‘Olketa Angel Duim Waka for Helpem Pipol’
‘Olketa Angel Duim Waka for Helpem Pipol’
“God iusim evri angel bilong hem for helpem pipol wea hem bae sevem.”—HEB. 1:14.
1. Wanem nao Matthew 18:10 and Hebrews 1:14 talem wea mekem iumi hapi?
JESUS CHRIST warnim eni man wea laek mekem olketa disaepol bilong hem stambol. Hem sei: “Iufala mas no les long eni disaepol bilong mi bikos, iu savve, olketa angel bilong olketa long heven evritaem lukim feis bilong Dadi bilong mi wea stap long heven.” (Matt. 18:10) Aposol Paul tok olsem abaotem olketa faithful angel: “God iusim evri angel bilong hem for helpem pipol wea hem bae sevem.” (Heb. 1:14) Disfala toktok mekem iumi hapi bikos iumi luksavve God iusim olketa angel for helpem iumi. Wanem nao Bible storyim abaotem olketa angel? Wanem nao olketa duim for helpem iumi? Wanem nao iumi savve lanem from olketa?
2, 3. Wanem nao samfala difren waka wea olketa angel duim?
2 Staka million faithful angel nao stap long heven. Evriwan ‘strong tumas and duim wanem God talem.’ (Ps. 103:20; readim Revelation 5:11.) Evri angel hia garem wei bilong olketa seleva, olketa wei bilong God, and savve disaedem wanem olketa seleva laek duim. Evriwan barava organize gud and garem hae position wea God markem. Michael (nem bilong Jesus long heven) hem nao chief angel. (Dan. 10:13; Jude 9) “God wakem hem firstaem bifor hem wakem evri nara samting.” Bible sei hem nao “Word,” wea minim hem man for toktok for God. Jehovah iusim hem tu for wakem evri nara samting.—Col. 1:15-17; John 1:1-3.
3 Olketa nara angel stap tu wea hem nao olketa seraph. Waka bilong olketa hem for talemaot hao Jehovah hem holy and for helpem pipol duim wanem God laekem. Olketa cherub tu stap wea duim olketa waka for sapotim rul bilong God. (Gen. 3:24; Isa. 6:1-3, 6, 7) Olketa nara angel duim staka difren kaen waka for duim wanem God hem laekem.—Heb. 12:22, 23.
4. Hao nao tingting bilong olketa angel taem God start for wakem earth? Sapos Adam and Eve disaedem samting long gudfala wei, wanem nao olketa man bae kasem?
4 Taem Jehovah ‘start for wakem earth,’ evri angel hapi tumas. Olketa hapi for duim waka bilong olketa taem Jehovah gohed for redyim earth for olketa man stap long hem. (Job 38:4, 7) Jehovah wakem iumi man for “no hae winim olketa angel.” Nomata olsem, hem wakem iumi for “tekem olketa wei” bilong Hem. Dastawe iumi savve showimaot olketa nambawan wei bilong God. (Heb. 2:7; Gen. 1:26) Sapos Adam and Eve disaedem samting long gudfala wei, tufala witim evri pikinini bilong tufala bae stap olowe long paradaes. Olketa witim olketa angel bae olsem famili bilong Jehovah.
5, 6. Wanem nao wanfala angel duim long heven? Wanem nao God duim taem datwan happen?
5 Taem wanfala angel start for bighed and againstim God, masbi olketa faithful angel sorre tumas. Disfala angel les nao for mekhae long Jehovah. Hem laekem olketa narawan for worshipim hem. From hem sei Jehovah no fit for rulim olketa man and hem trae hard for hem rul tu, hem kamap Satan (wea minim “Man for againstim narawan”). Taem Satan laea long Eve, hem switim Adam and Eve mekem tufala followim hem tu for againstim God.—Gen. 3:4, 5; John 8:44.
6 Long datfala taem nomoa, Jehovah judgem Satan. Hem talem disfala toktok long Satan wea hem nao firstfala profesi long Bible: “Mi bae mekem iu and woman hia for iutufala heitim iutufala. Pikinini bilong iu and pikinini bilong woman bae tufala heitim tufala. Pikinini bilong woman bae killim hed bilong iu and iu bae killim leg bilong hem.” (Gen. 3:15) Satan and “woman” bilong God bae gohed heitim tufala. Tru tumas, Jehovah ting long olketa faithful angel long heven olsem waef bilong hem wea hem lovem tumas. Disfala profesi givim hope long iumi nomata samfala part bilong profesi hia stap olsem wanfala “holy secret” wea bae isisi showaot klia long iumi. God talem hao hem bae iusim wanfala angel long organization bilong hem for finisim evriwan wea againstim God. Disfala angel tu bae mekem “olketa samting long heven and olketa samting long earth” for kam tugeta moa.—Eph. 1:8-10.
