Iufala Young Wan, Showimaot Iu Gohed Kamap Strongfala Christian
Iufala Young Wan, Showimaot Iu Gohed Kamap Strongfala Christian
“Ting raonem evri samting hia and tingting strong long olketa, mekem evriwan lukim iu gohed kamap strongfala Christian.”—1 TIM. 4:15.
1. Wanem nao God laekem for olketa young wan?
“I UFALA young wan, iufala mas hapi taem iufala young yet! Taem iufala young, duim olketa gudfala samting wea savve mekem iufala hapi.” (Eccl. 11:9) Nomata King Solomon nao talem datfala toktok, iumi savve toktok hia kam from Jehovah God. Hem barava laekem olketa young wan for hapi go kasem taem olketa olo. Bat plande taem olketa young wan no disaedem samting long gudfala wei. From olketa duim olsem, maet olketa kasem nogud samting and no hapi. Job tu hem sorre bikos hem tingim “samfala mistek wea hem duim taem hem young.” (Job 13:26) Plande taem olketa young Christian mas disaedem olketa important samting. Sapos olketa disaedem samting wea nogud, datwan savve spoelem tingting bilong olketa and mekem olketa kasem problem bihaen.—Eccl. 11:10.
2. Wanem toktok long Bible nao savve helpem olketa young wan for no kasem nogud samting?
2 Olketa young wan mas garem gudfala tingting taem olketa disaedem samting. Tingim wanem aposol Paul talem for olketa long Corinth. Hem sei: “Iufala mas no stap olsem pikinini long savve bilong iufala, bat iufala mas stap olsem bigman long savve bilong iufala.” (1 Cor. 14:20) Taem olketa young wan followim toktok hia and tingting gud olsem man wea big finis, olketa bae no kasem nogud samting.
3. Wanem nao iu savve duim mekem iu garem tingting olsem man wea big finis?
3 Olketa young wan mas waka hard sapos olketa laek garem gudfala tingting olsem man wea big finis. Paul talem Timothy: “No letem eni man daonem iu from iu young. Bat showimaot gudfala wei long olketa brata and sista, mekem olketa savve followim iu long toktok, long wei bilong iu, long love, long faith, and long wei for klin. . . . Gohed lane for read gud front long pipol, for givim kaonsel, and for teachim pipol. . . . Ting raonem evri samting hia and tingting strong long olketa, mekem evriwan lukim iu gohed kamap strongfala Christian.” (1 Tim. 4:12-15) Olketa young wan mas showimaot olketa gohed for kamap strongfala Christian.
Wanem Nao Iu Savve Duim for Kamap Strongfala Christian?
4. Sapos man laek kamap strongfala Christian, wanem nao hem mas duim?
4 Sapos man laek kamap strongfala Christian, hem mas “kamap gud long wanem hem duim.” Paul talem Timothy for waka hard for kamap gud moa long toktok, long wei bilong hem, long love, long faith, long wei for klin, and long ministry tu. Timothy mas showimaot gudfala wei for olketa nara Christian followim. Dastawe hem mas kamap gud moa for teachim pipol and long wei bilong hem.
5, 6. (a) Wanem taem nao Timothy start for kamap strongfala Christian? (b) Wanem nao olketa young wan distaem savve duim for followim wei bilong Timothy?
5 Paul talem datfala kaonsel long Timothy midolwan long samting olsem 61 and 64 C.E. Long datfala taem, Timothy no just niu insaed long truth bat hem elder finis for longtaem lelebet. Long 49 or 50 C.E. taem hem samting olsem 20 year nomoa, “olketa brata long Lystra and Iconium talem gudfala samting abaotem hem” bikos olketa lukim hem gohed for kamap strongfala Christian. (Acts 16:1-5) Long datfala taem, Paul tekem Timothy long missionary gogo bilong hem. Bihaen samfala month, Paul sendem Timothy long Thessalonica for strongim olketa Christian long there bikos hem lukim Timothy gohed kamap strong moa long truth. (Readim 1 Thessalonians 3:1-3, 6.) Tru tumas, olketa brata lukim hao Timothy start for kamap strongfala Christian taem hem young yet.
