Why Nao Iu Shud Dedicate Long Jehovah?
Why Nao Iu Shud Dedicate Long Jehovah?
“Last naet, God wea mi worshipim hem sendem wanfala angel kam long mi.”—ACTS 27:23.
1. Wanem nao olketa wea redi for baptaes duim finis? Diswan mekem iumi tingim olketa wanem kwestin?
“LONG sakrifaes bilong Jesus Christ, waswe, iu repent from olketa sin bilong iu and dedicatem iuseleva long Jehovah for duim wanem hem laekem?” Hem nao wanfala long tufala kwestin wea olketa wea redi for baptaes ansarem long end bilong baptism tok. Why nao olketa Christian mas dedicate long Jehovah? Wanem gud samting nao iumi kasem sapos iumi dedicate long God? Why nao God no acceptim worship bilong man sapos hem no dedicate long hem? Iumi bae savve long ansa bilong olketa kwestin hia taem iumi storyim wanem nao hem minim for dedicate.
2. Wanem nao hem minim for dedicate long Jehovah?
2 Wanem nao hem minim for dedicate long God? Tingim wanem aposol Paul talem abaotem wei wea hem fren witim God. Paul talem long staka narawan wea stap insaed ship wea klosap for sink daon hao Jehovah ‘hem God wea hem worshipim.’ (Readim Acts 27:22-24.) Evri trufala Christian worshipim Jehovah. Bat pipol long world “stap anda long paoa bilong Satan.” (1 John 5:19) Taem olketa Christian prea long Jehovah for dedicatem olketa seleva long hem, Jehovah hem God bilong olketa nao. Diswan hem samting wea man seleva nao promis for duim. Then bihaen hem baptaes.
3. Why nao Jesus baptaes? Wanem nao iumi savve duim for followim hem?
3 Jesus showimaot gudfala wei for iumi followim taem hem chus for duim wanem God laekem. Taem Jesus hem born, hem born long nation wea dedicate finis long God. So Jesus no baptaes from hem laek for dedicate long Jehovah, bat Bible showimaot Jesus hem sei: ‘Mi kam for duim wanem God laekem.’ (Heb. 10:7; Luke 3:21) So taem Jesus baptaes, datwan showimaot hem laek for duim wanem Dadi bilong hem laekem. Olketa wea followim hem duim sem samting tu taem olketa baptaes. Bat taem olketa baptaes, datwan showimaot long evriwan olketa prea finis for dedicate long God.
Gud Samting Iumi Kasem Taem Iumi Dedicate Long God
4. Wanem nao iumi lanem from David and Jonathan abaotem wei for fren?
4 Taem iumi dedicate long God, datwan hem bigfala samting and hem no olsem wanfala agreement nomoa. Hem barava important promis wea iumi talem long God. Bat wanem gud samting nao iumi kasem sapos iumi dedicate long God? Tingim olketa gudfala samting wea man kasem taem hem mekem promis witim narawan. Tingim wei for fren. Sapos iu laekem man for fren gud witim iu, iu tu mas fren gud witim hem. Iu duim olketa samting wea showimaot iu barava tingim fren bilong iu. Bible storyim David and Jonathan nao barava fren gud tugeta. Tufala promis tu for fren gud for olowe. (Readim 1 Samuel 17:57; 18:1, 3.) Staka man no fren gud olsem. Nomata olsem, tufala wea fren savve gohed fren gud sapos tufala duim olketa samting wea showimaot olketa barava tingim narawan.—Prov. 17:17; 18:24.
5. Wanem nao slave savve duim sapos hem laek for stap olowe witim masta bilong hem?
5 Law wea God givim long olketa Israelite storyim nara gud samting wea pipol kasem taem olketa mekem agreement. Tingim long taem bilong olketa Israelite. Sapos slave laekem tumas for stap olowe witim masta bilong hem, slave hia savve mekem agreement for stap witim hem. Law hem sei: “Sapos slave hem sei, ‘Mi lovem tumas masta bilong mi, waef bilong mi, and olketa pikinini bilong mi, and mi no laek for go free,’ then masta bilong hem mas tekem slave hia for standap long door or post long door. Masta hia bae mekem hol long ear bilong slave witim sharp nila mekem trufala God hem lukim slave hia laek for stap olowe witim masta bilong hem.”—Ex. 21:5, 6.
