Olketa Brata, Followim Holy Spirit and Trae Hard for Kasem Waka!

“Man wea followim holy spirit bae kasem laef olowe.”​—⁠GAL. 6:⁠8.

1, 2. Long wanem wei nao toktok long Matthew 9:​37, 38 gohed for kamap tru distaem, and diswan mekem olketa kongregeson needim wanem?

 IUMI stap long taem wea barava spesol bikos iumi lukim waka wea Jesus storyim hem gohed distaem! Jesus sei: “Staka samting nao stap for harvestim, bat no staka wakaman stap for duim datwan. So askem man wea ownim planteison for sendem go olketa wakaman for harvestim planteison bilong hem.” (Matt. 9:​37, 38) Jehovah God herem prea bilong pipol wea askem hem for sendem staka wakaman for harvestim planteison. Long 2009 service year, 2,031 niu kongregeson bilong Olketa Jehovah’s Witness kamap wea minim 105,298 kongregeson stap distaem. Diswan minim samting olsem 757 niu wan baptaes evriday!

² From organization bilong Jehovah kamap big, hem needim staka brata moa wea fit for teach and lukaftarem kongregeson. (Eph. 4:​11) Long staka year wea go finis, Jehovah helpem olketa brata for kamap fit for lukaftarem olketa sheepsheep bilong hem, and iumi savve bae hem gohed for duim olsem distaem tu. Profesi long Micah 5:5 sei long olketa last day, pipol bilong Jehovah bae garem “sevenfala man for lukaftarem sheepsheep” and “eitfala leader.” Diswan showimaot plande man wea fit nao bae leadim pipol bilong Jehovah.

3. Wanem nao hem minim for “followim holy spirit”?

³ Sapos iu brata wea baptaes, wanem nao savve helpem iu for laek for kasem waka long kongregeson? Important samting nao, iu mas “followim holy spirit.” (Gal. 6:⁠8) Hem minim iu mas letem holy spirit for leadim iu. Iu mas trae hard for no “duim samting wea body laekem.” No letem olketa samting olsem rich living, wei for duim samting for iuseleva nomoa, and hapitaem mekem iu for no waka hard for God. Iumi evri Christian shud “followim holy spirit,” and gogo olketa brata wea duim olsem savve kamap fit for duim waka long kongregeson. From organization bilong Jehovah barava needim olketa ministerial servant and elder distaem, disfala study hem for olketa brata. Dastawe mifala laekem iufala olketa brata for prea abaotem diswan and ting raonem tu.

Trae Hard for Kasem Gudfala Waka

4, 5. (a) Wanem nao olketa waka long kongregeson wea olketa brata wea baptaes savve trae hard for kasem? (b) Wanem nao brata savve trae hard for duim mekem hem kasem diswan?

⁴ Brata no seknomoa kamap overseer bat hem mas trae hard for kasem “gudfala waka” hia. (1 Tim. 3:⁠1) Wanfala samting wea hem mas duim nao, hem mas barava lukaftarem olketa brata and sista. (Readim Isaiah 32:​1, 2.) Brata wea garem stretfala tingting abaotem disfala waka bae trae hard for kasem datwan and mas no praod. Hem no tingim hemseleva, bat hem laek tumas for helpem olketa narawan.

⁵ Brata wea laek kamap ministerial servant or elder mas trae hard for kasem olketa mark wea Bible talem. (1 Tim. 3:​1-​10, 12, 13; Titus 1:​5-9) Sapos iu brata wea dedicate finis, tingim olketa kwestin hia: ‘Waswe, mi evritaem duim preaching waka, and mi helpem olketa narawan for duim olsem tu? Waswe, mi laek helpem olketa brata and sista and strongim  olketa? Waswe, pipol luksavve mi studyim gud Bible? Waswe, mi kamap gud long wei for givim olketa koment? Waswe, mi barava duim gud olketa waka wea olketa elder askem mi for duim?’ (2 Tim. 4:​5) Hem important for ting raonem olketa kwestin hia.