6 Hem gud tumas sapos iufala young wan waka hard for garem olketa gudfala wei. Taem iufala duim olsem, olketa brata and sista bae lukim hao iufala gohed kamap strongfala Christian and hao iufala savve lanem pipol abaotem olketa tru samting long Bible. Nomata Jesus hem 12 year nomoa, hem “start for garem gudfala tingting.” (Luke 2:52) So distaem iumi bae storyim thrifala samting wea savve kamap long laef bilong iu wea iu savve showimaot iu kamap strongfala Christian: (1) taem iu kasem hard taem, (2) taem iu tingting for marit, and (3) taem iu waka hard for “kamap gudfala wakaman.”—1 Tim. 4:6.
Taem Iu Kasem Hard Taem, Garem “Gudfala Tingting”
7. Wanem nao olketa young wan savve duim taem olketa kasem hard taem?
7 Carol, wanfala sista wea 17 year, hem sei: “Samfala taem mi no laek wekap long morning nao bikos mi feel wikdaon and body bilong mi wiki tumas.” * Why nao Carol hem olsem? Taem Carol hem 10 year nomoa, mami and dadi bilong hem divorce and hem stap witim mami bilong hem wea duim olketa rabis samting. Maet iu tu kasem hard taem olsem Carol wea luk olsem hem bae no finis.
8. Wanem kaen hard taem nao Timothy kasem?
8 Taem Timothy gohed for kamap strongfala Christian, hem kasem samfala hard taem tu. Wanfala nao, hem ‘sik olowe’ bikos bele bilong hem savve soa. (1 Tim. 5:23) Nara samting, taem samfala brata long Corinth tok daonem waka bilong Paul, Paul talem Timothy for go stretem olketa problem wea kamap long there. Paul talem olketa long kongregeson hia for waka gud witim Timothy mekem hem “no fraet.” (1 Cor. 4:17; 16:10, 11) Luk olsem Timothy hem man for shame lelebet.
9. Man wea garem gudfala tingting hem hao? Long wanem wei nao man olsem difren from man wea fraet?
9 Paul laek helpem Timothy dastawe hem tok olsem long hem: “Holy spirit wea God givim kam long iumi, hem no mekem iumi fraet, bat hem mekem iumi strong and hem mekem iumi lovem pipol and hem mekem iumi garem gudfala tingting.” (2 Tim. 1:7) Man wea garem “gudfala tingting” hem ting raonem samting and disaedem samting long gudfala wei. Nomata wanem hard taem hem kasem, hem gohed strong nomoa. Samfala young pipol fraet and taem olketa kasem hard taem, olketa sleep olowe, lukluk television olowe, tekem drug, drink gogo olketa drunk, hapitaem olowe, or olketa durong bikos olketa no laek tingim nao datfala hard taem. Olketa Christian mas ‘lusim olketa rabis wei and olketa samting wea pipol long world laekem and olketa mas garem gudfala tingting, garem gudfala wei, and lovem God taem olketa stap long disfala world.’—Titus 2:12.
10, 11. Taem man garem gudfala tingting, long wanem wei nao datwan helpem hem kamap strongfala Christian?
10 Bible talem olketa “young man for garem gudfala tingting.” (Titus 2:6) Datwan minim taem iu kasem olketa problem, iu bae prea long God and askem hem for strongim iu for winim olketa problem hia. (Readim 1 Peter 4:7.) Taem iu duim olsem, diswan bae mekem iu trustim ‘God for strongim iu.’—1 Pet. 4:11.
11 Gudfala tingting and prea nao helpem Carol. Hem sei: “From mi stap witim mami bilong mi wea duim olketa rabis samting, hem barava no isi for mi garem olketa gudfala wei. Bat taem mi prea long Jehovah, datwan nao barava helpem mi. Mi savve Jehovah helpem mi dastawe mi no fraet.” No forgetim diswan, taem iu kasem hard taem, datwan savve strongim iu and mekem iu garem olketa gudfala wei. (Ps. 105:17-19; Lam. 3:27) Nomata wanem problem iu kasem, God bae nating lusim iu. Hem bae “barava helpem iu.”—Isa. 41:10.
