1, 2. Olketa circuit overseer raonem world luksavve staka elder need for duim wanem samting?

 WANFALA circuit overseer hem garem meeting witim olketa elder, and meeting hia hem klosap for finis. Hem barava tinghae long olketa brata hia wea waka hard long kongregeson, wea samfala long olketa olo winim hem. Nomata olsem, hem warim yet wanfala samting. Hem sei: “Olketa brata, wanem nao iufala duim for trainim olketa narawan for duim samfala waka moa long kongregeson?” Olketa elder hia savve circuit overseer encouragem olketa for duim diswan long last visit bilong hem. Gogo, wanfala elder sei: “For tok stret, mifala no duim datwan.” Olketa nara elder tu agree witim wanem datfala elder talem.

² Sapos iu wanfala elder, maet iu tu luksavve iu no duim staka samting for trainim olketa narawan. Olketa circuit overseer raonem world luksavve staka elder need for duim moa samting for trainim olketa brata wea young and olo for duim  samfala waka moa for lukaftarem kongregeson. Bat maet diswan hem no isi. Why nao olsem?

3. (a) Wanem nao Bible talem wea showimaot hem important for trainim narawan, and why nao iumi evriwan shud interest long diswan? (Lukim footnote.) (b) Why nao maet hem no isi for olketa elder trainim narawan?

³ Iufala olketa elder savve hem important for trainim olketa brata long kongregeson. * Iufala luksavve iumi needim staka brata moa for strongim olketa kongregeson distaem, and for lukaftarem olketa niu kongregeson wea bae kamap long future. (Readim Isaiah 60:22.) Bible sei iufala shud teachim olketa narawan. (Readim 2 Timothy 2:2.) Nomata olsem, maet hem no isi for iu faendem taem for duim datwan. Iu mas lukaftarem famili, waka for selen, duim olketa waka long kongregeson, and duim olketa nara important samting tu. Hem tru, iumi evriwan busy, bat why nao hem barava important for iu markem taem for trainim narawan? Bae iumi storyim olketa reason why diswan hem important.

4. Wanem nao maet wanfala reason why staka elder no trainim olketa brata?

⁴ Why nao maet hem no isi for faendem taem for trainim olketa brata long kongregeson? Maet samfala elder ting olsem: ‘Mi luksavve hem important for trainim narawan, bat mi garem olketa nara waka for duim long kongregeson wea important winim datwan. Nomata mi no trainim narawan distaem, kongregeson bae hem olraet nomoa.’ Waswe, hem stretfala tingting for garem? Hem tru, maet iu garem staka nara samting for duim. Bat sapos iu no trainim olketa brata distaem, maet gogo diswan bae affectim kongregeson.

5, 6. Wanem tokpiksa nao showimaot stretfala tingting wea olketa elder shud garem abaotem wei for trainim olketa brata?

⁵ Tingim disfala example: Man wea ownim trak hem savve hem mas evritaem changem oil long trak mekem trak hia gohed ran gud. Nomata olsem, maet hem ting hem moa important for putim petrol insaed long trak, bikos sapos trak no garem eni petrol bae hem no muv nao. And tu, maet hem tingse nomata hem no garem taem for changem oil, datfala trak bae hem still muv for lelebet taem. Bat hem danger samting for garem kaen tingting olsem. Sapos hem no changem oil evritaem, gogo datfala trak bae hem nogud, and hem mas spendem staka taem and selen for fixim datfala trak. Wanem nao iumi savve lanem from diswan?

⁶ Hem tru, olketa elder mas kwiktaem deal witim olketa important samting wea kamap long kongregeson. Sapos nomoa, kongregeson bae kasem nogud samting. Olsem man luksavve hem mas evritaem putim petrol long trak, olketa elder mas “luksavve long olketa samting wea barava important.” (Phil. 1:10) Bat maet samfala elder busy tumas long olketa important samting long kongregeson, so olketa no garem taem for trainim narawan. Diswan hem olsem man wea no changem oil long trak. Sapos olketa elder no trainim olketa brata, gogo kongregeson bae no garem inaf brata for duim evri waka.

7. Why nao iumi shud tinghae long olketa elder wea spendem taem for trainim olketa narawan?

⁷ So iumi mas no tingse hem no important  for trainim olketa narawan. Olketa elder wea tingim wanem kongregeson bae needim long future and spendem taem for trainim olketa narawan, olketa duim wise samting and olketa barava helpem kongregeson. (Readim 1 Peter 4:10.) Wanem gud samting nao kongregeson kasem from diswan?

8. (a) Why nao hem important for olketa elder trainim olketa brata? (b) Olketa elder wea muv go long ples wea garem need olketa mas duim wanem important samting? (Lukim box  “Wanfala Important Waka.”)

