1, 2. Wanem nao tingting bilong samfala pipol abaotem God?

STAKA pipol tingse God no interest long wanem olketa duim. And olketa tingse God no wari nomoa sapos nogud samting kasem olketa. Olsem example, bihaen bigfala cyclone spoelem staka ples long Philippines long November 2013, bigman long wanfala big taon sei: “Luk olsem God hem forgetim mifala.”

² Olketa narawan tingse God no lukim wanem olketa duim. (Isa. 26:10, 11; 3 John 11) Samfala pipol long taem bilong aposol Paul garem semkaen tingting tu. Paul sei: “Olketa no willing for savve long tru samting abaotem God.” Olketa hia “evritaem duim samting wea no stret, duim sin, greedy, and garem nogud wei.”—Rome 1:28, 29.

3. Wanem nao samfala kwestin wea iumi shud ting raonem?

³ Waswe long iumi? Iumi savve Jehovah lukim evri samting wea iumi duim. Bat waswe, iumi sure Jehovah hem interest long iumi? Waswe, iumi luksavve long olketa samting wea hem duim for helpem iumi? Jehovah iusim paoa bilong hem for helpem olketa wea worshipim hem and for winim olketa enemy bilong hem. (Readim Deuteronomy 26:8.) Jesus sei samfala pipol bae “lukim God.”  (Matt. 5:8) Waswe, iumi wanfala long olketa hia? Long wanem wei nao iumi savve “lukim God”? Iumi bae storyim example bilong samfala long Bible wea luksavve long olketa samting wea God duim and samfala wea no laek for luksavve long datwan. Iumi bae storyim tu wei wea faith savve helpem iumi for luksavve long wei wea God helpem iumi.

4. Why nao olketa enemy bilong Israel no laek for luksavve long olketa samting wea God duim?

⁴ Long bifor, staka pipol garem chance for lukim and herem olketa samting wea God duim for helpem olketa Israelite. Jehovah duim olketa mirakol for mekem pipol bilong hem kamap free from Egypt, and hem winim staka king wea stap long Promis Land. (Josh. 9:3, 9, 10) Nomata olketa nara king herem and lukim wanem Jehovah duim for sevem pipol bilong hem, “olketa mekem agreement for waka tugeta for go faetem Joshua and olketa Israelite.” (Josh. 9:1, 2) Taem olketa king hia faetem Israel, olketa garem chance for lukim olketa samting wea God duim. Jehovah iusim bigfala paoa bilong hem for mekem “sun hem no muv, and moon hem no muv, go kasem taem datfala nation pei bak long olketa enemy bilong olketa.” (Josh. 10:13) Bat Jehovah letem olketa enemy bilong Israel for bighed, mekem olketa faetem olketa Israelite. (Josh. 11:20) Israel winim olketa enemy hia bikos olketa no laek for luksavve Jehovah hem faet for pipol bilong hem.

5. Wanem nao King Ahab no laek for luksavve long hem?

⁵ Nogud King Ahab tu garem chance for lukim olketa samting wea God duim. Bihaen hem no rain for longfala taem, Elijah sei long Ahab: “No eni dew or rain bae kam go kasem taem wea mi sei datwan bae happen!” (1 Ki. 17:1) Jehovah nao bae givim paoa long Elijah for duim olsem, bat Ahab no laek luksavve long datwan. Bihaen, Elijah prea long Jehovah, and God ansarem prea bilong hem taem hem sendem kam fire from heven. Ahab lukim datwan. Then, Elijah talem Ahab Jehovah bae mekem bigfala rain for kam. (1 Ki. 18:22-45) Nomata Ahab lukim evri mirakol hia, hem no laek for luksavve Jehovah iusim paoa bilong hem for duim olketa samting hia. Wanem nao iumi lanem from olketa example hia? Iumi mas luksavve long wei wea Jehovah iusim paoa bilong hem for helpem iumi.

6, 7. Wanem nao Rahab and olketa Gibeonite luksavve long hem?

⁶ Olketa Gibeonite no olsem pipol long olketa nara nation. Olketa luksavve long olketa samting wea God duim. Olketa no faetem olketa Israelite, bat olketa mek peace witim olketa. Why nao olsem? Olketa sei olketa herem olketa samting wea pipol talem abaotem Jehovah and evri samting wea hem duim. (Josh. 9:3, 9, 10) Olketa wise bikos olketa luksavve Jehovah nao faet for nation bilong Israel.

⁷ Rahab tu luksavve long olketa samting wea Jehovah duim. Hem no wanfala Israelite, bat hem herem story abaotem wanem Jehovah duim for mekem pipol bilong hem kamap free from Egypt. Taem tufala Israelite spae visitim hem, hem sei: “Mi barava savve Jehovah bae givim iufala disfala land.” Rahab trustim Jehovah for sevem hem and famili bilong hem. Hem showimaot faith long Jehovah nomata datwan bae mekem laef bilong hem stap long danger.—Josh. 2:9-13; 4:23, 24.

