Remember Those in the Full-Time Service
“Mifala evritaem tingim waka wea iufala duim from iufala garem faith, and evri hard waka wea iufala duim bikos long love bilong iufala.”—1 THESS. 1:3.
1. Wanem nao tingting bilong Paul abaotem olketa wea waka hard for talemaot gud nius?
APOSOL Paul tinghae long olketa brata and sista wea waka hard for talemaot gud nius. Hem sei: “Taem mifala prea long God wea hem Dadi bilong iumi, mifala evritaem tingim waka wea iufala duim from iufala garem faith, and evri hard waka wea iufala duim bikos long love bilong iufala. Mifala tingim tu wei wea iufala no givap from iufala hope long Lord bilong iumi Jesus Christ.” (1 Thess. 1:3) Jehovah tu hem tinghae long evri samting wea pipol bilong hem duim for worshipim hem, nomata datwan hem big or hem smol.—Heb. 6:10.
2. Wanem nao bae iumi storyim long disfala study?
2 Olketa Christian bifor and distaem tu sakrifaesim staka samting for duim samfala samting moa long waka bilong Jehovah. Long disfala study bae iumi storyim wanem samfala long first century duim long waka bilong Jehovah. Bae iumi storyim tu samting wea olketa long full-taem service duim distaem, and hao iumi savve sapotim olketa.
OLKETA CHRISTIAN LONG FIRST CENTURY
3, 4. (a) Wanem nao samfala Christian long first century duim long waka bilong Jehovah? (b) Hao nao olketa wea preachim gud nius long first century kasem need bilong olketa?
3 No longtaem bihaen Jesus baptaes, hem start for preach abaotem Kingdom, and hem teachim olketa narawan tu for duim disfala waka. (Luke 3:21-23; 4:14, 15, 43) Bihaen Jesus dae, olketa aposol bilong hem leadim preaching waka, and datfala gud nius go kasem staka ples. (Acts 5:42; 6:7) Samfala Christian lusim hom bilong olketa for go duim missionary waka. Olsem example, Philip go preach long samfala area long Palestine. (Acts 8:5, 40; 21:8) Paul tu duim missionary waka and hem go preachim gud nius long staka farawe ples. (Acts 13:2-4; 14:26; 2 Cor. 1:19) Olketa nara Christian olsem Mark, Luke, Silvanus (Silas), raetem samfala buk long Bible, or waka olsem secretary for olketa narawan wea raetem samfala buk hia. (1 Pet. 5:12) Staka sista tu helpem olketa faithful brata hia. (Acts 18:26; Rome 16:1, 2) Olketa Christian Greek Scripture storyim olketa naes experience bilong olketa brata and sista hia. Olketa experience hia showimaot Jehovah tinghae long waka bilong olketa wea worshipim hem, and hem lukaftarem olketa.
4 Hao nao olketa wea preachim gud nius long first century kasem need bilong olketa? Olketa no expectim olketa nara brata for givim wanem olketa needim, so samfala taem olketa duim part-taem waka. (1 Cor. 9:11-15) Bat olketa savve hapi taem olketa nara Christian helpem olketa. Samfala taem olketa nara Christian invaetem olketa for kaikai, givim ples for olketa stap, or helpem olketa long olketa nara samting. And samfala taem full kongregeson nao willing for helpem olketa.—Readim Acts 16:14, 15; Philippi 4:15-18.