6. Wanem important samting nao savve mekem brata kamap fit for duim waka long kongregeson?

⁶ Nara samting wea savve mekem brata kamap fit for duim waka long kongregeson, hem mas ‘kamap strong long spiritual wei from paoa wea hem kasem from spirit bilong God.’ (Eph. 3:​16) Kongregeson no savve votem brata for kamap ministerial servant or elder. Taem brata fren gud witim Jehovah, datwan nao savve helpem hem for kamap ministerial servant or elder. Wanem nao brata savve duim mekem hem fren gud witim Jehovah? Wanfala samting nao, iu mas “gohed followim [holy] spirit” and trae hard for garem olketa wei bilong holy spirit. (Gal. 5:​16, 22, 23) Taem iu duim olketa waka long kongregeson and showimaot olketa wei bilong spirit from iu followim olketa kaonsel wea iu kasem, ‘evriwan bae luksavve iu kamap strongfala Christian.’​—⁠1 Tim. 4:​15.

No Duim Wanem Iuseleva Nomoa Laekem

7. Wanem nao brata mas duim for helpem narawan?

⁷ Brata wea helpem olketa narawan mas waka hard and no duim wanem hemseleva nomoa laekem. From olketa overseer olsem man for lukaftarem sheepsheep, olketa tingim evritaem problem wea kasem olketa sheepsheep. Aposol Paul tu barava tingim olketa sheepsheep wea hem lukaftarem. Hem talem olketa Christian long Corinth: “Taem mi raetem first leta long iufala, mi feel nogud tumas and mi sorre tumas gogo mi krae nao. And mi no raetem leta hia for mekem iufala feel nogud, bat for mekem iufala savve mi barava lovem iufala evriwan.” (2 Cor. 2:⁠4) Datwan showimaot Paul duim waka bilong hem witim full heart.

8, 9. Storyim wanem samfala man long Bible duim for helpem narawan.

 ⁸ Start kam long bifor, olketa brata wea waka hard for lukaftarem pipol bilong Jehovah no duim wanem olketa seleva nomoa laekem. Tingim diswan. Noah no talem olsem long famili bilong hem: ‘Taem iufala wakem ark finis, iufala talem mi mekem mi kam tu.’ Moses tu no tok olsem long olketa Israelite long Egypt: ‘Bae mi lukim iufala nao long Red Sea. Iufala nao savve hao for kasem long there.’ Joshua nating tok olsem: ‘Iufala talem kam taem wall bilong Jericho foldaon.’ And Isaiah no point go long narawan and sei: ‘Hem long there! Talem hem nao for go.’​—⁠Isa. 6:⁠8.

⁹ Jesus Christ showimaot nambawan example for letem spirit bilong God leadim hem. Hem willing for duim wanem God askem hem for duim for sevem olketa man. (John 3:​16) Jesus showimaot love and no tingim hemseleva, so iumi tu shud duim sem samting! Wanfala brata wea elder for longfala taem talem tingting bilong hem abaotem olketa sheepsheep. Hem sei: “Datfala toktok wea Jesus talem long Peter wea sei, lukaftarem olketa smol sheepsheep bilong mi, barava mekem mi laek for duim sem samting. Long olketa year wea go finis, mi luksavve taem samwan talem toktok wea showimaot hem lovem narawan or duim kaenfala samting long narawan, datwan savve barava strongim man. Mi hapi tumas taem mi lukaftarem sheepsheep.”​—⁠John 21:⁠16.

10. Wanem nao savve helpem olketa brata for followim example bilong Jesus for helpem narawan?

¹⁰ Olketa brata wea lovem Jehovah witim full heart bae laek for duim wanem Jesus duim for olketa sheepsheep. Jesus sei: “Mi savve strongim iufala.” (Matt. 11:28) Olketa brata bae trae hard for kasem waka long kongregeson from olketa garem faith long God and lovem olketa long kongregeson. Olketa no tingim waka hia olsem hem hard tumas. Bat waswe sapos brata no tingting for trae hard for kasem gudfala waka long kongregeson? Wanem nao savve helpem brata for laek duim waka olsem?

