Wei Bilong Satan for Rul Hem Fail Nomoa
Wei Bilong Satan for Rul Hem Fail Nomoa
“Rabis man bae no kasem eni gud samting nomoa.”—ECCL. 8:13.
1. Why nao iumi hapi tumas for savve God bae judgem rabis pipol?
KLOSAP nao God bae judgem rabis pipol. Olketa bae kasem nogud samting from wanem olketa duim. (Prov. 5:22; Eccl. 8:12, 13) Diswan barava strongim pipol wea duim stret samting and wea kasem nogud samting from wanem rabis pipol duim. Main wan wea God bae judgem nao hem Satan, wea hem startim wei for duim nogud samting.—John 8:44.
2. Why nao Jehovah no stretem kwiktaem samting wea happen long Eden?
2 From Satan tinghae tumas long hemseleva, hem switim Adam and Eve for no laekem Jehovah for rulim olketa. From diswan, tufala saedem Satan for againstim wei wea Jehovah fit for rul and tufala sin nao. (Rom. 5:12-14) Hem tru, Jehovah savve finis nogud samting wea bae happen bikos olketa no respectim hem and olketa bighed. Nomata olsem, evriwan long heven and long earth need for luksavve long datwan. Dastawe Jehovah no stretem kwiktaem samting wea happen long Eden bat hem letem olketa gohed followim tingting bilong olketa seleva mekem pipol luksavve wanem Satan, Adam, and Eve duim hem barava rong.
3. Iumi shud ting hao long olketa gavman bilong man?
3 From olketa man no laekem Jehovah for rulim olketa, olketa startim olketa difren kaen gavman. Taem aposol Paul raet long olketa Christian long Rome, hem sei olketa mas stap anda long “olketa gavman wea rulim” olketa. Long taem bilong Paul, man wea rulim gavman bilong Rome hem Emperor Nero, wea start for rul long 54 C.E. go kasem 68 C.E. Paul sei ‘God nao letem olketa gavman for stap long position bilong olketa.’ (Readim Romans 13:1, 2.) So waswe, diswan minim Paul talem olketa Christian for sapotim gavman bilong man and no rul bilong God? Nomoa. Paul minim sapos Jehovah letem olketa gavman bilong man for rul, iumi mas respectim “arrangement bilong God” and acceptim olketa for rulim iumi.
Chusim Nogud Samting
4. Storyim why nao gavman bilong man hem fail nomoa.
4 Nomata God letem olketa gavman bilong man for rul, olketa gavman hia wea Satan bihaenem hem fail nomoa. Why nao olsem? Wei bilong olketa for rul hem no followim tingting bilong God. Jehovah nomoa barava wise. Hem nomoa savve best wei for rulim olketa man. (Jer. 8:9; Rom. 16:27) Plande taem man duim samting firstaem bifor hem savve sapos datwan bae gud or nomoa, bat Jehovah no olsem. Hem savve wanem nao best samting for duim. Eni gavman wea no followim wanem God talem hem fail nomoa. Dastawe start long bifor yet, wei bilong Satan for rul hem fail bikos hem no followim tingting bilong God and hem tingim hemseleva tu.
5, 6. Luk olsem wanem nao mekem Satan for againstim Jehovah?
5 Man wea garem gudfala tingting bae no duim eni samting wea hem savve bae nogud samting kamaot from datwan. Sapos hem duim olsem, bae gogo hem mas luksavve datwan hem rong. Olketa samting wea happen long history barava showimaot hem krangge nomoa for againstim God wea garem evri paoa. (Readim Proverbs 21:30.) Bat from Satan hem praod and tinghae tumas long hemseleva, hem no laek followim Jehovah. So samting wea Satan chus for duim bae mekem hem kasem barava nogud samting nomoa.
6 Wanfala king bilong Babylon praod olsem Satan taem hem sei: “Bae mi go ap long heven. Bae mi putim throne bilong mi hae winim olketa star bilong God and bae mi sidaon long maunten for meeting wea stap farawe long north. Bae mi go long olketa ples wea hae winim olketa cloud. Bae mi kamap olsem Barava Haefala God.” (Isa. 14:13-15) Plan bilong datfala king hem iusles, and hem kasem bigfala shame taem rul bilong Babylon hem finis. Klosap nao Satan and world bilong hem bae finis olsem tu.
Why Nao God Letem?
7, 8. From Jehovah letem nogud samting gohed, wanem nao samfala gud samting wea kamaot from datwan?
