Helpem Pikinini for Savve Wanem for Duim Taem Hard Samting Kamap

OLKETA young wan bilong iumi kasem staka hevi. World bilong Satan trae for pullim olketa young wan, and olketa mas againstim tu “olketa samting wea young pipol laekem.” (2 Tim. 2:​22; 1 John 5:​19) Nara samting tu, from olketa ‘tingim Nambawan God wea wakem olketa,’ olketa nara young wan tok spoelem and mekfani long olketa bikos long biliv bilong olketa. (Eccl. 12:⁠1) Wanfala brata wea nem bilong hem Vincent tingim taem wea hem smol. Hem sei: “Evritaem olketa pikinini spoelem mi, mekem mi fraet, and laek faetem mi bikos mi wanfala Witness. Staka taem hem nogud tumas, gogo mi no savve laek go long skul nao.” *

Maet olketa pikinini bilong iumi laek for olsem olketa wea sem age witim olketa tu and datwan hem wanfala hevi for olketa. Cathleen, wanfala sista wea 16 year hem sei: “Hem no isi taem olketa narawan ting long iu olsem iu no semsem witim olketa.” Alan, wanfala  young brata wea 21 year hem sei: “Staka taem olketa skulfren askem mi for go witim olketa long weekend and mi laek tumas for go witim olketa.” Olketa young wan savve laek tumas tu for joinim sports long skul bat datwan savve mekem olketa kaban witim olketa pikinini wea garem nogud wei. Tanya, wanfala sista wea 19 year hem sei: “Mi laek tumas for pleim sports. Olketa coach long skul evritaem trae for mekem mi plei long skul team. Hem no isi for talem olketa bae mi no joinim skul team.”

Hao nao bae iu helpem pikinini bilong iu for savve wanem for duim taem hard samting kamap? Jehovah talem dadi and mami for helpem pikinini bilong olketa for disaedem stret samting. (Prov. 22:6; Eph. 6:⁠4) Dadi and mami wea worshipim God laek helpem pikinini for laek obeyim Jehovah. (Prov. 6:​20-​23) Sapos dadi and mami duim olsem, taem tufala no stap, pikinini bae disaed seleva for no followim wei bilong world.

Hem no isi for dadi and mami duim evri samting olsem waka for selen, lukaftarem famili, and duim olketa samting long kongregeson. Samfala famili wea duim olsem garem dadi or mami nomoa, or dadi or mami nomoa worshipim Jehovah. Nomata olsem, Jehovah laekem dadi and mami for markem taem for teachim and helpem pikinini. So wanem nao iu savve duim for helpem pikinini taem narawan wea sem age witim hem trae for switim hem for duim nogud samting, taem hem kasem test, and taem narawan spoelem hem?

Fren Gud Witim Jehovah

Olketa pikinini bilong iumi mas bilivim Jehovah hem really stap and hem savve helpem olketa. Hem mas olsem olketa ‘lukim God nomata no eniwan savve lukim God.’ (Heb. 11:27) Vincent wea iumi storyim finis tingim wanem dadi and mami bilong hem duim for helpem hem fren gud witim Jehovah. Hem sei: “Tufala helpem mi for luksavve hem important tumas for prea. Mi tingim yet taem mi smol, mi savve prea long Jehovah evri naet bifor mi sleep. Mi bilivim Jehovah hem really stap.” Waswe, iu prea witim olketa pikinini bilong iu? Hem bae gud tumas sapos iu lisin long olketa pikinini bilong iu taem olketa prea long Jehovah! Waswe, olketa talem nomoa sem toktok olowe? Or waswe, taem olketa prea olketa talemaot tingting bilong olketa abaotem Jehovah? Sapos iu lisin long pikinini  bilong iu taem hem prea, iu bae luksavve sapos hem fren gud witim Jehovah or nomoa.

Olketa young wan savve fren gud witim Jehovah tu taem olketa readim Bible seleva. Cathleen, wea iumi storyim finis, hem sei: “Taem mi smol yet, wei for readim full Bible seleva hem helpem mi. Datwan mekem mi savve nomata pipol againstim mi, Jehovah bae helpem mi.” Waswe, olketa pikinini bilong iu readim Bible seleva evriday?​—⁠Ps. 1:​1-3; 77:⁠12.

