for serve long branch office hem nating luk olsem goal wea hard tumas.

Hem gud tu for iumi markem samfala smol goal for kasem olketa goal wea moa big long future. Olketa smol goal wea iumi fit for kasem savve helpem iumi for kasem datfala goal wea moa big. For reviewim evritaem wei wea iumi muv ahed saed long olketa goal hia savve mekem iumi tingim evritaem olketa goal bilong iumi. And tu, for evritaem prea long Jehovah abaotem olketa plan bilong iumi savve helpem iumi for no go difren. Aposol Paul encouragem iumi for “prea evritaem.”—1 Thessalonians 5:17.

Need for Disaed Strong and No Givap

Nomata iumi tingting gud long plan bilong iumi and iumi barava want for followim datwan, samfala goal hem hard tumas for iumi kasem. Datfala disaepol John Mark mas feel nogud tumas taem aposol Paul no laek tekem hem long mek-tu missionary gogo bilong hem! (Acts 15:37-40) Mark mas lane from diswan and changem goal wea hem garem for duim service long wei wea moa big. Luk olsem hem duim datwan. Bihaen, Paul storyim gud samting abaotem Mark and hem enjoyim tu klos wei for kaban witim aposol Peter long Babylon. (2 Timothy 4:11; 1 Peter 5:13) Maet privilege bilong hem wea winim eni narawan, hem wei wea God muvim hem for raet abaotem laef and ministry bilong Jesus.

Taem iumi aftarem olketa spiritual goal, maet iumi tu kasem samfala problem. Winim wei for givap, iumi mas reviewim samting iumi duim finis, luksavve sapos goal hem still fitim, and changem datwan sapos need stap. Taem olketa problem kamap, iumi need for trae hard witim fasin for disaed strong and no givap. Wisefala King Solomon hem promis olsem: “Leavim evri waka bilong iu long Jehovah seleva and olketa plan bilong iu bae win.”—Proverbs 16:3.

Nomata olsem, samfala taem samting savve kamap wea mekem hem hard tumas for iumi kasem samfala goal. Olsem example, health wea nogud or olketa famili responsibility maet stopem iumi for kasem samfala goal. Iumi shud no forget hao barava prize hem laef olowe—long heven or long Paradaes long earth. (Luke 23:43; Philippians 3:13, 14) Hao nao iumi savve kasem datwan? Aposol John hem raet: “Man wea duim will bilong God bae stap olowe.” (1 John 2:17) Nomata living bilong iumi maet stopem iumi for kasem wanfala goal, iumi savve go ahed for “fraet long trufala God and obeyim olketa komandment bilong hem.” (Ecclesiastes 12:13) Olketa spiritual goal helpem iumi for tingim evritaem wei for duim will bilong God. So iumi mas iusim olketa for givim glory long Creator bilong iumi.

[Box long page 22]

Olketa Spiritual Goal for Ting Raonem

○ Readim Bible evri day

○ Readim evri Wastaoa and Wekap! magasin

○ Mekem olketa prea bilong iumi kamap moabeta

○ Showimaot olketa frut bilong spirit

○ Reach aot for duim moa service

○ Kamap moabeta saed long preaching and teaching

○ Lane for duim enitaem and bisnis witnessing