7 Maet samfala ting why nao Jehovah no stopem olketa man for saedem Satan and for no rulim olketa seleva. From God garem evri paoa, hem fit for stopem olketa. (Ex. 6:3) Bat hem no duim datwan. Jehovah barava wise dastawe hem savve gudfala samting bae kamap sapos hem letem olketa for gohed long bighed wei bilong olketa for lelebet taem. Gogo evriwan bae luksavve Jehovah nomoa fit for rul bikos hem raeteous and hem lovem pipol. Olketa man wea faithful long God bae kasem gud samting tu from datfala samting wea hem disaedem.
8 Sapos olketa man no followim Satan and no chus for rulim olketa seleva, bae iumi nating kasem olketa nogud samting! Nomata olsem, from Jehovah letem olketa man rulim olketa seleva, samfala gud samting kamaot from datwan. Diswan mekem pipol wea hambol luksavve hem wise for lisin long God and trustim hem. From bifor kam yet, olketa man garem olketa difren kaen gavman bat no eni gavman hia barava gud. Diswan mekem pipol wea worshipim God luksavve wei bilong Jehovah for rul nao hem nambawan. Hem tru, iumi evriwan kasem hard taem from Jehovah letem Satan rulim world. Nomata olsem, pipol wea faithful for worshipim God kasem gud samting tu from hem letem nogud samting gohed.
Bighed Wei Bilong Olketa Mekhae Long Jehovah
9, 10. Storyim hao rul bilong Satan mekhae long Jehovah.
9 Nomata Jehovah letem olketa man for followim Satan and rulim olketa seleva, diswan no showimaot rul bilong Jehovah hem nogud! Olketa samting wea happen long history showimaot toktok bilong Jeremiah hem tru. Olketa man no fit for rulim olketa seleva. (Readim Jeremiah 10:23.) Nara samting tu, from Satan hem bighed, diswan mekem Jehovah barava showimaot klia olketa nambawan wei bilong hem. Wanem nao hem duim?
10 From no eni gud samting kamaot from rul bilong Satan, iumi barava luksavve long olketa nambawan wei bilong Jehovah. Diswan mekem pipol wea lovem God for mekhae long hem. Maet diswan no here stret, bat wei bilong Satan for rul hem mekhae long God. Hem showimaot Jehovah wise tumas long wei wea hem deal witim olketa wea againstim wei wea hem fit for rul. For pruvim diswan, bae iumi storyim samfala wei bilong Jehovah and lukim hao nogud rul bilong Satan hem mekem Jehovah barava showimaot nambawan wei bilong hem.
11. Wanem nao Jehovah duim for showimaot love bilong hem?
11 Love. Bible sei “God hem love.” (1 John 4:8) Taem God wakem olketa man, datwan showimaot love bilong hem. Nambawan wei wea God wakem iumi tu showimaot love bilong hem. Jehovah givim barava naesfala ples tu for olketa man stap long hem and evri samting wea olketa needim for hapi. (Gen. 1:29-31; 2:8, 9; Ps. 139:14-16) Bat bihaen Adam and Eve sin, Jehovah showimaot love bilong hem long olketa nara wei. Wanem nao hem duim? Aposol John raetem disfala toktok bilong Jesus: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.” (John 3:16) God barava showimaot love bilong hem taem hem givim kam spesol Son bilong hem for dae for olketa man! (John 15:13) From God duim olsem, iumi tu savve showimaot love long nara pipol long wanem iumi duim evriday, olsem Jesus duim.—John 17:25, 26.
12. Long wanem wei nao Jehovah showimaot paoa bilong hem?
12 Paoa. Jehovah hem “God wea garem evri paoa,” and hem nomoa savve givim laef long evri samting. (Rev. 11:17; Ps. 36:9) Taem man hem born, hem olsem wanfala pepa wea no garem eni raeting long hem. Bat taem hem dae, datfala pepa garem staka raeting long hem. Hem storyim wanem man hia disaedem, samting wea hem duim, and samting wea kasem hem long laef, wea evri samting hia showimaot wanem kaen man nao hem. Nomata hem dae, Jehovah nating forgetim eni samting wea hem duim. Long future, Jehovah savve mekem hem laef bak and for garem moa evri tingting and wei bilong hem. (John 5:28, 29) So nomata hem no plan bilong God for olketa man dae, dae hem mekem Jehovah showimaot hem garem paoa for mekem man laef bak. Tru tumas, Jehovah hem “God wea garem evri paoa.”
13. Hao nao dae bilong Jesus showimaot Jehovah evritaem duim stret samting?
13 Evritaem Duim Stret Samting. Jehovah no savve laea and no enitaem hem duim samting wea no stret. (Deut. 32:4; Titus 1:2) Evritaem hem talem tru samting and hem duim stret samting nomata luk olsem hem bae kasem nogud samting from datwan. (Rom. 8:32) Jehovah mas sorre tumas taem hem lukim Son wea hem lovem dae long post from pipol sei Jesus talem barava nogud samting againstim God and no faithful long hem! Nomata olsem, Jehovah lovem tumas olketa man dastawe hem willing for letem Jesus dae for showimaot hem evritaem duim stret samting. (Readim Romans 5:18-21.) From pipol long world duim staka samting wea no stret, datwan mekem Jehovah barava showimaot disfala wei bilong hem for duim stret samting.
