Stap Klia Long False Worship!
Stap Klia Long False Worship!
“‘Go aot from midolwan long olketa, and separatem iufala seleva,’ Jehovah hem sei, ‘and no tasim samting wea no klin.’”—2 CORINTHIANS 6:17.
1. Plande pipol wea garem honest heart barava need for savve long olketa wanem samting?
PLANDE pipol wea garem honest heart no savve long truth abaotem God and future bilong olketa man. From olketa no kasem ansa for olketa kwestin bilong olketa saed long truth abaotem God and future bilong olketa man, olketa barava konfius and no sure. Plande million pipol no savve hao olketa kastom biliv and celebration wea mekem Creator feel nogud hem spoelem olketa long spiritual wei and long physical wei. Maet iu garem olketa neiba and relative wea biliv long hellfire, trinity God, soul wea no savve dae, or maet nara false teaching.
2. Wanem nao olketa bigman bilong religion duim, and wanem nao kamaot from datwan?
2 Wanem nao mekem staka pipol no savve gud long God? Sapraesing samting nao, hem religion—especially olketa religion and bigman bilong olketa wea teachim olketa idea wea difren from tingting bilong God. (Mark 7:7, 8) Diswan giamanim plande pipol and mekem olketa tingse olketa worshipim tru God, bat really, hem nating hapi long worship bilong olketa. False religion nao kosim disfala sorre samting.
3. Hu nao main wan wea bihaenem false religion, and wanem nao Bible sei abaotem hem?
3 Man wea iumi no savve lukim hem bihaenem false religion. Aposol Paul hem sei olsem abaotem hem: “[Datfala] god bilong disfala world hem blindim mind bilong olketa [wea no biliv] for mekem laet bilong nambawan gud nius abaotem Christ, wea hem nao image bilong God, for no showaot.” (2 Corinthians 4:4) Satan nao “god bilong disfala world.” Hem nao main wan wea bihaenem false worship. Paul hem sei: “Satan gohed for changem hemseleva for kamap wanfala angel bilong laet. Dastawe hem no big samting sapos olketa minister bilong hem gohed for mekem olketa seleva kamap olketa minister bilong raeteous fasin.” (2 Corinthians 11:14, 15) Satan mekem wicked samting luk olsem hem gud and giamanim pipol mekem olketa bilivim olketa laea samting.
4. Wanem nao Law bilong God for Israel hem sei abaotem olketa false profet?
4 So iumi savve nao why Bible hem talemaot barava nogud judgment for false religion! Olsem example, Law bilong Moses barava warnim pipol bilong God abaotem olketa false profet. Eniwan wea mekhae long olketa false god and false teaching mas ‘dae from hem tok againstim Jehovah.’ Jehovah komandim olketa Israelite for ‘aotem olketa wicked samting from midolwan long olketa.’ (Deuteronomy 13:1-5) Tru nao, Jehovah hem ting long false religion olsem wicked samting.—Ezekiel 13:3.
5. Wanem nao olketa warning wea iumi shud obeyim distaem?
5 Jesus Christ and olketa aposol bilong hem showimaot semkaen strong feeling olsem Jehovah abaotem false religion. Jesus warnim olketa disaepol bilong hem: “Lukaot long olketa giaman profet bikos long aotsaed olketa luk olsem sheep, bat long insaed olketa olsem wild dog wea hangre fogud.” (Matthew 7:15; Mark 13:22, 23) Paul talem hao “kros bilong God hem showaot from heven againstim evri wei for no followim God and wei bilong olketa man wea no raeteous wea gohed for stopem truth.” (Romans 1:18) Hem barava important for olketa tru Christian mas obeyim olketa warning hia and stap klia long eniwan wea stopem pipol for savve long truth from Word bilong God or wea talemaot olketa false teaching!—1 John 4:1.
Rejectim “Bigfala Babylon”
6. Hao nao Bible storyim “Bigfala Babylon”?
6 Tingim wei wea Bible storyim false religion long buk bilong Revelation. Hem storyim diswan olsem wanfala jury woman wea drunk and wea garem paoa ovarem plande kingdom and pipol bilong olketa. Disfala tokpiksa woman hem duim fornication witim plande king and hem drunk from blood bilong olketa tru worshiper bilong God. (Revelation 17:1, 2, 6, 18) Hem garem wanfala nem long forhed bilong hem wea fitim barava dirty and rabis fasin bilong hem. Datfala nem hem “Bigfala Babylon, mami bilong olketa jury woman and bilong evri rabis samting long earth.”—Revelation 17:5.
