Wei Bilong Jehovah for Rul Nao Nambawan!
Wei Bilong Jehovah for Rul Nao Nambawan!
“Barava Haefala God nao hem Ruler long olketa kingdom bilong man.”—DAN. 4:17.
1, 2. Wanem nao samfala samting wea showimaot rul bilong man hem fail?
EVRI gavman bilong man hem fail nomoa! Main samting wea mekem olketa fail nao hem bikos olketa no garem wisdom for rulim gud olketa seleva. Distaem iumi barava luksavve rul bilong man hem fail bikos staka bigman wea rul ‘lovem olketa seleva, laekem tumas selen, mekhae long seleva, praod tumas, no faithful, no savve agree, tok laea for spoelem narawan, no savve kontrolem seleva, raf tumas, no laekem gud samting, duim nogud samting long fren bilong olketa, and enikaen tumas.’—2 Tim. 3:2-4.
2 Adam and Eve no laekem God for rulim olketa. Maet olketa tingse bae olketa free and no stap anda long eniwan, batawea Satan nao rulim tufala. Hem nao “rulim disfala world” and long 6,000 year wea olketa man rulim olketa seleva anda long paoa bilong hem, laef bilong olketa man hem barava nogud tumas. (John 12:31) Disfala buk The Oxford History of the Twentieth Century sei hem hard for “evri samting long world kamap gud.” Buk hia sei: “Man hard for mekem evri samting long world kamap gud, and eni samting wea hem duim for trae mekem diswan kamap hem lead go long nogud samting nomoa, . . . and olketa bigfala war.” Datwan barava showimaot rul bilong olketa man hem fail nomoa!
3. Sapos Adam and Eve no sin, rul bilong God bae hao?
3 Hem barava nogud tumas taem Adam and Eve no laekem God for rulim olketa, bikos rul bilong God nomoa savve mekem man kasem gud samting! Hem tru, iumi no barava savve hao Jehovah bae rulim iumi sapos Adam and Eve no sin. Bat iumi savve hem bae showimaot love and no favorim eniwan sapos evri man laekem hem for rulim olketa. (Acts 10:34; 1 John 4:8) Iumi savve tu sapos olketa man laekem Jehovah for rulim olketa, bae iumi no kasem olketa nogud samting wea kamaot from rul bilong man bikos God hem wise tumas. Sapos God rulim iumi, hem bae ‘givim iumi evri samting wea iumi laekem.’ (Ps. 145:16) Tru samting nao, rul bilong God bae perfect. (Deut. 32:4) Bat from olketa man no laekem God for rulim olketa, barava nogud samting nao kasem olketa!
4. Wanem samting nao Jehovah letem Satan for duim?
4 Nomata Jehovah letem olketa man for rulim olketa seleva, hem no givim right bilong hem for rul long eniwan. King bilong Babylon bifor mas luksavve “Barava Haefala God nao hem Ruler long olketa kingdom bilong man.” (Dan. 4:17) Gogo Kingdom bilong God bae mekem samting wea hem plan for duim long earth kamap tru. (Matt. 6:10) Hem tru, Jehovah letem Satan for rul olsem “god bilong disfala world” for lelebet taem mekem pipol luksavve samting wea Satan talem hem no stret. (2 Cor. 4:4; 1 John 5:19) Bat Jehovah putim spialaen for Satan mas no ovarem. (2 Chron. 20:6; markem witim Job 1:11, 12; 2:3-6.) And nomata disfala enemy bilong God hem rulim world, samfala pipol stap wea chus for stap anda long God.
Taem God Rulim Olketa Israelite
5. Wanem nao olketa Israelite promis for duim?
5 Start long taem bilong Abel, staka pipol faithful for worshipim Jehovah and obeyim hem. (Heb. 11:4-22) Then long taem bilong Moses, Jehovah mekem agreement witim olketa wea kam from laen bilong Jacob, and olketa hia kamap nation bilong Israel. Long 1513 B.C.E., olketa Israelite promis for stap anda long rul bilong Jehovah taem olketa sei: “Bae mifala duim evri samting wea Jehovah talem.”—Ex. 19:8.
6, 7. Taem God rulim olketa Israelite, wanem nao diswan showimaot abaotem hem?
6 Jehovah garem plan dastawe hem chusim olketa Israelite for kamap pipol bilong hem. (Readim Deuteronomy 7:7, 8.) Hem tru, Jehovah tingim olketa Israelite and laek helpem olketa. Bat hem tingim tu nem bilong hem and wei wea hem fit for rul. Diswan nao barava important samting long hem. Samting wea olketa Israelite duim bae showimaot long pipol Jehovah nao trufala God. (Isa. 43:10; 44:6-8) Dastawe Jehovah talem Moses for sei long olketa Israelite: “Iufala nao holy pipol bilong Jehovah, wea hem God bilong iufala. Jehovah chusim iufala from evri nara pipol long disfala world. Hem chusim iufala nomoa for kamap spesol pipol bilong hem.”—Deut. 14:2.