7. Long taem bilong Noah, wanem nao smol haf long olketa angel duim? Wanem nao Jehovah duim long olketa?
7 Long taem bilong Noah, smol haf long olketa angel lusim “ples wea olketa shud stap long hem” and tekem body olsem man bikos olketa laek durong witim olketa gele long earth. (Jude 6; Gen. 6:1-4) So Jehovah aotem olketa hia from famili bilong hem and olketa joinim Satan and kamap “olketa wicked spirit” wea barava laek spoelem pipol wea worshipim God.—Eph. 6:11-13; 2 Pet. 2:4.
Wanem Nao Olketa Angel Duim for Helpem Iumi?
8, 9. Long wanem wei nao Jehovah iusim olketa angel for helpem olketa man?
8 Olketa angel helpem Abraham, Jacob, Moses, Joshua, Isaiah, Daniel, Jesus, Peter, John, and Paul. God iusim olketa faithful angel for killim dae pipol wea hem judgem and for givim kam olketa profesi and talemaot wanem God laekem pipol for duim. Wanfala nao hem Law bilong Moses. (2 Ki. 19:35; Dan. 10:5, 11, 14; Acts 7:53; Rev. 1:1) From iumi garem full Bible distaem, maet Jehovah no iusim olketa angel for talem olketa message long iumi. (2 Tim. 3:16, 17) Nomata olsem, iumi savve olketa angel waka hard for duim wanem God laekem and helpem pipol bilong hem.
9 Bible talem olsem: “Angel bilong Jehovah stap raonem olketa wea fraet long God, and hem sevem olketa.” (Ps. 34:7; 91:11) Satan talem hao sapos olketa man kasem hard taem, olketa bae no faithful long God. Dastawe Jehovah letem Satan for testim iumi. (Luke 21:16-19) Bat God luksavve long wanem kaen hard taem nao pipol bilong hem fit for winim mekem olketa savve gohed faithful long hem. (Readim 1 Corinthians 10:13.) Olketa angel redi nomoa for duim wanem God laekem. Olketa sevem Shadrach, Meshach, Abednego, Daniel, and Peter bat olketa no stopem olketa man for killim dae Stephen and James. (Dan. 3:17, 18, 28; 6:22; Acts 7:59, 60; 12:1-3, 7, 11) Samting wea happen long taem bilong olketa man hia and samting wea kamaot from wanem hem happen hem no semsem. Long sem wei tu, samfala brata wea stap long olketa raf prison olketa dae, bat Jehovah helpem staka mekem olketa no dae.
10. Hu moa savve helpem iumi?
10 Bible no teachim hao man wanwan garem angel for lukaftarem hem. Iumi savve hao “taem iumi askem eni samting long God wea fitim tingting bilong hem, hem bae herem iumi.” (1 John 5:14) Hem tru, Jehovah savve iusim angel for helpem iumi, bat iumi savve kasem help long olketa nara wei tu. Wanfala brata or sista nao maet helpem and strongim iumi. Maet iumi kasem hard taem wea olsem “nogud nila long body” bilong iumi and maet datwan hem olsem wanfala “angel bilong Satan” nao killim iumi. Bat God savve mekem iumi garem gudfala tingting and strongim iumi for winim hard taem wea iumi kasem.—2 Cor. 12:7-10; 1 Thess. 5:14.
Followim Wei Bilong Jesus
11. Wanem nao olketa angel duim for helpem Jesus? From Jesus faithful long God, wanem nao hem showimaot?
11 Tingim wei wea Jehovah iusim olketa angel taem Jesus stap long earth. Olketa angel talemaot long pipol taem Jesus hem born and taem hem laef bak. Olketa helpem Jesus tu taem hem stap long earth. Nomata olketa angel savve stopem olketa man for no kasholem Jesus and killim hem dae, olketa no duim datwan, bat God sendem wanfala angel for strongim Jesus. (Matt. 28:5,6; Luke 2:8-11; 22:43) Olsem Jehovah planim finis, Jesus dae for olketa man and hem showimaot hao man wea perfect savve gohed faithful long God nomata hem kasem barava bigfala test. From datwan, Jehovah mekem Jesus laef bak moa olsem spirit long heven wea nating savve dae. Hem givim ‘paoa long Jesus ovarem evri samting’ and olketa angel stap anda long hem. (Matt. 28:18; Acts 2:32; 1 Pet. 3:22) Dastawe Jesus nao main “pikinini” bilong “woman” bilong God.—Gen. 3:15; Gal. 3:16.