OLKETA LONG FULL-TAEM SERVICE DISTAEM
5. Wanem nao wanfala hasband and waef talem abaotem full-taem service?
5 Distaem tu, staka pipol bilong Jehovah waka hard long full-taem service. (Lukim box “Difren Kaen Full-Taem Service.”) Wanem nao tingting bilong olketa abaotem full-taem service? Sapos iu askem samfala wea duim full-taem service, samting wea olketa talem bae encouragem iu. Wanfala brata wea bifor hem regular pioneer, spesol pioneer, and missionary, and wea distaem hem Bethelite long nara kantri hem sei: “Long tingting bilong mi, best disison wea mi mekem nao hem for duim full-taem service. Taem mi 18 year, mi mas disaed sapos mi bae go long university, waka for selen, or duim pioneer waka. Olketa samting wea happen long laef bilong mi showimaot Jehovah nating forgetim olketa sakrifaes wea iumi mekem taem iumi duim full-taem service. Mi iusim savve wea Jehovah givim long mi long staka difren wei long full-taem service, wea sapos mi waka for selen bae mi no garem chance for duim datwan.” Waef bilong hem sei: “Evri assignment wea mi duim helpem mi for kamap mature. Mitufala luksavve Jehovah protectim and leadim mifala staka taem. Sapos mitufala no duim full-taem service, bae mifala no kasem olketa blessing hia. Evriday mi thankiu long Jehovah for olketa gud samting wea mifala kasem from mifala duim full-taem service.” Waswe, iu laek for kasem olketa blessing olsem tu long laef bilong iu?
6. Hao nao Jehovah ting long wanem iumi duim for worshipim hem?
6 Hem tru, samfala no fit for duim full-taem service distaem, bat olketa duim best bilong olketa for worshipim Jehovah. Jehovah tinghae long wanem olketa duim. Olsem example, taem Paul raet go long Philemon, hem talem hello long kongregeson long Colossae, and hem talem nem bilong samfala long olketa tu. (Readim Philemon 1-3.) Paul tinghae long hard waka bilong olketa, and Jehovah tu tinghae long datwan. Jehovah tinghae tu long wanem iu duim long waka bilong hem. Sapos iu no fit for duim full-taem service, wanem nao iu savve duim for sapotim olketa long full-taem service?
SAPOTIM OLKETA PIONEER
7, 8. Wanem nao olketa pioneer long kongregeson duim, and wanem nao olketa brata and sista savve duim for sapotim olketa pioneer?
7 Olketa long first century wea strong for talemaot gud nius barava encouragem olketa narawan long kongregeson. Olketa regular pioneer distaem duim sem samting tu. Staka pioneer iusim samting olsem 70 hour evri month for duim preaching waka. Wanem nao iu savve duim for sapotim olketa?
8 Wanfala pioneer sista wea nem bilong hem Shari hem sei: “From olketa pioneer duim preaching waka evriday, hem luk olsem olketa strong. Nomata olsem, olketa needim iumi for encouragem olketa.” (Rome 1:11, 12) Narafala sista wea pioneer for staka year sei olsem abaotem olketa pioneer long kongregeson bilong hem: “Olketa waka hard evritaem. Taem olketa long kongregeson tekem olketa long trak bilong olketa for preaching, invaetem olketa for kaikai long haos, givim lelebet selen for petrol or for peim eni nara samting, olketa barava tinghae long datwan. Sapos iu duim datwan, iu showimaot long olketa iu lovem olketa.”
9, 10. Wanem nao samfala duim for sapotim olketa pioneer long kongregeson bilong olketa?
9 Narafala samting wea iumi savve duim for sapotim olketa pioneer hem for waka witim olketa long ministry. Tufala pioneer sista sei staka taem olketa needim samfala pablisa for waka witim olketa long olketa week day and long olketa aftanun. Wanfala sista wea waka long Brooklyn Bethel distaem no forgetim wei wea olketa narawan sapotim hem taem hem pioneer. Hem sei: “Wanfala sista wea garem car sei olsem long mi, ‘Enitaem wea iu no garem eniwan for go witim iu, iu ringim mi and bae mi kam witim iu.’ Sista hia barava helpem mi for gohed long pioneer waka bilong mi.” And Shari hem sei: “Staka taem olketa pioneer wea singol savve stap seleva nomoa bihaen olketa duim ministry. Hem gud for invaetem olketa pioneer wea singol for joinim famili worship bilong iumi samfala taem. Taem iumi invaetem olketa for join insaed olketa nara samting wea iumi duim, datwan tu savve strongim olketa.”
10 Wanfala sista wea duim full-taem service for klosap 50 year finis storyim wei wea olketa narawan sapotim hem and olketa nara sista wea singol. Hem sei: “Evri tu-thri month, olketa elder savve visitim olketa pioneer. Olketa laek for savve sapos mifala garem eni problem saed long health, saed long waka for selen, and eni nara problem. Olketa barava laek for helpem mifala. Olketa visitim mifala long haos bilong mifala for lukim sapos mifala needim eni help.” Olketa elder hia and olketa narawan tu followim example bilong Onesiphorus. Hem lukaftarem famili bilong hem, and long semtaem hem sapotim Paul tu.— Tim. 1:18.