7 Taem God rulim olketa Israelite, hem luksavve olketa no perfect. Bat olketa law bilong God hem perfect and showimaot olketa wei bilong hem. Olketa law wea Jehovah givim long Moses mekhae long wei wea God hem holy, hem evritaem duim stret samting, hem willing for forgive, and hem patient. Long taem bilong Joshua, olketa Israelite obeyim olketa law bilong Jehovah and olketa garem peace and fren gud witim Jehovah. (Josh. 24:21, 22, 31) Samting wea happen long datfala taem showimaot rul bilong Jehovah nao nambawan.
Rul Bilong Man Mekem Pipol Kasem Nogud Samting
8, 9. Wanem samting nao olketa Israelite laekem, and wanem nao kamaot from datwan?
8 Bat staka taem olketa Israelite no laek stap anda long rul bilong God and from datwan hem no protectim olketa nao. Gogo olketa Israelite talem Samuel olketa laekem wanfala man nao for rulim olketa. Jehovah talem Samuel for duim wanem olketa laekem. Bat Jehovah sei long Samuel: “Olketa no les long iu bat mi nao olketa les for mi king ovarem olketa.” (1 Sam. 8:7) Nomata Jehovah letem olketa Israelite for garem king, hem sei bae olketa kasem nogud samting from datwan.—Readim 1 Samuel 8:9-18.
9 Samting wea happen long history showimaot wanem Jehovah talem hem tru. Olketa Israelite kasem olketa bigfala problem taem olketa man rulim olketa and hem worse go moa taem king hem no faithful long God. Taem iumi tingim samting wea happen long Israel bifor, iumi no sapraes hao olketa gavman bilong man wea no savve long Jehovah nating mekem pipol kasem gud samting for olowe. Nomata samfala long gavman prea long God for hem blessim waka bilong olketa for mekem pipol garem peace and stap sef, hard tumas for God blessim olketa man wea no laek stap anda long rul bilong hem!—Ps. 2:10-12.
Niu Nation wea Stap Anda Long Rul Bilong God
10. Why nao God chusim wanfala niu nation for changem nation bilong Israel?
10 Nation bilong Israel duim olketa samting wea showimaot olketa no laek faithful long Jehovah. Gogo olketa les long Messiah wea God markem, and Jehovah no ting long olketa Israelite olsem pipol bilong hem nao. Dastawe Jehovah chusim wanfala sekson for kamap niu nation bilong hem. So long 33 C.E., God anointim olketa wea worshipim hem and long datfala taem Christian kongregeson hem start. Olketa anointed Christian nao datfala niu nation wea stap anda long rul bilong Jehovah. Paul sei datfala nation nao hem “Israel bilong God.”—Gal. 6:16.
11, 12. Wanem nao nation bilong Israel and datfala “Israel bilong God” semsem long hem?
11 Nation bilong Israel and datfala “Israel bilong God” semsem long samfala samting bat difren long samfala samting tu. Nation bilong Israel garem man wea king, bat Christian kongregeson no olsem. Olketa Israelite mas sakrifaesim olketa animal mekem God forgivim olketa, bat olketa long Christian kongregeson no need for duim datwan. Wanfala samting wea tufala nation hia semsem long hem nao, tufala garem olketa elder. (Ex. 19:3-8) Olketa Christian elder no bossim olketa sheepsheep, bat olketa lukaftarem kongregeson and leadim waka wea olketa Christian duim. Olketa lovem evriwan insaed kongregeson and respectim olketa.—2 Cor. 1:24; 1 Pet. 5:2, 3.
12 Taem olketa Christian elder ting raonem wei wea Jehovah rulim olketa Israelite bifor long kaenfala wei, datwan mekem olketa barava tinghae long wei bilong Jehovah for rul. (John 10:16) Long Israel bifor, taem olketa king duim nogud samting, olketa Israelite duim nogud samting tu. And taem olketa king duim gud samting, olketa Israelite duim gud samting tu. So diswan helpem olketa elder luksavve nomata olketa no rul ovarem pipol olsem olketa king bifor, olketa mas garem faith and evritaem showimaot gudfala example.—Heb. 13:7.
Wei wea Jehovah Rul Distaem
13. Wanem important samting nao happen long 1914?
13 Olketa Christian distaem talem pipol long world hao rul bilong olketa man hem klosap finis. Long 1914, Kingdom bilong Jehovah hem start for rul long heven and Jesus Christ hem kamap King. Long datfala taem, God givim paoa long Jesus for “go faetem olketa enemy and winim olketa.” (Rev. 6:2) God talem Jesus: “Go midolwan long olketa enemy bilong iu and bae iu garem bigfala paoa ovarem olketa.” (Ps. 110:2) Sorre samting nao, pipol no laek for stap anda long rul bilong Jehovah. Olketa gohed duim samting wea showimaot hao olketa tingse “Jehovah nating stap nomoa.”—Ps. 14:1.
14, 15. (a) Long wanem wei nao Kingdom bilong God rulim iumi distaem? Olketa wanem kwestin nao hem gud for iumi tingim? (b) Wanem nao happen distaem wea showimaot rul bilong God hem nambawan?
