SAPOS man no savve trustim evri samting wea olketa raetem long niuspepa winim 200 year go finis, iumi tu shud no trustim evri samting wea iumi readim long Internet distaem. Staka information hem stap bikos long technology. Bat samfala information hem tru and samfala no tru, samfala hem important and samfala no important, samfala information savve helpem pipol and samfala savve spoelem man tu. Iumi mas chusim nomoa information wea savve helpem iumi. Olketa wea just iusim Internet maet tingse evri samting wea olketa readim and lukim hem tru bikos hem stap long Internet or wanfala fren emailim long olketa. Bat Bible sei: “Man wea no wise hem bilivim evri samting wea hem herem, bat man wea wise hem tingting gud firstaem bifor hem duim eni samting.”—Prov. 14:15.

Hao nao iumi savve kamap “wise” and luksavve long olketa conman, olketa laea story for trikim man, and olketa nara information wea no tru long Internet? Hem gud for tingim diswan: ‘Waswe, datfala information kam from website wea man savve trustim? Or waswe, hem kam from wanfala blog, or iumi no savve wea nao datfala information kam from? Waswe, wanfala website wea iu savve trustim hem talem finis datfala information hem no tru?’ * Then iusim gudfala tingting for disaedem wanem for duim. (Prov. 7:7) Sapos hem luk olsem datfala information wea iu kasem hem no tru, iu shud no trustim. And tu, sapos datfala information hem for tok spoelem pipol, tingim hu nao bae kasem gud samting from datwan, and why olketa spredim datfala nius.

Samfala pipol laekem for olketa nao first wan for talem nius and for sendem long olketa narawan, bat olketa no chekim firstaem sapos datfala nius hem tru or nomoa, or wanem samting bae kamaot from datwan. (2 Sam. 13:28-33) Bat sapos iumi “wise,” iumi bae no sendem kaen information olsem bikos maet hem spoelem nem bilong wanfala man or wanfala organization.

 Man needim taem for chekim sapos wanfala information hem tru. Dastawe samfala leavim for man wea kasem e-mail nao for chekim datwan. Bat maet hem tu no garem taem for duim datwan. (Eph. 5:15, 16) So sapos iu no sure wanfala information hem tru or nomoa, hem gud for no sendem datwan.

Ting raonem olketa kwestin hia: ‘Waswe, mi evritaem forwardim olketa e-mail long olketa narawan? Waswe, enitaem mi sendem e-mail long olketa narawan for talem sorre bikos information wea mi sendem hem no stret or hem no tru? Waswe, eniwan talem mi for no sendem kaen e-mail olsem?’ Tingim, olketa long e-mail contact list bilong iu savve lukluk tu long Internet for eni samting wea olketa interest long hem. Olketa no garem taem for readim staka e-mail wea garem fani story, video, or olketa piksa, wea iu sendem long olketa. Hem no fitim tu for sendem recording or copy bilong olketa Bible tok. * And tu, hem no stret for sendem long wanfala brata or sista copy bilong wanfala research wea iu duim, olketa scripture for iusim long Bible study, or olketa ansa for olketa kongregeson meeting. Sapos iu duim olsem, datwan bae no helpem hem for duim study seleva.

Wanem nao iu shud duim sapos iu lukim nius long Internet wea tok spoelem organization bilong Jehovah? Iu shud stap klia long olketa information olsem. Samfala tingse olketa mas storyim diswan long olketa narawan for herem tingting bilong olketa, bat wei for duim olsem bae spredim datfala laea story. Sapos iumi start for wari abaotem samting wea iumi lukim long Internet, iumi shud prea long Jehovah for hem givim iumi wisdom and askem help bilong olketa elder. (Jas. 1:5, 6; Jude 22, 23) Pipol accusim Jesus long staka nogud samting, so hem warnim olketa disaepol abaotem wei wea olketa enemy bae spoelem and “talem enikaen nogud samting abaotem [olketa] wea no tru.” (Matt. 5:11; 11:19; John 10:19-21) Iumi mas garem “gudfala tingting” and “wei for minim samting” mekem iumi luksavve long “man wea tok abaotem rabis samting” and olketa wea “duim nogud samting.”—Prov. 2:10-16.

Iumi mas keakea tu for no spredim nius abaotem olketa brata or olketa experience wea iumi herem. Nomata sapos datfala nius or experience hem tru, samfala taem hem no stret or hem no showimaot love for storyim datwan long olketa narawan. (Matt. 7:12) Olsem example, hem no showimaot love or encouragem narawan for storyim olobaot wanfala nius wea spoelem narawan. (2 Thess. 3:11; 1 Tim. 5:13) Samfala nius maet no fitim for olketa narawan herem, and iumi shud respectim olketa wea hem nius bilong olketa mekem olketa seleva talem datfala nius long taem wea fitim. Problem savve kamap taem iumi storyim information wea no kasem yet taem for olketa narawan savve abaotem.

Distaem hem isi tumas for storyim nius wea hem tru and no tru, wea hem important and no important, wea savve helpem pipol and wea savve spoelem man. Man wea sendem e-mail or text nomata long wanfala man nomoa mas luksavve kwiktaem nomoa staka pipol bae savve long datfala nius. Hem gud for iumi no kwiktaem e-mailim information long eniwan nomoa. Nomata man wea garem love hem “gohed for biliv,” iumi shud no kwiktaem for bilivim evri samting wea iumi readim. (1 Cor. 13:7) And tu, iumi no bilivim olketa laea story abaotem organization bilong Jehovah or abaotem olketa brata and sista bilong iumi. Olketa wea spredim olketa laea story hia duim wanem Satan, datfala “dadi bilong wei for laea,” hem laekem. (John 8:44) Gudfala tingting and wei for luksavve bae helpem iumi for kamap “wise” and for ting raonem which information nao savve helpem iumi. Bible sei, “man wea no wise bae duim krangge samting, bat man wea wise hem garem gudfala tingting.”—Prov. 14:18.