6, 7. (a) Wanem gud samting nao pipol kasem taem olketa mekem promis or kontrak witim narawan? (b) Wanem nao diswan showimaot abaotem wei wea iumi fren witim Jehovah?
6 Hasband and waef mas waka hard for faithful long tufala, bikos marit hem no minim for saenem pepa nomoa. Man and woman wea stap tugeta bat no register, tufala no savve sapos tufala bae stap tugeta olowe taem problem kamap, and olketa pikinini bilong tufala bae feel olsem tu. Bat tufala wea talem marit promis savve bae tufala waka hard for stretem eni problem wea kamap. Tufala bae duim diswan bikos tufala lovem tufala and laek followim wanem Bible talem.—Matt. 19:5, 6; 1 Cor. 13:7, 8; Heb. 13:4.
7 Long bifor, pipol kasem gud samting taem olketa mekem kontrak for duim bisnis witim nara man and taem olketa waka. (Matt. 20:1, 2, 8) Hem semsem tu distaem. Iumi savve kasem gud samting sapos iumi saenem kontrak bifor iumi startim bisnis witim narawan or iumi waka long company. So sapos pipol kasem gud samting taem olketa talem promis long fren bilong olketa, long hasband or waef bilong olketa, or taem olketa mekem kontrak for waka, iu tu bae fren gud witim Jehovah sapos iu dedicate long hem! Bae iumi storyim olketa gud samting wea pipol bifor kasem from olketa dedicate long Jehovah God, and hao diswan hem no wanfala agreement nomoa.
Gud Samting Olketa Israelite Kasem From Olketa Dedicate Long God
8. From olketa Israelite dedicate long God, wanem nao datwan minim for olketa?
8 Nation bilong Israel dedicate long Jehovah taem olketa mekem promis long hem. Jehovah talem olketa for hipap klosap long Maunt Sinai and hem sei long olketa: “Sapos iufala barava obeyim mi and keepim agreement wea mi mekem witim iufala, iufala nomoa bae spesol pipol bilong mi.” Olketa Israelite sei: “Bae mifala duim evri samting wea Jehovah talem.” (Ex. 19:4-8) From olketa Israelite dedicate long God, datwan no minim olketa promis for duim wanfala samting nomoa, bat hem minim olketa bilong Jehovah nao. Jehovah ting long olketa olsem “spesol pipol” bilong hem.
9. Wanem gud samting nao olketa Israelite kasem from olketa dedicate long God?
9 Olketa Israelite kasem gud samting from olketa kamap pipol bilong Jehovah. Jehovah faithful long olketa and lukaftarem olketa olsem mami or dadi wea lukaftarem gud pikinini bilong olketa. God sei long olketa Israelite: “Waswe, iufala tingse mami savve forgetim nomoa baby bilong hem wea hem susum? Waswe, iufala tingse hem savve les long pikinini bilong hem wea hem bornem? Olketa mami savve forgetim pikinini bilong olketa, bat mi bae nating forgetim iufala.” (Isa. 49:15) Jehovah givim Law for leadim olketa Israelite, olketa profet for strongim olketa, and olketa angel for protectim olketa. Man wea raetem psalm hem sei: “[God] talem olketa toktok bilong hem long Jacob and olketa law bilong hem long Israel. Hem no duim olsem long olketa nara nation.” (Ps. 147:19, 20; readim Psalm 34:7, 19; 48:14.) From Jehovah lukaftarem pipol bilong hem bifor, hem bae lukaftarem tu olketa wea dedicate long hem distaem.
Why Iumi Shud Dedicate Long God
10, 11. Waswe, iumi insaed big famili bilong God taem iumi born? Minim kam.
