HISTORY BILONG IUMI
He Saw That Love Ran the Cafeteria
IUMI savve hapi tumas taem iumi hipap tugeta long olketa convention for kasem spiritual kaikai from Jehovah. And nara samting wea mekem iumi hapi long olketa taem hia hem for kaikai tugeta.
Long September 1919, olketa Bible student holem wanfala convention wea gohed for eitfala day long Cedar Point, Ohio, U.S.A. Olketa wea kam stap long olketa hotel and shud kaikai long there tu. Bat olketa hia staka tumas so staka wakaman wea servem kaikai long olketa hotel hia les for waka nao. Manager bilong olketa no savve wanem for duim, so hem askem samfala young wan wea attendim convention for help. Sadie Green sei: “No enitaem bifor mi duim datfala waka, bat mifala barava enjoyim.
Sierra Leone, 1982
Long olketa year bihaen, olketa convention garem cafeteria wea staka brata and sista volunteer for waka long there. Taem olketa young wan waka witim olketa nara Christian, diswan encouragem olketa for garem olketa spiritual goal. Gladys Bolton, wea waka long cafeteria long wanfala convention long 1937, sei: “Mi meetim pipol from plande difren ples, and olketa storyim samting wea helpem olketa for deal witim olketa test. Datwan helpem mi for garem goal for kamap pioneer.”
Beulah Covey, wea attendim wanfala convention sei: “From evriwan waka hard, evri samting ran smooth.” Nomata olsem, samfala taem waka hia hem no isi. Olsem example, long 1969, taem Brata Angelo Manera arrive long Dodger Stadium long Los Angeles, California, then hem just savve hem nao overseer bilong cafeteria. Hem sei: “Mi seke taem mi herem datwan!” Long datfala convention olketa mas digim wanfala drain wea 400 meter long, for putim wanfala pipe for gas for go long kitchen!
Frankfurt, Germany, 1951
Long 1982, long Sierra Leone, olketa mas brasim area and buildim cafeteria from bush material long there. Long 1951, long Frankfurt, Germany, olketa brata rentim wanfala train wea garem steam engine, and olketa iusim steam hia for kukim kaikai insaed 40-fala big pot. Long datfala convention olketa servem 30,000 pleit kaikai insaed wanfala hour. Olketa
askem olketa brata and sista for tekem kam naef and fork bilong olketa seleva, mekem 576 brata and sista wea volunteer no garem staka samting for wasim. Long Yangon, Myanmar, olketa wea kuki no putim tumas chilli long kaikai for olketa ovasea brata and sista wea attendim convention.“OLKETA STANDAP NOMOA FOR KAIKAI”
Long 1950, long wanfala convention long United States, wanfala samting encouragem Annie Poggensee taem hem laen ap for tekem kaikai. Hem sei: “Mi herem tufala sista from Europe story tugeta.” Tufala kam long ship, and each wan storyim wei wea Jehovah helpem hem for attendim datfala convention. Annie sei: “Tufala sista hia barava hapi fogud. Nomata hem hot and tufala mas standap long laen, tufala hapi nomoa.”
Seoul, Korea, 1963
Long staka bigfala convention, ples for kaikai hem insaed olketa bigfala tent wea olketa putim staka tebol insaed. Evri tebol hia hae fitim for man standap and kaikai. Olketa duim olsem mekem staka thousand pipol savve kaikai kwiktaem bifor program start. Wanfala man wea no Witness sei: “Disfala religion hem barava difren. Olketa standap nomoa for kaikai.”
Samfala bigman long army and gavman sapraes taem olketa lukim hao olketa convention organize gud. Samfala soldia bilong United States Army kam lukim cafeteria long wanfala convention wea kamap long Yankee Stadium long New York City. Bihaen datwan, olketa talem Major Faulkner, wanfala bigman bilong British War Department, for duim sem samting. So hem and waef bilong hem go attendim 1955 “Triumphant Kingdom” Assembly long Twickenham, England. Hem sei hem luksavve cafeteria hem organize gud bikos evriwan showimaot love.
For staka year, olketa brata and sista redyim kaikai for evriwan wea attendim olketa convention. Bat diswan hem bigfala waka, and staka volunteer savve missim samfala part long program or full program tu. Klosap long 1980, arrangement for redyim kaikai long convention hem moa simpol. Then, start long 1995, evriwan wea kam long convention mas tekem kam kaikai bilong olketa seleva. From diswan, staka wea bifor olketa savve volunteer for redyim kaikai, savve enjoyim program and associate witim olketa narawan. *
Jehovah tinghae long olketa brata and sista wea barava waka hard for redyim kaikai for olketa narawan! Samfala maet missim wei for waka long cafeteria. Nomata olsem, iumi sure long wanfala samting: Love nao main samting wea mekem olketa convention bilong iumi gohed gud.—John 13:34, 35.
^ par. 12 Nomata olsem, olketa brata and sista savve volunteer long olketa nara department long convention.