Tingting Strong for Laek Duim Waka

11. Wanem nao savve helpem brata for tingting strong for laek duim waka long kongregeson?

¹¹ Sapos iu tingse iu no fit for duim waka long kongregeson, hem gud for prea long God for givim iu holy spirit. (Luke 11:13) Spirit bilong Jehovah bae helpem iu for no tingse iu no fit for duim datfala waka. Holy spirit nao bae helpem wanfala brata for laek duim holy waka. And Jehovah bae iusim holy spirit for strongim hem for duim datfala waka. (Phil. 2:​13; 4:​13) Dastawe hem stret for askem Jehovah for helpem iu for garem tingting for laek duim waka long kongregeson.​—⁠Readim Psalm 25:​4, 5.

12. Wanem nao savve helpem brata for garem wisdom for duim waka bilong hem long kongregeson?

¹² Maet Christian brata no laek trae hard for kasem waka long kongregeson bikos hem tingse waka for lukaftarem sheepsheep hem hard tumas and hem mas iusim staka taem bilong hem. Or maet hem tingse hem no garem savve for duim disfala waka. Sapos olsem, taem hem studyim gud Bible and olketa buk bilong iumi, bae hem garem savve for duim disfala waka. Hem gud for hem tingim tufala kwestin hia, ‘Waswe, mi markem taem for studyim Bible? Waswe, mi prea evritaem for God givim mi wisdom?’ Disaepol James sei: “Sapos eniwan long iufala no garem wisdom hem mas gohed for askem God. From God bae hapi tumas for givim wisdom long eniwan.” (Jas. 1:⁠5) Waswe, iu bilivim datwan? Solomon prea long God for givim wisdom long hem. God mekem hem “wise and minim samting” mekem hem luksavve long wanem hem stret and wanem hem no stret taem hem judgem pipol. (1 Ki. 3:​7-​14) Hem tru, Jehovah duim spesol samting for Solomon. Nomata olsem, iumi savve God bae givim wisdom long olketa brata wea duim waka long kongregeson mekem olketa savve lukaftarem gud sheepsheep bilong hem.​—⁠Prov. 2:⁠6.

13, 14. (a) “Love wea Christ showimaot” mekem Paul laek for duim wanem? (b) “Love wea Christ showimaot” mekem iumi laek for duim wanem?

 ¹³ Nara samting wea savve helpem brata for laek duim waka, hem nao for ting raonem evri samting wea Jehovah and Son bilong hem duim for iumi. Tingim wanem 2 Corinthians 5:​14, 15 talem. (Readim.) Wanem nao hem minim taem Bible sei “love wea Christ showimaot mekem iumi for laek duim samting”? Sapos iumi tinghae long love wea Christ showimaot taem hem dae for iumi from hem duim wanem God laekem, iumi bae barava laek for helpem narawan. From Paul tinghae long love wea Christ showimaot, hem no tingim hemseleva bat hem strong for worshipim God and helpem olketa long kongregeson and nara pipol.

¹⁴ Taem iumi ting raonem love wea Christ showimaot for pipol, iumi bae tinghae long wanem hem duim. Dastawe iumi luksavve hem barava no fitim for iumi gohed ‘duim samting wea body laekem.’ Bat iumi changem samfala samting long living bilong iumi mekem important samting long laef bilong iumi nao hem for duim waka wea God talem iumi for duim. Iumi barava laek for “duim gud samting” for olketa brata bilong iumi bikos iumi lovem olketa. (Readim Galatians 5:​13.) Taem iumi hambol and tingim iumi olketa wakaman for helpem pipol bilong Jehovah, bae iumi respectim and tinghae long olketa. Iumi bae nating garem wei for komplen and judgem narawan olsem Satan laekem iumi for duim.​—⁠Rev. 12:⁠10.

Famili Mas Waka Tugeta

15, 16. Bifor brata savve kamap elder or ministerial servant, wanem nao olketa long famili mas duim?

¹⁵ Sapos brata wea marit and garem pikinini trae hard for kamap ministerial servant or elder, bae olketa elder lukluk long famili bilong hem for luksavve sapos hem fit for duim datfala waka. Tru tumas, wanfala samting wea savve helpem brata for kamap ministerial servant or elder hem sapos famili bilong hem garem gudfala wei and fren gud witim Jehovah. So famili mas sapotim hasband and dadi wea ministerial servant or elder taem hem waka hard for helpem kongregeson.​—⁠Readim 1 Timothy 3:​4, 5, 12.

