Kwestin From Reader

Datfala arrangement bilong Jubilee year wea Leviticus chapter 25 storyim hem piksarem wanem?

Law Bilong Moses komandim “long mek seven year wanfala sabbath shud kamap for mekem land rest evribit.” Olketa Israelite kasem disfala komand abaotem datfala year: “Iufala mas no plantim seed long field bilong iufala, and iufala mas no katem grape plantation bilong iufala. No harvestim eniting wea grow kam from olketa seed wea foldaon long first harvest bilong iufala, and iufala mas no hipimap olketa grape from olketa tree wea iufala no katem. Land shud rest evribit for wanfala year.” (Leviticus 25:4, 5) So, long evri mek-seven year hem mas wanfala year bilong Sabbath for datfala land. And long evri mek-50 year, bihaen long mek-seven Sabbath year, hem mas wanfala Jubilee. Wanem nao bae happen long datfala year?

Thru long Moses, Jehovah talem Israel: “And iufala mas mekem datfala mek-fifti year hem holy and talemaot wei for kamap free long evriwan wea stap long disfala land. Datfala year hem wanfala Jubilee for iufala, and iufala mas givim bak samting bilong each wan and iufala mas givim bak man long famili bilong hem. Datfala mek-fifti year bae kamap wanfala Jubilee for iufala. Iufala mas no plantim seed and no harvestim eniting wea grow kam from olketa seed wea foldaon, and no hipimap olketa grape from olketa tree wea iufala no katem.” (Leviticus 25:10, 11) Wanfala Jubilee hem mekem year wea kam bihaen Sabbath year hem nara Sabbath year for datfala land. Bat for olketa wea stap long datfala land, Jubilee hem givim freedom for olketa. Eni Jew wea olketa sellim for kamap slave mas kamap free. Pis land wea man ownim thru famili and hem sellim finis bikos long need wea hem garem mas go bak for famili bilong hem. For olketa bilong Israel bifor, Jubilee hem wanfala year bilong wei for kamap gud moa and for kasem freedom. Wanem nao datwan piksarem for olketa Christian?

Bighed fasin bilong firstfala man, Adam, hem mekem olketa man kamap slave long sin. Arrangement bilong God for mekem olketa man  kamap free from wei for slave long sin hem datfala ransom sakrifaes bilong Jesus Christ. * (Matthew 20:28; John 3:16; 1 John 2:1, 2) Wanem taem nao olketa Christian kamap free from law bilong sin? Taem hem story for olketa anointed Christian, aposol Paul sei: “Law bilong datfala spirit wea givim laef wea wan mind witim Christ Jesus hem mekem iufala kamap free from law bilong sin and bilong dae.” (Romans 8:2) Olketa wea garem hope for laef long heven kasem disfala freedom taem holy spirit anointim olketa. Nomata olketa garem body olsem man and no perfect, God ting long olketa olsem man wea raeteous and adoptim olketa olsem olketa spiritual son bilong hem. (Romans 3:24; 8:16, 17) For evri anointed wan olsem wanfala grup, Jubilee bilong olketa Christian hem start long Pentecost 33 C.E.

Waswe long olketa “nara sheep,” wea garem hope for laef olowe long earth? (John 10:16) For olketa nara sheep, datfala Thousand Year Rul bilong Christ bae hem taem for kamap gud moa and for garem freedom. Insaed long datfala Thousand Year Jubilee, Jesus bae iusim olketa gud samting bilong ransom sakrifaes bilong hem for olketa man wea biliv and bae changem olketa samting wea kamap from sin. (Revelation 21:3, 4) Go kasem end bilong Thousand Year Rul bilong Christ, olketa man bae kamap perfect and kamap free evribit from sin wea olketa garem and wei for dae. (Romans 8:21) Taem datwan happen finis, then Jubilee bilong olketa Christian bae finis nao.

[Footnote]

[Piksa long page 26]

Datfala Thousand Year Jubilee—wanfala taem for kamap gud moa and freedom for olketa “nara sheep”