“Toktok Bilong Jehovah” No Savve Fail

“Mi laek for talem toktok bilong Jehovah; hem sei long mi: ‘Iu nao son bilong mi . . . Askem mi, mekem mi givim olketa nation long iu.’”—PSALM 2:7, 8.

1. Long wanem wei nao purpose bilong God hem difren from purpose bilong olketa nation?

JEHOVAH GOD garem wanfala purpose for olketa man and earth. Olketa nation tu garem wanfala purpose. Bat olketa purpose hia difren tumas! Iumi fit for savve long diswan, bikos God hem sei: “Olsem heven hem moa hae winim earth, so olketa wei bilong mi hem moa hae winim olketa wei bilong iufala, and olketa tingting bilong mi winim olketa tingting bilong iufala.” Purpose bilong God bae fulfill bikos hem sei: “Olsem big rain and snow foldaon from skae and hem no go bak long datfala ples sapos firstaem hem no barava tuwetem earth and mekem samting start for grow, wea givim seed long man wea plantim and bred long man wea kaikaim, toktok bilong mi wea go aot from mouth bilong mi bae kamap tru. Hem bae no kam bak nating long mi, bat hem bae barava duim wanem mi laekem, and hem bae barava win long wanem mi sendem hem for duim.”—Isaiah 55:9-11.

2, 3. Wanem nao mek-tu psalm hem showimaot klia, bat wanem nao olketa kwestin wea kamap?

 ² Mek-tu psalm hem showimaot klia tumas wei wea purpose bilong God saed long Messiah King bilong hem bae fulfill. Spirit bilong God muvim man wea raetem, King David bilong Israel bifor, for talem profesi hao wanfala important taem bae kamap wea olketa nation bae olobaot. Olketa ruler bilong olketa bae againstim Jehovah God and Anointed Wan bilong hem. Bat, man wea raetem psalm sing olsem tu: “Mi laek for talem toktok bilong Jehovah; hem sei long mi: ‘Iu nao son bilong mi . . . Askem mi, mekem mi givim olketa nation long iu and full earth olsem samting bilong iu.’”—Psalm 2:7, 8.

³ Datfala “toktok bilong Jehovah” minim wanem samting for olketa nation? Hao nao datwan affectim olketa man? Wanem nao olketa samting hia minim for pipol wea fraet long God wea readim mek-tu psalm?

Olketa Nation Olobaot

4. Wanem nao olketa main point bilong Psalm 2:1, 2?

⁴ Taem hem storyim samting wea olketa nation duim and olketa bigman bilong olketa, man wea raetem psalm startim singsing bilong hem olsem: “Why nao olketa nation olobaot and olketa sekson long olketa nation go ahed for storyim samting nating? Olketa king bilong earth standap and olketa bigman hipap tugeta olsem wanfala sekson for againstim Jehovah and againstim anointed wan bilong hem.”—Psalm 2: 1, 2. *

5, 6. Wanem nao datfala “samting nating” wea olketa sekson long olketa nation “go ahed for storyim”?

⁵ Wanem nao “samting nating” wea olketa sekson long olketa nation distaem olketa “go ahed for storyim”? Olketa nation no acceptim Anointed Wan bilong God, datfala Messiah, or Christ, bat olketa “go ahed for storyim,” or tingting strong long wei for go ahed long rul bilong olketa seleva. Olketa toktok hia bilong mek-tu psalm hem fulfill tu long first century C.E. taem gavman bilong olketa Jew and Rome waka tugeta for killim dae King wea God markem, Jesus Christ. Nomata olsem, diswan hem start fulfill long bigfala wei long 1914 taem Jesus kamap King long heven. Start long datfala taem, no eni organization bilong politik long earth hem acceptim King wea God markem.

⁶ Wanem nao man wea raetem psalm hem minim taem hem ask ‘why nao olketa nation storyim samting nating’? Purpose bilong olketa nao samting nating; hem iusles and bae hem fail nomoa. Olketa no savve mekem peace and wan mind kamap long disfala earth. Nomata olsem, wei wea olketa go ahed saed long diswan mekem olketa againstim rul bilong God. Tru  nao, from olketa garem feeling for heit olketa hipap tugeta for againstim Most Hae and Anointed Wan bilong hem. Datwan hem krangge tumas!

