Gudfala Advaes for Olketa wea Singol and wea Marit
Gudfala Advaes for Olketa wea Singol and wea Marit
“Mi talem diswan . . . for encouragem iufala for duim samting wea fitim olketa wea singol. Diswan minim iufala savve gohed duim waka bilong Lord and no busy long eni nara samting.”—1 COR. 7:35.
1, 2. Why nao iumi shud savve long advaes long Bible abaotem wei for stap singol and marit?
SAMFALA samting wea happen long laef savve mekem tufala wea marit feel hapi, wari, or feel nogud. From iumi savve feel olsem, iumi needim advaes long Bible for helpem iumi. And iumi needim God for helpem iumi long olketa nara samting tu. Olsem example, samfala Christian hapi nomoa for stap singol bat olketa kasem hevi from olketa fren or famili for mas marit. Olketa narawan maet laek for marit bat no faendem partner wea fitim. Olketa wea frenim samwan needim advaes tu abaotem marit laef. And olketa Christian wea singol mas careful for no durong and olketa wea marit mas no duim adultery.
2 Olketa samting olsem wea kasem iumi savve mekem iumi no hapi or spoelem wei wea iumi fren witim God. Long 1 Corinthians chapter 7, Paul givim advaes for olketa wea singol and wea marit. Hem laekem olketa Christian for duim samting wea stret and “gohed duim waka bilong Lord and no busy long eni nara samting.” (1 Cor. 7:35) Advaes wea Paul talem savve helpem iu tu. Hem laekem olketa wea singol and wea marit for duim samting wea Jehovah laekem.
Disison wea Man Seleva Mas Mekem
3, 4. (a) Wanem nao savve happen sapos olketa fren and famili putim hevi long narawan for marit? (b) Hao nao samting wea Paul talem savve helpem iumi garem stretfala tingting abaotem marit?
3 Marit hem important samting long olketa Jew long first century. Distaem tu staka pipol ting olsem. Sapos boy or gele hem big finis bat hem no marit, maet olketa fren or famili wari abaotem hem and laek givim advaes long hem. Maet olketa talem hem for lukaotem samwan for maritim. Or maet olketa storyim samwan wea olketa tingse hem fitim hem. Maet olketa arrange for tufala wea singol for meetim each other bikos olketa laekem tufala for marit. Bat wei for duim olketa samting hia savve mekem man shame, feel nogud, and spoelem wei for fren.
4 Paul no talem narawan olketa shud marit or stap singol. (1 Cor. 7:7) Hem hapi for worshipim Jehovah nomata hem singol, and hem no tok spoelem olketa wea laek marit. Olketa Christian seleva nao bae disaed sapos olketa bae marit or nomoa and narawan shud no disaed for olketa.
Kasem Gud Samting Taem Iu Singol
5, 6. Why nao Paul encouragem olketa Christian for stap singol?
5 Samting wea Paul talem long olketa Christian long Corinth helpem iumi for luksavve olketa wea singol savve hapi. (Readim 1 Corinthians 7:8.) Samfala bigman bilong religion distaem wea no marit tingse olketa gud winim olketa wea marit. Bat Paul no ting olsem. Nomata hem singol, hem no tingse hem gud winim olketa wea marit. Paul sei olketa wea singol savve duim staka samting for worshipim Jehovah winim olketa wea marit. Wanem nao datwan minim?
6 Wanfala Christian wea singol savve acceptim olketa assignment, bat man wea marit maet no fit for duim sem samting. Paul kasem privilege for kamap “wanfala aposol for preach long pipol wea no Jew.” (Rom. 11:13) Acts chapter 13 go kasem 20 story abaotem missionary gogo bilong hem witim olketa narawan. Olketa preach long olketa niu ples and startim staka kongregeson. Taem Paul duim ministry, hem kasem plande hard taem wea iumi distaem maet no kasem. (2 Cor. 11:23-27, 32, 33) Nomata olsem, Paul hapi and no givap for helpem narawan kamap disaepol. (1 Thess. 1:2-7, 9; 2:19) Sapos Paul marit, maet hem no fit for duim evri samting hia.
7. Wanem nao tufala singol sista duim?
7 Plande brata and sista wea singol chus for duim staka samting long preaching waka. Tingim Sara and Limbania, tufala singol sista wea pioneer long Bolivia. Tufala go stap long vilij wea no eniwan preach long hem for staka year. No eniwan long vilij garem TV or radio, so samting wea olketa laekem tumas nao hem for read. Samfala readim yet olketa oldfala magasin and buk wea iumi no printim distaem. Klosap evriwan long vilij laek for lane abaotem Bible, so hem tek longtaem for tufala finisim full territory. Wanfala olo woman sei long tufala: “Luk olsem end hem klosap nao bikos iufala Jehovah’s Witness kasem mifala.” Gogo samfala long vilij start for kam long olketa kongregeson meeting.
