1-3. Why nao Paul barava sure Jehovah bae helpem hem? (Lukim piksa long start bilong study.)

 SAPOS iu wanfala Christian wea stap long Rome long first century, laef bilong iu hem stap long danger. Olketa long Rome barava spoelem olketa Christian long datfala taem. Olketa sei olketa Christian nao startim wanfala big fire long Rome, and sei olketa Christian heitim nara pipol. Olketa arrestim staka brata and sista bilong iumi. Olketa animal killim dae samfala long olketa, and olketa long Rome nilam samfala narawan long post and bonem olketa taem olketa laef yet. Sapos iu stap long datfala taem, iu savve olketa samting olsem maet happen long iu enitaem nomoa.

² Long taem wea olketa nogud samting hia happen, olketa putim aposol Paul long prison long Rome. Maet Paul tingse olketa brata and sista bae no helpem hem, bikos olketa no helpem hem long taem wea hem stap long prison bifor. Bat Jesus nao helpem hem long datfala taem. Hem sei: “Lord hem helpem mi and strongim mi.” Jesus hem strongim Paul long datfala taem wea hem barava needim help. Paul sei tu: “Hem sevem  mi from mouth bilong lion.”—2 Tim. 4:16, 17. *

³ Taem Paul tingim wei wea Jehovah helpem hem bifor, datwan mekem hem sure Jehovah bae helpem and strongim hem for no givap long disfala mek-tu taem wea hem go long prison, and long eni hard samting wea maet kasem hem bihaen. Hem barava sure long diswan, dastawe hem sei: “Lord bae sevem mi from evri nogud samting.” (2 Tim. 4:18) Paul barava sure Jehovah and Jesus bae evritaem helpem hem, nomata maet samfala taem olketa Christian no fit for helpem hem.

4, 5. (a) Hu nao bae evritaem givim iumi help wea iumi needim? (b) Hao nao iu savve strongim wei wea iu fren witim Jehovah?

⁴ Waswe, enitaem iu kasem eni hard samting and iu feel olsem no eniwan hem stap for helpem iu? Olsem example, maet iu lusim waka bilong iu for selen, or iu kasem hevi from olketa narawan long skul. Maet iu kasem big sik, or iu feisim olketa nara hard samting. Maet olketa wea iu askem for helpem iu olketa no givim help wea iu needim, and datwan mekem iu feel nogud. Tru nao, samfala hard samting wea iumi feisim, man no fit for stretem. Sapos iu kasem hard samting olsem, wanem nao iu savve duim? Bible hem sei for iumi “trustim Jehovah.” (Prov. 3:5, 6) Waswe, iumi fit for trustim Jehovah for helpem iumi? Yes! Staka story insaed Bible pruvim long iumi Jehovah hem helpem pipol bilong hem.

⁵ No feel nogud sapos pipol no givim help wea iu needim. Bat, olsem Paul, taem iu kasem hard samting, ting long datwan olsem chance for showimaot iu trustim Jehovah. And tu, hem chance for iu lukim wei wea Jehovah hem lukaftarem iu. Diswan bae strongim wei wea iu fren witim Jehovah and bae iu barava trustim hem.

6. Why nao maet hem no isi for trustim Jehovah taem iumi kasem problem?

⁶ Maet iu kasem wanfala problem wea mekem iu barava wari. Traem best bilong iu for stretem datfala problem, and prea long Jehovah for helpem iu. Bihaen iu duim olsem, iu savve garem peace long mind and trustim wei wea Jehovah bae helpem iu! (Readim Psalm 62:8; 1 Peter 5:7.) Sapos iu laek for fren gud witim Jehovah, hem important for iu trustim hem. Bat hem no evritaem isi for duim diswan. Why nao olsem? Wanfala reason hem bikos maet samfala taem Jehovah no kwiktaem ansarem prea bilong iu.—Ps. 13:1, 2; 74:10; 89:46; 90:13; Hab. 1:2.

