Ting Long Worship Bilong Iu Olsem Important Samting
Ting Long Worship Bilong Iu Olsem Important Samting
“Gohed for tingim . . . evri samting wea important.”—PHIL. 4:8.
1, 2. Wanem nao mekem staka pipol long world for no tingim olketa important samting? Olketa wanem kwestin nao bae iumi storyim?
IUMI stap long taem wea laef hem barava hard and staka nogud samting hem happen. From “evri samting hem hard tumas,” olketa wea no fren witim Jehovah no savve wanem for duim. (2 Tim. 3:1-5) Taem olketa kasem problem, no eniwan stap for helpem olketa and plande taem olketa no savve hao for barava winim datfala problem. Winim wei for tingim olketa important samting, staka tingse wei for duim olketa difren kaen hapitaem bae mekem olketa for hapi and no tingim moa problem bilong olketa.
2 Main samting long laef bilong plande pipol hem for duim hapitaem. Sapos iumi no careful, maet iumi tu start for duim sem samting. Wanem nao iumi mas duim mekem iumi no olsem? Waswe, iumi shud no duim eni hapitaem nao? Wanem nao iumi savve duim mekem iumi garem stretfala tingting abaotem hapitaem and olketa responsibility wea iumi garem? Nomata iumi tingim olketa important samting firstaem, wanem nao olketa Bible principle wea savve helpem iumi for no serious tumas?
Tingim Olketa Important Samting
3, 4. Hao nao Bible helpem iumi for tinghae long samting wea important?
3 Pipol long world “interest nomoa for enjoyim seleva” and olketa tingse datwan nao important. (2 Tim. 3:4) Kaen tingting olsem savve spoelem wei wea iumi fren witim Jehovah. (Prov. 21:17) Dastawe long olketa leta wea aposol Paul raetem for Timothy and Titus, hem givim kaonsel abaotem olketa samting wea important. Wei for followim kaonsel hia bae helpem iumi for no garem tingting bilong pipol long world abaotem laef.—Readim 1 Timothy 2:1, 2; Titus 2:2-8.
4 Solomon sei hem gud for ting raonem olketa important samting long laef winim wei for tingim nomoa olketa samting wea mekem iumi hapi. (Eccl. 3:4; 7:2-4) Tru tumas, from laef short tumas iumi need for “barava trae hard” mekem iumi kasem laef. (Luke 13:24) Iumi need for gohed tingim “evri samting wea important.” (Phil. 4:8, 9) Datwan minim iumi mas ting raonem evri samting wea wanfala Christian mas duim.
5. Wanem samting long laef nao hem barava important for iumi tingim?
5 Olsem example, olketa Christian followim example bilong Jehovah and Jesus and tinghae long responsibility wea olketa garem for waka hard. (John 5:17) Staka pipol praisem olketa tru Christian bikos olketa waka hard and pipol savve trustim olketa. Hed long famili nao barava waka hard for sapotim famili. Tru tumas, man wea no provaedem wanem famili needim showimaot hem “no garem faith” long Jehovah!—1 Tim. 5:8.
Worshipim God Long Stretfala Wei and Hapi
6. Why nao iumi luksavve hem important for worshipim Jehovah long stretfala wei?
6 Jehovah evritaem laekem iumi for worshipim hem long stretfala wei. Olsem example, olketa Israelite kasem nogud samting taem olketa no worshipim Jehovah long stretfala wei. (Josh. 23:12, 13) Long first century, olketa Christian mas barava waka hard for no mekem olketa laea teaching and nogud wei bilong pipol for spoelem tru worship. (2 John 7-11; Rev. 2:14-16) Distaem tu, olketa tru Christian luksavve hem important for worshipim God long stretfala wei.—1 Tim. 6:20.