Taem Iu Tingting for Marit
12. Why nao Christian wea tingting for marit mas ting raonem toktok long Proverbs 20:25?
12 Samfala young wan marit kwiktaem bikos olketa no hapi, no laek stap seleva, laef hem boring, or olketa garem problem long famili. Bat taem man and woman marit, tufala mekem wanfala important promis. Long bifor, samfala no tingting gud firstaem bat olketa kwiktaem mekem promis long God. (Readim Proverbs 20:25.) Samfala young wan no tingim wanem olketa mas duim for mekem marit bilong olketa stap gud. Bihaen olketa marit, olketa start for luksavve olketa mas duim plande samting wea olketa no tingim firstaem.
13. Sapos iu tingting for frenim samwan, wanem nao olketa kwestin wea hem gud for iu ting raonem? Wanem gudfala advaes nao hem stap?
13 So bifor iu frenim wanfala boy or gele, tingim olketa kwestin hia: ‘Why nao mi laek marit? Wanem nao mi laek kasem from marit? Waswe, boy or gele hia barava fitim mi? Waswe, mi barava redi for kamap hasband or waef?’ “Datfala wakaman wea faithful and wise” givim barava gudfala advaes for helpem iu taem iu tingting for marit. * (Matt. 24:45-47) Tingim hao Jehovah nao givim kam datfala advaes. Ting raonem gud wanem iu readim and followim. No garem wei bilong “horse or donkey wea no savve minim samting.” (Ps. 32:8, 9) Sapos iu tingting for marit, hem gud for iu garem tingting olsem man wea big finis abaotem wanem hasband or waef mas duim. Sapos iu tingse iu redi nao for frenim wanfala boy or gele, waka hard for showimaot gudfala wei “for klin.”—1 Tim. 4:12.
14. Sapos man waka hard for followim wei bilong Christ, long wanem wei nao datwan helpem hem sapos hem marit?
14 Sapos man hem strongfala Christian, hem bae kasem gud samting tu bihaen hem marit. Man olsem hem waka hard for “followim olketa wei bilong Christ.” (Eph. 4:11-14) Christ “no tingim hemseleva nomoa.” (Rom. 15:3) Taem hasband and waef tingim narawan, tufala bae hapi and stap gud. (1 Cor. 10:24) Hasband bae lovem waef bilong hem and no tingim hemseleva, and waef bae waka hard for stap anda long hasband bilong hem olsem Jesus stap anda long God.—1 Cor. 11:3; Eph. 5:25.
“Duim Gud Waka wea Iu Kasem”
15, 16. Wanem nao iu savve duim for showimaot iu duim gud ministry bilong iu?
15 Paul mekhae long important waka wea Timothy duim. Hem sei: “Mi talem iu front long God and Christ Jesus, . . . preachim word bilong God, and no isisi for duim datwan.” Hem sei tu: “Duim waka for talemaot gud nius, duim gud waka wea iu kasem.” (2 Tim. 4:1, 2, 5) So sapos Timothy laek duim gud disfala waka, hem mas “garem strongfala faith.”—Readim 1 Timothy 4:6.
16 Wanem nao iu savve duim mekem iu “garem strongfala faith”? Paul hem sei: “Gohed lane for read gud front long pipol, for givim kaonsel, and for teachim pipol. Ting raonem evri samting hia and tingting strong long olketa.” (1 Tim. 4:13, 15) Man mas barava waka hard for duim study seleva mekem hem gohed kamap strongfala Christian. Disfala toktok “tingting strong” hem minim for man tingting nomoa long wanem hem duim and for no tingim nara samting. Waswe, iu gohed yet for duim study seleva evritaem? Waswe, iu tingting strong long “olketa deep samting wea kam from God”? (1 Cor. 2:10) Or waswe, taem iu study iu duim kwiktaem nomoa and no ting raonem wanem iu lanem? Taem iu ting raonem samting wea iu lanem, datwan savve mekem iu laek for followim wanem iu lanem.—Readim Proverbs 2:1-5.