8, 9. (a) Why nao Paul sei hem gud for worshipim God taem man singol? (b) Wanem gud samting nao olketa singol Christian savve kasem?
8 Hem tru, olketa wea marit savve kasem gud samting tu taem olketa preach long territory wea no isi. Bat samfala assignment wea olketa singol pioneer kasem maet hem no isi for olketa wea marit or wea garem pikinini. Taem Paul raet long olketa kongregeson bifor, hem savve staka ples stap yet for olketa preachim gud nius. Paul hapi taem hem helpem pipol kamap disaepol and hem laekem narawan tu for kasem sem samting. Dastawe Paul sei hem gud for worshipim Jehovah taem man singol.
9 Wanfala pioneer sista long America sei: “Samfala pipol tingse olketa wea singol no savve hapi. Bat mi savve wei for fren witim Jehovah nao mekem man hapi. Nomata samfala taem hem no isi for stap singol, hem wanfala blessing sapos man iusim long gudfala wei.” Hem sei tu: “Man wea singol savve hapi tu. Mi savve Jehovah lovem evriwan nomata olketa marit or singol.” Distaem sista hia stap long kantri wea needim staka pablisa moa for preach. Sapos iu singol, waswe, iu savve duim samfala samting moa for helpem narawan savve long truth? Sapos olsem, wei wea iu singol bae olsem nambawan present from Jehovah.
Olketa wea Laek Marit
10, 11. Wanem nao Jehovah duim for helpem olketa wea laek marit bat no faendem partner wea fitim?
10 Maet wanfala Christian wea singol for lelebet longtaem laek for marit. From hem luksavve hem needim advaes, hem askem Jehovah for helpem hem faendem partner wea fitim.—Readim 1 Corinthians 7:36.
11 Sapos iu laek for maritim man wea gohed strong for worshipim Jehovah, hem gud for prea abaotem datwan. (Phil. 4:6, 7) Nomata sapos iu mas weit for lelebet longtaem, no wikdaon. Jehovah savve long wanem iu needim. Sapos iu trustim hem, bae hem helpem iu for gohed garem gudfala tingting and hapi nomata iu singol.—Heb. 13:6.
12. Sapos samwan askem iu for marit, wanem nao iu shud tingim firstaem?
12 Wanem nao bae iu duim sapos wanfala brata wea no strong for worshipim God or samwan wea no Witness askem iu for maritim hem? Maet iu barava laek for marit. Bat sapos iu no disaed gud and then iu marit, bae iu sorre winim taem wea iu singol. Bible sei iu mas stap witim man or woman wea iu maritim. Disison wea iu mekem bae affectim full laef bilong iu. (1 Cor. 7:27) So no maritim eniwan nomoa bikos iu tingse datwan hem chance bilong iu. Nogud bihaen iu sorre long wanem iu disaedem.—Readim 1 Corinthians 7:39.
Prepare Firstaem for Marit Laef
13-15. Olketa wanem samting nao tufala wea plan for marit shud storyim firstaem?
13 Nomata Paul sei hem gud for stap singol, hem no ting daonem olketa wea disaed for marit. Paul laek for helpem olketa, so hem givim advaes abaotem marit laef and hao for stap gud tugeta.
14 Samfala wea fren maet need for changem tingting bilong olketa abaotem marit laef. Taem tufala marit, maet tufala tingse olketa bae hapi olowe and no kasem eni problem. Bat marit laef hem no olsem. Samfala taem bae tufala no hapi. Hem tru, taem tufala wea marit duim samting wea showimaot tufala lovem each other, datwan savve mekem tufala hapi. Bat wei for duim olsem bae no stretem evri problem and hard taem wea tufala kasem.—Readim 1 Corinthians 7:28. *
15 Samfala wea just marit savve feel nogud taem partner no agree long olketa important samting. Olsem example, maet tufala no agree long hao for iusim selen, wanem kaen hapitaem for duim, ples for stap, or haomas taem nao bae tufala visitim famili. Maet hasband feel nogud long samfala wei bilong waef or waef feel nogud long samfala wei bilong hasband. Sapos tufala wea fren no storyim olketa important samting hia, datwan savve mekem problem kamap taem tufala marit. So hem gud for tufala storyim datwan firstaem.
16. Why nao hasband and waef mas agree long hao for stretem olketa problem?
16 Hasband and waef bae hapi sapos tufala story gud abaotem waka bilong olketa long famili. Tufala mas agree long hao for disciplinem pikinini and hao for lukaftarem dadi and mami bilong tufala wea olo. Nomata famili kasem problem, tufala shud no letem datwan for mekem tufala no stap tugeta. Advaes long Bible bae helpem tufala for stretem problem or savve wanem for duim nomata problem no finis. Advaes hia bae helpem tufala for stap tugeta and hapi.—1 Cor. 7:10, 11.