10 Taem samfala tingting for dedicate and baptaes, maet olketa ting olsem, ‘Why nao God no acceptim worship bilong mi sapos mi no dedicate long hem?’ Iumi bae savve long ansa taem iumi tingim wei wea God ting long iumi distaem. From iumi born sin, iumi evriwan no insaed famili bilong God. (Rom. 3:23; 5:12) Hem important for iumi dedicate long God sapos iumi laek for stap insaed famili bilong hem. Bae iumi storyim why nao olsem.
11 No eniwan long iumi garem really dadi wea savve mekem iumi for laef olowe. (1 Tim. 6:19) From Adam and Eve sin, iumi no olketa pikinini bilong God taem iumi born. Datwan mekem iumi no savve fren gud witim Dadi bilong iumi wea wakem iumi. (Markem witim Deuteronomy 32:5.) Start long datfala taem, olketa man no insaed long big famili bilong Jehovah.
12. (a) Wanem nao olketa man savve duim for kamap olketa pikinini bilong God? (b) Wanem nao iumi mas duim bifor iumi baptaes?
12 Iumi wanwan savve askem God for iumi kamap olketa pikinini bilong hem. * Bat from iumi sin, hao nao iumi savve kamap olketa pikinini bilong God? Aposol Paul hem sei: “Taem iumi enemy bilong God, Son bilong hem dae for iumi, mekem iumi fren bak witim hem.” (Rom. 5:10) Taem iumi baptaes, iumi askem God for iumi garem gudfala conscience wea hem hapi long hem. (1 Pet. 3:21) Bat iumi mas duim samfala samting firstaem bifor iumi baptaes. Iumi mas lane abaotem God, trustim hem, repent, and changem wei bilong iumi. (John 17:3; Acts 3:19; Heb. 11:6) Iumi mas duim nara samting tu bifor iumi savve kamap pikinini bilong God. Wanem nao datwan?
13. Why nao man mas dedicate long God sapos hem laek for insaed famili bilong hem?
13 Man mas mekem promis long Jehovah firstaem bifor hem savve kamap pikinini bilong God. For minim diswan, tingim wanfala dadi wea laek adoptim wanfala young boy wea no garem mami and dadi. Pipol savve dadi hia hem wanfala gud man. Bat bifor hem adoptim hem, hem laekem boy hia for promisim wanfala samting. So datfala dadi hem sei long boy: “Bifor mi adoptim iu, mi laek savve sapos iu bae lovem mi and respectim mi olsem dadi bilong iu.” Dadi hia bae adoptim hem long famili bilong hem sapos datfala young boy willing for mekem datfala promis. Datwan hem stret, iaman? Jehovah olsem tu. Hem acceptim nomoa olketa wea dedicate long hem for insaed long famili bilong hem. Bible sei: “Givim body bilong iufala olsem sakrifaes wea laef, dedicate long [God], and duim samting wea hem hapi long hem.”—Rom. 12:1, The New English Bible.
Wei for Dedicate Showimaot Love and Faith
14. Taem iu dedicate, wanem nao iu savve duim for showimaot iu lovem God?
14 Taem iumi dedicate long Jehovah, datwan showimaot iumi barava lovem hem. Long samfala wei hem olsem promis wea man mekem taem hem marit. Christian man promisim hem bae gohed lovem waef bilong hem and faithful long hem nomata wanem samting hem happen. Hem no talem promis for duim wanfala samting nomoa bat hem talem promis long waef bilong hem. Christian man savve hem mas talem promis bilong marit firstaem bifor hem savve stap witim gele wea hem bae maritim. Iumi olsem tu. Sapos iumi no dedicate long Jehovah, hem hard for iumi kasem evri gud samting wea olketa long famili bilong hem kasem. So nomata iumi sin, iumi dedicate long God bikos iumi laek worshipim hem and faithful long hem nomata wanem samting nao kasem iumi.—Matt. 22:37.