King Bilong Jehovah wea Win

7. Taem olketa disaepol bilong Jesus bifor prea, olketa sei Psalm 2:1, 2 hem story abaotem hu?

⁷ Olketa disaepol bilong Jesus luksavve hao toktok long Psalm 2:1, 2 story abaotem hem. From olketa hia kasem persecution bikos long faith bilong olketa, olketa prea olsem: “Sovereign Lord [Jehovah], iu nao Datwan wea wakem heven and earth and sea and evri samting insaed long olketa, and wan wea thru long holy spirit iu talem thru long mouth bilong laen dadi bilong mifala David, servant bilong iu, ‘Why nao olketa nation olobaot tumas and pipol ting strong long olketa samting nating? Olketa king bilong earth standap and olketa bigman hipap tugeta olsem wanfala sekson for againstim Jehovah and againstim anointed wan bilong hem.’ Nomata olsem, really samting nao hem wei wea Herod [Antipas] and Pontius Pilate witim olketa man bilong olketa nation and pipol bilong Israel hipap tugeta long taon and againstim holy servant bilong iu Jesus, wea iu anointim.” (Acts 4:24-27; Luke 23:1-12) * Tru tumas, nogud plan nao olketa mekem againstim Jesus, anointed servant bilong God long first century. Nomata olsem, disfala psalm bae fulfill narataem moa, staka handred year bihaen.

8. Hao nao Psalm 2:3 hem fitim olketa nation distaem?

⁸ Taem Israel bifor garem man olsem king, olsem David, olketa heathen nation and ruler hipap tugeta for againstim God and anointed king wea hem markem. Bat waswe long taem bilong iumi? Olketa nation distaem no laek for obeyim olketa mark bilong Jehovah and Messiah. Dastawe olketa sei olsem: “Iumi brekem olketa rope and torowem olketa string bilong olketa from iumi!” (Psalm 2:3) Eni law wea God and Anointed Wan bilong hem putim bae olketa ruler and nation againstim. Bat, eni samting wea olketa duim for brekem rope and torowem olketa string bae fail.

Jehovah Mekfani Long Olketa

9, 10. Why nao Jehovah mekfani long olketa nation?

⁹ Jehovah hem no warim eni samting wea olketa ruler bilong olketa nation duim for rulim olketa seleva. Mek-tu psalm hem go ahed for sei: “Datwan wea sidaon long heven bae laf; Jehovah nao bae mekfani long olketa.” (Psalm 2:4) Long wei wea showimaot hao olketa ruler hia barava samting nating, God go ahed nomoa witim purpose bilong hem. Hem laf long praod fasin bilong olketa and mekfani long olketa. Letem olketa tokplas abaotem plan bilong olketa. Jehovah ting long olketa olsem samting for laf long hem nomoa. Hem laf long iusles wei wea olketa trae for againstim hem.

¹⁰ Long olketa nara psalm, David story  abaotem olketa man wea enemy and hem sing olsem: “Iu, O Jehovah wea iu God bilong olketa army, iu nao God bilong Israel. Wekap and luk go long evri nation. No favorim eniwan wea laea. Olketa evritaem kam bak long evening; olketa go ahed for singaot olsem wanfala dog and go raonem full taon. Lukim! Mouth bilong olketa talem samting; lips bilong olketa olsem sword, from hu nao go ahed for lisin? Bat iu, O Jehovah, bae laf long olketa; iu bae mekfani long olketa.” (Psalm 59:5-8) Jehovah laflaf long wei wea olketa nation tokplas and konfius taem olketa duim krangge samting for againstim hem.

11. Wanem nao happen taem olketa nation trae for againstim purpose bilong God?

¹¹ Toktok bilong Psalm 2 hem strongim faith bilong iumi hao Jehovah savve stretem eni problem. Iumi fit for biliv strong dat hem evritaem duim will bilong hem and no enitaem lusim olketa loyal servant bilong hem. (Psalm 94:14) Sapos olsem, wanem nao bae happen taem olketa nation duim samting for againstim purpose bilong Jehovah? Datfala psalm hem sei, God “bae tok long olketa from hem kros,” olsem saond bilong bigfala thunder. And tu, “bigfala feel nogud” bilong hem bae olsem laetning taem “hem spoelem olketa.”—Psalm 2:5.

God Putim Finis King Bilong Hem

12. Psalm 2:6 hem story hu nao kamap king?

¹² Next samting wea Jehovah talem thru long man wea raetem psalm hem mekem olketa nation feel nogud. God hem sei: “Mi, yes mi, putim king bilong mi long Zion, holy maunten bilong mi.” (Psalm 2:6) Maunt Zion hem wanfala hill long Jerusalem wea David kasem paoa for rul olsem king ovarem full Israel. Bat datfala Messiah King bae no sidaon antap wanfala throne long datfala taon or eni nara ples long earth. Tru tumas, Jehovah hem putim finis Jesus Christ, Messiah King wea hem chusim long Maunt Zion long heven.—Revelation 14:1.

