Kwestin From Reader

From Jehovah tambuim wei for worshipim idol, why nao hem no panisim Aaron bikos hem mekem datfala gold buluka?

Taem Aaron mekem datfala gold buluka wea Exodus chapter 32 storyim, hem brekem nao law bilong God abaotem wei for no worshipim idol. (Ex. 20:​3-5) From datwan, “Jehovah kros tumas [long Aaron] and laek for killim hem dae; bat long datfala taem [Moses] prea for Aaron.” (Deut. 9:​19, 20) Waswe, prea bilong Moses garem “bigfala paoa” for helpem Aaron? (Jas. 5:​16) Ia. Bikos prea bilong Moses and maet long nara tufala reason moa, luk olsem Jehovah herem prea bilong Moses and hem no panisim Aaron.

Maet firstfala reason hem bikos Aaron hem faithful for longfala taem finis. Taem Jehovah markem Moses for go lukim Pharaoh and for tekem olketa Israelite from Egypt, Jehovah markem Aaron for go witim Moses and kamap man for toktok for hem. (Ex. 4:​10-​16) Tufala man hia obey for go staka taem for lukim king bilong Egypt nomata Pharaoh hem bighed. Taem Aaron stap long Egypt, hem gohed for faithful long Jehovah.​—⁠Ex. 4:​21.

Tingim tu samting wea gogo mekem Aaron for wakem datfala gold buluka. Moses stap long Maunt Sinai for 40-fala day. Taem “pipol lukim wei wea Moses hem longtaem tumas for kam daon from maunten,” olketa strong for askem Aaron for mekem wanfala idol for olketa. Aaron followim wanem olketa askem and hem wakem wanfala gold idol wea luk olsem buluka. (Ex. 32:​1-6) Bat samting wea Aaron duim bihaen showimaot hem barava no laekem wei for worshipim idol. Luk olsem Aaron duim olsem bikos hem kasem hevi from olketa narawan. Evri son bilong Levi and Aaron disaed strong for saed witim Jehovah taem Moses askem hu nao olketa bae chus for worshipim. Thri thousand pipol wea leadim olketa narawan for worshipim datfala idol, olketa nao dae.​—⁠Ex. 32:​25-​29.

Bihaen, Moses talem olketa: ‘Sin wea iufala duim hem barava nogud tumas.’ (Ex. 32:30) Dastawe hem no Aaron nomoa guilty long datfala nogud samting wea happen. Bat Aaron and olketa Israelite kasem gud samting bikos Jehovah showimaot mercy long olketa.

Bihaen datfala samting wea happen, Jehovah talem for mekem Aaron for kamap hae priest. God talem Moses olsem: ‘Iufala mas tekem olketa spesol kaleko for Aaron werem. And iufala mas anointim hem, for mekem hem holy, for hem kamap priest bilong mi.’ (Ex. 40:​12, 13) Luk olsem, Jehovah luksavve long wik point bilong Aaron and hem forgivim hem. For tok stret, Aaron hem no man for worshipim idol, bat hem barava sapotim tru worship.