Gohed for Luksavve Long Wanem Hem Stret and No Stret

IU BAE hapi tumas for lukim wanfala gymnast muvim body bilong hem long naesfala wei! Bible helpem olketa Christian for gohed trainim olketa seleva for luksavve long wanem hem stret and wanem hem no stret, olsem wanfala gymnast wea mas trainim hemseleva.

Aposol Paul raet olsem long olketa Hebrew: ‘Strongfala kaikai hem for strongfala Christian, for olketa wea lane finis long wei for trainim tingting bilong olketa mekem olketa for luksavve long wanem hem stret and wanem hem no stret.’ (Heb. 5:​14.) Why nao Paul talem olketa Hebrew Christian for trainim tingting for luksavve long wanem hem stret and wanem hem no stret olsem wanfala gymnast mas trainim olketa masol bilong hem? Hao nao iumi savve trainim tingting bilong iumi?

“Iufala Shud Kamap Olketa Teacher”

Taem Paul storyim position bilong Jesus olsem “hae priest Melchizedek,” Paul sei: ‘Mifala garem staka samting for talem abaotem Jesus bat hem hard for minim long iufala, bikos iufala slow tumas for minim samting. Hem tru, nomata iufala shud kamap olketa teacher fitim taem hia, iufala needim samwan for teachim iufala moa olketa firstfala samting bilong olketa holy toktok bilong God; and iufala kamap olsem man wea needim milk, no strongfala kaikai.’​—⁠Heb. 5:​10-​12.

Luk olsem, samfala Jew Christian long first century no gohed for garem gudfala savve, and olketa no gohed gud long spiritual wei. Olsem example, olketa faendem hard for acceptim olketa change wea kamap abaotem Law and wei for circumcise. (Acts 15:​1, 2, 27-​29; Gal. 2:⁠11-​14; 6:​12, 13) Hem hard for samfala lusim wei bilong olketa for followim olketa teaching wea join witim Sabbath wea kamap evri week and Atonement Day wea kamap evri year. (Col. 2:​16, 17; Heb. 9:​1-​14) Dastawe Paul encouragem olketa for trainim tingting bilong olketa for luksavve long wanem hem stret and wanem hem no stret, and for “gohed for kamap olketa strongfala Christian.” (Heb. 6:​1, 2) Luk olsem samting wea hem talem helpem samfala long olketa for garem gudfala tingting, and maet diswan helpem olketa for gohed gud long spiritual wei. Waswe long iumi?

Trainim Tingting Bilong Iu

Hao nao iumi savve trainim tingting bilong iumi for kamap strongfala Christian? Paul sei: ‘Long wei for iusim gud.’ Olsem olketa gymnast wea trainim body bilong olketa for duim olketa hard samting wea luk naes tumas, iumi tu shud trainim tingting bilong iumi for luksavve long wanem hem stret and wanem hem no stret.

John Ratey, wanfala savveman abaotem brain long Harvard Medical School sei olsem: “Wei for trainim brain hem best samting wea iu savve duim.” Gene Cohen wea hem Director bilong Center on Aging, Health and Humanities long George Washington University hem storyim, “taem iumi mekem brain bilong iumi waka hard, olketa cell long brain bilong iumi savve duim staka samting for mekem brain bilong iumi waka gud.”

Hem bae gud tumas for iumi trainim tingting bilong iumi and gohed for lane abaotem Bible. Taem iumi duim olsem, iumi bae barava fit for duim “samting wea God laekem iumi for duim.”​—⁠Rom. 12:​1, 2.

 Gohed for Laekem “Strongfala Kaikai”

Sapos iumi laek for ‘gohed kamap olketa strongfala Christian,’ iumi need for tingim olketa kwestin hia: ‘Waswe, mi gohed for kasem savve abaotem olketa tru samting long Bible? Waswe, olketa narawan ting long mi olsem spiritual man?’ Wanfala mami hapi for susum and feedim baby long soft kaikai taem hem baby yet. Bat tingim wari wea mami bae garem sapos pikinini no kaikaim strongfala kaikai bihaen tu-thri year. Long sem wei tu, iumi hapi for lukim Bible study bilong iumi gohed gud for dedicate and baptaes. Waswe sapos datfala Bible study no gohed gud long spiritual wei bihaen hem dedicate and baptaes? Waswe, bae datwan mekem iu wikdaon? (1 Cor. 3:​1-4) Man wea conductim study bae laekem Bible study bilong hem for wanday kamap man for teachim narawan tu.

Wei for iusim gud tingting bilong iumi abaotem samfala samting, hem minim for iumi waka hard for ting raonem gud datfala samting. (Ps. 1:​1-3) Iumi mas no letem eni samting olsem TV, olketa samting wea iumi interest long hem, wea hem isi for duim, for stopem iumi for ting raonem olketa important samting. For iumi gohed trainim tingting bilong iumi, hem important for iumi laek for studyim Bible and olketa Bible pablikeson wea “datfala wakaman wea faithful and wise” givim kam. (Matt. 24:⁠45-​47) Hem important for iumi evritaem studyim Bible seleva, and tu, markem taem for duim Famili Worship and duim research long samfala Bible topic.

Jerónimo wea hem wanfala traveling overseer long Mexico talem, bihaen hem kasem olketa Wastaoa, hem studyim stretawe. Hem markem taem tu for study tugeta witim waef bilong hem. Jerónimo sei olsem: “Mitufala markem taem for readim Bible tugeta evriday and iusim olketa nara buk tu for helpem mitufala, olsem ‘Good Land’ brochure.” Ronald wea hem wanfala Christian sei, hem evritaem redyim Bible reading wea kamap evri week long kongregeson. Hem garem tu-thri samting wea hem laek for gohed studyim nomata datwan tek longtaem lelebet. Ronald talem olsem: “Olketa samting hia mekem mi luk forward long samting wea mi bae studyim.”

Waswe long iumi? Iumi markem inaf taem for studyim Bible and ting raonem toktok bilong God? Waswe, iumi trainim tingting bilong iumi for mekem iumi fit for disaedem samting followim wanem Bible talem? (Prov. 2:​1-7) Hem gud tumas for iumi waka hard for kamap strongfala Christian and fren gud witim God. Diswan showimaot iumi pipol wea garem wisdom, savve, and wei for luksavve long wanem hem stret and wanem hem no stret!

[Piksa long page 23]

Iumi trainim tingting bilong iumi ‘long wei for iusim gud’