13. Wanem covenant nao Jehovah mekem witim Son bilong hem?

¹³ Then datfala Messiah King hem toktok. Hem sei: “Mi laek for talem toktok bilong Jehovah [wea mekem finis wanfala covenant witim Son bilong hem for datfala Kingdom]; hem [Jehovah God] sei long mi: ‘Iu nao son bilong mi; mi, tuday, mi kamap dadi bilong iu.’” (Psalm 2:7) Christ hem story abaotem datfala Kingdom covenant taem hem talem olketa aposol bilong hem: “Iufala nao olketa wea no lusim mi taem mi kasem olketa test; and mi mekem wanfala covenant witim iufala, olsem Dadi bilong mi hem mekem wanfala covenant witim mi, for wanfala kingdom.”—Luke 22:28, 29.

14. Why nao iumi fit for sei Jesus barava fit for rul olsem king?

¹⁴Psalm 2:7 talem firstaem hao Jehovah talemaot wei wea Jesus nao Son bilong Hem taem hem baptaes and long wei wea Hem resurrectim hem for laef olsem wanfala spirit. (Mark 1:9-11; Romans 1:4; Hebrews 1:5; 5:5) Tru tumas, King bilong Kingdom long heven hem only-born Son bilong God. (John 3:16) From hem nao kam from laen bilong King David, Jesus fit evribit for rul olsem king. (2 Samuel 7:4-17; Matthew 1:6, 16) Long disfala psalm, God talem Son bilong hem: “Askem mi, mekem mi givim olketa  nation long iu and full earth olsem samting bilong iu.”—Psalm 2:8.

15. Why nao Jesus ask for kasem olketa nation olsem samting bilong hem?

¹⁵ Datfala King—Son bilong God—hem garem paoa wea mek-tu long Jehovah. Jesus hem winim olketa test, hem loyal and Jehovah fit for trustim hem. And tu, Jesus hem Firstborn bilong God. Tru tumas, Jesus Christ “hem image bilong God wea iumi no savve lukim, firstborn long evri creation.” (Colossians 1:15) Wanem hem need for duim nao for ask and God bae ‘givim hem olketa nation and full earth olsem samting bilong hem.’ Jesus askem diswan from hem ‘laekem tumas olketa samting wea join witim olketa son bilong man’ and hem barava want for duim will bilong Dadi bilong hem long heven for earth and olketa man.—Proverbs 8:30, 31.

Toktok Bilong Jehovah Againstim Olketa Nation

16, 17. Olsem Psalm 2:9 talem, wanem nao bae kasem olketa nation?

¹⁶ From mek-tu psalm hem go ahed for fulfill distaem, taem wea Christ hem stap moa, wanem nao bae kasem olketa nation? Klosap nao King hia bae obeyim disfala toktok bilong God: “Iu bae brekem olketa [nation] witim iron stik, olsem clay dish iu bae pisisim olketa.”—Psalm 2:9.

¹⁷ Olketa iron stik bilong olketa king long taem bifor piksarem paoa bilong king. Olketa wakem samfala stik bilong king from iron, olsem datwan wea psalm hem storyim. Tokpiksa hia hem showimaot wei wea hem bae isi tumas for Christ datfala King for distroem olketa nation. Sapos man iusim wanfala iron stik for hitim strong wanfala clay pot, bae hem smasem evribit and hard nao for fixim datwan.

18, 19. For God appruvim olketa, wanem nao olketa king bilong earth need for duim?

¹⁸ Waswe, olketa ruler bilong olketa nation hard tumas nao for missim wei for distroe olsem? Nomoa, from man wea raetem psalm hem invaetem olketa olsem: “So, olketa king, showimaot fasin for luksavve; letem Jehovah stretem iufala, O olketa judge bilong earth.” (Psalm 2:10) Olketa king kasem invitation for barava lisin gud, for garem gudfala tingting long diswan. Olketa shud tingim wei wea plan bilong olketa hem iusles, wea difren evribit from wanem Kingdom bilong God bae duim for helpem olketa man.

¹⁹ For God appruvim olketa, olketa king bilong earth mas barava change. Olketa kasem kaonsel for “servem Jehovah witim fraet and hapi.” (Psalm 2:11) Wanem nao bae happen sapos olketa duim diswan? Olketa bae no olobaot, bat olketa bae hapi long hope wea datfala Messiah King hem putim front long olketa. Hem fitim nomoa for olketa ruler bilong earth mas lusim praod and bighed fasin wea showaot long wei wea olketa rul. And tu, olketa mas stretawe change and luksavve hao rul bilong Jehovah hem hae winim evri narawan and hao Messiah King bilong hem garem paoa wea no eniwan savve againstim.

“Kissim Son”

20, 21. Wanem nao hem minim for “kissim son”?

