Haran Taon wea Staka Samting Gohed Long There Bifor

TAEM pipol wea savve long Bible herem datfala nem Haran, olketa tingim nao faithful man Abraham. Taem Abraham lusim Ur for gogo long Canaan, hem witim waef bilong hem Sarah, dadi bilong hem Terah, and nephew bilong hem Lot, olketa stap firstaem long Haran. Taem olketa stap long there, Abraham garem staka material samting. Taem dadi bilong Abraham dae, Abraham lusim Haran for go long Canaan, datfala land wea tru God promisim for hem. (Gen. 11:​31, 32; 12:​4, 5; Acts 7:​2-4) Bihaen, Abraham sendem olo wakaman bilong hem for go long Haran or long wanfala ples wea klosap for faendem waef for Isaac. Granson bilong Abraham, Jacob, stap long Haran tu for staka year.​—⁠Gen. 24:​1-4, 10; 27:​42-​45; 28:​1, 2, 10.

Taem King Sennacherib bilong Assyria tok spoelem King Hezekiah bilong Judah, Sennacherib sei Haran hem wanfala long “olketa nation” wea olketa king bilong Assyria winim. Taem hem storyim “Haran” hem no minim nomoa datfala taon bat hem minim tu area raonem datfala taon. (2 Ki. 19:​11, 12) Long profesi wea Ezekiel talem, Ezekiel sei Haran hem wanfala main taon wea olketa long Tyre savve salem and peim staka samting long hem, wea datwan pruvim Haran hem important ples for duim bisnis.​—⁠Ezek. 27:​1, 2, 23.

Distaem Haran hem smol taon nomoa wea stap klosap long Şanlıurfa, long east Turkey. Bat long bifor Haran hem wanfala taon wea staka samting happen long there. Tu-thri taon long bifor garem yet nem wea Bible iusim and Haran nao wanfala. Long languis bilong Assyria, Haran hem Harranu, wea savve minim “Road” or “Caravan Road.” Diswan showimaot Haran hem stap klosap long olketa main road wea go for olketa big taon. Taem olketa digim graon long Haran, olketa faendem samfala samting wea garem olketa raeting long hem wea sei mami bilong King Nabonidus bilong Babylon, hem woman priest long temple bilong Sin, god bilong moon wea olketa long Haran worshipim. Samfala pipol sei Nabonidus wakem bak datfala temple. Bihaen long datwan, nomata staka rul kamap long Haran and gogo olketa finis, datfala taon stap kam kasem distaem.

Distaem Haran hem barava difren from bifor. Long bifor, Haran hem wanfala main taon wea pipol duim bisnis long hem. Bat distaem olketa haos wea garem raon ruf nomoa stap long there. Raonem Haran hem garem olketa oldfala building wea pipol stap long hem bifor. Long niu world staka wea stap long Haran olsem Abraham, Sarah, and Lot bae laef bak. Bae olketa nao savve talem iumi staka samting moa abaotem Haran, datfala taon wea staka samting gohed long there bifor.

[Piksa long page 20]

Olketa oldfala building long Haran bifor

[Piksa long page 20]

Olketa haos wea garem raon ruf

[Piksa long page 20]

Haran distaem