1. Wanem nogud samting nao olketa man kasem distaem?

HEM no plan bilong Jehovah for olketa man kamap olo and kasem nogud samting wea kamaot from datwan. Plan bilong God hem for olketa man and woman perfect and stap long Paradaes. Bat long distaem, “evri samting wea God wakem gohed for krae long heart and safa tugeta.” (Rome 8:22) God no hapi for lukim pipol kasem nogud samting from wei wea iumi olketa man born sin. Taem man olo hem nao taem hem needim samwan for lukaftarem hem. Bat iumi sorre for lukim staka wea olo no eniwan lukaftarem olketa.—Ps. 39:5; 2 Tim. 3:3.

2. Why nao olketa Christian hapi for garem olketa olo insaed long kongregeson?

² Pipol bilong Jehovah hapi for garem olketa olo insaed long kongregeson. Iumi kasem gud samting from savve wea olketa garem, and iumi laek for followim gudfala example bilong olketa. Staka long olketa olo hia hem olketa relative bilong iumi. Nomata olketa relative bilong iumi or nomoa, iumi laek for lukaftarem olketa. (Gal. 6:10; 1 Pet. 1:22) Disfala study bae helpem iumi evriwan for savve long tingting bilong God abaotem olketa wea olo. Iumi bae storyim tu responsibility wea  famili and kongregeson garem for lukaftarem olketa wea olo.

3, 4. (a) Wanem nao man wea raetem Psalm 71 askem long Jehovah? (b) Wanem nao olketa olo long kongregeson savve askem long God?

³ Psalm 71:9 sei: “Nomata mi olo, plis iu no les long mi. Taem mi wiki, plis iu no lusim mi.” Luk olsem David nao raetem olketa toktok hia. David worshipim God for full laef bilong hem and Jehovah iusim hem for duim staka gud samting. (1 Sam. 17:33-37, 50; 1 Ki. 2:1-3, 10) Nomata David duim staka samting for Jehovah, bat taem hem olo hem askem Jehovah for no lusim hem.​—Readim Psalm 71:17, 18.

⁴ Staka distaem olketa olsem David. Nomata olketa gogo for olo and feisim “taem bilong trabol,” olketa traem best for praisem God. (Eccl. 12:1-7) Maet olketa no fit for duim staka samting olsem bifor, and maet long ministry tu. Bat olketa tu savve askem Jehovah for gohed blessim and lukaftarem olketa. Jehovah bae herem prea bilong olketa olo hia wea faithful. Iumi savve long diswan bikos Jehovah iusim holy spirit for muvim David for askem sem samting long prea bilong hem.

5. Wanem nao tingting bilong Jehovah abaotem olketa olo wea faithful?

⁵ Jehovah barava tinghae long olketa olo, and hem laekem olketa wea worshipim hem for duim sem samting tu. (Ps. 22:24-26; Prov. 16:31; 20:29) Leviticus 19:32 sei: “Iufala mas standap front long man wea garem white hair, and iufala mas respectim olketa wea olo, and iufala mas fraet long God bilong iufala. Mi nao Jehovah.” Tru tumas, long bifor hem barava important for showimaot respect long olketa wea olo long kongregeson, and hem important distaem tu. Bat hu nao garem responsibility for lukaftarem olketa olo?

6. Wanem gudfala example nao Jesus showimaot long wei for lukaftarem mami bilong hem?

⁶ Bible sei: “Respectim dadi and mami bilong iufala.” (Ex. 20:12; Eph. 6:2) Jesus showimaot disfala komand hem barava important taem hem tok strong long olketa Pharisee and olketa scribe wea no laek for lukaftarem mami and dadi bilong olketa. (Mark 7:5, 10-13) Jesus showimaot nambawan example. Nomata taem hem redi for dae, hem tingim mami bilong hem wea maet hem wanfala widow. Jesus askem disaepol John wea hem gudfala fren bilong hem, for lukaftarem mami bilong hem.​—John 19:26, 27.

7. (a) Wanem principle nao Paul talem long leta wea hem raetem for Timothy? (b) Wanem nara samting nao Paul story abaotem?

⁷ Long leta wea aposol Paul raetem long Timothy, Paul sei olketa Christian shud lukaftarem famili bilong olketa seleva. (Readim 1 Timothy 5:4, 8, 16.) Paul talem datfala principle taem hem story abaotem hu nao kongregeson fit for helpem saed long selen. Paul sei olketa Christian pikinini, grani, and olketa nara relative bilong olketa widow woman wea olo nao garem responsibility for lukaftarem olketa. Taem olketa duim olsem, hem no putim tumas hevi long kongregeson for duim datwan. Distaem tu, iumi showimaot iumi lovem God taem iumi helpem olketa relative wea olo.