7, 8. Hao nao false religion givim hemseleva olsem wanfala jury woman, and wanem nao kamaot from datwan?
7 Bigfala Babylon wea Bible storyim hem piksarem evri false religion wea stap long world, wea hem staka thousand. Nomata olketa no join tugeta insaed wanfala really organization raonem world, olketa barava wan mind saed long goal bilong olketa and samting olketa duim. Olsem datfala olobaot woman long Revelation, false religion barava win for mekem olketa gavman duim wanem olketa laekem. Olsem wanfala woman wea nating faithful long marit promis bilong hem, false religion givim hemseleva olsem wanfala jury woman taem hem waka tugeta witim olketa gavman. Disaepol James hem raet: “Waswe, iufala wea duim adultery no savve hao wei for fren witim world hem minim man kamap enemy bilong God? So, eniwan wea laek for kamap fren bilong world hem mekem hemseleva kamap enemy bilong God.”—James 4:4.
8 Plande pipol safa from disfala wei for mixim false religion witim olketa gavman. Man long Africa wea storyim politik, Doctor Xolela Mangcu, talem hao “long history bilong world iumi lukim staka example bilong olketa killkill wea kamap from wei wea religion and politik join tugeta.” No longtaem go nomoa, wanfala niuspepa hem sei: “Olketa raoa wea barava danger and wea killim dae staka man distaem . . . hem bikos long religion.” Plande million pipol dae from wei wea religion sapotim olketa war. Bigfala Babylon hem persecutim and killim dae olketa tru servant bilong God tu, and long tokpiksa wei hem drunk from blood bilong olketa.—Revelation 18:24.
9. Hao nao buk bilong Revelation storyim feeling for heit wea Jehovah garem for false worship?
9 Samting wea Bible sei bae kasem Bigfala Babylon hem showimaot klia hao Jehovah hem heitim false worship. Revelation 17:16 hem sei: “Tenfala horn wea iu lukim, and datfala wild animal, olketa hia bae heitim datfala jury woman and bae spoelem hem and mekem hem naked, and bae kaikaim meat bilong hem and bae bonem hem evribit long fire.” So, first samting, wanfala maeti animal killim hem dae and kaikaim hem. Then, olketa part bilong hem wea hem no kaikaim, olketa bonem evribit. Klosap nao diswan bae fulfill taem olketa gavman duim samting againstim false religion. God nao bae muvim olketa for duim datwan. (Revelation 17:17) Bigfala Babylon, wea hem nao olketa false religion evriwea long world, kasem judgment for finis evribit. “No eniwan bae faendem hem moa.”—Revelation 18:21.
10. Hao nao iumi shud ting long false religion?
10 Hao nao olketa tru worshiper shud ting long Bigfala Babylon? Bible talem stret: “Go aot from hem, pipol bilong mi, sapos iufala no want for share witim hem long olketa sin bilong hem, and sapos iufala no want for kasem eni trabol bilong hem.” (Revelation 18:4) Olketa wea laek sev mas go aot from false religion taem chance stap yet for duim datwan. Taem Jesus Christ stap long earth, hem talem hao long olketa last day plande pipol bae sei olketa obeyim hem, bat really olketa no duim datwan. (Matthew 24:3-5) Hem sei olsem long olketa: “Mi nating savve long iufala! Iufala go nao, iufala man for brekem law.” (Matthew 7:23) Jesus Christ, wea hem King distaem, hem rejectim false religion.
Stap Klia—Hao Nao Olsem?
11. Wanem nao iumi shud duim for stap klia long false worship?
11 Olketa tru Christian stap klia from false worship and rejectim olketa false teaching. Diswan minim iumi no lukluk or lisin long olketa program bilong religion long television and radio and no readim olketa buk bilong religion wea teachim olketa laea samting abaotem God and Word bilong hem. (Psalm 119:37) Hem bae wise tu for iumi no join insaed eni hapitaem wea olketa false religion organizem. And tu, iumi no sapotim false worship long eni wei. (1 Corinthians 10:21) Diswan savve protectim iumi, mekem no eniwan “spoelem [iumi] thru long olketa idea and iusles tingting wea giamanim man wea followim kastom bilong man, wea fitim olketa samting bilong world and wea no followim Christ.”—Colossians 2:8.