7. Wanem nao Paul duim mekem hem redi for duim ministry?
7 Preaching waka savve mekem iumi hapi. Nomata olsem, for gohed hapi for duim ministry, iumi mas tinghae long datfala waka and prepare firstaem. Paul storyim hao hem tingim pipol wea hem teachim long ministry. Hem sei: “Mi change for fitim evri didifren kaen man mekem mi savve sevem samfala long olketa. Evri samting wea mi duim hem for mekem mi savve sharem gud nius witim nara pipol.” (1 Cor. 9:22, 23) Paul hapi taem hem helpem pipol fren witim Jehovah. Hem ting raonem tu wanem for duim for helpem olketa wea lisin long hem. Datwan mekem hem fit for encouragem and helpem narawan for laek worshipim Jehovah.
8. (a) Wanem tingting nao iumi shud garem long pipol wea iumi teachim long ministry? (b) Hao nao wei for conductim Bible study savve mekem iumi hapi?
8 Hao nao Paul ting long ministry? Hem willing for “waka hard” for Jehovah and for olketa wea lisin long gud nius. (Rom. 12:11; 1 Cor. 9:19) Taem iumi teachim pipol for savve long Bible, olsem for duim Bible study, conductim kongregeson meeting, or duim Famili Worship, waswe, iumi tinghae long datfala responsibility for teachim olketa? Maet iumi tingse wei for duim Bible study hem samting wea hard tumas for iumi duim. Hem tru, iumi need for iusim taem bilong iumiseleva for helpem olketa narawan. Bat wei for duim olsem hem followim tingting bilong Jesus. Hem sei: “Man wea givim samting hem barava hapi winim man wea kasem samting”! (Acts 20:35) Wei for teachim narawan abaotem olketa tru samting bae mekem iumi hapi winim eni nara samting.
9, 10. (a) Waswe, wei for serious minim iumi mas no relax and garem hapitaem witim narawan? Minim kam. (b) Wanem nao elder savve duim for encouragem narawan and for pipol no fraet for story witim hem?
9 Wei for serious no minim iumi mas no duim eni hapitaem witim pipol. Jesus showimaot nambawan example long wei for markem taem no for teachim pipol nomoa bat for relax and fren gud witim olketa narawan tu. (Luke 5:27-29; John 12:1, 2) Wei for serious no minim lukluk bilong iumi mas serious olowe. Sapos Jesus hem man wea serious tumas, pipol bae no feel free for story witim hem. Bat iumi savve hem no olsem bikos olketa smol pikinini no fraet for go long hem. (Mark 10:13-16) Wanem nao iumi savve duim for followim example bilong Jesus?
10 Wanfala brata story olsem abaotem wanfala elder: “Evritaem hem laek for duim samting long wei wea barava stret, bat hem no expectim olketa narawan for duim sem samting.” Waswe, iu tu olsem? Hem stret for iumi expectim olketa narawan for duim samfala samting. Olsem example, olketa pikinini savve hapi taem dadi and mami markem goal for olketa and helpem olketa for kasem datwan. Semsem tu, olketa elder savve encouragem olketa long kongregeson for fren gud witim Jehovah and givim olketa idea long hao for duim datwan. Taem elder hem hambol, datwan bae encouragem olketa narawan and pipol bae no fraet for story witim hem. (Rom. 12:3) Wanfala sista sei: “Mi no laekem elder wea evritaem mekfani nomoa long samting wea man talem or duim. Bat sapos hem serious evritaem bae hem hard for story witim hem tu.” Nara sista sei samfala elder hem “no isi for story witim olketa bikos olketa serious tumas.” Olketa elder shud no duim eni samting wea bae spoelem hapi wea olketa brata and sista garem taem olketa worshipim Jehovah, “datfala hapi God.”—1 Tim. 1:11.