12. Long wanem wei nao iumi savve followim wei bilong Jesus?
12 Jesus savve hem no stret for hem testim Jehovah long wei for askem olketa angel for sevem hem sapos hem duim krangge samting wea savve mekem hem dae. (Readim Matthew 4:5-7.) So hem gud for iumi followim wei bilong Jesus for “garem gudfala tingting” and no duim eni samting wea savve spoelem iumi. Taem pipol againstim iumi, iumi trustim God olsem Jesus tu.—Titus 2:12.
Wanem Nao Iumi Savve Lanem From Olketa Faithful Angel?
13. Wanem nao iumi savve lanem from olketa faithful angel wea 2 Peter 2:9-11 storyim?
13 Taem aposol Peter kaonselem olketa wea “tok spoelem” olketa anointed Christian, hem mekhae long gudfala wei bilong olketa faithful angel. Nomata olketa garem bigfala paoa, olketa hambol and no judgem eniwan bikos olketa “respectim Jehovah.” (Readim 2 Peter 2:9-11.) Iumi tu mas no judgem pipol, bat iumi mas respectim olketa wea lukaftarem kongregeson, and trustim Jehovah for stretem evri samting from hem nao Nambawan Judge.—Rom. 12:18, 19; Heb. 13:17.
14. Wanem nao olketa angel duim wea showimaot olketa hambol?
14 Olketa angel bilong Jehovah hambol taem olketa duim waka bilong olketa. Samfala angel nating laek talem nem bilong olketa long olketa man. (Gen. 32:29; Judg. 13:17, 18) Staka million angel nao stap long heven, bat Bible talem nomoa nem bilong tufala, hem nao Michael and Gabriel. Maet diswan hem for mekem iumi olketa man no worshipim olketa angel. (Luke 1:26; Rev. 12:7) Taem aposol John baodaon front long wanfala angel, angel hia tok strong olsem long hem: “Nomoa! Iu no worshipim mi! Mi wanfala wakaman olsem iu nomoa and olketa brata bilong iu.” (Rev. 22:8, 9) Iumi mas worshipim God and prea long hem nomoa.—Readim Matthew 4:8-10.
15. Wanem nao iumi lanem from wei bilong olketa angel for patient?
15 Olketa angel showimaot olketa patient tu. Nomata olketa barava laek tumas for savve long olketa holy secret bilong God, God no talem evri samting long olketa. Bible hem sei: “Olketa samting hia nao olketa angel laek tumas for minim.” (1 Pet. 1:12) So wanem nao olketa duim? Olketa patient nomoa go kasem taem God showimaot “bigfala savve bilong hem long kongregeson.”—Eph. 3:10, 11.
16. Wei bilong iumi savve mekem olketa angel laek duim wanem?
16 Taem olketa Christian kasem hard taem, ‘olketa angel lukim olketa.’ (1 Cor. 4:9) Taem iumi faithful, olketa angel lukim diswan and olketa barava hapi. Olketa hapi tu taem wanfala man wea sin hem repent. (Luke 15:10) Olketa angel lukim taem olketa Christian woman showim gudfala wei. Bible hem sei: “Bikos long olketa angel, evri woman mas kavarem hed bilong hem for showimaot hem stap anda long paoa bilong hasband bilong hem.” (1 Cor. 11:3, 10) Tru tumas, olketa angel hapi taem olketa lukim olketa Christian woman and olketa narawan wea worshipim God stap anda long olketa wea leadim olketa and followim wanem organization bilong God talem. Taem olketa hia obey, datwan helpem olketa angel tu for duim sem samting.
Olketa Angel Helpem Preaching Waka
17, 18. Why nao iumi fit for sei olketa angel helpem preaching waka?