12. Hao nao man savve separatem hemseleva evribit from false religion?
12 Waswe sapos samwan wea laek kamap wanfala Jehovah’s Witness hem member bilong wanfala false religion? Plande taem, wanfala leta wea talem hao hem no laek gohed olsem member bilong datfala false religion bae showimaot klia hao hem no laekem olketa for tingse hem member bilong church bilong olketa. Hem important tumas for datfala man barava disaed strong and duim samting, mekem false religion no spoelem hem long spiritual wei. Samting wea hem duim mas showaot klia long pipol, and long church bilong hem bifor hao hem finis for olsem member bilong datfala religion.
13. Bible talem wanem kaonsel for iumi saed long need for stap klia long false worship?
13 Aposol Paul hem raet: “No join tugeta witim olketa wea no biliv. From hao nao raeteous fasin savve join witim fasin for brekem law? Or hao nao laet savve share witim darkness? And tu, hao nao Christ savve wan mind witim Belial? Or hao nao man wea faithful savve share witim man wea no biliv? And hao nao temple bilong God savve join witim olketa idol? . . . ‘Dastawe, go aot from midolwan long olketa, and separatem iufala seleva,’ Jehovah hem sei, ‘and no tasim samting wea no klin.’” (2 Corinthians 6:14-17) Iumi obeyim diswan taem iumi stap klia long false worship. Waswe, advaes bilong Paul minim tu hao iumi mas stap klia long pipol wea olketa member bilong olketa false religion?
“Gohed for Wakabaot Long Wisefala Wei”
14. Waswe, iumi mas barava stap klia from pipol wea join insaed false worship? Explainim diswan.
14 Waswe, olketa tru worshiper mas stap klia evribit from pipol wea join insaed false worship? Waswe, iumi shud nating interest long pipol wea no garem sem biliv olsem iumi? Ansa hem nomoa. Mek-tu main komandment hem sei: “Iu mas lovem neiba bilong iu olsem iuseleva.” (Matthew 22:39) Iumi barava showimaot love for olketa neiba bilong iumi taem iumi sharem gud nius bilong Kingdom witim olketa. Love wea iumi garem for olketa showaot tu taem iumi studyim Bible witim olketa and helpem olketa luksavve hao olketa mas stap klia long false worship.
15. Wanem nao hem minim for “no part bilong world”?
15 Nomata iumi preachim gud nius long olketa neiba bilong iumi, from iumi olketa follower bilong Jesus, iumi “no part bilong world.” (John 15:19) Long hia, datfala word “world” hem minim olketa man wea no worshipim God. (Ephesians 4:17-19; 1 John 5:19) Iumi stap separate from world long wei wea iumi stap klia from tingting, toktok, and fasin wea Jehovah no hapi long hem. (1 John 2:15-17) And tu, for followim datfala principle wea sei “wei for kaban witim nogud pipol hem spoelem gudfala fasin,” iumi stap klia long wei for fren gud witim pipol wea no followim olketa Christian standard. (1 Corinthians 15:33) For no part bilong disfala world hem minim iumi “no letem world mekem iumi dirty.” (James 1:27) So, for stap separate from disfala world hem no minim iumi mas separatem iumiseleva evribit from nara pipol.—John 17:15, 16; 1 Corinthians 5:9, 10.
16, 17. Hao nao olketa Christian shud ting long pipol wea no savve long truth from Bible?
16 So, hao nao iumi shud ting long pipol wea no savve long truth from Bible? Paul hem raet olsem long kongregeson long Colossae: “Gohed for wakabaot long wisefala wei witim pipol long aotsaed, baem bak for iuseleva, taem wea iu iusim for duim nara samting. Toktok bilong iufala mas kaenfala evritaem, garem salt, mekem iufala savve hao for givim ansa long each wan.” (Colossians 4:5, 6) Aposol Peter hem raet olsem: “Honorim Christ olsem Lord long heart bilong iufala, evritaem redy for givim ansa long eniwan wea askem reason for hope wea iufala garem, bat duim datwan witim kwaet fasin and bigfala respect.” (1 Peter 3:15) Paul kaonselem olketa Christian “for no tok daonem eniwan, no garem wei for laek raoa, garem balance fasin, and showimaot kwaet fasin evribit long evri man.”—Titus 3:2.