14 Samfala long datfala “Israel bilong God” stap yet distaem, and olketa hia nao olketa brata bilong Jesus wea gohed “duim waka for Christ.” (2 Cor. 5:20) Olketa kamap datfala wakaman wea faithful and wise for lukaftarem and givim spiritual kaikai long olketa anointed Christian and bigfala sekson wea garem hope for laef olowe long earth. (Matt. 24:45-47; Rev. 7:9-15) Olketa blessing wea olketa tru Christian kasem distaem showimaot Jehovah hapi long wanem datfala wakaman hem duim.
15 Hem gud for iumi evriwan tingim diswan: ‘Waswe, mi luksavve long waka wea mi mas duim long kongregeson? Waswe, mi barava sapotim rul bilong Jehovah? Waswe, mi hapi for stap anda long Kingdom bilong Jehovah? Waswe, mi disaed strong for duim best bilong mi for talem pipol abaotem Kingdom bilong God?’ Iumi evriwan hapi for followim wanem Governing Body talem and waka tugeta witim olketa elder long kongregeson. Taem iumi duim olketa samting hia, iumi showimaot iumi laekem God for rulim iumi. (Readim Hebrews 13:17.) From iumi hapi for stap anda long rul bilong God, datwan mekem iumi wan mind. Diswan hem spesol samting bikos pipol long world no olsem. Nara samting tu, iumi stap gud, duim stret samting, and mekhae long Jehovah. Olketa samting hia showimaot wei bilong Jehovah for rul hem nambawan.
Rul Bilong Jehovah Nambawan
16. Evriwan distaem mas disaedem wanem samting?
16 Klosap nao Jehovah bae stretem olketa nogud samting wea kamap long Eden. Dastawe pipol distaem mas disaedem hu nao bae olketa sapotim. Waswe, bae olketa sapotim rul bilong Jehovah or rul bilong man? Iumi nao garem privilege for helpem pipol wea hambol for disaedem stret samting. Long Armageddon, rul bilong Jehovah bae changem rul bilong olketa man wea Satan nao bihaenem and rul bilong Jehovah nomoa bae stap for olowe. (Dan. 2:44; Rev. 16:16) Rul bilong olketa man bae finis, bat Kingdom bilong God bae rulim full earth. Evri samting wea happen bae showimaot wei bilong Jehovah for rul hem nambawan.—Readim Revelation 21:3-5.
17. Wanem nao olketa samting wea savve helpem hambol pipol for chus for sapotim rul bilong God?
17 Olketa wea no disaed yet for sapotim rul bilong Jehovah shud prea abaotem diswan and tingim olketa gud samting wea rul bilong God bae duim for olketa man. Olketa man wea rul no savve finisim problem olsem crime and terrorism. Bat rul bilong God bae finisim evri rabis man. (Ps. 37:1, 2, 9) Rul bilong olketa man mekem staka war kamap, bat rul bilong God bae “finisim olketa war long full earth.” (Ps. 46:9) Rul bilong God bae mekem olketa man and animal stap gud tugeta tu! (Isa. 11:6-9) Start long bifor kam kasem distaem, rul bilong olketa man mekem pipol poor and hangre, bat rul bilong God bae finisim diswan. (Isa. 65:21) Nomata olketa man trae hard for finisim sik and dae, olketa no savve duim datwan. Bat rul bilong God bae mekem olketa wea sik kamap gud and olketa wea olo kamap young moa. (Job 33:25; Isa. 35:5, 6) Tru tumas, earth bae kamap paradaes and pipol wea dae finis bae laef bak tu.—Luke 23:43; Acts 24:15.
18. Wanem nao iumi savve duim for showimaot iumi bilivim wei bilong God for rul nao hem nambawan?
18 Tru tumas, rul bilong God bae stretem evri nogud samting wea Satan duim taem hem switim Adam and Eve for againstim God. And tingim, Satan spoelem olketa man for samting olsem 6,000 year finis, bat God bae iusim Christ for stretem olketa nogud samting hia insaed 1,000 year nomoa! Diswan barava showimaot wei bilong God for rul hem nambawan! From iumi pipol bilong God, iumi sapotim rul bilong hem. Dastawe long evri samting wea iumi duim, iumi showimaot iumi worshipim Jehovah, stap anda long Kingdom bilong hem, and hapi tumas from iumi olketa Witness bilong hem. And iumi laek for talem evriwan wea laek lisin hao wei bilong Jehovah for rul nao nambawan.
Review
• Wanem nao Deuteronomy 7:7, 8 talem abaotem why God chusim olketa Israelite for kamap pipol bilong hem?
• Long 1 Samuel 8:9-18, wanem nao Jehovah sei bae kasem olketa Israelite from olketa laekem man for rulim olketa?
• Olsem Hebrews 13:17 talem, wanem nao iumi savve duim for showimaot iumi laekem God for rulim iumi?
• Wanem nao Revelation 21:3-5 sei God bae duim for showimaot rul bilong hem nao nambawan?
[Olketa Study Kwestin]
[Olketa piksa long page 29]
Jehovah no givim right bilong hem for rul long eniwan
[Piksa long page 31]
From olketa Christian hapi for stap anda long rul bilong Jehovah, diswan mekem olketa wan mind