11. Wanem nao olketa spesol pioneer long kongregeson duim?
11 Olketa spesol pioneer tu insaed full-taem service. Staka spesol pioneer iusim samting olsem 130 hour for preach evri month. Olketa duim staka nara waka tu insaed kongregeson. For helpem olketa kasem need bilong olketa branch office givim olketa lelebet selen evri month bikos olketa no garem taem for waka for selen. Diswan mekem olketa fit for iusim staka taem long ministry.
12. Wanem nao olketa elder and olketa narawan savve duim for sapotim olketa spesol pioneer?
12 Wanem nao iumi savve duim for sapotim olketa spesol pioneer? Wanfala elder wea waka long wanfala branch office and wea savve story witim staka spesol pioneer sei: “Olketa elder mas story witim olketa pioneer, faendemaot hao nao olketa, and datwan bae helpem olketa for savve wanem for duim for sapotim olketa. Samfala brata and sista tingse olketa spesol pioneer no needim eni samting bikos olketa kasem selen from branch office, bat olketa long kongregeson savve helpem olketa long staka difren wei tu.” Olsem olketa regular pioneer, olketa spesol pioneer tu hapi taem olketa brata and sista waka witim olketa. Waswe, iu savve waka witim olketa long ministry?
SAPOTIM OLKETA CIRCUIT OVERSEER
13, 14. (a) Wanem nao iumi mas no forgetim abaotem olketa circuit overseer and waef bilong olketa? (b) Wanem nao iu savve duim for sapotim olketa circuit overseer?
13 Olketa circuit overseer and waef bilong olketa strong long spiritual wei and savve encouragem iumi. Nomata olsem, iumi mas no forgetim hao olketa tu needim encouragement. Olketa hapi tumas tu taem olketa brata and sista waka witim olketa long ministry. And olketa tinghae long wei wea olketa brata and sista invaetem olketa for duim lelebet hapitaem witim olketa. Taem olketa circuit overseer or waef bilong olketa sik or stap long hospital, iumi savve sapotim olketa taem iumi visitim olketa and duim samting for helpem olketa. Maet diswan mekem iumi tingim wanem Luke, ‘datfala doctor wea staka lovem,’ hem duim long first century for helpem Paul and olketa narawan wea visitim olketa kongregeson.—Col. 4:14; Acts 20:5–21:18.
14 Olketa circuit overseer and waef bilong olketa needim olketa gudfala fren wea showimaot love long olketa and encouragem olketa. Wanfala circuit overseer sei: “Olketa fren bilong mi luksavve taem mi needim samwan for encouragem mi. Olketa askem olketa kwestin wea helpem mi for storyim eni samting wea mekem mi wari. Nomata olketa lisin long mi nomoa, datwan barava helpem mi.” Olketa circuit overseer barava tinghae long olketa brata and sista wea showimaot interest long olketa and kamap gudfala fren bilong olketa.
SAPOTIM OLKETA BETHELITE
15, 16. Wanem important waka nao olketa Bethelite and olketa wea lukaftarem olketa Assembly Hall duim, and hao nao iumi savve sapotim olketa?
15 Olketa wea waka long Bethel and wea lukaftarem olketa Assembly Hall duim important waka for sapotim preaching waka. Sapos samfala Bethelite stap long kongregeson bilong iu or circuit wea iu insaed, wanem nao iu savve duim for sapotim olketa?
16 Taem olketa just kam long Bethel, maet olketa missim famili and olketa fren bilong olketa long hom. Olketa niu Bethelite hia tinghae long wei wea olketa nara Bethelite and olketa long kongregeson welkamim and fren witim olketa! (Mark 10:29, 30) Olketa Bethelite attendim olketa kongregeson meeting and savve go preaching evri week, bat samfala taem olketa mas duim samfala extra waka long Bethel. Hem gud for olketa long kongregeson luksavve long diswan and showimaot olketa tinghae long waka bilong olketa Bethelite.—Readim 1 Thessalonica 2:9.
