Waswe, Iu Luksavve Hao God Leadim Iu?
Waswe, Iu Luksavve Hao God Leadim Iu?
NO ENITAEM olketa Israelite or olketa long Egypt lukim cloud olsem. Taem olketa Israelite lusim Egypt, wanfala cloud stap klosap long olketa evriday and evri naet. Long naet, hem kamap wanfala fire. Datwan hem nambawan samting! Bat hu nao mekem datfala cloud kamap? Why nao hem duim datwan? And wanem nao iumi savve lanem from wei wea olketa Israelite ting long “datfala fire and cloud”?—Ex. 14:24.
Bible storyim hu nao mekem datfala cloud and fire kamap and why nao hem duim datwan. Hem sei: “Jehovah nao leadim olketa Israelite. Long daytaem hem iusim wanfala cloud for leadim olketa and long naet datfala cloud kamap fire for leadim olketa. Datfala fire givim laet long road mekem olketa savve travel long naet.” (Ex. 13:21, 22) Jehovah God iusim fire and cloud hia for leadim pipol bilong hem go aot from Egypt and taem olketa stap long wilderness. Olketa mas redi for go taem datfala cloud hem muv. Taem olketa long Egypt klosap for kasem olketa Israelite, datfala cloud muv and stap midol long tufala sekson hia for protectim olketa Israelite. (Ex. 14:19, 20) Nomata datfala cloud no showim olketa Israelite road wea olketa tingse hem stret, olketa mas followim datfala cloud sapos olketa laek for kasem Promis Land.
Cloud hia hem mekem pipol bilong Jehovah luksavve hem stap witim olketa. Datfala cloud stand for Jehovah and samfala taem hem story kam from cloud hia. (Num. 14:14; Ps. 99:7) Jehovah story kam from datfala cloud taem hem markem Moses for leadim olketa Israelite. (Ex. 33:9) Lastaem for olketa lukim datfala cloud hem taem Jehovah markem Joshua for changem Moses. (Deut. 31:14, 15) Tru tumas, for olketa Israelite kasem Promis Land olketa mas luksavve God nao leadim olketa and then followim wanem hem talem.
Olketa No Tinghae Long Wanem Jehovah Duim
Firstaem wea olketa Israelite lukim datfala cloud, masbi olketa sapraes long datwan. Bat nomata olketa lukim datfala mirakol staka taem, olketa no tinghae long datwan and no trustim Jehovah. Staka taem olketa kwestinim wei wea God leadim olketa. Taem army bilong Egypt ronem olketa, olketa no trustim Jehovah bae iusim paoa bilong hem for sevem olketa. Olketa accusim Moses and sei hem leadim olketa for dae. (Ex. 14:10-12) Bihaen God sevem olketa long Red Sea, olketa komplenim Moses, Aaron, and Jehovah bikos olketa tingse olketa no garem kaikai and wata. (Ex. 15:22-24; 16:1-3; 17:1-3, 7) And samfala week bihaen, olketa putim hevi long Aaron for mekem wanfala gold buluka. Tingim diswan! Nomata olketa Israelite savve lukim datfala fire and cloud wea leadim olketa kamaot from Egypt, olketa gohed for worshipim wanfala idol and sei: “Hem nao God bilong iumi wea leadim iumi for kamaot from Egypt.” Olketa duim olketa “nogud samting wea nating showimaot respect”!—Ex. 32:4; Neh. 9:18.
Wei wea olketa Israelite bighed showimaot olketa nating respectim Jehovah wea leadim olketa. Olketa lukim datfala cloud, bat olketa no tinghae long wei wea Jehovah iusim datfala cloud for leadim olketa. Nomata staka taem olketa Israelite mekem Jehovah “barava feel nogud,” Jehovah kaen and sorre long olketa and gohed iusim datfala cloud for leadim olketa go long Promis Land.—Ps. 78:40-42, 52-54; Neh. 9:19.
Luksavve Hao God Leadim Iumi Distaem
Jehovah gohed for leadim pipol bilong hem distaem tu. Hem no expectim olketa Israelite bifor for faendem road for followim. Distaem tu Jehovah no sei iumiseleva nao mas lukaotem wei for go insaed long niu world wea hem promisim. Jesus Christ nao hem Leader bilong kongregeson. (Matt. 23:10; Eph. 5:23) Hem givim samfala waka long wakaman wea faithful and wise. Datfala wakaman markem olketa overseer long Christian kongregeson.—Matt. 24:45-47; Titus 1:5-9.
Hao nao bae iumi luksavve long datfala wakaman wea faithful and wise? Jesus sei: “Hu nao datfala wakaman wea faithful and wise wea boss bae markem hem for lukaftarem olketa nara wakaman and for gohed givim kaikai long olketa long barava taem? Datfala wakaman bae hem hapi sapos boss lukim hem duim olketa samting hia taem hem kam!”—Luke 12:42, 43.
