1. Wanem nius abaotem olketa Christian long Corinth nao mekem Paul barava hapi?

LONG 55 C.E., aposol Paul herem nius olketa long kongregeson long Corinth raoa olowe. From hem lovem olketa olsem wanfala dadi wea lovem olketa pikinini bilong hem, hem sendem wanfala leta for stretem tingting bilong olketa. (1 Cor. 1:11; 4:15) Paul askem fren bilong hem Titus for visitim olketa tu and bihaen for hem kam meetim Paul long Troas, wanfala taon wea stap long saedsea, for storyim hao nao olketa long Corinth. Samfala month bihaen, Paul weit long Troas for Titus meetim hem long there. Paul gohed wari abaotem olketa long Corinth. Bat Paul barava sorre from Titus no kam. Wanem nao Paul duim? Hem go insaed ship for go long Macedonia and hem barava hapi taem hem meetim Titus long there. Titus talem Paul olketa long Corinth followim kaonsel bilong Paul and olketa laekem tumas for lukim hem. Taem Paul herem datwan, hem “hapi tumas.”—2 Cor. 2:12, 13; 7:5-9.

2. (a) Wanem nao Paul talem olketa long Corinth abaotem faith and wei for hapi? (b) Olketa wanem kwestin nao bae iumi storyim?

² No longtaem bihaen, Paul raetem narafala leta for olketa long Corinth. Hem sei: “Mi no sei mifala boss long faith bilong iufala, bat mifala waka tugeta witim iufala for mekem iufala hapi. Faith bilong iufala nao hem mekem iufala strong.” (2 Cor. 1:24) Why nao Paul talem datwan? And wanem nao olketa elder long kongregeson distaem savve lanem from samting wea hem talem?

3. (a) Wanem nao Paul minim taem hem sei “faith bilong iufala nao hem mekem iufala strong”? (b) Long wanem wei nao olketa elder distaem followim example bilong Paul?

³ Paul sei hem important for olketa Christian mas garem faith and hapi. Firstaem Paul hem story abaotem  faith. Hem sei: “Mi no sei mifala boss long faith bilong iufala. . . . Faith bilong iufala nao hem mekem iufala strong.” Paul savve olketa long Corinth faithful for worshipim God bikos olketa seleva nao garem faith, no bikos long samting wea Paul or eni narawan talem or duim. Hem sure olketa barava lovem God and laek for duim samting wea stret. So Paul hem no boss long faith bilong olketa brata bilong hem, and hem no laek for bossim olketa tu. (2 Cor. 2:3) Olketa elder distaem followim example bilong Paul. Olketa sure olketa brata garem faith long God and olketa worshipim God from olketa lovem hem. (2 Thess. 3:4) Olketa no putim olketa strict rul long kongregeson, bat olketa helpem olketa brata for followim olketa Bible principle and direction from organization bilong Jehovah taem olketa mekem disison. Olketa elder distaem no “bossim olketa pipol bilong God.”—1 Pet. 5:2, 3.

4. (a) Wanem nao Paul minim taem hem sei: “Mifala waka tugeta witim iufala for mekem iufala hapi”? (b) Long wanem wei nao olketa elder distaem followim example bilong Paul?

⁴ Paul sei tu: “Mifala waka tugeta witim iufala for mekem iufala hapi.” Taem Paul talem datwan, hem story abaotem hemseleva and olketa wea waka tugeta witim hem. Hao nao iumi savve long datwan? Long datfala sem leta wea Paul raetem for olketa long Corinth hem talem nem bilong tufala long olketa hia. Paul sei hem “witim Silvanus and Timothy” story abaotem Jesus long olketa. (2 Cor. 1:19) And tu, long olketa nara leta bilong Paul, taem hem storyim olketa narawan wea waka tugeta witim hem, hem minim olketa wea duim preaching waka witim hem, olsem Apollos, Aquila, Prisca, Timothy, and Titus. (Rome 16:3, 21; 1 Cor. 3:6-9; 2 Cor. 8:23) So taem Paul sei: “Mifala waka tugeta witim iufala for mekem iufala hapi,” hem laekem olketa long Corinth for savve hem and olketa wea waka tugeta witim hem laek helpem datfala kongregeson for hapi taem olketa worshipim God. Olketa elder distaem tu garem sem tingting. Olketa laek helpem olketa brata for hapi for worshipim Jehovah.—Ps. 100:2; Phil. 1:25.