Evri pikinini no semsem long wei wea olketa followim wanem dadi and mami talem. Wei wea pikinini fren gud witim Jehovah hem depend tu long age bilong hem. Bat sapos dadi and mami no helpem olketa young wan, hard for olketa savve Jehovah hem really stap. Dadi and mami mas evritaem lanem toktok bilong God long olketa pikinini mekem nomata wea nao olketa pikinini stap, olketa savve long tingting bilong Jehovah abaotem olketa samting. (Deut. 6:​6-9) Olketa pikinini mas luksavve Jehovah barava tingim olketa.

Hao for Story Gud Witim Pikinini

Nara important samting for helpem pikinini hem for story witim hem. Diswan no minim for toktok witim hem nomoa bat hem minim for story gud witim hem. Iu savve askem olketa kwestin and weit for herem ansa bilong hem nomata samting wea hem talem hem no mas here stret long iu. Anne wea garem tufala boy, hem sei: “Mi askem olketa kwestin for savve long tingting bilong olketa pikinini and for savve long samting wea kasem olketa.” Waswe, pikinini feel savve iu lisin long hem taem hem story? Tanya wea iumi storyim finis, hem sei: “Dadi and mami bilong mi barava lisin gud taem mi story and tufala no forgetim olketa samting wea mifala storyim. Tufala savve long nem bilong olketa pikinini long class bilong mi. Tufala savve ask abaotem olketa hia and abaotem olketa samting wea mi thrifala storyim finis.” Hem important for lisin gud  long pikinini taem hem story and no forgetim wanem iufala storyim finis. Diswan nao hem gudfala wei for story.

Long staka famili, taem for kaikai nao hem taem wea olketa savve story gud tugeta. Vincent hem sei: “Long famili bilong mifala, hem important for mifala kaikai tugeta. Sapos hem fitim, mifala evriwan mas kaikai tugeta. Long taem for kaikai, dadi and mami no letem eniwan lukluk long television, herehere long radio, or readim eni buk. Long taem hia nao mifala savve story abaotem enikaen samting and diswan hem barava helpem mi for winim olketa hardfala samting wea happen long skul.” Hem sei: “From mi getius for story witim dadi and mami long taem for kaikai, datwan helpem mi for no fraet for story witim tufala taem mi needim tufala for helpem mi long eni bigfala samting wea kamap.”

Tingim diswan, ‘Haomas taem long week nao mifala evriwan long famili kaikai tugeta?’ Waswe, iu need for changem samfala samting mekem iu savve garem moa taem for story gud witim olketa pikinini bilong iu?

Why Hem Important for Practice

Taem famili duim Famili Worship tugeta evri week, diswan savve helpem evriwan for story gud and hem helpem olketa pikinini for savve wanem for duim taem olketa kasem problem. Alan wea iumi storyim finis, hem sei: “Long taem for famili study dadi and mami savve askem olketa kwestin for savve long tingting bilong mifala. Olketa storyim olketa samting wea savve helpem mifala.” Mami bilong Alan hem sei: “Long taem for famili study, mifala practice tu witim olketa pikinini. Diswan helpem olketa pikinini for savve hao for storyim biliv bilong olketa and for pruvim long pipol wanem olketa bilivim hem tru. Diswan mekem olketa savve wanem for duim taem hard samting kamap.”

Tru tumas, taem pikinini kasem hevi from olketa narawan, hem mas no just sei no long olketa and go from olketa bat hem mas duim nara samting tu. Hem mas talem why nao hem no duim datfala samting. Hem mas savve wanem for duim taem narawan tok spoelem hem from biliv bilong hem. Sapos hem no savve  wanem for talem for sapotim wanem hem bilivim, hard for hem saedem tru worship. Taem dadi and mami practice staka taem witim pikinini, datwan bae helpem hem for savve wanem for duim.

Box long page 18 storyim samfala samting wea famili savve actim long taem for Famili Worship. Actim really samting wea savve happen and taem pikinini ansarem kwestin, askem samfala nara kwestin moa. Iu savve storyim tu samfala gud samting wea iumi lanem from pipol wea Bible storyim. Taem iu lanem pikinini olsem long haos, hem bae savve wanem for duim taem hard samting kamap long skul or long eni nara ples.

Waswe, Haos Bilong Iu Hem Wanfala Sef Ples?