7. Why nao maet samfala taem Jehovah no kwiktaem ansarem olketa prea bilong iumi?

⁷ Why nao maet samfala taem Jehovah no kwiktaem ansarem olketa prea bilong iumi? Bible hem sei Jehovah hem Dadi bilong iumi and iumi olketa pikinini bilong hem. (Ps. 103:13) Wanfala dadi bae no givim evri samting wea pikinini askem, or hem no givim stretawe samting wea pikinini askem. Dadi hem savve maet pikinini seknomoa lukim samting and laekem, bat bihaen, hem no laekem moa datfala samting. Dadi savve tu long best samting for pikinini bilong hem, and maet samting wea pikinini askem bae hem affectim olketa narawan. Hem savve long samting wea pikinini needim, and long best taem for givim long hem. Sapos dadi hem stretawe givim evri samting wea pikinini askem, pikinini bae kamap boss long dadi. Jehovah, wea hem Dadi bilong iumi long heven, hem lovem iumi. From hem wakem iumi, hem savve long wanem iumi needim and long best taem for givim long iumi wanem iumi askem. Hem gud for iumi patient for lukim wei wea Jehovah bae  ansarem olketa prea bilong iumi.—Comparem Isaiah 29:16; 45:9.

8. Sapos iumiseleva no fit for winim hard samting wea kasem iumi, wanem nao Jehovah promis for duim?

⁸ Nara samting tu, Jehovah hem savve long wanem iumi fit for deal witim and wanem iumi no fit for deal witim. (Ps. 103:14) Hem savve helpem iumi long taem wea iumi needim help. Hem tru, maet samfala taem iumi feel olsem iumi no wei nao. Bat sapos iumiseleva no fit for winim hard samting wea kasem iumi, Jehovah hem promis for “helpem [iumi] for winim datwan.” (Readim 1 Corinth 10:13.) Iumi hapi tumas Jehovah hem savve long wanem iumi fit for deal witim.

9. Wanem nao iumi shud duim sapos Jehovah no kwiktaem ansarem prea bilong iumi?

⁹ Sapos iumi prea long Jehovah for helpem iumi, bat hem no kwiktaem ansarem prea bilong iumi, iumi mas patient. Hem gud for tingim Jehovah hem laekem tumas for helpem iumi, bat hem tu hem patient. Hem weit for best taem for givim iumi wanem iumi needim. Bible sei: “Jehovah hem patient and hem weit for helpem iufala, and hem bae showimaot mercy long iufala. Jehovah hem God wea evritaem duim stret samting. Olketa wea gohed patient for weitim hem bae hapi.”—Isa. 30:18.

10-12. (a) Wanem nao samfala samting wea maet mekem hem no isi for lukaftarem famili member wea sik? (b) Why nao iumi shud trustim Jehovah taem iumi kasem hard taem? Storyim example.

¹⁰ Taem iu deal witim wanfala barava hard samting, maet datwan mekem iu feel olsem aposol Paul. Maet iu feel olsem iu needim samwan for sevem iu from “mouth bilong lion.” (2 Tim. 4:17) Long taem olsem, hem barava important for iu trustim Jehovah. Olsem example, maet iu lukaftarem samwan long famili wea barava sik. Iu prea long Jehovah for strongim iu and for helpem iu mekem olketa wise disison. * From iu duim olsem, iu savve garem peace long mind bikos Jehovah luksavve long hard samting wea iu deal witim. Hem bae helpem iu for no givap and for gohed faithful long hem.—Ps. 32:8.

¹¹ Bat maet samfala samting happen wea mekem hem luk olsem Jehovah no ansarem prea bilong iu. Olsem example, maet olketa doctor no agree long treatment wea datfala famili member bilong iu shud kasem. Or maet olketa relative wea iu tingse olketa shud comfortim iu, olketa nao givim hard taem long iu. Gohed depend long Jehovah for strongim iu. Gohed for fren gud witim hem. (Readim 1 Samuel 30:3, 6.) Gogo, taem iu luksavve Jehovah hem duim samting for helpem iu, datwan bae strongim wei wea iu fren witim hem.

¹² Tingim example bilong Linda. * Hem lukaftarem dadi and mami bilong hem wea barava sik for longfala taem bifor tufala dae. Hem sei: “Staka taem mi, hasband bilong mi, and brata bilong mi, mifala no savve nao wanem for duim. And samfala taem mifala feel olsem mifala barava no wei nao. Bat taem mifala ting go bak, mifala luksavve Jehovah hem barava helpem mifala. Hem strongim mifala and givim mifala help long taem wea mifala barava needim.”

