For staka year nao olketa pablikeson bilong iumi sei Gog from Magog hem nara nem for Satan, and hem kasem datfala nem bihaen Jesus aotem hem from heven. Why nao olketa pablikeson bilong iumi talem datwan? Bikos Revelation sei Satan nao bae leadim olketa wea bae attakim pipol bilong God evriwea long world. (Rev. 12:1-17) Hem nao why olketa pablikeson bilong iumi sei Gog hem nara nem for Satan.

Bat maet datfala tingting hem no stret. Why nao iumi sei olsem? Tingim diswan: Taem Jehovah story abaotem taem wea Gog bae distroe, hem sei “evri difren kaen bird and olketa wild animal bae kaikaim” Gog. (Ezek. 39:4) Then Jehovah sei: “Long datfala day mi bae markem wanfala ples long Israel for berem Gog.” (Ezek. 39:11) Hard for olketa bird and olketa wild animal kaikaim Satan, and hard for eniwan berem hem long earth, bikos Satan hem wanfala spirit. Bible sei samting wea bae kasem Satan nao, bae olketa torowem hem “insaed datfala hol wea deep tumas” wea hem bae stap for 1000 year.—Rev. 20:1, 2.

Bible sei taem datfala 1,000 year hem finis, olketa bae aotem Satan from datfala hol, and “bae hem go aot for laea long olketa pipol long evri kantri long world, wea hem nao Gog and Magog. Hem duim diswan for hipimap olketa for datfala war.” (Rev. 20:8) Bat sapos Satan hem Gog, datwan minim Satan hem laea long hemseleva. So datwan showimaot “Gog” wea Ezekiel and Revelation storyim, hem no Satan.

So hu nao Gog from Magog? For savve long ansa iumi need for lukluk long Bible for savve hu nao attakim pipol bilong God. Bible story abaotem attak bilong ‘Gog from Magog,’ and hem storyim tu attak bilong “king bilong north,” and attak bilong “olketa king long earth.” (Ezek. 38:2, 10-13; Dan. 11:40, 44, 45; Rev. 17:14; 19:19) Luk olsem taem Bible story abaotem thrifala attak hia hem iusim difren nem for storyim sem samting. Why nao iumi sei olsem? Bikos Bible sei evri kantri long earth nao bae join tugeta for attakim pipol bilong God, and taem olketa duim datwan Armageddon bae start.—Rev. 16:14, 16.

Taem iumi comparem evri scripture hia wea story abaotem olketa wea bae attakim pipol bilong  God bifor Armageddon, iumi luksavve Gog from Magog hem no nara nem for Satan. Bat datfala nem Gog from Magog hem minim olketa kantri wea join tugeta for attakim pipol bilong God. Waswe, “king bilong north” bae leadim olketa kantri hia? Iumi no barava sure long datwan. Bat maet hem olsem bikos diswan nao samting wea Jehovah talem abaotem Gog: “Bae iu kam from ples bilong iu wea farawe long north. And staka pipol bae kam witim iu, staka soldia, wanfala big army. Evriwan long olketa raedem horse.”—Ezek. 38:6, 15.

Nara samting tu, profet Daniel wea hem laef long semtaem olsem Ezekiel, hem sei olsem abaotem king bilong north: “Bae hem herem olketa story wea kam from east and north wea mekem hem feel nogud and barava kros, and bae hem go for killim dae staka pipol. And king hia bae apim olketa tent bilong hem midol long datfala big sea and datfala holy maunten wea luk naes tumas. Bat bae hem dae, and no eniwan bae helpem hem.” (Dan. 11:44, 45) Samting wea scripture hia storyim hem klosap semsem olsem wanem Ezekiel sei Gog bae duim.—Ezek. 38:8-12, 16.

Wanem nao bae happen bihaen Gog attakim pipol bilong God? Buk bilong Daniel sei: “Long datfala taem Michael [Jesus Christ] bae standap [long Armageddon], wea hem datfala nambawan prince wea standap finis [start long 1914] for helpem pipol bilong iu. And wanfala nogud taem [datfala big trabol] bae kamap, wea winim eni nogud taem wea happen start long taem wea olketa nation kamap go kasem datfala taem. And long datfala taem pipol bilong iu bae sev, wea hem nao evriwan wea nem bilong olketa insaed long datfala buk.” (Dan. 12:1) Long Revelation 19:11-21, hem storyim tu disfala samting wea Jesus bae duim.

Bat hu nao “Gog and Magog” wea Revelation 20:8 storyim? Disfala nem hem minim evriwan wea againstim Jehovah and attakim pipol bilong hem long taem bilong lastfala test wea bae kamap long end bilong datfala 1,000 year. Olketa tu bae heitim pipol bilong God olsem Gog from Magog, wea hem olketa kantri wea attakim pipol bilong God bifor Armageddon. And olsem olketa kantri hia bae finis long Armageddon, Gog and Magog tu bae finis for olowe. (Rev. 19:20, 21; 20:9) So hem fitim for iumi sei “Gog and Magog” hem evriwan wea againstim Jehovah long end bilong datfala 1,000 year.

Klosap nao “king bilong north” bae attakim pipol bilong God. Iumi barava laek for savve hu nao bae kamap datfala “king bilong north.” Nomata iumi no savve yet hu nao bae leadim olketa kantri for againstim pipol bilong God, tufala samting hia nao iumi sure bae hem happen: (1) Gog from Magog and army bilong hem bae finis evribit. (2) King bilong iumi, Jesus Christ, bae sevem pipol bilong God, and olketa bae stap gud insaed long niu world wea garem peace.—Rev. 7:14-17.