JULIAN sei: “Taem mi herem olketa announcem son bilong mi hem disfellowship, mi barava feel sorre tumas. Hem firstborn bilong mi, and mitufala fren gud and duim staka samting tugeta. Hem wanfala gudfala boy bifor, and then seknomoa hem start for duim samfala samting wea no stret. Waef bilong mi hem stap for krae nomoa, and mi no savve wanem for duim for comfortim hem. Mitufala feel guilty and tingse maet mitufala nao no teachim hem gud.”

From staka savve sorre tumas taem wanfala Christian hem disfellowship, why nao iumi sei wei for disfellowship hem showimaot love? Wanem nao Bible talem wea showimaot wei for disfellowshipim samwan hem stret samting? And why nao gogo man hem disfellowship?

Tufala samting nao savve happen wea gogo wanfala Jehovah’s Witness savve disfellowship long hem. First samting, hem duim bigfala sin. Mek-tu samting, hem no repent from sin wea hem duim.

Jehovah luksavve iumi no perfect, nomata olsem, hem laekem iumi for mas followim olketa standard bilong hem. Olsem example, Jehovah sei iumi mas no duim olketa bigfala sin olsem wei for durong, worshipim idol, steal, demandim selen, and samting wea join witim devildevil.—1 Cor. 6:9, 10; Rev. 21:8.

Iumi evriwan fit for obeyim olketa standard bilong Jehovah, and olketa standard hia protectim iumi. Iumi evriwan laek for stap witim pipol wea kaen, duim gud samting, and wea iumi fit for trustim. Olketa brata and sista bilong iumi long kongregeson nao garem olketa wei olsem. Diswan hem bikos taem iumi dedicate long God iumi promis for followim olketa standard bilong hem wea stap insaed long Bible.

Bat waswe sapos wanfala Christian wea baptaes hem duim bigfala sin bikos long wik point bilong hem? Samfala wea worshipim Jehovah bifor tu olketa duim bigfala sin, bat God forgivim olketa. Wanfala example hem King David. David duim adultery and killim man dae. Nomata olsem, profet Nathan talem David: “Jehovah forgivim sin bilong iu.”—2 Sam. 12:13.

God forgivim David bikos David hem repent. (Ps. 32:1-5) Long distaem wanfala Christian bae disfellowship only sapos hem no repent from sin wea hem duim or hem gohed for duim rong samting. (Acts 3:19; 26:20) So sapos olketa elder insaed wanfala judicial komiti luksavve Christian wea duim bigfala sin hem no repent, olketa mas disfellowshipim hem.

Maet firstaem iumi tingse disison for disfellowshipim samwan hem ova tumas or hem no kaen, especially sapos datfala man hem famili member or fren bilong iumi. Nomata olsem, Bible showimaot wei for disfellowshipim samwan hem showimaot love bilong Jehovah.

Gudfala samting savve kamaot from wei for disfellowshipim man wea duim bigfala sin and no repent. Tingim thrifala samting hia:

Wei for disfellowshipim samwan hem mekhae long nem bilong Jehovah. From iumi olketa Witness bilong Jehovah, samting wea iumi duim savve spoelem datfala nem or mekhae long hem. (Isa. 43:10) Long sem wei wea samting wea pikinini duim hem savve spoelem or mekhae long parents bilong hem, samting wea pipol bilong Jehovah duim savve affectim hao nara pipol ting long Jehovah. Taem pipol bilong God followim olketa standard bilong hem, datwan mekhae long nem bilong hem. Sem samting hem happen long taem bilong Ezekiel. Taem olketa Jew obeyim olketa law bilong Jehovah, datwan mekhae long Jehovah.—Ezek. 36:19-23.

Sapos wanfala Christian hem durong, datwan bae spoelem nem bilong God. Aposol Peter sei olsem long olketa Christian: “From iufala olketa pikinini wea obey, no followim olketa old wei wea iufala garem taem iufala no savve long God. Bat iufala mas holy long evri samting wea iufala duim, olsem datfala Holy God wea hem chusim iufala, bikos olketa Holy Raeting sei: ‘Iufala mas holy bikos mi nao mi holy.’” (1 Pet. 1:14-16) Sapos iumi klin and holy long evri samting wea iumi duim, datwan bae mekhae long nem bilong God.

Sapos wanfala Jehovah’s Witness gohed for duim bigfala sin, bae gogo olketa fren bilong hem and olketa wea savve long hem savve abaotem datwan. Taem hem disfellowship pipol bae luksavve Jehovah laekem pipol bilong hem for klin. Wantaem, wanfala man hem kam long meeting long Kingdom Hall long Switzerland, and hem sei hem laek for kamap wanfala Witness. Sista bilong datfala man disfellowship bikos hem durong. Datfala man sei hem laek for joinim organization wea disciplinem man wea duim rong samting.

Wei for disfellowshipim samwan hem protectim and keepim Christian kongregeson klin. Aposol Paul talem olketa long Corinth hao nogud samting savve kamaot sapos olketa letem man wea gohed duim bigfala sin for stap insaed kongregeson. Hem sei man olsem savve affectim evriwan long kongregeson, long sem wei wea yeast savve mekem flour for rise. Hem sei: “Lelebet yeast nomoa savve mekem evri flour wea man mixim hem rise.” Then hem sei long olketa: “Aotem man wea duim rabis samting from kongregeson.”—1 Cor. 5:6, 11-13.