8. Why nao Bible no listim evri samting wea Christian mas duim for lukaftarem parents bilong hem wea olo?

⁸ Olketa Christian garem responsibility for mek sure parents bilong olketa kasem wanem olketa needim. Paul story abaotem wei for helpem olketa relative “wea biliv,” bat olketa Christian shud mek sure parents bilong olketa wea no biliv tu kasem wanem olketa needim. Evri famili no semsem, so each famili mas disaed wanem olketa savve  duim for helpem parents bilong olketa. Olsem example, health bilong parents, samting olketa needim, and wei bilong olketa no semsem. Samfala olo garem staka pikinini and olketa narawan garem wanfala nomoa. Samfala olo gavman nao sapotim olketa, bat olketa narawan nomoa. And tu, samting wea olketa olo laekem hem no semsem. So hem no fitim and iumi no showimaot love sapos iumi tok daonem hao olketa narawan lukaftarem relative bilong olketa wea olo. Jehovah savve blessim eni disison wea man mekem wea followim Bible, olsem hem duim long taem bilong Moses.​—Num. 11:23.

9-11. (a) Wanem disison nao maet hem no isi for samfala mekem taem samting happen long parents? (Lukim piksa long start bilong study.) (b) Why nao olketa Christian wea duim full-taem service shud no kwiktaem lusim assignment bilong olketa? Storyim example.

⁹ Hem no isi for olketa pikinini lukaftarem parents wea stap farawe from olketa. Maet samfala samting happen long parents wea mekem olketa pikinini mas go kwiktaem for lukim olketa. Olsem example, maet olketa garekil from olketa foldaon, or eni nara samting kasem olketa. And maet olketa pikinini need for stap for lelebet taem for lukaftarem parents bilong olketa, or maet for longtaem lelebet. *

¹⁰ Olketa wea duim full-taem service and wea stap farawe from parents bilong olketa maet need for mekem samfala disison wea no isi. Olketa Bethelite, olketa missionary, and olketa traveling overseer barava tinghae long assignment bilong olketa. Nomata olsem, taem parents bilong olketa sik, maet first samting wea olketa tingim hem for lusim assignment and go lukaftarem parents bilong olketa. Bat hem gud for prea abaotem and ting raonem wanem nao parents barava needim and laekem. Olketa Christian shud no kwiktaem lusim assignment wea Jehovah givim olketa, and maet olketa no need for duim datwan tu. Maet sik wea kasem mami or dadi hem no big tumas. And maet samfala long kongregeson bilong hem savve help for lukaftarem hem for lelebet taem, mekem pikinini bilong olketa savve gohed long assignment bilong olketa.​—Prov. 21:5.

¹¹ Olsem example, tufala really brata stap farawe from parents bilong tufala. Wanfala hem missionary long Paraguay and narawan waka long world headquarter, long Brooklyn, New York. Taem parents bilong olketa sik, tufala boy witim waef bilong tufala go bak for lukim olketa. Tufala wea duim missionary waka tingting for lusim assignment bilong tufala and go lukaftarem parents bilong olketa. Then olketa elder long kongregeson bilong dadi and mami ringim tufala missionary hia and sei olketa elder story raonem samting wea happen, and laekem tufala for gohed stap long assignment bilong tufala. Olketa elder tinghae long waka wea tufala duim and willing for help for lukaftarem parents bilong olketa. Evriwan long famili tinghae long love wea olketa elder showimaot for helpem olketa!

12. Wanem nao Christian famili shud mek sure long hem taem olketa disaedem hao for lukaftarem parents wea olo?

¹² Christian famili shud mek sure evri samting wea olketa disaed for duim for lukaftarem parents wea olo hem mekhae long nem bilong God. Iumi no laek olsem olketa bigman long religion long taem bilong Jesus. (Matt. 15:3-6) Bat iumi laek for mekhae long Jehovah and no duim eni samting wea bae spoelem nem bilong kongregeson.​—2 Cor. 6:3.

13, 14. Hao nao Bible showimaot olketa kongregeson shud help for lukaftarem olketa olo brata and sista?

¹³ No evri kongregeson savve duim sem  samting for helpem olketa wea insaed full-taem service olsem kongregeson wea iumi storyim long paragraf 11. Bat Bible showimaot olketa kongregeson shud duim wanem olketa fit for duim for helpem olketa olo wea faithful insaed kongregeson. Bible sei long kongregeson long Jerusalem, “evriwan kasem nao need bilong olketa.” Datwan no minim evriwan long datfala kongregeson olketa rich. Samfala no garem staka samting, bat evriwan kasem need bilong olketa bikos “olketa aposol nao sharem datfala selen long evriwan fitim samting wea olketa needim.” (Acts 4:34, 35) Bat bihaen, wanfala problem kamap long datfala kongregeson. Samfala widow woman “no kasem nao kaikai wea olketa narawan savve kasem evriday.” So wanem nao olketa aposol duim for stretem datfala problem? Olketa markem samfala man wea pipol tinghae long olketa for mek sure olketa widow hia kasem kaikai wea olketa needim. (Acts 6:1-5) Hem tru, datfala arrangement for sharem kaikai hem for lelebet taem nomoa for helpem pipol wea kamap Christian long Pentecost 33 C.E. and wea gohed stap long Jerusalem for strongim faith bilong olketa. Nomata olsem, samting wea olketa aposol disaedem showimaot kongregeson savve duim samting for helpem olketa faithful brata and sista wea garem need.