Waswe, haos bilong iu hem ples wea olketa pikinini laek tumas for kam bak long hem bihaen olketa finis skul evriday? Sapos olsem, datwan bae helpem olketa for savve wanem for duim taem hard samting kamap. Wanfala sista wea distaem hem waka long Bethel, hem sei: “Taem mi smol, wanfala samting wea helpem mi nao hem taem mi kam bak long haos mi no savve fraet long eni samting. Nomata samting wea happen long skul hem nogud tumas, mi savve taem mi go long haos, bae mi feel sef long there.” Waswe long haos bilong iu? Waswe, hem ples wea iufala ‘kros, raoa, and wei for divaed’ hem happen evritaem, or hem ples wea evriwan garem ‘love, hapi, and stap gud’? (Gal. 5:​19-​23) Sapos iufala no stap gud, waswe, iu trae for tingim wanem samting nao iu need for duim mekem haos bilong iu hem sef ples for olketa pikinini stap long hem?

Nara samting wea iu savve duim for helpem pikinini, hem for invaetem olketa long kongregeson for kaban witim hem. Waswe, iu savve askem samfala mature Christian for joinim hapitaem bilong famili bilong iu? Or waswe, iu savve askem traveling overseer or olketa narawan wea duim full-taem service for kaikai witim iufala long haos? Waswe, iu savve long eni missionary or Bethelite wea pikinini bilong iu savve fren witim hem long wei for raetem leta, e-mail, or samfala taem ringim hem? Taem pikinini garem olketa fren olsem, datwan bae helpem hem for followim stretfala wei and garem olketa spiritual goal. Tingim gud samting wea Timothy kasem from aposol Paul. (2 Tim. 1:​13; 3:​10) From Paul fren gud witim Timothy, datwan mekem Timothy tingting strong long olketa spiritual goal bilong hem.​—⁠1 Cor. 4:​17.

Praisem Pikinini Bilong Iu

Jehovah hapi tumas for lukim olketa young wan duim stret samting nomata olketa kasem staka hevi from world bilong Satan. (Ps. 147:11; Prov. 27:11) Iu tu hapi for lukim olketa young wan worshipim Jehovah. (Prov. 10:⁠1) Talem pikinini iu tinghae long hem and praisem hem. Jehovah showimaot gudfala example for olketa dadi and mami followim. Taem Jesus baptaes, Jehovah hem sei: “Iu nao Son bilong mi wea mi barava lovem. Mi hapi tumas long iu.” (Mark 1:​11) Toktok wea Jehovah talem long Jesus barava strongim Jesus for winim olketa hard samting wea hem bae kasem! So talem long pikinini iu lovem hem and praisem hem long olketa samting wea hem duim.

Hem tru, iu hard for stopem wei wea olketa narawan trae for switim pikinini for duim nogud samting, spoelem hem, and mekfani long hem. Bat iu savve duim staka samting for helpem hem. Wanem nao iu savve duim? Helpem pikinini for fren gud witim Jehovah. Duim samting wea mekem evriwan long famili savve story gud tugeta. Duim samting long famili study wea bae helpem evriwan and duim samting for mekem haos bilong iu wanfala sef ples. Taem iu duim olsem, datwan bae helpem pikinini savve wanem for duim taem hard samting kamap.

[Footnote]

[Box/Piksa long page 18]

WEI FOR PRACTICE SAVVE HELP

Samfala samting hia nao savve kasem olketa young wan bilong iumi. Hem gud for practicem samfala samting hia long taem for Famili Worship!

▸ Coach askem pikinini bilong iu for joinim skul team.

▸ Taem pikinini bilong iu kakam bak from skul, nara pikinini laek givim smoke long hem.

▸ Samfala boy sei olketa bae killim pikinini bilong iu sapos olketa lukim hem preach.

▸ Taem pikinini bilong iu duim haos tu haos, hem meetim skulfren.

▸ Long class, teacher askem pikinini why nao hem no salutim flag.

▸ Wanfala boy evritaem mekfani long pikinini bilong iu from hem wanfala Witness.

[Piksa long page 17]

Waswe, pikinini bilong iu readim Bible seleva evriday?

[Piksa long page 19]

Waswe, iu askem olketa mature Christian for joinim hapitaem bilong famili bilong iu?