¹⁶ Taem evriwan long famili waka tugeta, Jehovah hapi. (Eph. 3:​14, 15) Hed bilong famili mas iusim gud taem for duim waka long kongregeson and for lukaftarem famili “long gudfala wei.” Dastawe elder or ministerial servant mas studyim Bible witim waef and olketa pikinini mekem evriwan savve kasem gud samting from Famili Worship evri week. Hem shud garem schedule for preach witim famili. Hem important tu for famili waka tugeta for followim wanem hed long famili trae hard for duim.

Waswe, Iu Savve Duim Waka Moa?

17, 18. (a) Sapos brata hem no fit distaem for duim waka long kongregeson, wanem nao maet hem need for duim? (b) Brata wea elder or ministerial servant bifor shud trae for garem wanem kaen tingting?

¹⁷ Maet long bifor iu elder or ministerial servant bat distaem nomoa nao. Nomata olsem, iu lovem Jehovah yet and hem tu nating forgetim iu. (1 Pet. 5:​6, 7) Waswe, iu kasem samfala kaonsel? Sapos olsem, hem gud for iu hambol and askem God for helpem iu for followim datfala kaonsel. Iu mas no letem datwan mekem iu gohed for feel nogud. Tingim gud saed long samting and duim samting wea wise. Wanfala brata wea elder for staka year finis bat wea lusim datfala privilege hem sei:  “Mi trae for duim olketa samting wea mi duim taem mi elder, olsem mi go olowe long olketa meeting, field service, and readim Bible. Mi lane for patient bikos mi tingse mi bae elder moa bihaen wan or tufala year nomoa, batawea hem klosap seven year nao bifor mi elder moa. Long taem wea mi lusim privilege, mi kasem encouragement for no givap bat gohed for trae hard and datwan barava helpem mi.”

¹⁸ Sapos iu tu kasem sem samting olsem datfala brata, no wikdaon. Ting raonem olketa gud samting wea Jehovah givim long iu long ministry and famili bilong iu. Strongim famili bilong iu for fren gud witim God, go lukim olketa wea sik, and strongim olketa wea needim help. Bat important samting nao, hem for iu tinghae long wei for mekhae long God and talemaot gud nius abaotem Kingdom from iu wanfala Jehovah’s Witness. *​—⁠Ps. 145:​1, 2; Isa. 43:​10-​12.

Tingting Gud Moa

19, 20. (a) Hem gud for evri brata wea baptaes for duim wanem? (b) Wanem nao bae iumi storyim long study bihaen diswan?

¹⁹ Distaem organization bilong Jehovah barava needim staka elder and ministerial servant. Dastawe mifala encouragem evri brata wea baptaes for tingting gud moa abaotem laef bilong olketa and tingim disfala kwestin, ‘Sapos mi no ministerial servant or elder, waswe, mi shud tingting gud moa abaotem why nao mi olsem?’ Askem God for givim spirit bilong hem long iu mekem iu garem stretfala tingting abaotem disfala important waka.

²⁰ Taem evriwan long kongregeson trae hard for no duim nomoa wanem olketa seleva laekem, evriwan bae kasem gud samting. Taem iumi kaen long narawan and duim olketa gud samting, iumi bae hapi from iumi helpem narawan and from iumi followim holy spirit. Study bihaen diswan bae storyim iumi mas no mekem holy spirit sorre. Wanem nao bae helpem iumi for no duim diswan?

[Footnote]

Wanem Nao Ansa Bilong Iu?

• Profesi long Micah 5:5 hem talem wanem samting?

• Wanem nao hem minim for no duim wanem iuseleva laekem?

• Wanem nao savve helpem brata for tingting strong for laek duim waka long kongregeson?

• Bifor brata savve kamap elder or ministerial servant, why nao hem important for famili waka tugeta?

[Olketa Study Kwestin]

[Olketa Piksa long page 25]

Wanem nao iu savve trae hard for duim for kasem waka long kongregeson?