8. Wanem nao showimaot samfala Israelite luksavve long olketa samting wea God duim?

⁸ Nomata King Ahab no laek luksavve long  olketa samting wea God duim, samfala Israelite wea lukim fire kam daon from heven bihaen Elijah hem prea luksavve God nao duim datwan. Olketa singaot big olsem: “Jehovah nao tru God!” (1 Ki. 18:39) Olketa barava sure samting wea olketa lukim hem showimaot paoa bilong God.

9. Wanem nao bae helpem iumi for luksavve long olketa samting wea Jehovah duim distaem?

⁹ Iumi storyim finis example bilong samfala wea luksavve long olketa samting wea God duim, and example bilong samfala wea no laek luksavve long datwan. Taem iumi savve long Jehovah and olketa wei bilong hem, iumi bae luksavve long olketa samting wea hem duim. (Eph. 1:18) Iumi laek followim example bilong olketa wea faithful long bifor and distaem wea luksavve long wei wea Jehovah helpem pipol bilong hem. Waswe, iumi garem eni pruv wea showimaot God helpem pipol distaem?

10. Wanem pruv nao showimaot Jehovah helpem pipol distaem? (Lukim piksa long start bilong study.)

¹⁰ Staka pruv stap wea showimaot Jehovah helpem pipol distaem. Iumi herem staka experience abaotem pipol wea prea long God for helpem olketa, and hem ansarem prea bilong olketa. (Ps. 53:2) Olsem example, taem Allan preach long wanfala smol island long Philippines, hem meetim wanfala woman wea start for krae. Allan sei: “Long datfala morning, woman hia prea long Jehovah for sendem kam olketa Witness bilong hem.” Taem datfala woman hem teenager, olketa Witness study witim hem, bat bihaen hem marit and hem muv go long datfala island hem no gohed for study. From God kwiktaem for ansarem prea bilong hem, datwan mekem hem krae. Bihaen wanfala year, hem dedicate long Jehovah and hem baptaes.

11, 12. (a) Long olketa wanem wei nao Jehovah helpem olketa wea worshipim hem? (b) Storyim wanem Jehovah duim for helpem wanfala sista.

¹¹ Staka wea worshipim Jehovah distaem luksavve hem helpem olketa for stop for smoke, no iusim drug, and no lukluk long olketa rabis piksa. Samfala sei, bifor olketa lane abaotem Jehovah olketa trae for no duim olketa samting hia, bat hem hard long olketa. Taem olketa askem Jehovah for helpem olketa, hem givim “strong wea winim strong bilong man,” and datwan helpem olketa for lusim olketa nogud samting hia.—2 Cor. 4:7; Ps. 37:23, 24.

¹² Jehovah helpem tu olketa wea worshipim hem taem olketa kasem hard taem. Olsem example, tingim samting wea Jehovah duim for helpem Amy. Hem kasem assignment for help long waka for buildim wanfala Kingdom Hall and missionary hom long wanfala smol island long Pacific. Culture bilong pipol long there hem difren, staka taem no eni paoa or wata, road hem flood, hem missim famili bilong hem, and hem stap long smol rum long wanfala hotel. Wanday hem tok kros long wanfala sista wea tufala waka tugeta. Bihaen datwan, Amy barava feel sorre long samting wea hem duim. Taem hem go bak long rum bilong hem, hem prea long Jehovah for helpem hem. Then taem paoa kam bak, hem readim article abaotem Gilead graduation long Wastaoa magasin. Datfala article storyim olketa sem hard taem wea hem kasem long datfala island. Amy sei: “Long datfala naet hem olsem Jehovah story kam long mi. Datwan strongim mi for gohed duim assignment bilong mi.”—Ps. 44:25, 26; Isa. 41:10, 13.

13. Wanem nao showimaot Jehovah helpem pipol bilong hem for defendim raet bilong olketa for preach?

¹³ Jehovah helpem tu pipol bilong hem for “iusim law for defendim datfala gud nius and  for kasem raet for preachim datwan.” (Phil. 1:7) Olsem example, taem samfala gavman trae for stopem preaching waka, iumi go long kot for defendim raet bilong iumi for preach. Long staka kantri, iumi winim samting olsem 268 kot case long hae kot. Start kam long year 2000, iumi winim 24 kot case hia long European Court of Human Rights. Tru nao, no eniwan savve stopem waka bilong God!—Isa. 54:17; readim Isaiah 59:1.