Duim Waka Insaed Kongregeson
11. Sapos brata “laek for” duim waka insaed kongregeson, wanem nao hem mas duim?
11 Taem Paul encouragem olketa brata for traem best for kasem responsibility insaed kongregeson, hem no minim for olketa aftarem bignem. Bat hem sei: “Sapos man hem laek for elder, gud samting nao hem laek for duim.” (1 Tim. 3:1, 4) Sapos wanfala Christian brata “laek for” duim waka insaed kongregeson, hem mas waka hard for garem olketa gudfala wei wea showimaot hem fren gud witim God mekem hem savve helpem olketa brata and sista. Sapos brata hem baptaes for wanfala year finis and hem traem best for kasem olketa mark for ministerial servant wea 1 Timothy 3:8-13 storyim, olketa elder savve recommendim hem for kamap ministerial servant. Bat tingim wanem verse 8 talem. Hem sei: “Olketa ministerial servant mas garem mature tingting.”
12, 13. Storyim samfala samting wea olketa young brata savve duim for showimaot olketa laek for duim waka insaed kongregeson.
12 Waswe, iu wanfala young brata wea baptaes finis and ting long worship bilong iu olsem important samting? Iu savve duim staka difren samting for showimaot iu laek for duim waka insaed kongregeson. Wanfala samting nao hem for duim gud preaching waka. Waswe, iu hapi for waka witim olketa brata and sista nomata olketa young or olo? Waswe, iu trae hard for garem eni Bible study? Taem iu followim wanem iu lanem long olketa meeting long hao for conductim Bible study, datwan bae helpem iu for savve hao for teach. Hem bae helpem iu tu for tingim feeling bilong olketa wea iu teachim. Taem study bilong iu start for luksavve hem need for changem samfala wei bilong hem, iu bae lane for patient and helpem hem long kaenfala wei for followim olketa Bible principle.
13 Iufala olketa young brata savve duim samting for helpem olketa olo brata and sista long kongregeson. Iu savve help tu for klinim Kingdom Hall mekem hem luk naes. Taem iu willing for duim eni samting for helpem kongregeson, datwan showimaot iu ting long ministry bilong iu olsem important samting. Iu savve lane for lukaftarem kongregeson olsem Timothy duim.—Readim Philippians 2:19-22.
14. Wanem nao olketa elder savve duim for ‘testim firstaem’ olketa young brata?
14 Iufala olketa elder, trae for givim samfala waka long olketa young brata wea “ranawe from olketa samting wea young pipol laekem” distaem and wea waka hard for ‘garem faith, love, peace, duim stret samting,’ and olketa nara gudfala wei. (2 Tim. 2:22) Iu savve givim waka for olketa duim long kongregeson for ‘testim olketa firstaem’ sapos olketa fit lukaftarem datfala waka. Datwan bae mekem “evriwan lukim wei wea [olketa] gohed for kamap strongfala Christian.”—1 Tim. 3:10; 4:15.
Showimaot Iu Garem Mature Tingting Long Kongregeson and Famili
15. Olsem 1 Timothy 5:1, 2 talem, hao nao iumi showimaot iumi garem mature tingting?
15 Taem iumi respectim olketa brata and sista, datwan showimaot iumi garem mature tingting. Kaonsel wea Paul givim long Timothy mekhae long wei for respectim narawan. (Readim 1 Timothy 5:1, 2.) Diswan barava important taem iumi deal witim olketa long opposite sex. Job showimaot gudfala example for respectim waef bilong hem and olketa woman tu. Hem no lukluk strong long eni woman and garem tingting for durong witim hem. (Job 31:1) Wei for respectim olketa brata and sista hem minim for no switim feeling bilong olketa or duim samting wea bae mekem brata or sista feel shame for stap witim iumi. Hem important for tufala wea fren and plan for marit for mas respectim each other. Christian wea garem mature tingting bae no switim feeling bilong narawan wea hem nating plan for maritim.—Prov. 12:22.
16. Wanem nao tingting bilong pipol long world abaotem waka wea hasband and dadi garem, bat wanem nao Bible talem?
16 Iumi mas garem mature tingting tu abaotem waka wea God givim each wan long famili. Pipol long world tok daonem waka wea hasband and dadi garem long famili. Staka movie and television program mekhae long wei for tok daonem and no respectim hed long famili. Bat Bible sei hasband garem bigfala responsibility. Hem nao “hed bilong waef.”—Eph. 5:23; 1 Cor. 11:3.