17 From iumi Olketa Jehovah’s Witness, iumi stap klia long wei for bighed or tok raf long nara pipol. Iumi no iusim toktok wea daonem pipol bilong nara religion, bat iumi tingim feeling bilong pipol, nomata sapos haosholder, neiba, or wakfren bilong iumi hem tok raf or hem no kaen.—Colossians 4:6; 2 Timothy 2:24.
“Gohed for Followim Datfala Plan Bilong Healthy Toktok”
18. Olketa wea go bak long false worship olketa hao long spiritual wei?
18 Bae hem barava sorre samting sapos man go bak moa long false worship bihaen hem lanem truth from Bible! Bible storyim olketa nogud samting wea kamaot from diswan taem hem sei: “Tru nao, sapos firstaem, stretfala savve abaotem Lord and Man wea sevem iumi, Jesus Christ, hem mekem olketa lusim dirty samting bilong world, bat then bihaen, olketa duim moa olketa samting hia and diswan winim olketa, datwan bae moa worse for olketa winim taem bifor olketa lanem olketa samting hia. . . . Toktok bilong trufala proverb hem happen finis long olketa: ‘Dog hem go bak long toroaot bilong hem, and pigpig wea swim finis hem go rol olobaot insaed long mud.’”—2 Peter 2:20-22.
19. Why nao hem barava important for iumi careful for stap klia long eni samting wea savve spoelem iumi long spiritual wei?
19 Iumi mas evritaem careful for stap klia long eni samting wea savve spoelem iumi long spiritual wei. Danger hem stap evritaem! Aposol Paul talem disfala warning: “Spirit hem talem stret hao long olketa taem wea bae kam bihaen, samfala bae lusim faith and lisin long olketa giaman toktok from antap and teaching bilong olketa demon.” (1 Timothy 4:1) Iumi stap long datfala “taem wea bae kam bihaen.” Olketa wea no stap klia long false worship savve ‘olsem man wea olketa wave pushim hem olobaot from evrikaen teaching wea olsem wind wea kamaot from giaman wei bilong man, from olketa kleva for duim rong samting.’—Ephesians 4:13, 14.
20. Hao nao iumi savve protectim iumiseleva from wei wea false religion savve spoelem iumi?
20 Hao nao iumi savve protectim iumiseleva from wei wea false religion savve spoelem iumi? Tingim evri samting wea Jehovah hem provaedem. Iumi garem Word bilong God, Bible. (2 Timothy 3:16, 17) Jehovah provaedem tu staka spiritual kaikai thru long “faithful and wise slave.” (Matthew 24:45) Taem iumi muv ahed long truth, iumi shud barava interest long ‘strongfala kaikai wea hem for mature pipol’ and laekem tumas for hipap tugeta long olketa Christian meeting wea iumi lanem olketa spiritual truth. (Hebrews 5:13, 14; Psalm 26:8) Iumi mas disaed strong for barava mekius long olketa samting wea Jehovah provaedem, mekem iumi savve “gohed for followim datfala plan bilong healthy toktok” wea iumi herem. (2 Timothy 1:13) Long wei olsem, iumi savve stap klia from false worship.
Wanem Nao Mi Lanem?
• Wanem nao “Bigfala Babylon”?
• Wanem nao iumi mas duim for stap klia long false religion?
• Iumi mas stap klia long olketa wanem samting wea savve spoelem iumi long spiritual wei?
[Olketa Kwestin]
[Piksa long page 9]
Waswe, iu savve why nao Bible sei “Bigfala Babylon” hem olsem wanfala olobaot woman?
[Piksa long page 10]
“Bigfala Babylon” kasem judgment for finis evribit
[Piksa long page 12]
Iumi showimaot “kwaet fasin and bigfala respect” long olketa wea no garem sem biliv olsem iumi