SAPOTIM OLKETA LONG FULL-TAEM SERVICE WEA KAM FROM NARA KANTRI
17, 18. Wanem nao samfala assignment wea olketa wea duim full-taem service long nara kantri olketa duim?
17 Samfala wea duim full-taem service kasem assignment for go long nara kantri. Maet olketa mas kaikaim difren kaikai, lanem niu languis, and getius long difren living and wei bilong pipol long there. Wanem nao samfala assignment wea olketa hia duim?
18 Samfala duim missionary waka and iusim staka taem bilong olketa long ministry. Olketa savve gud hao for preach and teachim narawan, and olketa trainim olketa narawan long kongregeson. Branch office provaedem haos for olketa missionary, and olketa kasem tu lelebet selen for peim wanem olketa needim. Olketa narawan kasem assignment for go long nara kantri for waka long branch office, or for buildim olketa branch office, transleison office, olketa Assembly Hall, or olketa Kingdom Hall. Branch office or olketa brata long datfala kantri lukaftarem olketa saed long kaikai and ples for stap. Olsem olketa Bethelite, olketa hia wea volunteer for duim construction waka go long olketa meeting evri week and duim preaching waka tu. Olketa brata and sista hia savve helpem olketa kongregeson long staka difren wei.
19. Wanem nao iu savve duim for sapotim olketa wea kam from nara kantri for duim full-taem service long kantri bilong iu?
19 Wanem nao iu savve duim for sapotim olketa wea kam from nara kantri for duim full-taem service long kantri bilong iu? Hem gud for luksavve taem olketa just kam, maet olketa no getius long kaikai long kantri bilong iu. So taem iu invaetem olketa for kam kaikai long haos, iu savve askem olketa firstaem sapos eni kaikai long ples bilong iu olketa laek traem or nomoa. Hem bae tek taem for olketa lanem languis and kastom long ples bilong iu. Nomata olsem, olketa laek for lane, so iumi mas patient witim olketa and helpem olketa.
20. Wanem nao iumi savve duim for helpem olketa wea duim full-taem service and parents bilong olketa?
20 Bihaen samfala year, olketa wea duim full-taem service long nara kantri maet need for disaedem wanem olketa bae duim for helpem parents wea gogo for olo. Sapos parents olketa Witness, bae tufala laekem pikinini bilong tufala for gohed long assignment bilong olketa. (3 John 4) Olketa wea duim full-taem service bae traem best for helpem parents bilong olketa and go visitim tufala long taem wea fitim. Bat olketa long kongregeson tu savve helpem parents bilong olketa wea duim full-taem service long nara kantri, and lukaftarem tufala taem tufala needim help. Iumi mas tingim diswan: Olketa wea duim full-taem service barava busy for sapotim preaching waka, wea hem nao important waka winim eni nara waka long earth distaem. (Matt. 28:19, 20) Waswe, iu or kongregeson bilong iu savve sapotim olketa wea duim full-taem service long wei for helpem parents bilong olketa?
21. Hao nao olketa wea duim full-taem service ting long olketa brata and sista wea sapotim and encouragem olketa?
21 Staka pipol waka hard bikos olketa laek for rich. Bat olketa wea disaed for duim full-taem service waka hard bikos olketa laek for duim best bilong olketa for Jehovah, and for helpem nara pipol. So olketa tinghae long olketa brata and sista wea sapotim olketa. Wanfala sista wea duim full-taem service and muv long nara kantri sei olsem: “Nomata eni smol toktok wea eniwan raetem kam long iu for sei olketa tinghae long wanem iu duim, datwan showimaot olketa tingim iu.”
22. Wanem nao tingting bilong iu abaotem full-taem service?
22 Olketa wea duim full-taem service garem barava interesting laef wea mekem olketa satisfae. Hem nao best samting for duim long laef distaem. Waka wea olketa long full-taem service duim hem trainim olketa long staka samting and helpem olketa for garem gudfala wei. Diswan helpem olketa distaem and bae helpem olketa long niu world. Klosap nao evriwan wea worshipim Jehovah bae duim waka wea mekem olketa satisfae evriday. Iumi evriwan laek for gohed showimaot iumi tinghae long “evri hard waka” wea olketa long full-taem service olketa duim.—1 Thess. 1:3.