Datfala wakaman hem “faithful.” No enitaem hem lusim Jehovah, Jesus, olketa tru samting long Bible, and pipol bilong God. Datfala wakaman showimaot hem “wise” long wei wea hem leadim disfala important waka for preachim “gud nius abaotem kingdom” and for “teachim pipol long evri kantri for kamap disaepol.” (Matt. 24:14; 28:19, 20) Datfala wakaman givim nambawan spiritual kaikai “long barava taem.” Iumi lukim Jehovah blessim pipol bilong hem bikos olketa kamap staka, hem helpem olketa for disaedem olketa important samting, minim tru samting long Bible, protectim olketa from olketa enemy, and mekem olketa garem peace long mind and heart.—Isa. 54:17; Phil. 4:7.
Tinghae Long Wei wea God Leadim Iumi
Wanem nao iumi savve duim for showimaot iumi tinghae long wei wea God leadim iumi? Aposol Paul sei: ‘Obeyim and stap anda long olketa wea leadim iufala.’ (Heb. 13:17) Maet samfala taem hem no isi for duim datwan. Tingim sapos iu wanfala Israelite long taem bilong Moses wea wakabaot followim datfala cloud. Gogo datfala cloud stap long wanfala ples and hem no muv. Maet iu start for tingting olsem: Hao long nao bae datfala cloud stap olsem? Waswe, bae hem no muv for wanfala day, wanfala week, or staka month? Maet iu ting olsem, ‘Waswe, mi shud aotem evri samting from basket nao or weit firstaem?’ Maet firstaem, iu aotem nomoa olketa samting wea iu need for iusim. Tu-thri day bihaen iu start for aotem evri samting. Bat then seknomoa cloud start for muv taem iu just finis for aotem evri samting, and iu mas putim bak evri samting insaed basket moa! Maet hem no isi for duim datwan. Nomata olsem, olketa Israelite mas “followim nao” datfala cloud.—Num. 9:17-22.
Taem eni change kamap, wanem nao first samting wea iumi duim? Waswe, iumi kwiktaem “followim” datwan? Or waswe, iumi gohed nomoa for duim samting wea iumi getius long hem? Waswe, iumi followim olketa change wea kamap abaotem hao for conductim Bible study, for preach long pipol wea story long difren languis, for evritaem duim Famili Worship, waka tugeta witim Hospital Liaison Komiti, and for showimaot gudfala example taem iumi hipap long convention? Iumi showimaot iumi tinghae long wei wea God leadim iumi taem iumi acceptim kaonsel tu. Taem iumi disaedem olketa important samting, iumi no depend long savve bilong iumiseleva bat trustim Jehovah and organization bilong hem for leadim iumi. And olsem pikinini hem ran go long dadi and mami for protectim hem long taem bilong bigfala thunder, iumi tu savve kasem protection from organization bilong Jehovah taem iumi kasem olketa bigfala problem.
Hem tru, olketa wea Christ iusim long organization long earth for leadim iumi no perfect, olsem Moses bifor tu. Nomata olsem, datfala cloud showimaot God chusim Moses for leadim olketa Israelite and God hapi long hem. Tingim tu, olketa Israelite no followim tingting bilong olketa seleva bat olketa muv taem olketa herem “toktok bilong Jehovah wea hem talem long Moses.” (Num. 9:23) So God iusim Moses for talem olketa Israelite wanem taem olketa mas muv.
Distaem wakaman wea faithful and wise talem iumi abaotem eni change wea kamap. Long wanem wei nao wakaman hia duim datwan? Olketa raetem insaed long Wastaoa, Kingdom Ministry Bilong Iumi, olketa niu pablikeson, and long olketa tok wea kamap long assembly and convention. Iumi kasem instruction thru long olketa traveling overseer, olketa leta, or from olketa brata long kongregeson wea kasem training from olketa theocratic skul.
Waswe, iu luksavve long wei wea God leadim iu? Long olketa last day, world bilong Satan hem olsem “wilderness,” bat Jehovah iusim organization bilong hem for leadim pipol bilong hem. From datwan, iumi garem wan mind, lovem narawan, and stap sef.
Taem olketa Israelite kasem Promis Land, Joshua sei: “Iufala barava savve evri samting wea God bilong iufala Jehovah promisim hem kamap tru. No eni samting wea hem promisim hem no kamap tru. Evri promis bilong hem kamap tru.” (Josh. 23:14) Pipol bilong God distaem tu bae go insaed long niu world wea hem promisim. Bat for iumi stap long there, iumi mas hambol and willing for followim wanem God talem. So iumi evriwan need for luksavve long wei wea Jehovah leadim iumi distaem!
[Piksa long page 5]
Organization bilong Jehovah leadim iumi distaem
Olketa niu release
Olketa theocratic skul
Iumi kasem training taem iumi hipap for go preach