17. Why nao pipol wea marit “wari abaotem olketa samting bilong disfala world”?
17 Paul storyim olketa nara samting abaotem marit laef long 1 Corinthians 7:32-34. (Readim.) Pipol wea marit “wari abaotem olketa samting bilong disfala world” olsem kaikai, kaleko, ples for stap, and olketa nara samting. Why nao olketa warim olketa samting hia? Tingim diswan. Taem brata hem singol maet hem iusim staka taem long ministry. Bat taem hem marit, hem no savve duim sem samting wea hem duim long ministry bifor bikos hem mas lukaftarem waef. Maet waef tu need for changem samfala samting. Jehovah luksavve hasband and waef laek for hapi. Hem luksavve maet tufala no fit for duim sem samting wea tufala duim for hem taem tufala singol and tufala need for iusim samfala taem for strongim marit bilong tufala.
18. Maet wanem nao hasband and waef need for changem saed long hapitaem?
18 Bat tingim diswan. From hasband and waef no fit for duim sem samting for Jehovah olsem taem tufala singol, tufala shud changem samfala samting saed long hapitaem tu. Hao nao bae waef feel sapos hasband evritaem plei sports witim olketa fren bilong hem olsem hem duim taem hem singol? And hao nao bae hasband feel sapos waef evritaem kaban witim olketa fren bilong hem olsem hem duim taem hem singol? Samting wea hasband or waef duim savve mekem partner bilong hem feel lonely, no hapi, or tingse hem no lovem hem. Dastawe tufala need for waka hard for strongim marit bilong tufala.—Eph. 5:31.
Jehovah Laekem Iumi for Garem Gudfala Wei
19, 20. (a) Wanem nao olketa wea marit mas tingim? (b) Sapos hasband and waef no stap tugeta for longtaem, wanem nao savve happen?
19 Olketa wea worshipim Jehovah traem best for garem gudfala wei. Samfala marit bikos olketa fraet nogud olketa durong. Bat man wea marit tu mas careful for no duim adultery. Bible sei olketa taon bifor garem bigfala wall for protectim pipol. Sapos man go aotsaed maet olketa criminal stealim olketa samting bilong hem or killim hem dae. Semsem tu, olketa law wea Jehovah putim for olketa wea marit hem olsem wall wea protectim tufala. Sapos tufala obeyim wanem Jehovah talem saed long sex, no eni samting bae spoelem marit bilong tufala.
20 Paul storyim datwan long 1 Corinthians 7:2-5. Hasband mas sleep witim waef bilong hem nomoa and waef mas sleep witim hasband bilong hem nomoa. God sei hasband mas givim “wanem waef hem fit for kasem” and waef tu mas duim sem samting for hasband. Diswan minim tufala mas tingim each other saed long sex. Sapos hasband or waef go waka long nara province or disaed for holiday seleva, datwan stopem tufala for sleep tugeta. Satan savve iusim kaen samting olsem for spoelem marit. Sapos hasband or waef no tingim each other saed long sex, maet narawan no savve kontrolem hemseleva and hem duim adultery. Jehovah bae blessim olketa hasband wea lukaftarem famili and wea no duim eni samting wea savve spoelem marit bilong olketa.—Ps. 37:25.
Followim Advaes Long Bible
21. (a) Why nao hem no isi for mekem disison for stap singol or marit? (b) Hao nao advaes long 1 Corinthians chapter 7 savve helpem iumi?
21 Hem no isi for mekem disison for stap singol or marit. Iumi evriwan savve kasem olketa problem bikos iumi no perfect. And nomata Jehovah blessim pipol bilong hem, samfala taem olketa bae feel nogud long samting wea happen long laef. Bat sapos iumi followim advaes wea Paul talem long 1 Corinthians chapter 7, bae iumi no kasem staka problem wea iumi storyim. Nomata iumi singol or marit iumi savve mekem Jehovah hapi. (Readim 1 Corinthians 7:37, 38.) Datwan hem nambawan samting. Sapos iumi duim wanem Jehovah laekem, iumi bae stap long niu world wea hem promisim. Long datfala taem, bae iumi no kasem olketa problem and hevi wea iumi kasem distaem.
[Footnote]
^ par. 14 Lukim buk Secret for Kasem Hapi Famili, chapter 2, paragraf 16-19.
Wanem Nao Ansa Bilong Iu?
• Why nao iumi shud no putim hevi long narawan for marit?
• Wanem gud samting nao olketa wea singol savve duim?
• Hao nao tufala wea fren savve prepare for marit laef?
• Wanem nao olketa wea marit mas tingim?
[Olketa Kwestin]
[Piksa long page 14]
Staka Christian wea singol hapi bikos olketa duim plande samting for Jehovah
[Piksa long page 16]
Wanem nao samfala samting wea hasband and waef maet need for changem?