13. Wanem nao helpem Rhonda for no givap taem hem kasem olketa hard taem?

¹³ Sapos iumi barava trustim Jehovah, datwan bae helpem iumi for no givap taem barava nogud samting happen long iumi. Tingim samting wea happen long Rhonda. Hasband bilong hem wea no wanfala Witness divorcem hem. Long semtaem tu, brata bilong Rhonda faendaot hem garem wanfala nogud  sik wea olketa kolem lupus. Then tu-thri month bihaen, waef bilong brata bilong Rhonda hem dae. Bihaen Rhonda deal witim olketa nogud samting hia, hem start for regular pioneer. Bat no longtaem bihaen hem start for pioneer, mami bilong hem dae. Wanem nao helpem Rhonda for no givap long olketa hard taem hia? Hem sei: “Mi prea long Jehovah evriday. Mi askem hem for helpem mi for disaedem olketa samting, nomata long olketa smol samting tu. Taem mi duim olsem, datwan helpem mi for barava trustim Jehovah, and for no depend long miseleva or long nara pipol. Jehovah givim evri help wea mi needim, and hem barava lukaftarem mi.”

14. Long wanem wei nao Jehovah bae helpem iu sapos wanfala famili member hem disfellowship?

¹⁴ Tingim nara hard samting wea savve happen. Maet wanfala member long famili hem disfellowship. Iu savve finis Bible talem iumi for no associate witim olketa wea disfellowship. (1 Cor. 5:11; 2 John 10) Bat from iu lovem famili member bilong iu, maet long tingting bilong iu hem hard tumas nao for iu obeyim wanem Bible talem. * Waswe, bae iu trustim Dadi bilong iu long heven for strongim iu for gohed faithful for obeyim hem? Waswe, bae iu ting long diswan olsem chance for iu strongim wei wea iu fren witim Jehovah?

15. Why nao Adam no obeyim Jehovah?

¹⁵ Diswan hem olsem samting wea kasem firstfala man, Adam. Bible sei “Devil no trikim Adam.” (1 Tim. 2:14) So Adam savve sapos hem no obeyim Jehovah bae hem no gohed for laef. So why nao Adam no obeyim Jehovah and kaikaim frut wea Jehovah talem  hem for no kaikaim? Adam duim datwan bikos hem lovem waef bilong hem winim Jehovah. Hem followim wanem waef bilong hem talem and no followim wanem Jehovah talem.—Gen. 3:6, 17.

16. Hu nao iumi shud lovem winim eni narawan, and why nao olsem?

¹⁶ Taem iumi ting raonem wanem Adam duim, datwan helpem iumi for luksavve iumi mas lovem Jehovah winim eni narawan. (Readim Matthew 22:37, 38.) And taem iumi garem strongfala love for Jehovah, iumi savve helpem olketa relative bilong iumi for kasem gud samting, nomata olketa worshipim Jehovah or nomoa. So gohed strongim love wea iu garem for Jehovah and wei wea iu trustim hem. Sapos iu barava feel sorre bikos wanfala famili member hem disfellowship, prea long Jehovah and talem hem evri tingting and feeling bilong iu. * (Rome 12:12; Phil. 4:6, 7) Nomata iu sorre tumas, ting long diswan olsem chance for strongim wei wea iu fren witim Jehovah. Diswan bae helpem iu for trustim Jehovah and for luksavve wei for obeyim Jehovah nao hem best samting for duim.

17. Sapos iumi gohed busy long preaching waka, wanem nao bae Jehovah duim for helpem iumi?

¹⁷ Why nao Jehovah sevem Paul from “mouth bilong lion”? Paul sei: “Lord hem helpem mi . . . mekem mi savve barava duim gud datfala waka for talemaot gud nius.” (2 Tim. 4:17) Jehovah talem iumi tu for duim datfala waka for preachim “gud nius,” and hem sei iumi “waka tugeta” witim hem. (1 Thess. 2:4; 1 Cor. 3:9) Sapos iumi gohed duim best bilong iumi long preaching waka, iumi savve sure Jehovah bae givim iumi olketa samting wea iumi needim. (Matt. 6:33) And tu, datwan bae helpem iumi for patient taem iumi weitim Jehovah for ansarem prea bilong iumi.

18. Wanem nao bae helpem iu for trustim Jehovah and strongim wei wea iu fren witim hem?

¹⁸ So duim samting for strongim wei wea iu fren witim Jehovah evriday. Sapos iu kasem eni hard taem, ting long datwan olsem chance for strongim wei wea iu fren witim Jehovah. Readim and studyim Bible, and ting raonem wanem iu lanem. Gohed for prea, and gohed for busy long waka bilong Jehovah. Sapos iu duim olketa samting hia, iu savve trustim Jehovah for helpem iu long eni hard taem wea kasem iu distaem or long future.