5. Wanem kwestin nao olketa askem long samfala brata and sista, and wanem nao iumi shud tingim?

⁵ No longtaem go nomoa olketa askem disfala kwestin long samfala brata and sista long olketa difren ples long world: “Wanem nao samfala samting wea wanfala elder talem or duim wea helpem iu for hapi?” Bae iumi storyim ansa bilong olketa. Taem iumi storyim diswan, tingim olketa samting wea olketa elder talem or duim wea helpem iu for hapi. Tingim tu wanem iu savve duim for helpem olketa long kongregeson bilong iu for hapi. *

6, 7. (a) Wanem nao wanfala wei wea olketa elder savve followim example bilong Jesus, Paul, and olketa nara wakaman bilong God? (b) Why nao olketa brata and sista hapi taem iumi rememberim nem bilong olketa?

⁶ Staka brata and sista sei olketa hapi taem olketa elder showimaot interest long olketa. Wanfala wei wea olketa elder savve duim diswan hem for duim sem samting wea David, Elihu, and Jesus duim. (Readim 2 Samuel 9:6; Job 33:1; Luke 19:5.) Thrifala hia showimaot olketa interest long narawan long wei for iusim nem bilong olketa. Paul tu luksavve hem important for rememberim and iusim nem bilong olketa brata and sista. Long end bilong wanfala leta bilong Paul, hem talem nem bilong winim 25 brata and sista. Nem bilong wanfala sista hia  hem Persis. Paul sei: “Talem hello long gud fren bilong iumi Persis.”—Rome 16:3-15.

⁷ Samfala elder faendem hem hard for rememberim olketa nem. Bat taem wanfala elder traem best for rememberim nem bilong olketa brata and sista, datwan savve mekem olketa feel olsem hem tingim olketa. (Ex. 33:17) Olketa brata and sista savve feel hapi tu taem olketa elder talem nem bilong olketa taem olketa laek givim koment long Wastaoa Study or long olketa nara meeting.—Comparem John 10:3.

8. Wanem nao wanfala important wei wea Paul followim example bilong Jehovah and Jesus?

⁸ Paul showimaot hem tingim narawan tu long wei for praisem olketa. Diswan hem narafala wei wea olketa elder savve helpem olketa brata and sista for hapi taem olketa worshipim God. Taem Paul raet for olketa long Corinth, hem sei hem praod long olketa. Hem sei: “Mi barava savve tok praod abaotem iufala.” (2 Cor. 7:4) Iumi sure disfala toktok bilong Paul hem mekem olketa brata long Corinth luksavve hem lovem olketa. Paul praisem olketa nara kongregeson tu for gudfala samting wea olketa duim. (Rome 1:8; Phil. 1:3-5; 1 Thess. 1:8) And bihaen Paul story abaotem Persis long leta wea hem raetem for kongregeson long Rome, hem sei tu: “Sista hia duim staka samting long waka bilong Lord.” (Rome 16:12) Masbi datfala toktok hem barava encouragem Persis. Paul followim example bilong Jehovah and Jesus taem hem praisem olketa narawan.—Readim Mark 1:9-11; John 1:47; Rev. 2:2, 13, 19.

