Parents—Showimaot Gudfala Example for Pikinini Bilong Iu
Parents—Showimaot Gudfala Example for Pikinini Bilong Iu
“OLKETA doctor wea for plande year finis trae for lukaotem gudfala wei for bringimap olketa pikinini, olketa no savve faendem datwan, bikos no eni wei olsem hem stap.” Hem nao toktok bilong Time magasin wea reviewim wanfala buk abaotem wei for bringimap olketa pikinini. Datfala buk hem talem hao olketa wea sem age nao main wan wea affectim fasin bilong olketa young wan, and no dadi or mami.
Hem tru hao olketa wea sem age savve barava affectim olketa narawan. (Proverbs 13:20; 1 Corinthians 15:33) William Brown, wea raet for wanfala niuspepa hem story olsem: “Main samting wea savve affectim laef bilong wanfala teenager, hem for olketa wea sem age for acceptim hem. . . . And for hem difren from olketa narawan wea sem age hem samting wea olketa teenager barava no laekem.” Taem parents fail for mekem famili laef hapi or no spendem inaf taem witim pikinini bilong olketa—wea diswan affectim staka pipol long disfala world wea busy—hem olsem olketa givim chance for olketa narawan wea sem age for barava affectim pikinini bilong olketa long nogud wei.
And tu, Bible storyim staka samting wea attakim famili arrangement insaed “olketa last day,” olsem wei wea pipol tingim nomoa selen, hapitaem, and samting wea olketa seleva interest long hem. Dastawe, iumi shud no sapraes taem iumi lukim hao olketa pikinini “no obeyim dadi and mami, no savve sei thankiu, [and] no garem love wea olketa long famili shud garem for each other.”—2 Timothy 3:1-3.
Datfala toktok “love,” wea Bible iusim long disfala verse hem minim feeling wea muvim parents for lukaftarem olketa pikinini, and wei wea olketa pikinini lovem parents bilong olketa. Bat taem parents no garem datfala love, pikinini bae lukaotem datwan from narafala ples—plande taem from olketa wea sem age olsem olketa, and bae followim fasin and tingting bilong olketa. Bat, parents savve stap klia long disfala trap, sapos olketa letem olketa principle from Bible for leadim famili bilong olketa.—Proverbs 3:5, 6.
Famili—Wanfala Arrangement wea Kam From God
Bihaen God joinim Adam and Eve for kamap olsem hasband and waef, hem givim tufala disfala responsibility: “Garem pikinini and kamap plande and fulimap earth.” Bihaen datwan, famili arrangement wea garem dadi, mami, and pikinini hem start. (Genesis 1:28; 5:3, 4; Ephesians 3:14, 15) For helpem olketa man bringimap olketa pikinini, Jehovah mekem samfala main samting saed long wei for bringimap pikinini kamap natural samting for olketa man duim. Olketa animal no needim help, bat olketa man needim help so Jehovah hem provaedem advaes thru long Bible for olketa. Insaed datwan tu, hem provaedem direction saed long fasin and worship and wei for disciplinem pikinini long stretfala wei.—Proverbs 4:1-4.
God hem story long olketa dadi taem hem sei: “Olketa toktok hia wea mi komandim iu tuday mas stap long heart bilong iu; and iu mas evritaem strongim toktok hia long son bilong iu and storyim olketa taem iu sidaon long haos bilong iu and taem iu wakabaot long road and taem iu leidaon and taem iu getap.” (Deuteronomy 6:6, 7; Proverbs 1:8, 9) Iumi lukim hao firstaem, parents mas putim law bilong God insaed heart bilong olketa seleva. Why nao diswan hem important? From wei for teach wea really muvim narawan hem no kam from mouth bat hem kam from heart. Taem parents teach from heart bilong olketa nomoa, bae olketa kasem heart bilong pikinini. Parents olsem fit for kamap example for pikinini bilong olketa, bikos olketa pikinini isi for luksavve sapos truth hem stap insaed heart bilong parents or nomoa.—Romans 2:21.
Christian parents kasem instruction for teachim olketa pikinini datfala “training, discipline, kaonsel, and encouragement wea kam from Lord” taem olketa baby yet. (Ephesians 6:4 The Amplified Bible; 2 Timothy 3:15) Waswe, diswan hem fitim? Ia! Wanfala mami hem raet olsem: “Samfala taem mifala parents ting smol long olketa samting wea pikinini fit for duim. Bat olketa fit for duim samfala samting and parents mas mekius long datwan.” Tru tumas, pikinini lovem wei for lanem samting, and taem parents wea worshipim God teachim olketa, bae olketa lane tu hao for showimaot love. Olketa pikinini olsem bae feel sef from olketa rul wea parents mekem for olketa. So parents wea win for helpem olketa pikinini bae garem gudfala wei for story, kamap klos fren witim olketa, and patient bat strong for teachim olketa wea mekem evriwan long famili hapi and stap gud tugeta. *
Protectim Pikinini Bilong Iu
Wanfala hedmasta long Germany hem raet olsem insaed wanfala leta for olketa parents: “Mifala laek for encouragem iufala parents wea lovem pikinini bilong iufala for showimaot moa interest for bringimap pikinini and no givim datfala responsibility long television or olketa nogud pipol, from hem responsibility bilong iu for trainim olketa saed long fasin.”