17. Storyim hao wei for duim Famili Worship showimaot iumi ting strong long responsibility wea iumi garem.
17 Maet hasband provaedem wanem famili needim, bat sapos hem no helpem famili for fren gud witim Jehovah, hem showimaot hem no wise and no tingim famili. (Deut. 6:6, 7) Dastawe sapos iu hed long famili and iu laek for garem olketa privilege long kongregeson, iu mas duim wanem 1 Timothy 3:4 talem. Hem sei man mas “lukaftarem gud famili bilong hem, and olketa pikinini bilong hem mas obey and showimaot respect.” So tingim diswan: ‘Waswe, mi evritaem duim Famili Worship?’ Samfala Christian waef feel olsem olketa mas evritaem askem hasband for showimaot gud example long wei for duim olketa spiritual samting. Evri hasband shud ting strong long responsibility wea hem garem long famili. Christian waef tu shud sapotim arrangement for duim Famili Worship and waka tugeta witim hasband for duim datwan.
18. Wanem nao savve helpem pikinini for tingim olketa important samting?
18 Bible encouragem olketa pikinini tu for tingim olketa important samting wea bae helpem olketa worshipim Jehovah. (Eccl. 12:1) Hem gud samting for lanem olketa pikinini for waka hard and for duim olketa waka long haos wea fitim age bilong olketa and strong bilong olketa. (Lam. 3:27) Taem King David hem young, hem lane for lukaftarem gud olketa sheepsheep. Hem lane tu for pleim music and raetem olketa singsing. Datwan mekem King Saul askem David for waka for hem. (1 Sam. 16:11, 12, 18-21) Taem David hem young, hem savve plei witim olketa nara pikinini, bat hem lane tu for duim olketa waka wea helpem hem for praisem Jehovah taem hem big. From hem savve tumas for lukaftarem olketa sheepsheep, datwan helpem hem for patient taem hem leadim olketa Israelite. Iufala young wan, waswe, iu lane for duim olketa waka wea bae helpem iu for worshipim Jehovah and for garem olketa responsibility long future?
Gohed Garem Stretfala Tingting
19, 20. Wanem tingting nao iu laek garem abaotem iuseleva and worship bilong iu?
19 Iumi evriwan savve trae hard for garem stretfala tingting abaotem iumiseleva. Iumi no laek for tingse iumi “barava raeteous.” (Eccl. 7:16) Sapos iumi no serious tumas, olketa long famili, pipol long waka, or olketa brata and sista bae laek for story witim iumi. Olketa long famili mas trae for no tok strong long each other bikos datwan savve mekem famili no stap gud. Long kongregeson, evriwan savve lane for mekfani and fren gud tugeta. Taem iumi story tugeta and teachim narawan, iumi savve talem olketa gudfala toktok wea strongim man.—2 Cor. 13:10; Eph. 4:29.
20 Staka pipol long world no tinghae long olketa law bilong Jehovah and wei for worshipim hem. Bat pipol bilong Jehovah luksavve hem barava important for obeyim hem and faithful long hem. Hem nambawan samting for join witim olketa nara brata and sista wea “showimaot respect” taem olketa worshipim Jehovah! Iumi laek for gohed ting long worship bilong iumi olsem important samting.
Wanem Nao Ansa Bilong Iu?
• Why nao iumi shud no garem tingting bilong pipol long world abaotem laef?
• Wanem nao savve helpem iumi for duim gud preaching waka and hapi?
• Hao nao tingting bilong iumi abaotem wei for duim olketa waka showimaot iumi tingim olketa important samting?
• Explainim why hem important for iumi respectim olketa brata and sista and olketa long famili.
[Olketa Kwestin]
[Piksa long page 12]
Hasband mas provaed for famili and helpem olketa fren witim Jehovah
