1. Why nao iumi mas gohed waka hard for strongim wei wea iumi fren witim Jehovah?

 WASWE, iu wanfala Witness bilong Jehovah wea baptaes finis? Sapos olsem, iu garem wanfala spesol samting, wea hem nao wei for fren witim Jehovah. Nomata olsem, iumi mas careful nogud olketa hevi wea iumi kasem from world bilong Satan and olketa wik point bilong iumi spoelem wei wea iumi fren witim Jehovah. Dastawe iumi evriwan mas gohed waka hard for strongim wei wea iumi fren witim Jehovah.

2. Hao nao iumi savve strongim wei wea iumi fren witim Jehovah?

² Waswe, iu barava fren gud witim Jehovah? Waswe, iu laek for strongim wei wea iu fren witim Jehovah? James 4:8 storyim wanem iu mas duim. Hem sei: “Fren gud witim God and bae hem fren gud witim iufala.” Sapos iu duim samting for fren gud witim Jehovah, bae hem fren gud witim iu tu. Taem iu gohed for duim olsem, datwan bae barava strongim wei wea iu fren witim Jehovah. Iu bae garem sem feeling olsem Jesus wea sei: “Man wea sendem mi kam hem tru, and . . . mi savve long hem.”  (John 7:28, 29) Bat wanem nao samfala samting wea iu savve duim for strongim wei wea iu fren witim Jehovah?

3. Hao nao iumi savve story witim Jehovah, and hao nao hem savve story witim iumi?

³ Sapos iu laek for fren gud witim Jehovah, hem barava important for iu and Jehovah story evritaem. Bat hao nao iu savve duim diswan? Tingim sapos wanfala fren bilong iu hem stap farawe, and iutufala laek for story. Maet iutufala savve raetem leta long each other evritaem and story long telephone. Iu savve story long Jehovah taem iu prea long hem evritaem. (Readim Psalm 142:2.) Bat hao nao bae Jehovah story long iu? Taem iu evritaem readim Bible, and ting raonem wanem iu readim, hem olsem iu letem Jehovah for story long iu. (Readim Isaiah 30:20, 21.) Distaem bae iumi storyim wei wea prea and wei for readim Bible savve strongim wei wea iu fren witim Jehovah.

4, 5. Hao nao wei for readim Bible hem olsem iu letem Jehovah for story long iu? Storyim example.

⁴ Iumi savve message bilong God wea stap long Bible hem for evriwan long earth. Bat waswe, Bible savve helpem iu for fren gud witim Jehovah? Yes! Taem iu readim and ting raonem wanem Bible talem, tingim tufala kwestin hia: ‘Waswe, samting wea mi readim hem fitim mi? Hao nao mi savve followim wanem mi lanem?’ Taem iu duim diswan, hem olsem iu letem Jehovah for story long iu. Hem kamap gudfala fren wea helpem iu, and datwan strongim wei wea iu fren witim hem.—Heb. 4:12; Jas. 1:23-25.

⁵ Olsem example, taem iu readim and ting raonem toktok bilong Jesus for “mas no hipimap riches long earth,” wanem nao kam long mind bilong iu? Sapos iu waka hard for mekem Kingdom hem first samting long laef bilong iu, bae iu hapi bikos iu luksavve Jehovah hem hapi long wanem iu duim. Bat maet iu readim disfala toktok bilong Jesus and iu luksavve iu mas mekem laef bilong iu simpol and duim moa samting long waka bilong Jehovah. Sapos olsem, datwan showimaot Jehovah helpem iu for luksavve wanem iu mas duim for fren gud witim hem.—Matt. 6:19, 20.

6, 7. (a) Hao nao wei for readim Bible savve strongim love wea iu garem for Jehovah, and love wea hem garem for iu? (b) Wanem nao main goal bilong iumi taem iumi readim Bible?

⁶ So taem iumi readim Bible, datwan savve helpem iumi for luksavve long olketa  wik point bilong iumi. Bat iumi lanem nara important samting tu. Iumi lane abaotem olketa nambawan samting wea Jehovah duim and olketa nambawan wei bilong hem. Datwan hem strongim love wea iumi garem for hem. And taem love wea iumi garem for Jehovah hem kamap strong, love wea hem garem for iumi bae kamap strong tu.—Readim 1 Corinth 8:3.