²⁰Psalm 2 givim wanfala invitation wea showimaot mercy long olketa ruler bilong olketa nation. Winim wei for olketa hipap againstim hem, hem encouragem olketa for: “Kissim son mekem Hem [Jehovah God] no feel kros and mekem iufala no distroe, bikos hem savve kros kwiktaem.” (Psalm 2:12a) Pipol shud obeyim Sovereign Lord Jehovah taem hem talem samting. Taem God putim Son bilong hem for rul, olketa ruler bilong earth shud finis for “storyim samting nating.” Olketa shud stretawe luksavve long datfala King and obeyim hem evribit.

²¹ Why nao olketa shud “kissim son”? Taem olketa raetem disfala psalm, wei for kiss hem showimaot hao tufala man fren and pipol savve duim olsem for welkamim visitor long haos bilong olketa. Wei for kiss savve minim tu dat man hem loyal, or faithful. (1 Samuel 10:1) Long disfala verse bilong mek-tu psalm, God hem komandim olketa nation for kissim, or welkamim Son bilong hem olsem King wea hem markem.

22. Olketa ruler bilong olketa nation shud obeyim wanem warning?

²² Olketa wea no want for luksavve long paoa  bilong King wea God chusim olketa duim samting againstim Jehovah. Olketa no luksavve long rul bilong Jehovah God long universe and paoa and savve wea hem garem for chusim King wea best ruler for olketa man. Olketa ruler bilong olketa nation bae feelim kros bilong God wea bae seknomoa kasem olketa, taem olketa trae for duim samting followim plan bilong olketa seleva. “Hem savve kros kwiktaem.” Olketa ruler bilong olketa nation shud acceptim disfala warning witim thankiu and duim samting. Sapos olketa duim olsem, bae olketa kasem laef.

23. Taem stap yet for olketa man wanwan for duim wanem?

²³ Disfala nambawan psalm hem end olsem: “Hapi nao olketa wea mekem hem [Jehovah] ples for stap sef.” (Psalm 2:12b) Taem stap yet for olketa man wanwan for faendem sef ples. Nomata olketa ruler wanwan tu wea followim plan bilong olketa nation savve duim olsem. Olketa savve ranawe go long Jehovah, wea givim sef ples for olketa wea stap anda long datfala Kingdom rul. Bat olketa mas duim samting bifor datfala Messiah Kingdom hem distroem olketa nation wea againstim hem.

24. Hao nao iumi savve garem laef wea mekem iumi satisfae nomata iumi stap insaed disfala world wea fulap witim trabol?

²⁴ Sapos iumi waka hard for studyim Bible and followim kaonsel bilong hem, iumi savve garem laef wea mekem iumi satisfae nomata iumi stap insaed world wea fulap witim trabol. Wei for followim Bible kaonsel hem mekem famili moa hapi and iumi free from staka wari and wei for fraet wea pipol bilong world garem. Wei for followim olketa Bible instruction mekem iumi sure iumi mekem Creator hapi. No eni narawan bat Sovereign bilong Universe nomoa savve promisim “laef distaem and datwan wea bae kam” bihaen hem aotem from earth olketa wea againstim stret samting taem olketa rejectim rul bilong Kingdom.—1 Timothy 4:8.

25. From “toktok bilong Jehovah” no savve fail, wanem nao iumi sure bae happen long taem bilong iumi?

²⁵ “Toktok bilong Jehovah” no savve fail. From hem Creator bilong iumi, God savve wanem nao best for olketa man and bae hem fulfillim purpose bilong hem for blessim olketa man wea obey witim peace, wei for satisfae, and sef living for olowe anda long Kingdom bilong Son bilong hem wea hem lovem. Profet Daniel hem raet olsem abaotem taem bilong iumi: “Long taem bilong olketa king hia God bilong heven bae startim wanfala kingdom wea bae nating savve finis. . . . Hem bae smasem and finisim evri kingdom hia, and hemseleva nao bae stap olowe.” (Daniel 2:44) Dastawe, hem important tumas distaem, for “kissim Son” and servem Sovereign Lord, Jehovah!

[Olketa Footnote]

Hao Nao Bae Iu Ansa?

• Wanem “samting nating” nao olketa nation “go ahed for storyim”?

• Why nao Jehovah mekfani long olketa nation?

• Wanem nao toktok bilong God againstim olketa nation?

• Wanem nao hem minim for “kissim son”?

[Olketa Kwestin]

[Piksa long page 16]

David sing abaotem Messiah King wea win

[Piksa long page 17]

Olketa ruler and pipol bilong Israel plan for againstim Jesus Christ

[Piksa long page 18]

Christ hem stap finis olsem King long Maunt Zion long heven