15. Taem iumi dedicate long God, hao nao datwan showimaot iumi garem faith long hem?
15 Taem iumi dedicate long God, iumi showimaot iumi garem faith long hem. Why nao olsem? Bikos faith wea iumi garem long Jehovah mekem iumi fren gud witim hem, wea datwan hem gud samting for iumi. (Ps. 73:28) Iumi savve hem bae no isi for worshipim God bikos iumi stap witim pipol wea “sin and wea duim samting wea no stret.” Nomata olsem, iumi trustim God for helpem iumi taem iumi worshipim hem. (Phil. 2:15; 4:13) Nomata iumi no perfect, iumi savve Jehovah bae sorre and kaen long iumi taem iumi duim samting wea no stret. (Readim Psalm 103:13, 14; Romans 7:21-25.) Iumi trustim Jehovah bae givim gud samting long iumi taem iumi disaed strong for gohed faithful long hem.—Job 27:5.
Wei for Dedicate Long God Bae Mekem Iumi Hapi
16, 17. Why nao wei for dedicate long Jehovah bae mekem iumi hapi?
16 Iumi bae hapi taem iumi dedicate long Jehovah bikos iumi givim iumiseleva long hem. Jesus talem disfala tru samting: “Man wea givim samting hem barava hapi winim man wea kasem samting.” (Acts 20:35) Taem Jesus duim ministry, hem barava hapi for duim samting for helpem narawan. Samfala taem hem no rest, hem no kaikai, and hem no garem gudfala ples for stap. Bat hem hapi for duim olsem bikos hem laek helpem pipol for savve long truth wea bae mekem olketa kasem laef. (John 4:34) Jesus hapi for duim samting wea Dadi bilong hem laekem. Hem sei: “Mi evritaem duim samting wea hem laekem.”—John 8:29; Prov. 27:11.
17 Dastawe Jesus talem samting wea savve mekem olketa follower bilong hem for hapi taem hem sei: “Sapos eniwan laek followim mi, hem mas givim laef bilong hem for God.” (Matt. 16:24) Taem iumi duim olsem, iumi bae barava fren gud witim Jehovah. Hem nao savve lukaftarem iumi gud winim eni nara man!
18. Why nao wei for gohed duim samting wea God laekem mekem man hapi winim wei for givim laef bilong hem for duim nara samting or long nara man?
18 Taem iumi dedicate long Jehovah and gohed duim wanem hem laekem, datwan nao mekem iumi hapi winim wei for givim laef bilong iumi for duim nara samting or long nara man. Tingim diswan. Staka pipol iusim full laef bilong olketa for kasem olketa material samting bat olketa nating hapi nomoa. Bat olketa wea dedicate long Jehovah hapi for olowe. (Matt. 6:24) Olketa hapi bikos olketa “waka witim God.” Olketa no givim laef bilong olketa for duim wanfala waka bat olketa givim laef bilong olketa long God wea tinghae long wanem olketa duim. (1 Cor. 3:9) God barava tinghae long wei wea olketa givim olketa seleva long hem. Hem bae mekem olketa olo wea faithful long hem for young moa mekem olketa kasem gud samting for olowe.—Job 33:25; readim Hebrews 6:10.
19. Wanem gud samting nao olketa wea dedicate long Jehovah kasem?
19 Wei for dedicate long Jehovah bae mekem iu barava fren gud witim hem. Bible sei: “Fren gud witim God and hem bae fren gud witim iufala.” (Jas. 4:8; Ps. 25:14) Long study bihaen, iumi bae storyim why nao hem gud for givim laef bilong iumi long Jehovah.
[Footnote]
^ par. 12 “Olketa nara sheepsheep” bilong Jesus bae kamap olketa pikinini bilong God long end bilong wan thousand year. Bat from olketa dedicate long God, olketa kolem God “Dadi” and God savve ting long olketa olsem olketa pikinini bilong hem wea worshipim hem.—John 10:16; Isa. 64:8; Matt. 6:9; Rev. 20:5.
Wanem Nao Ansa Bilong Iu?
• Wanem nao hem minim for dedicate long God?
• Wanem gud samting nao iumi kasem taem iumi dedicate long God?
• Why nao olketa Christian mas dedicate long Jehovah?
[Olketa Study Kwestin]
[Piksa long page 6]
Man wea gohed duim samting wea God laekem bae hapi for olowe