17, 18. (a) Iu mas waka hard for kamap gud long wanem? (b) Taem iu garem sem tingting olsem Timothy, long wanem wei nao datwan savve helpem iu long ministry?
17 Michelle, wanfala young pioneer sista, hem sei: “Mi markem taem for duim study seleva, and evritaem mi go long olketa meeting. Datwan nao helpem mi for duim gud ministry bilong mi and mi gohed for kamap strongfala Christian.” Taem man pioneer, datwan savve helpem hem for savve hao for iusim Bible long preaching and for kamap strongfala Christian. Waka hard for read gud and for givim gudfala ansa long olketa meeting. Olketa young wan wea kamap strongfala Christian bae redyim gudfala tok long Theocratic Ministry Skul and duim datfala tok followim theme bilong hem.
18 Iu mas “talemaot gud nius” sapos iu laek barava duim gud ministry bilong iu and helpem pipol for kasem laef olowe. So iu mas gohed waka hard for lane hao for “teach gud.” (2 Tim. 4:2) Taem iu waka witim olketa nara brata and sista wea savve gud hao for preach, iu bae lane hao for teach, olsem Timothy tu hem lane from hem waka witim Paul. (1 Cor. 4:17) Paul helpem olketa brata taem hem talem gud nius long olketa and ‘givim laef’ bilong hem tu for olketa. Hem iusim laef bilong hem for helpem olketa bikos hem barava lovem olketa. (1 Thess. 2:8) Sapos iu laek followim wei wea Paul duim ministry, iu mas garem sem tingting olsem Timothy. Timothy barava tingim pipol and hem ‘waka hard for talemaot gud nius.’ (Readim Philippians 2:19-23.) Waswe, iu showimaot tu semkaen wei olsem Timothy long ministry?
Iu Bae Hapi Taem Iu Kamap Strongfala Christian
19, 20. Why nao iu savve hapi taem iu kamap strongfala Christian?
19 Iu mas waka hard sapos iu laek kamap strongfala Christian. Taem iu waka hard for savve gud hao for teach, gogo iu bae “helpem staka pipol kamap rich,” wea datwan minim iu helpem olketa for fren gud witim Jehovah. Datwan savve mekem iu “barava hapi.” (2 Cor. 6:10; 1 Thess. 2:19) Fred, wea waka long wanfala Bethel, hem sei: “Bifor, mi no iusim staka taem olsem distaem for helpem pipol. Tru tumas, man wea givim samting hem hapi winim man wea kasem samting.”
20 Daphne, wanfala young pioneer sista, hem storyim hao hem hapi from hem gohed for kamap strongfala Christian. Hem sei: “Taem mi gohed for lane abaotem Jehovah, mi barava fren gud go moa witim hem. Taem iu barava waka hard for mekem Jehovah hapi, iu tu barava hapi!” Nomata sapos pipol no savve lukim iu gohed for kamap strongfala Christian, Jehovah savve lukim datwan and hem tinghae long iu. (Heb. 4:13) Tru tumas, iufala young Christian savve mekhae long Dadi bilong iufala long heven. Gohed for duim samting wea Jehovah hapi long hem and waka hard for kamap strongfala Christian.—Prov. 27:11.
[Olketa Footnote]
^ par. 7 Mifala changem samfala nem.
^ par. 13 Lukim buk Questions Young People Ask—Answers That Work, Volume 2, “Is This Person Right for Me?”; Wastaoa bilong May 15, 2001, “Kaonsel From God for Chusim Marit Partner”; and Awake! bilong September 22, 1983, “How Wise Is a Teenage Marriage?”
Wanem Nao Iu Lanem?
• Wanem nao iu mas duim mekem iu gohed kamap strongfala Christian?
• Wanem nao showimaot iu kamap strongfala Christian . . .
taem iu kasem hard taem?
taem iu tingting for marit?
long ministry?
[Olketa Study Kwestin]
[Piksa long page 15]
Taem iu prea, datwan savve helpem iu for winim hard taem
[Piksa long page 16]
Wanem nao olketa young pablisa savve duim mekem olketa savve gud hao for teach?