Wei for givim datfala responsibility for bringimap pikinini long television or olketa nogud pipol, hem olsem wei for letem spirit bilong disfala world for spoelem wei wea olketa young wan growap. (Ephesians 2:1, 2) Spirit bilong disfala world hem barava go againstim spirit bilong God, from spirit bilong world hem olsem strongfala wind, wea hem karem olketa seed bilong kaen tingting wea followim wei bilong ‘earth, bilong animal, bilong demon,” and hem gohed for spredim diswan long mind and heart bilong olketa wea no garem savve or wea krangge. (James 3:15) Olketa tingting hia hem olsem olketa rabis grass wea gogo spoelem heart. Jesus explainim insaed wanfala tokpiksa wanem savve happen long heart taem hem sei: “Gudfala man givim kam gudfala samting from gudfala rich samting long heart bilong hem, bat nogud man givim kam samting wea nogud from nogud rich samting bilong hem; from samting wea fulap long heart nao mouth bilong hem talem.” (Luke 6:45) Dastawe, Bible kaonselem iumi: “Winim eni nara samting wea iu mas protectim, protectim gud heart bilong iu, from olketa samting bilong laef kamaot from hem.”—Proverbs 4:23.
Hem tru, olketa pikinini bae act olsem pikinini, and samfala taem wei bilong samfala hem for bighed. (Genesis 8:21) Wanem nao parents savve duim? Bible hem sei: “Krangge fasin hem stap insaed long heart bilong wanfala boy; stik bilong discipline nao bae aotem datwan from hem.” (Proverbs 22:15) Samfala ting long diswan olsem wanfala wei wea hem ova tumas for deal witim pikinini wea no fitim taem bilong iumi. For tok stret, Bible hem againstim raf fasin and enikaen wei for spoelem narawan. Datfala “stik” savve piksarem wei for panisim olketa, bat tu, hem savve piksarem paoa wea parents iusim long stretfala wei, bat long wei for showimaot love and wea bae helpem pikinini for future bilong olketa for olowe.—Hebrews 12:7-11.
Enjoyim Hapitaem Witim Pikinini Bilong Iu
Hem tru samting hao for pikinini growap long gudfala wei, olketa need for plei and garem hapitaem. Parents wea wise mekius long eni chance for strongim wei wea olketa fren witim pikinini taem olketa enjoyim hapitaem tugeta. So, diswan hem wei wea parents helpem pikinini for chusim gudfala hapitaem, and tu, olketa showimaot long pikinini hao olketa tinghae long wei for spendem taem witim olketa.
Wanfala Witness dadi sei hao taem hem kam bak long haos bihaen hem finis waka, hem and son bilong hem savve iusim ball for pleim samfala game. Wanfala mami hem ting bak long taem wea hem enjoyim wei for pleim olketa board game witim pikinini bilong hem. Wanfala dota wea big distaem rememberim taem hem smol hao famili bilong hem enjoyim wei for raedem baesikol tugeta. Nomata evri pikinini hia full grown distaem, love wea olketa garem for parents bilong olketa, and for Jehovah, hem big tumas and gohed for kamap moa big.
Hem tru, parents wea showimaot thru long toktok and samting olketa duim hao olketa lovem pikinini bilong olketa and want for stap witim olketa, bae affectim pikinini long gudfala wei start long taem olketa smol and for full laef bilong olketa. Olsem example, plande long olketa wea graduate from wanfala class bilong Watchtower Bible Skul Bilong Gilead storyim hao feeling bilong olketa for laek duim full taem ministry hem from example and encouragement bilong parents. Datwan hem nambawan present for pikinini and wanfala blessing for parents! Hem tru, no evri pikinini fit for join insaed full taem ministry taem olketa kamap full grown, bat evri pikinini bae kasem gud samting and honorim parents wea fraet long God, and wea kamap gudfala example and best fren for olketa.—Proverbs 22:6; Ephesians 6:2, 3.