14, 15. Wanem nao samfala samting wea Jehovah duim wea showimaot hem barava wise and patient?
14 Wisdom. Taem Adam and Eve sin, semtaem nomoa Jehovah talem wanem hem bae duim for stretem olketa nogud samting wea kamaot from datwan. (Gen. 3:15) From Jehovah kwiktaem for duim diswan and hem isisi tu for showimaot olketa samting wea hem bae duim for mekem disfala plan bilong hem kamap tru, datwan showimaot wisdom bilong Jehovah hem big tumas. (Rom. 11:33) No eni samting savve stopem God for duim wanem hem planim. From staka pipol long world durong, olketa war gohed, pipol no garem gudfala tingting, no obey, no sorre and kaen long narawan, favorim narawan, and laea long wei bilong olketa, evri samting hia mekem Jehovah garem chance for showim long pipol wanem nao wise samting for duim. Disaepol James sei: “Man wea garem wisdom wea kam from God hem garem gudfala wei. Hem stap gud witim narawan, no ova tumas, hapi for obey, sorre and kaen long pipol and duim olketa gudfala samting. Hem no favorim eniwan and hem no laea long wei bilong hem.”—Jas. 3:17.
15 Patient. Sapos iumi perfect and iumi no savve sin, maet hem hard lelebet for luksavve Jehovah hem patient. Bat from iumi sin, Jehovah barava showimaot disfala wei. From hem patient for staka thousand year finis, diswan showimaot no eniwan winim hem long wei for patient, and iumi shud tinghae long diswan. Aposol Peter sei iumi mas “tingim hao Lord hem laek sevem iumi dastawe hem patient witim iumi.”—2 Pet. 3:9, 15.
16. Why nao iumi hapi tumas from Jehovah willing for forgivim iumi?
16 Willing for Forgive. Iumi evriwan sin and staka taem iumi duim samting wea no stret. (Jas. 3:2; 1 John 1:8, 9) Iumi shud barava tinghae long Jehovah bikos hem willing for forgivim iumi “staka taem”! (Isa. 55:7) Nara samting tu, from iumi born sin and savve duim samting wea no stret, iumi barava hapi tumas taem God forgivim iumi. (Ps. 51:5, 9, 17) Taem Jehovah forgivim iumi olsem, datwan mekem iumi barava lovem hem and strongim iumi tu for followim example bilong hem for forgivim narawan.—Readim Colossians 3:13.
Why Disfala World Hem Nogud Tumas
17, 18. Long olketa wanem wei nao rul bilong Satan hem fail?
17 Kam kasem distaem evri gavman wea Satan iusim hem fail nomoa. Satan switim Adam and Eve, and tufala chus for rulim olketa seleva winim wei for Jehovah rulim olketa. Disfala wei wea tufala startim for man rulim olketa seleva hem fail nomoa. Olketa nogud samting wea pipol kasem showimaot olketa man nating fit for rulim olketa seleva.
18 Wei bilong Satan for rul showimaot hem tingim hemseleva nomoa and datwan mekem nara pipol tu for olsem hem. Bat rul bilong Satan no savve winim rul bilong Jehovah bikos Jehovah showimaot love and hem no selfish olsem Satan. Rul bilong Satan nating mekem pipol stap gud, hapi, and feel sef. Diswan showimaot wei bilong Jehovah for rul nao hem nambawan! Waswe, eni samting wea happen distaem showimaot diswan hem tru? Ia. Bae iumi storyim long study bihaen diswan.
Review
• Wanem nao Romans 13:1, 2 talem abaotem hao iumi shud ting long olketa gavman bilong man?
• Proverbs 21:30 sei wanem nao bae kasem man wea againstim Jehovah?
• Wanem nao Jeremiah 10:23 talem abaotem wei wea olketa man rulim olketa seleva?
• From Adam and Eve sin, wanem nao Colossians 3:13 showimaot abaotem wei bilong Jehovah?
[Olketa Study Kwestin]
[Olketa Piksa long page 25]
Pipol nating kasem gud samting from rul bilong Satan
[Credit Lines]
U.S. Army photo
WHO photo by P. Almasy
[Piksa long page 26]
Jehovah garem paoa for mekem pipol laef bak
[Piksa long page 27]
Jehovah showimaot hem lovem pipol and duim stret samting taem hem letem Son bilong hem for dae