Datfala “man wea duim rabis samting” wea Paul story abaotem hem durong, and hem nating shame long datwan. And samfala narawan long kongregeson start for tingse samting wea man hia duim hem olraet nomoa. (1 Cor. 5:1, 2) Sapos kongregeson no duim eni samting abaotem diswan, maet samfala nara Christian start for followim olobaot wei bilong pipol long datfala taon. Wei for no kwiktaem stretem samwan long kongregeson wea gohed duim sin, savve mekem olketa narawan for no tinghae long olketa standard bilong God. (Eccl. 8:11) And tu, man wea duim bigfala sin and hem no repent savve kamap olsem “ston wea haed andanit long wata” and hem savve spoelem faith bilong olketa narawan long kongregeson.—Jude 4, 12.

Wei for disfellowshipim samwan maet mekem hem kasem bak gudfala tingting. Jesus story abaotem wanfala young man wea lusim haos bilong dadi bilong hem and spoelem selen bilong hem and evri samting wea dadi givim long hem long enikaen rabis samting. Gogo disfala olobaot son luksavve hem no kasem eni gud samting taem hem lusim haos bilong dadi bilong hem. Taem datfala son kasem bak gudfala tingting, hem repent and hem go bak long famili bilong hem. (Luke 15:11-24) Datfala dadi wea barava hapi taem son bilong hem kam bak hem olsem Jehovah. Jehovah sei: “Mi nating hapi taem nogud man hem dae, bat mi hapi taem hem lusim nogud wei bilong hem and gohed for laef.”—Ezek. 33:11.

Olketa wea disfellowship lusim spiritual famili bilong olketa, wea hem nao kongregeson. Maet gogo olketa tu luksavve olketa no kasem eni gud samting long world. Maet nogud samting wea olketa kasem from sin wea olketa duim, helpem olketa for kasem bak gudfala tingting. And tu, maet wei for tingim olketa gud samting wea olketa kasem taem olketa fren gud witim Jehovah and pipol bilong hem, helpem olketa for kam bak long Jehovah.

For helpem samwan wea disfellowship for kasem  bak gudfala tingting hem important for showimaot love and for strong for followim olketa standard bilong Jehovah. David sei: “Sapos man wea raeteous hem hitim mi, datwan showimaot hem lovem mi. And sapos hem kaonselem mi, datwan bae olsem hem putim oil long hed bilong mi.” (Ps. 141:5) Tingim disfala example: Samwan hem kaikai and lelebet kaikai hem pas long nek bilong hem. Hem no savve brith gud, and hem no savve aotem datfala kaikai tu. Sapos no eniwan kwiktaem helpem hem, bae hem dae. Then wanfala fren hitim baksaed bilong hem for aotem datfala kaikai. Maet hem feel pain taem fren bilong hem duim datwan, bat maet datwan sevem laef bilong hem. Olsem tu, David luksavve sapos man wea raeteous stretem hem, maet long firstaem datwan mekem hem feel nogud, bat bihaen bae hem kasem gud samting.

Staka Christian wea disfellowship sei datfala discipline nao helpem olketa for kasem bak gudfala tingting. Son bilong Julian, wea iumi storyim finis, hem disfellowship for tenfala year. Then hem lusim olketa nogud wei bilong hem, hem reinstate, and distaem hem wanfala elder. Hem sei: “Bihaen mi disfellowship nao mi luksavve mi no kasem eni gud samting from rabis wei bilong mi. Mi barava needim datfala discipline.”—Heb. 12:7-11.

Hem tru, taem samwan hem disfellowship datwan hem barava sorre samting. Bat sapos iumi evriwan duim samting for sapotim datfala disison, maet gud samting savve kamaot from datwan.

Olketa elder wea garem responsibility for disfellowshipim samwan traem best for showimaot love bilong Jehovah. Taem olketa talem wanfala brata or sista hem bae disfellowship, long kaenfala wei olketa talem hem wanem hem need for duim mekem hem savve reinstate. Olketa elder savve visitim olketa wea disfellowship wea start for lusim nogud wei bilong olketa, for talem olketa wanem olketa need for duim for kam bak long Jehovah. *

Olketa famili member savve showimaot love for olketa brata and sista long kongregeson and for datwan wea disfellowship taem olketa sapotim disison bilong olketa elder. Julian sei: “Hem still son bilong mi, bat nogud samting wea hem duim nao mekem mi no savve associate moa witim hem.”

Evriwan long kongregeson savve showimaot love taem olketa no associate and no story witim samwan wea disfellowship. (1 Cor. 5:11; 2 John 10, 11) Taem olketa duim olsem olketa sapotim discipline wea kam from Jehovah. And tu, olketa savve showimaot love and sapotim famili bilong datwan wea disfellowship, bikos olketa famili member hia bae feel sorre. Iumi laekem olketa famili member hia for luksavve iumi laek gohed associate witim olketa.—Rome 12:13, 15.

Julian sei moa: “Wei for disfellowship hem arrangement wea iumi needim and hem helpem iumi for followim olketa standard bilong Jehovah. Nomata diswan hem kosim bigfala pain, bat gogo gud samting savve kamaot from wei for disfellowshipim man. Sapos mi acceptim nomoa olketa nogud samting wea son bilong mi duim, bae hem no reinstate distaem.”