⁸ Evri elder, nomata olketa wea elder for longtaem finis, mas luksavve taem olketa gogo for olo bae olketa no fit for duim staka samting wea olketa duim distaem. (Mic. 6:8) And tu, olketa elder shud luksavve “seknomoa samting wea olketa no tingim” maet kasem olketa, wea mekem hem no isi for olketa duim waka bilong olketa long kongregeson. (Eccl. 9:11, 12; Jas. 4:13, 14) From olketa elder tingim pipol bilong Jehovah, olketa waka hard for trainim olketa young brata long kongregeson and teachim olketa brata hia wanem olketa lanem.—Readim Psalm 71:17, 18.

9. Why nao hem barava important for trainim olketa brata distaem?

⁹ Olketa elder wea trainim olketa narawan barava helpem and strongim kongregeson. Datfala training mekem staka nara brata fit for helpem olketa insaed long kongregeson for garem wan mind and gohed faithful for worshipim God. Hem barava important for olketa long kongregeson garem wan mind and faithful long olketa last day distaem, and long datfala big trabol wea klosap for kam. (Ezek. 38:10-12; Mic. 5:5, 6) So plis olketa elder, spendem taem for trainim olketa brata distaem.

10. Wanem nao maet wanfala elder mas duim mekem hem garem taem for trainim olketa narawan?

¹⁰ Hem tru, mifala luksavve iufala spendem staka taem for duim olketa important waka long kongregeson. So maet iu need for katdaon long haomas taem iu markem for duim samfala waka hia, and iusim datfala taem for trainim olketa brata. (Eccl. 3:1) Hem bae gud tumas for iusim samfala taem bilong iu for trainim narawan, and kongregeson bae kasem gud samting from datwan.

11. (a) Olketa idea wea olketa elder talem abaotem wei wea olketa trainim narawan hem pruvim wanem samting? (b) Olsem Proverbs 15:22 hem showimaot, why nao hem important for storyim olketa idea wea olketa elder hia talem?

¹¹ No longtaem go nomoa, samfala elder wea trainim olketa nara brata for duim moa waka long kongregeson storyim hao olketa duim datwan. * Nomata olketa elder hia kam from difren ples, bat samting wea olketa talem abaotem wei wea olketa trainim narawan hem klosap semsem. Datwan pruvim disfala important samting: Training wea kam from Bible hem helpem olketa brata wea stap long “olketa kongregeson long evri ples.” (1 Cor. 4:17) Long disfala study bae iumi storyim samfala idea wea olketa elder hia talem.—Prov. 15:22.

12. Wanem nao first samting wea elder wea trainim olketa narawan mas duim, and why nao olsem?

¹² First samting, elder mas redyim heart bilong brata wea hem laek trainim. Why nao diswan hem important? Olsem man wea wakem garden mas redyim graon bifor hem plantim eni seed, elder mas redyim heart bilong man bifor hem start for  trainim hem. So wanem nao elder savve duim for redyim heart bilong man? Hem savve duim sem samting wea profet Samuel duim taem hem trainim narawan.

13-15. (a) Wanem nao Jehovah talem Samuel for duim? (b) Wanem nao Samuel duim for redyim Saul for niu assignment wea hem kasem? (Lukim piksa long start bilong study.) (c) Why nao olketa elder shud interest long story bilong Samuel?

¹³ Winim 3,000 year go finis, Jehovah sei long olo profet Samuel: “Tumoro long semtaem olsem distaem, bae mi sendem kam wanfala man from tribe bilong Benjamin for lukim iu. Iu mas anointim hem for leadim pipol bilong mi, Israel.” (1 Sam. 9:15, 16) Samuel luksavve hem bae no leadim nao olketa Israelite, and Jehovah laekem hem for markem wanfala niu leader. So Samuel ting raonem diswan and disaedem wanem hem bae duim for redyim datfala man for leadim olketa Israelite.

¹⁴ Long next day Samuel meetim Saul, and Jehovah sei long hem: “Diswan nao man wea mi storyim long iu.” Semtaem nomoa, Samuel start for followim wanem hem disaed for duim. Samuel laek story witim Saul, so hem invaetem Saul and wakaman bilong hem for kaikai witim hem, and givim tufala best ples for sidaon and olketa best meat. Samuel sei: “Iu kaikaim diswan bikos olketa keepim for disfala taem wea iu bae kam.” Bihaen olketa kaikai finis, Samuel invaetem Saul for go long haos bilong hem. Taem tufala wakabaot, tufala story gud. Taem tufala kasem haos bilong Samuel, tufala go ap long ruf bilong haos, and Samuel “gohed for story long Saul” go kasem taem olketa redi for sleep. Long next day, Samuel anointim Saul, kissim hem, and givim samfala instruction moa long hem. Bihaen datwan, Saul lusim Samuel and redi for duim assignment bilong hem.—1 Sam. 9:17-27; 10:1.