9. Hao nao wei for praisem narawan savve mekem evriwan long kongregeson hapi?

⁹ Olketa elder distaem tu luksavve hem barava important for talem olketa brata and sista olketa tinghae long olketa. (Prov. 3:27; 15:23) Taem elder praisem olketa brata, hem showimaot hem tingim olketa and hem savve long wanem olketa duim. Olketa brata and sista long kongregeson needim olketa elder for talem toktok wea encouragem olketa. Wanfala sista wea winim 50 year sei no eniwan savve praisem hem long ples wea hem waka. Hem sei pipol no tingim narawan and laek for winim narawan olowe. So taem wanfala elder talem thankiu long hem for samting wea hem duim long kongregeson, datwan mekem sista hia feel hapi. Hem sei: “Datwan mekem mi feel olsem Dadi long heven hem lovem mi.” Wanfala brata wea hem singol dadi wea garem tufala pikinini hem garem sem tingting tu. No longtaem go nomoa wanfala elder praisem hem. Hem sei: “Toktok bilong datfala elder barava strongim mi!” Tufala example hia showimaot taem olketa elder praisem olketa brata and sista, datwan helpem olketa for gohed hapi for worshipim God and no givap.—Isa. 40:31.

10, 11. (a) Hao nao olketa elder savve followim example bilong Nehemiah? (b) Wanem nao elder savve duim for strongim faith bilong olketa brata and sista taem hem visitim olketa?

¹⁰ Wanem nao nara important wei wea olketa elder savve showimaot olketa lovem olketa brata, and savve helpem olketa for hapi for worshipim God? Hem nao for kwiktaem duim samting for helpem olketa wea needim encouragement. (Readim Acts 20:28.) Taem olketa duim datwan, olketa followim example bilong olketa long Bible wea worshipim God. Olsem example, Bible sei taem Nehemiah luksavve samfala nara Israelite wikdaon, hem duim samting for encouragem olketa. (Neh. 4:14) Olketa elder tu laek for duim sem samting distaem. Taem olketa brata wikdaon, olketa duim samting for encouragem olketa. Olketa elder trae for visitim olketa and “storyim samting for helpem olketa fren witim God.” (Rome 1:11) Wanem  nao savve helpem olketa elder for duim diswan?

¹¹ Elder wea redi for visitim samwan mas tingting gud firstaem abaotem hao hem savve encouragem datfala brata or sista. Olsem example, hem savve ting raonem olketa kwestin hia: ‘Wanem nao olketa hard samting wea disfala brata or sista hem mas deal witim? Wanem nao mi savve talem for encouragem hem? Wanem scripture or example long Bible nao mi savve iusim for duim datwan?’ Sapos elder tingting gud firstaem abaotem datfala brata or sista wea hem bae visitim, hem savve story abaotem olketa samting wea savve barava helpem hem, and no story nating nomoa. Taem hem visit, hem letem brata or sista hia for story tu and hem lisin gud long wanem olketa talem. (Jas. 1:19) Wanfala sista sei: “Taem wanfala elder barava lisin gud long wanem mi talem, datwan hem barava comfortim mi.”—Luke 8:18.

12. Hu nao needim encouragement from olketa elder, and why nao olsem?

¹² Hu nao needim encouragement from olketa elder? Taem Paul talem olketa elder for “lukaftarem olketa sheepsheep,” diswan minim evriwan long kongregeson. Tru nao, evriwan long kongregeson needim encouragement, nomata olketa pablisa and pioneer wea faithful for staka year tu. Why nao olketa hia needim olketa elder for encouragem olketa? Nomata faith bilong olketa strong, samfala taem olketa faendem hem barava hard for deal witim olketa samting wea olketa feisim long disfala nogud world. Tingim wanfala samting wea happen long King David, wea showimaot why olketa wea strong needim help bilong narawan samfala taem.

13. (a) Wanem taem nao Ishbi-benob luksavve hem garem chance for attakim David? (b) Hao nao Abishai fit for helpem David long barava taem wea hem needim?

