Gohed Strong Long Spiritual Wei Taem Iu Lukaftarem Samwan Long Famili wea Sik

WANFALA sista wea nem bilong hem Kim, hem kasem wanfala sik. * Olketa doctor faendem tumor long bak-bone bilong hem wea hem cancer. Hasband bilong hem Steve sei: “Bihaen doctor operate for aotem tumor, Kim mas kasem nara treatment wea hem radiotherapy and chemotherapy. Datfala treatment mekem body bilong hem barava wiki and no mas strong for wakabaot.”

Steve mas barava feel nogud taem hem lukim waef bilong hem safa long datfala sik! Maet samwan long famili bilong iu olo or garem sik wea mekem hem barava wiki. (Eccl. 12:​1-7) Sapos olsem, for lukaftarem hem gud iu mas lukaftarem iuseleva tu. Sapos iu wik long spiritual wei, maet iu start for sik long mind and body and maet datwan mekem iu no fit for lukaftarem datwan long famili wea sik or olo. So wanem nao iu savve duim mekem iu gohed strong long spiritual wei taem iu lukaftarem relative wea sik or olo? Waswe, olketa long kongregeson savve duim eni samting for helpem olketa?

Wanem for Duim for Gohed Strong

For gohed strong long spiritual and physical wei, iu mas willing for changem samfala samting and iusim gud taem and strong bilong iu taem iu lukaftarem man wea sik. Proverbs 11:2 sei: “Olketa wea hambol nao wise.” Long disfala scripture, “hambol” hem minim man luksavve long wanem hem fit for duim and no fit for duim. Hem gud for lukluk long schedule bilong iu and wanem iu mas duim, mekem iu no trae for duim wanem iu no fit for duim distaem.

Steve showimaot hem wise and hambol taem hem lukluk long wanem hem duim. Nomata hem waka for selen, hem chairman  bilong olketa elder and service overseer long kongregeson wea hem stap long hem long Ireland. Hem wanfala long Hospital Liaison Komiti tu. Steve sei: “No enitaem Kim komplen and sei mi busy tumas long olketa samting hia and no tingim hem. Bat mi luksavve mi duim staka samting winim wanem mi fit for duim.” Wanem nao Steve duim? Hem sei: “Mi prea abaotem diswan and mi disaed for no gohed olsem chairman bilong olketa elder. Mi gohed elder long kongregeson bat mi givim samfala waka bilong mi long olketa narawan long kongregeson, wea datwan mekem mi garem taem for lukaftarem Kim.”

Gogo Kim start for kamap gud. Steve and Kim lukluk moa long wanem tufala savve duim and tufala agree for Steve duim moa olketa waka wea hem duim bifor long kongregeson. Steve sei: “Taem Kim hem sik, mitufala lane for duim nomoa wanem mitufala fit for duim. Mi thankiu tumas long Jehovah from hem helpem mitufala and long waef bilong mi from hem sapotim mi and no komplen nomata hem sik.”

Tingim tu Jerry and waef bilong hem Maria wea duim circuit waka. From dadi and mami bilong tufala olo, tufala mas changem goal bilong tufala. Maria sei: “Mitufala  laek for duim missionary waka long nara kantri. Bat Jerry hem wanfala pikinini nomoa long famili bilong hem, and dadi and mami bilong hem needim samwan for lukaftarem tufala. So mifala disaed for stap long Ireland for lukaftarem tufala. Datwan mekem mitufala savve lukaftarem dadi bilong Jerry taem hem stap long hospital go kasem taem hem dae. Mitufala story witim mami bilong Jerry evriday, and from mitufala no stap farawe tumas from hem, mitufala savve kam helpem hem taem hem needim help. Kongregeson wea mami bilong Jerry stap long hem barava helpem hem, and diswan mekem mitufala savve gohed duim circuit waka.”

Wanem Narawan Savve Duim

Taem aposol Paul story abaotem wanem kongregeson savve duim for olketa olo widow, hem sei: “Man wea no duim eni samting for helpem olketa relative bilong hem and important wan nao hem famili bilong hemseleva, hem showimaot hem lusim faith bilong hem and hem worse winim man wea no garem faith.” Paul talem olketa Christian sapos olketa laekem ‘God for hapi long olketa,’ olketa mas iusim selen bilong olketa for lukaftarem olo dadi and mami and grani bilong olketa tu. (1 Tim. 5:​4, 8) Bat olketa long kongregeson tu shud helpem olketa.

Tingim Hakan and Inger, wanfala olo hasband and waef wea stap long Sweden. Hakan sei: “Taem doctor sei waef bilong mi garem cancer, mitufala barava seke long datwan bikos Inger hem healthy and strong nomoa. Bat distaem mifala mas go long hospital evriday for Inger tekem treatment, and datfala medicine mekem hem barava wiki. Inger stap long haos taem hem garem cancer, and mi mas stap long haos witim hem for lukaftarem hem.” Wanem nao kongregeson duim for helpem Hakan and Inger?

Olketa elder long kongregeson mekem arrangement for tufala lisin long telephone taem olketa meeting gohed. Olketa brata and sista visitim tufala and ringim tufala tu. Nara samting tu, olketa sendem olketa leta and card long tufala. Hakan sei: “Olketa brata and sista barava helpem mifala and Jehovah tu. Diswan helpem mitufala gohed strong long spiritual wei. Mitufala hapi bikos Inger no sik distaem, and mitufala savve go long olketa meeting long Kingdom Hall.” Taem olketa long kongregeson helpem olketa wea sik and olo, olketa showimaot olketa nao ‘trufala fren wea lovem narawan, and brata wea redi for help long hard taem.’​—⁠Prov. 17:⁠17.

Jehovah Tinghae Long Hard Waka Bilong Iu

Hem tru, taem iumi lukaftarem samwan long famili wea sik, iumi savve taed. Nomata olsem, King David sei: “Man wea tingim olketa poor pipol bae hapi,” olsem wei for helpem man wea sik.​—⁠Ps. 41:⁠1.

Why nao olketa wea lukaftarem man wea sik or safa bae hapi? Proverbs 19:17 sei: “Man wea kaen long poor pipol [olketa wea needim help], Jehovah garem kaon long hem and Hem bae givim gud samting long hem.” Trufala God tingim tumas faithful pipol bilong hem wea sik, and hem blessim olketa wea duim samting for helpem olketa. David sing olsem: “Taem [man olsem hem] sik, Jehovah bae helpem hem. Iu bae lukaftarem hem gud taem hem sik.” (Ps. 41:⁠3) Iumi savve sapos man wea helpem narawan kasem hard taem or nogud samting, Jehovah bae helpem hem tu.

Iumi hapi tumas taem iumi tingim Jehovah God lukim wanem iumi duim for helpem olketa wea sik and hem hapi long iumi! Nomata iumi mas waka hard for helpem narawan wea sik, Bible sei “God hem hapi tumas long olketa sakrifaes olsem.”​—⁠Heb. 13:⁠16.

[Footnote]

[Piksa long page 18]

Gohed strong long spiritual wei and acceptim help from narawan