¹⁵ Hem tru, wei wea Samuel anointim Saul for kamap leader bilong olketa Israelite, hem barava difren from wei for trainim wanfala brata for kamap elder or ministerial servant long kongregeson. Nomata olsem, olketa elder savve lanem staka samting from wei wea Samuel redyim heart bilong Saul. Distaem bae iumi storyim tufala samting wea olketa elder savve lanem.

16. (a) Hao nao tingting bilong Samuel taem olketa Israelite talem hem olketa laekem wanfala king? (b) Hao nao tingting bilong Samuel taem Jehovah talem hem for anointim Saul?

¹⁶ Mas willing, and no hol bak. Taem olketa Israelite talem Samuel olketa laekem wanfala king for rulim olketa, datwan mekem Samuel feel nogud. (1 Sam. 8:4-8) Thrifala taem nao Jehovah talem Samuel for duim wanem olketa askem, bikos Samuel hem no laek for anointim wanfala king for olketa. (1 Sam. 8:7, 9, 22) Nomata Samuel hem feel olsem, hem no jealous or kros long man wea bae changem hem for leadim olketa Israelite. Taem Jehovah talem Samuel for anointim Saul, Samuel no hol bak for duim datwan. Hem willing for obey bikos hem lovem Jehovah, and no bikos hem samting wea hem mas duim nomoa.

17. Long wanem wei nao olketa elder savve followim example bilong Samuel, and why nao olketa hapi for duim datwan?

¹⁷ Distaem staka wea elder for longtaem finis followim example bilong Samuel for showimaot love and kaen long olketa brata wea olketa trainim. (1 Pet. 5:2) Olketa elder hia willing for trainim olketa narawan, and no hol bak for givim samfala privilege wea olketa garem long olketa brata wea olketa trainim. Long tingting bilong olketa elder hia, olketa “waka tugeta” witim olketa brata  wea olketa trainim for lukaftarem kongregeson. (2 Cor. 1:24; Heb. 13:16) Olketa elder hia hapi taem olketa lukim olketa brata wea olketa trainim duim gudfala samting for helpem kongregeson.—Acts 20:35.

18, 19. Wanem nao elder savve duim for redyim heart bilong brata wea hem trainim, and why nao datwan hem important?

¹⁸ Kamap gudfala fren. Taem Samuel meetim Saul, hem no stretawe anointim hem for kamap king. Sapos hem duim olsem, Saul hem kamap king, bat bae hem no savve hao for leadim pipol bilong God. Samting wea Samuel duim nao hem spendem taem witim Saul for redyim hem for datfala niu assignment. Bifor Samuel anointim Saul, tufala kaikai tugeta, wakabaot tugeta, story tugeta for longtaem, and rest lelebet tu. Bihaen Samuel duim evri samting hia, hem savve hem taem nao for anointim Saul olsem king.

¹⁹ Olketa elder distaem shud duim sem samting tu. Bifor wanfala elder start for trainim wanfala brata, hem shud fren gud witim datfala brata. Wanem datfala elder duim for fren gud witim datfala brata wea hem trainim bae hem depend long wei and kastom bilong pipol long ples wea olketa stap. Bat nomata wanem ples iu stap, sapos iu spendem taem witim brata wea iu trainim, bae hem feel savve iu tingim hem. (Readim Rome 12:10.) Olketa brata wea iu trainim bae olketa tinghae long wei wea iu showimaot love and iu spendem taem witim olketa.

20, 21. (a) Wanem nao olketa elder mas tingim mekem olketa duim gud disfala waka for trainim narawan? (b) Wanem nao bae iumi storyim long nextfala study?

²⁰ Olketa elder, plis tingim diswan: For duim gud disfala waka for trainim narawan iu mas laek for duim disfala waka, and tu, hem important for iu lovem brata wea iu trainim. (Comparem John 5:20.) Why nao diswan hem important? Sapos brata wea iu trainim hem luksavve iu lovem hem, hem bae willing for duim samting followim wanem hem lanem. So olketa elder, traem best bilong iu for fren gud witim olketa wea iu trainim.—Prov. 17:17; John 15:15.

²¹ Bihaen elder hem redyim heart bilong man, hem savve start for trainim hem. Long nextfala study bae iumi storyim hao olketa elder savve duim datfala training.