¹⁴ Paul storyim long Timothy wanem taem nao hem fitim for kongregeson lukaftarem olketa Christian widow wea needim help. (1 Tim. 5:3-16) Aposol James sei olketa Christian garem responsibility for lukaftarem olketa pikinini wea no garem dadi and mami, and olketa widow woman, and olketa narawan wea kasem hard taem. (Jas. 1:27; 2:15-17) Aposol John sei tu: “Sapos man wea garem plande samting hem lukim brata bilong hem needim samting bat hem no laek kaen long hem, datfala man hem nating lovem God.” (1 John 3:17) So sapos wanfala Christian hem garem responsibility for lukaftarem olketa wea needim help, then kongregeson tu garem responsibility for duim sem samting.

15. Help wea famili or kongregeson savve provaedem for olketa olo brata and sista maet depend long olketa wanem samting?

¹⁵ Long samfala kantri maet gavman savve givim selen and provaedem olketa nara samting wea olketa olo needim. (Rome 13:6) Bat long olketa nara kantri olketa olo no kasem kaen help olsem. So help wea olketa relative and kongregeson provaedem hem depend long need bilong olketa olo. Sapos olketa pikinini wea biliv stap farawe from parents, maet hem no isi for olketa duim evri samting wea olketa laek duim for helpem parents bilong olketa. Olketa pikinini  need for story gud witim olketa elder long kongregeson bilong parents bilong olketa, mekem evriwan savve wanem for duim for helpem parents wea olo. Olsem example, maet olketa elder savve helpem olketa olo for go faendemaot samfala samting wea gavman savve provaedem for helpem olketa. Maet olketa elder luksavve parents no drinkim medicine, or no peim bill bilong wata or paoa, and olketa need for letem pikinini savve abaotem datwan. Sapos olketa elder and pikinini story abaotem olketa samting olsem, datwan savve helpem olketa for faendem wei for stretem problem. Taem samwan stap klosap for helpem olketa olo or letem famili wea stap farawe savve wanem nao kasem olketa, datwan mekem problem no kamap big, and olketa long famili no wari tumas.

16. Wanem nao samfala Christian duim for helpem olketa wea olo long kongregeson?

¹⁶ Samfala Christian hapi for iusim taem and strong bilong olketa for lukaftarem olketa olo, bikos olketa lovem olketa. Olketa lukaftarem gud olketa olo hia olsem really famili bilong olketa. Samfala long kongregeson markem taem for lukaftarem olketa olo. Maet olketa brata and sista hia no savve duim full-taem service, bat olketa hapi for helpem pikinini bilong olketa olo brata and sista for gohed stap long assignment bilong olketa. Olketa brata and sista hia wea willing for lukaftarem olketa olo showimaot gudfala example! Bat nomata kongregeson savve duim staka samting for helpem olketa olo, hem responsibility bilong olketa insaed famili for lukaftarem parents bilong olketa.

17, 18. Wanem nao savve mekem waka for lukaftarem olketa wea olo hem isi?

¹⁷ Datfala waka for lukaftarem olketa olo bae hem no hard tumas, sapos olketa wea olo and olketa wea lukaftarem olketa no tingim seleva nomoa. Samfala taem olketa wea gogo for olo savve wari and wikdaon. So iumi shud respectim and encouragem olketa. Hao nao iumi savve duim datwan? Evritaem talem toktok wea encouragem olketa. Iumi shud praisem olketa olo wea gohed faithful long Jehovah for staka year. Jehovah no forgetim wanem olketa duim for worshipim hem and iumi tu no forgetim datwan.​—Readim Malachi 3:16; Hebrew 6:10.

¹⁸ And tu, hem gud for olketa olo and olketa wea lukaftarem olketa for mekfani samfala taem and no serious tumas. Datwan savve mekem datfala waka hem isi. (Eccl. 3:1, 4) Staka wea olo traem best for no askem staka samting tumas for narawan duim for olketa. Olketa luksavve sapos olketa kaen, staka bae tingim olketa and kam visitim olketa. Staka wea go for lukim olketa wea olo savve sei olsem: “Mi go encouragem fren bilong mi wea olo, bat long semtaem mi tu kasem encouragement.”​—Prov. 15:13; 17:22.

19. Wanem nao savve helpem olketa wea young and olketa wea olo for no givap taem olketa kasem hard taem?

¹⁹ Iumi luk forward long taem wea wei for olo, and evri nogud samting wea kamaot from wei wea iumi no perfect bae finis. Bifor datfala taem hem kam, olketa wea worshipim Jehovah mas tingim hope wea olketa garem for laef olowe long future. Faith wea iumi garem long olketa promis bilong God savve strongim iumi taem iumi kasem hard taem. Faith wea iumi garem mekem “iumi no givap. Nomata body bilong iumi hem gogo for nogud, bat heart and tingting bilong iumi hem kamap strong moa evriday.” (2 Cor. 4:16-18; Heb. 6:18, 19) Wanem nao samfala nara samting wea savve helpem iumi for lukaftarem olketa wea olo? Bae iumi storyim datwan long next study.