Singol Parents Savve Win
Distaem, plande pikinini growap insaed famili wea garem dadi or mami nomoa. Diswan kamap wanfala challenge for bringimap pikinini, bat nomata olsem olketa savve win for duim datwan. Singol parents savve kasem encouragement from Bible example bilong Eunice, wanfala Jew Christian woman long first century. From hasband bilong hem no garem sem biliv olsem hem, luk olsem Eunice no kasem spiritual sapot from hasband bilong hem. Nomata olsem, hem showimaot gudfala example long wei wea hem teachim Timothy. Gudfala example bilong Eunice and Lois wea hem granmami bilong Timothy, affectim Timothy long gudfala wei from taem wea hem baby yet. Gudfala example bilong tufala hem garem moa paoa winim nogud example bilong samfala wea sem age olsem Timothy.—Acts 16:1, 2; 2 Timothy 1:5; 3:15.
Staka young wan distaem wea stap witim dadi or mami nomoa, or garem dadi or mami wea no insaed long truth, showimaot gudfala fasin olsem young Timothy. Olsem example, Ryan, wea age bilong hem 22 year and hem wanfala full taem minister, hem growap insaed famili wea garem mami nomoa and hem garem wanfala big brata and sista. Dadi bilong olketa hem man wea depend long alcohol, and hem lusim olketa taem Ryan hem foa year. Ryan hem sei: “Mami hem disaed strong hao mifala mas gohed for servem
Jehovah, and hem duim best bilong hem for followim datfala disison witim full heart bilong hem.”Ryan sei moa, “Mami hem mek sure mifala pikinini enjoyim gud samting wea kam from gudfala fasin bilong olketa wea sem age. Hem no enitaem letem mifala for kaban witim eniwan wea Bible kolem olketa nogud pipol, nomata sapos olketa from insaed or aotsaed kongregeson. And tu, hem strongim long mifala stretfala tingting abaotem education bilong disfala world.” Nomata plande taem mami bilong Ryan busy and taed from waka bilong hem, diswan no stopem hem for showimaot loving interest long olketa pikinini bilong hem. Ryan hem sei: “Mami evritaem laek for stap and story witim mifala. Hem patient bat strong for duim stret samting, and duim best bilong hem for mek sure mifala duim famili Bible study evritaem. And saed long olketa Bible principle hem disaed strong hao mifala mas followim evritaem.”
Taem Ryan hem ting go bak, hem luksavve hao wei wea mami bilong hem lovem God and olketa pikinini bilong hem, hem nao main samting wea affectim hem and brata and sista bilong hem long gudfala wei. So iufala Christian parents, nomata sapos iufala marit or widow, or nomata sapos partner bilong iu garem sem biliv olsem iu or nomoa, no givap for duim best bilong iu for teachim pikinini bilong iu, nomata long samfala taem maet olketa foldaon. Samfala taem, olketa young wan savve go difren from truth olsem datfala olobaot son. Bat, maet olketa savve kam bak taem olketa lukim hao world no really interest long olketa. Hem tru,“raeteous wan hem wakabaot followim faithful fasin bilong hem. Hapi nao olketa son bilong hem wea followim hem.”—Proverbs 20:7; 23:24, 25; Luke 15:11-24.
[Footnotes]
^ par. 9 For samfala moa information abaotem olketa point hia, lukim page 55-9 bilong buk Secret for Kasem Hapi Famili, wea Olketa Jehovah’s Witness pablisim.
[Box/Pictures on page 11]
God Chusim Parents Bilong Jesus
Taem Jehovah sendem Son bilong hem long disfala earth for born olsem man, hem chusim gud parents bilong Jesus. Hem interesting samting hao Jehovah hem chusim tufala wea no rich bat wea fraet long God. Tufala no ova tumas for duim evri samting for Jesus, bat tufala teachim hem Word bilong God and hao for waka hard and duim olketa responsibility. (Proverbs 29:21; Lamentations 3:27) Joseph teachim Jesus carpenter waka, and iumi sure from Jesus hem firstborn, Joseph and Mary markem hem for helpem tufala lukaftarem maet winim sixfala brata and sista bilong hem.—Mark 6:3.
Iumi savve tingim tu, hao long taem bilong Passover full famili bilong Joseph waka tugeta for redy for travel tugeta each year for go long Jerusalem—wea hem samting olsem 200 kilometer for go and kam bak and no eni trak stap long datfala taem. Iumi sure, for go long Jerusalem datfala famili wea maet garem naenfala or winim, olketa mas organize long gudfala wei. (Luke 2:39, 41) Nomata hem wanfala challenge, Joseph and Mary tinghae long chance for go tugeta, and maet tufala mekius long datfala taem for teachim pikinini bilong tufala abaotem history wea stap insaed long Bible.
Taem Jesus stap long hom yet, hem “gohed for stap anda long” parents bilong hem, and evritaem “gohed for grow long wisdom and long body and hem stap gud long eye bilong God and olketa man.” (Luke 2:51, 52) Hem tru, Jehovah fit for trustim Joseph and Mary. Tufala hia nambawan example for parents distaem!—Psalm 127:3.