14. Wanem nao samfala nara samting wea pruvim God helpem pipol bilong hem?

¹⁴ Nara samting wea pruvim God helpem pipol bilong hem, hem preaching waka wea gohed raonem full world. (Matt. 24:14; Acts 1:8) And tu, Jehovah helpem pipol bilong hem long evri kantri for olketa wan mind. Wei wea iumi wan mind hem barava spesol! Nomata pipol wea no worshipim Jehovah, olketa sei: “God hem barava stap witim iufala.” (1 Cor. 14:25) Tru nao, staka samting pruvim God helpem pipol bilong hem! (Readim Isaiah 66:14.) Waswe, iu luksavve long olketa wei wea Jehovah helpem iu?

15. Why nao maet samfala taem iumi no luksavve long olketa wei wea God helpem iumi?

¹⁵ Samfala taem maet iumi no luksavve long olketa wei wea God helpem iumi. Why nao olsem? Taem iumi kasem staka problem, maet iumi no tingim olketa wei wea Jehovah helpem iumi finis. Hem nao samting wea kasem Elijah. Hem man for no fraet. Bat taem Queen Jezebel laek for killim hem dae, hem fraet nao. Hem no tingim wanem Jehovah duim finis for helpem hem. Bible sei Elijah hem laek for dae nomoa. (1 Ki. 19:1-4) Wanem nao hem shud duim? Hem shud askem Jehovah for helpem hem!—1 Ki. 19:14-18.

16. Taem iumi kasem olketa problem, wanem nao savve helpem iumi for luksavve long olketa wei wea God helpem iumi?

¹⁶ From Job tingim nomoa olketa nogud samting wea kasem hem, hem no luksavve long tingting bilong Jehovah abaotem olketa samting hia. (Job 42:3-6) Samfala taem, maet iumi tu tingim nomoa olketa problem  wea iumi kasem. Long taem olsem, wanem nao savve helpem iumi for luksavve long olketa wei wea God helpem iumi? Iumi mas ting raonem wanem Bible talem abaotem olketa problem bilong iumi. Datwan bae helpem iumi for luksavve long olketa wei wea Jehovah helpem iumi. And olsem Job, iumi bae sei: “Mi herem samting wea olketa talem abaotem iu, bat distaem eye bilong mi barava lukim iu.”

17, 18. (a) Wanem nao samfala wei wea Jehovah maet helpem iumi? (b) Storyim experience wea showimaot God helpem iumi distaem.

¹⁷ Wanem nao samfala wei wea Jehovah maet helpem iumi? Tingim faevfala example. First wan, maet iu luksavve long wei wea Jehovah helpem iu for lanem truth. Mek-tu, maet iu tingim yet wanfala tok wea iu herem long meeting wea barava helpem iu. Mek-thri, maet iu luksavve long wei wea Jehovah ansarem prea bilong iu. Mek-foa, maet iu laek for duim moa samting long waka bilong Jehovah and iu luksavve long wei wea Jehovah helpem iu for kasem datfala goal. Mek-faev, maet iu lusim waka wea iu duim bikos datfala waka mekem iu for misstim olketa meeting and preaching waka, then God duim wanem hem promisim, taem hem sei: “Bae mi nating lusim iu.” (Heb. 13:5) Taem iumi fren gud witim Jehovah, hem bae isi for iumi luksavve long olketa wei wea hem helpem iumi.

¹⁸ Sarah, wanfala sista from Kenya, hem sei: “Wanfala taem mi prea long Jehovah abaotem wanfala Bible study bilong mi wea mi tingse hem no tinghae long wanem hem lanem. Mi askem Jehovah sapos mi shud stop for study witim hem. Stretawe bihaen mi talem ‘Amen,’ phone bilong mi hem ring. Datfala Bible study ring kam for sei hem laek go long meeting witim mi! Mi sapraes tumas!” Sapos iumi lukluk for olketa wei wea God helpem iumi, iumi bae luksavve long wanem hem duim. Rhonna, wanfala sista from Asia, sei: “Hem tek taem for iumi lane for luksavve long olketa wei wea Jehovah helpem iumi. Bat taem iu lukim olketa samting wea God duim, bae iu luksavve hem duim staka samting for helpem iumi!”

19. Wanem nao nara samting wea bae helpem iumi for “lukim God”?

¹⁹ Jesus sei olketa wea “bae lukim God” mas “garem gudfala heart.” (Matt. 5:8) Wanem nao iumi mas duim for “garem gudfala heart”? Iumi mas tingim evri samting wea klin and no duim nogud samting. (Readim 2 Corinth 4:2.) Sapos iumi gohed strongim wei wea iumi fren witim God, iumi bae luksavve long olketa wei wea hem helpem iumi. Nextfala study bae storyim wei wea faith savve helpem iumi for luksavve long olketa wei wea Jehovah helpem iumi.