17 Olketa angel tu join insaed samfala nambawan samting wea happen long “day bilong Lord.” Olketa lukim taem Kingdom hem start long 1914 and Bible storyim hao “Michael and olketa angel bilong hem” torowem Satan and olketa demon bilong hem aot from heven. (Rev. 1:10; 11:15; 12:5-9) Aposol John lukim wanfala “angel flae long skae, and hem garem gud nius wea stap for olowe. Waka bilong angel hia hem for talemaot gud nius long evri pipol long world.” Datfala angel tok big olsem: “Fraet long God and mekhae long hem, bikos taem bilong hem for judgem pipol hem kam nao. Iufala mas worshipim Hem from hem wakem heven and earth and sea and olketa springwata.” (Rev. 14:6, 7) Nomata Satan barava againstim iumi, iumi savve olketa angel helpem iumi taem iumi preachim gud nius abaotem Kingdom.—Rev. 12:13, 17.
18 Long distaem, olketa angel no story kam long iumi for mekem iumi go kasem pipol wea laek lanem truth, olsem taem angel story long Philip and talem hem for go kasem wanfala man from Ethiopia. (Acts 8:26-29) Nomata iumi no lukim olketa angel, staka samting wea happen distaem showimaot olketa helpem preaching waka and leadim iumi for go kasem pipol “wea laek savve long laef olowe.” * (Acts 13:48) Dastawe iumi mas preach evritaem mekem iumi savve faendem pipol wea laek “worshipim [Dadi] followim holy spirit and followim samting wea tru”!—John 4:23, 24.
19, 20. Taem “world hem gogo for finis,” wanem waka nao bae olketa angel duim?
19 Jesus storyim hao long “taem wea world hem gogo for finis,” olketa angel bae “separatem nogud pipol from pipol wea obeyim God.” (Matt. 13:37-43, 49) Olketa bae garem waka tu for hipimap and markem olketa anointed Christian. (Readim Matthew 24:31; Rev. 7:1-3) Nara samting tu, olketa angel bae waka witim Jesus taem hem “separatem olketa sheepsheep from olketa goat.”—Matt. 25:31-33, 46.
20 “Taem Lord bilong iumi Jesus hem showaot from heven witim olketa strongfala angel bilong hem,” evriwan “wea no savve long God and olketa wea no obeyim gud nius abaotem Lord bilong iumi Jesus” olketa bae finis. (2 Thess. 1:6-10) John lukim vision abaotem sem samting tu. Hem sei Jesus witim olketa angel long heven raedem olketa white horse and faet long stretfala wei.—Rev. 19:11-14.
21. Wanem nao datfala chief angel bae duim long Satan and olketa demon?
21 John lukim tu “wanfala angel kakam daon from heven and hem garem key bilong datfala hol wea deep tumas and hem holem bigfala chain.” Disfala angel nao hem Michael, datfala chief angel, wea bae taemapem Satan and torowem hem and olketa demon go long datfala hol wea deep tumas. Bihaen Christ rul for 1,000 year, Satan and olketa demon bae kamaot for lelebet taem for testim olketa man wea perfect. Bihaen datwan, Satan and olketa wea saedem hem bae finis for olowe. (Rev. 20:1-3, 7-10; 1 John 3:8) Evriwan wea againstim God bae finis nao.
22. Wanem nao olketa angel klosap duim? Iumi mas ting hao long waka wea olketa duim?
22 Klosap nao God bae sevem iumi taem nogud world bilong Satan hem finis. Olketa angel bae duim important waka taem olketa big samting hia happen long future wea bae showimaot Jehovah nomoa fit for rul and mekem plan bilong God for earth and olketa man kamap tru. Tru tumas, olketa faithful angel “helpem pipol wea [God] bae sevem.” Dastawe iumi thankiu long Jehovah God from hem iusim olketa angel for helpem iumi duim wanem God laekem and for kasem laef olowe.
[Footnote]
^ par. 18 Lukim buk Jehovah’s Witnesses—Proclaimers of God’s Kingdom, page 549-551.
Wanem Nao Ansa Bilong Iu?
• Wanem nao olketa difren waka wea olketa angel duim?
• Wanem nao samfala angel duim long taem bilong Noah?
• God iusim olketa angel for helpem iumi long wanem wei?
• Wanem waka nao olketa faithful angel duim long taem bilong iumi?
[Olketa Study Kwestin]
[Piksa long page 21]
Olketa angel hapi for duim wanem God laekem
[Piksa long page 23]
Olsem hem happen long Daniel, olketa angel redi evritaem for duim eni samting wea God laekem
[Piksa long page 24]
No fraet bikos olketa angel helpem preaching waka!
[Credit Line]
Globe: NASA photo