⁷ Sapos iumi laek for fren gud witim Jehovah, main goal bilong iumi taem iumi readim Bible hem for iumi savve gud long hem. Jesus sei: “For olketa kasem laef olowe, olketa mas lane abaotem iu, wea iu nomoa trufala God, and lane abaotem Jesus Christ, wea iu sendem kam.” (John 17:3) Taem iumi readim Bible, iumi savve lanem staka interesting samting, bat main goal bilong iumi hem for iumi savve gud long Jehovah.—Readim Exodus 33:13; Ps. 25:4.

8. (a) Why nao maet samfala tingse Jehovah shud no panisim King Azariah? (b) Sapos iu savve gud long Jehovah, why nao bae iu no daotem wanem hem duim?

⁸ Sapos iumi fren gud witim Jehovah, bae iumi no wari taem Bible no talem olketa reason why God duim samfala samting. Olsem example, taem Azariah hem king long Judah, olketa Israelite worshipim olketa false god. Azariah no duim datwan. Bible sei: “Hem gohed duim wanem Jehovah laekem.” (2 Ki. 15:1-5) Bat Jehovah mekem Azariah for kasem leprosy. Why nao olsem? Olketa verse hia no storyim datwan. So hao nao tingting bilong iu abaotem disfala samting wea Jehovah duim? Waswe, long tingting bilong iu, Jehovah shud no panisim Azariah bikos hem no duim eni rong samting? Sapos iu savve gud long Jehovah, bae iu no garem kaen tingting olsem, bikos iu savve Jehovah evritaem duim stret samting. Hem evritaem givim discipline wea fitim nogud samting wea man duim. (Jer. 30:11) So nomata iu maet no savve why nao Jehovah panisim Azariah, iu savve Jehovah hem duim stret samting.

9. Wanem nao Bible storyim wea helpem iumi for luksavve why Jehovah mekem Azariah for kasem leprosy?

⁹ Bible storyim samfala samting moa abaotem King Azariah. Bible sei nara nem bilong hem King Uzziah. (2 Ki. 15:7, 32) Long 2 Chronicles 26:3-5, 16-21 hem sei King Uzziah “hem duim wanem Jehovah laekem.” Bat olketa verse hia sei tu hao gogo hem “kamap praod and datwan mekem hem kasem nogud samting.” King Uzziah hem trae for duim samting wea olketa priest nomoa garem raet for duim. Eiti-wan priest talem hem samting wea hem duim hem no stret and olketa trae for stopem hem. Waswe, hem followim wanem olketa talem? Nomoa. From hem praod tumas hem kros long olketa! Evri samting hia helpem iumi for luksavve why Jehovah mekem Azariah kasem leprosy for panisim hem.

10. Why nao iumi no need for savve long olketa reason why Jehovah duim samfala samting, and wanem nao bae helpem iumi for trustim Jehovah?

¹⁰ Wanem important samting nao iumi lanem from disfala story? Long datfala story abaotem King Azariah, Bible helpem iumi for luksavve why Jehovah panisim hem. Bat waswe sapos Bible no talem olketa reason why Jehovah duim samfala samting? Waswe, bae iu tingse wanem Jehovah duim hem no stret? Or waswe, olketa nara samting wea iu lanem long Bible bae mekem iu for luksavve Jehovah hem evritaem duim stret samting? (Deut. 32:4) Taem iu savve gud long Jehovah, bae iu lovem and  trustim hem. Then bae iu no need for savve long olketa reason why hem duim samting. Taem iu gohed readim Bible, bae iu barava fren gud witim Jehovah.—Ps. 77:12, 13.

11-13. Wanem nao mekem iu sure Jehovah herem prea bilong iumi? (Lukim piksa long start bilong study.)

