David sei: “No enitaem mi lukim God hem lusim eni man wea raeteous or olketa pikinini bilong hem short long kaikai.” David talem disfala toktok bikos hem nao samting wea kasem hem long laef bilong hem. God hem evritaem lukaftarem hem. (Ps. 37:25) Bat datfala toktok bilong David no minim pipol wea worshipim Jehovah bae no savve short long eni samting.

Samfala taem David seleva tu kasem barava hard taem. Wanfala taem nao hem taem hem ranawe from Saul wea laek for killim hem dae. From kaikai bilong olketa hem klosap for finis, David askem wanfala priest for givim bred long hem and olketa wea go witim hem. (1 Sam. 21:1-6) So long datfala taem, David hem “short long kaikai.” Nomata olsem, long datfala hard taem, David savve Jehovah nating lusim hem. No eni scripture long Bible sei David barava no garem eni kaikai nao gogo hem mas begim pipol for givim kaikai long hem.

Long Matthew 6:33, Jesus sei sapos Kingdom hem first samting long laef bilong olketa wea worshipim God, bae hem givim evri samting olketa needim. Jesus sei: “So evritaem Kingdom and olketa samting wea God sei hem stret mas first samting long laef bilong iufala. Sapos olsem, God bae givim iufala olketa samting hia [wea minim kaikai, samting for drinkim, and kaleko] wea iufala needim.” Bat Jesus sei from pipol bae againstim olketa “brata” bilong hem, maet samfala taem bae olketa hangre tu. (Matt. 25:35, 37, 40) Datwan nao samting wea kasem aposol Paul. Samfala taem hem no garem kaikai and samting for drinkim tu.—2 Cor. 11:27.

Jehovah sei pipol bae againstim iumi. From datwan, maet samfala taem bae iumi no garem wanem iumi needim. Jehovah letem datwan for happen mekem iumi savve helpem hem for ansarem laea toktok wea Satan talem againstim God. (Job 2:3-5) Olsem example, samfala brata and sista bilong iumi wea stap long olketa Nazi prison long World War II kasem barava hard taem. Wanfala barava nogud samting wea olketa Nazi duim for mekem olketa brata hia no faithful, hem nao for no givim inaf kaikai long olketa. Staka long olketa brata hia gohed faithful long Jehovah, and hem nating lusim olketa. Jehovah letem diswan for kasem olketa, and distaem hem letem evri Christian for kasem olketa difren kaen test tu. Nomata olsem, Jehovah bae helpem evriwan wea gohed faithful long hem for no givap. (1 Cor. 10:13) Iumi mas no forgetim samting wea Paul talem long Philippi 1:29, wea sei: “Iufala no kasem privilege for biliv long Christ nomoa, bat for safa for hem tu.”

Jehovah promis bae hem stap witim olketa wea worshipim hem. Olsem example, Isaiah 54:17 sei: “Eni weapon wea pipol wakem for againstim iufala bae no spoelem iufala.” Disfala promis, and olketa nara promis long Bible, showimaot Jehovah bae protectim pipol bilong hem olsem wanfala grup. Bat maet hem letem iumi wanwan for kasem test, and maet iumi lusim laef bilong iumi tu from datwan.