¹³ No longtaem bihaen Jehovah chusim David for kamap king, hem faet witim Goliath, wea hem wanfala giant from tribe bilong Rephaim. David nating fraet and hem  killim dae datfala giant. (1 Sam. 17:4, 48-51; 1 Chron. 20:5, 8) Staka year bihaen, taem Israel faetem olketa Philistine, David faetem narafala giant moa. Nem bilong hem Ishbi-benob, wea hem tu from tribe bilong Rephaim. (2 Sam. 21:16; ftn.) Bat long disfala faet, datfala giant hem klosap killim dae David. Hao nao olsem? Datwan hem no bikos David hem fraet, bat Bible sei David “start for taed.” Taem Ishbi-benob lukim David hem taed, hem luksavve hem garem chance nao for attakim hem. Bat “semtaem nomoa” Abishai kam for helpem David and hem killim dae datfala Philistine. (2 Sam. 21:15-17) Datfala giant klosap killim dae David! Masbi David hem tinghae long Abishai wea stanbae for helpem hem and kwiktaem duim samting taem laef bilong hem stap long danger. Wanem nao iumi savve lanem from disfala story?

14. (a) Wanem nao savve helpem iumi for gohed faithful taem iumi kasem olketa hard taem? (b) Hao nao olketa elder savve helpem narawan for gohed faithful and hapi? Storyim example.

¹⁴ Pipol bilong Jehovah evriwea long world gohed for worshipim hem nomata Satan and olketa narawan trae for stopem olketa. Samfala long iumi kasem olketa hard taem wea big tumas, wea olsem iumi feisim olketa giant. Bat from iumi barava trustim Jehovah, iumi kasem strong for gohed faithful long olketa hard taem hia, olsem David hem strong for killim dae Goliath. Taem iumi strong iumi savve deal witim olketa problem wea kasem iumi. Bat samfala taem, iumi no feel strong for gohed againstim world bilong Satan. Long taem olsem hem isi for olketa problem savve mekem iumi wikdaon. Maet wanfala elder luksavve long diswan and helpem iumi long barava taem. Diswan savve helpem iumi for gohed hapi for worshipim God. Staka long iumi kasem kaen help olsem. Wanfala pioneer sista wea winim 60 year hem sei: “Wantaem mi no mas feel gud, and preaching waka mekem mi feel taed. Wanfala elder hem luksavve long diswan and kam story witim mi. Mifala storyim samfala verse long Bible, and datwan encouragem mi. Mi followim olketa idea wea hem talem, and mi kasem gud samting from datwan.” Sista hia sei tu: “Datfala elder hem kaen tumas for helpem mi taem hem luksavve mi start for wikdaon!” Hem gud tumas for savve olketa elder tingim iumi and stanbae for helpem iumi, olsem Abishai hem stanbae for helpem David.

15, 16. (a) Why nao olketa brata and sista lovem Paul? (b) Why nao iumi lovem olketa elder long kongregeson bilong iumi?

¹⁵ Olketa elder barava waka hard. Samfala taem olketa no savve sleep gud long naet bikos olketa wari abaotem olketa brata and sista, and maet olketa wekap leit for prea abaotem olketa or helpem olketa. (2 Cor. 11:27, 28) Nomata olsem olketa elder hapi for duim waka bilong olketa, olsem Paul. Hem sei long olketa long Corinth: “Mi hapi for givim evri samting wea mi garem and givim miseleva tu for helpem iufala.” (2 Cor. 12:15) From Paul lovem olketa long kongregeson, hem ‘givim hemseleva’ long olketa, wea minim hem iusim full strong bilong hem for strongim olketa. (Readim 2 Corinth 2:4; Phil. 2:17; 1 Thess. 2:8) Dastawe olketa brata barava lovem Paul!—Acts 20:31-38.

¹⁶ Iumi tu lovem olketa elder bilong iumi and talem thankiu long Jehovah from hem iusim olketa for lukaftarem iumi. Iumi hapi olketa showimaot interest long iumi wanwan and visitim iumi for encouragem iumi. And iumi tinghae long wei wea olketa stanbae for helpem iumi taem hem no isi for iumi deal witim olketa hard taem seleva. Olketa elder hia waka hard for mekem iumi hapi.