¹¹ Taem iumi prea, datwan helpem iumi for fren gud witim Jehovah. Iumi savve praisem hem, sei thankiu long hem, and askem hem for helpem iumi. (Ps. 32:8) Bat sapos iu laek for fren gud witim Jehovah, iu mas barava bilivim hem herem olketa prea bilong iu.

¹² Samfala pipol sei God no herem or ansarem prea bilong iumi. Olketa sei prea hem samting wea man duim for mekem hem feel gud nomoa, and prea hem helpem man for ting raonem olketa problem bilong hem and faendem wei for stretem olketa problem hia. Hem tru, wei for prea savve helpem iu long olketa wei olsem, bat iu savve sure Jehovah hem herem iu taem iu prea. Wanem nao mekem iumi sure long datwan?

¹³ Tingim diswan: Bifor Jesus kam long earth, hem lukim olketa difren taem wea Jehovah ansarem prea bilong olketa long earth wea worshipim Hem. Taem Jesus stap long earth, hem prea long Dadi bilong hem long heven for talem tingting and feeling bilong hem. Wantaem hem prea full naet. (Luke 6:12; 22:40-46) Hard for Jesus duim olsem sapos hem savve Jehovah no herem prea bilong hem. And tu, Jesus teachim olketa disaepol bilong hem hao for prea. Sapos hem savve Jehovah no herem olketa prea, waswe, bae hem duim datwan? Nomoa. Jesus savve Jehovah herem olketa prea. Hem sei: “Dadi, mi thankiu long iu bikos iu herem prea bilong mi. Mi savve iu evritaem herem mi.” Iumi tu savve sure Jehovah herem prea bilong iumi.—John 11:41, 42; Ps. 65:2.

14, 15. (a) Taem iu prea, why nao hem gud for talem klia long Jehovah wanem iu laekem? (b) Hao nao prea helpem wanfala sista for strongim wei wea hem fren witim Jehovah?

¹⁴ Waswe, samfala taem hem no isi for luksavve hao Jehovah ansarem olketa prea  bilong iu? Hem gud for talem klia long Jehovah wanem iu laekem taem iu prea. Datwan bae mekem hem isi for iu luksavve long hao Jehovah ansarem prea bilong iu, and iu bae sure Jehovah hem herem prea bilong iu. Sapos iu talem Jehovah evri samting wea iu wari abaotem, datwan bae mekem hem fren gud witim iu.

¹⁵ Tingim Kathy. * Hem evritaem go aot long field ministry, nomata hem no enjoyim preaching waka. Hem sei: “Mi nating savve enjoyim preaching waka.” Taem hem retire from waka bilong hem, wanfala elder encouragem hem for regular pioneer. Kathy sei: “Hem givim mi wanfala application pepa tu. Mi disaed for pioneer, and start long datfala taem mi prea long Jehovah tu for helpem mi for enjoyim preaching waka.” Waswe, Jehovah ansarem olketa prea bilong hem? Kam kasem distaem hem pioneer for thrifala year finis. Hem sei: “From mi go long ministry evritaem and mi lanem staka samting from olketa sista, datwan helpem mi for savve gud hao for preach. Distaem mi barava enjoyim preaching waka. And tu, datwan strongim wei wea mi fren witim Jehovah.” Tru nao, olketa prea bilong Kathy helpem hem for fren gud witim Jehovah.

16, 17. (a) Wanem nao iumi mas duim for gohed strongim wei wea iumi fren witim Jehovah? (b) Wanem nao bae iumi storyim long nextfala study?

¹⁶ Wei for fren gud witim Jehovah hem samting wea iumi savve gohed duim for olowe. So readim Bible evritaem and gohed prea long hem. Sapos iumi duim datwan, bae iumi strongim wei wea iumi fren witim Jehovah, and bae hem helpem iumi for winim olketa hard taem wea kasem iumi.

¹⁷ Bat samfala taem iumi kasem olketa problem wea no savve finis nomata iumi prea long Jehovah evritaem. Long taem olsem, maet iumi start for daotem Jehovah, and tingse Jehovah no herem prea bilong iumi, and hem no laek fren witim iumi nao. Sapos iu start for feel olsem, wanem nao iu savve duim? Bae iumi storyim datwan long nextfala study.