Waswe, iu readim olketa Wastaoa magasin wea iumi kasem no longtaem go nomoa and ting raonem samting wea iu readim? Trae for ansarem olketa kwestin hia:

Long end bilong world, wanem nao samfala samting wea bae finis?

Samfala long olketa samting wea bae finis nao hem olketa gavman, war and olketa samting wea no stret, olketa religion wea spoelem God and olketa man, and pipol wea duim olketa nogud samting.—7/1, page 3-5.

Hu nao Gog from Magog wea buk bilong Ezekiel storyim?

Gog from Magog hem no nara nem for Satan, bat luk olsem datfala nem Gog from Magog hem minim olketa kantri wea join tugeta for attakim pipol bilong God bihaen datfala big trabol hem start.—5/15, page 29-30.

Hao nao olketa mirakol wea Jesus duim showimaot hem kaen?

Long wanfala marit feast long Cana, Jesus duim mirakol for mekem samting olsem 100 gallon wata for kamap wine. Long nara taem, Jesus feedim winim 5,000 pipol. (Matt. 14:14-21; John 2:6-11) Taem hem duim olketa samting hia hem followim wei bilong Dadi bilong hem wea kaen tumas.—6/15, page 4-5.

Waswe, evri member bilong false religion nao bae dae taem Bigfala Babylon hem distroe?

Nomoa. Samting wea Zechariah 13:4-6 talem hem showimaot samfala bigman bilong religion bae sei olketa no insaed long olketa religion hia wea finis, and olketa bae act olsem olketa no interest long religion.—7/15, page 15-16.

Why nao Barak laekem Deborah for go witim hem taem hem go faetem Sisera?

Barak garem strongfala faith. Barak no askem God for provaedem olketa weapon for olketa. From hem garem strongfala faith, hem savve hao sapos profet bilong God hem stap, datwan bae strongim hem and olketa soldia bilong hem. (Judg. 4:6-8; 5:7)—9/1, page 13.

Wanem nao samfala samting wea olketa Christian savve ting raonem?

Samfala samting hia nao hem olketa samting wea Jehovah wakem, olketa gud samting wea iumi lanem insaed Bible, privilege wea iumi garem for prea long Jehovah, and ransom sakrifaes bilong Jesus.—8/15, page 10-13.

Hao nao principle long 1 Corinth 15:33 hem fitim tu wei for no frenim eniwan wea no worshipim Jehovah?

Nomata iumi laek for kaen long evriwan, hem rong for frenim eniwan wea no dedicate long God and no followim olketa standard bilong hem. (1 Cor. 15:33)—8/15, page 25.

Wanem nao mekem faith bilong Peter no strong, bat wanem nao mekem faith bilong hem for strong moa?

Peter showimaot faith and wakabaot go long Jesus antap long sea. (Matt. 14:24-32) Bat taem hem lukim strongfala wind and olketa bigfala wave, hem fraet nao. Then hem lukluk moa long Jesus and trustim Jesus for helpem hem.—9/15, page 16-17.

Wanem leson nao iumi lanem from wei wea Martha hem busy tumas long staka samting?

Wantaem Martha hem busy tumas for redyim spesol kaikai and duim staka nara samting tu for Jesus. Jesus sei Mary hem chusim stret samting bikos Mary lisin gud long wanem Jesus storyim. Iumi mas careful for no letem olketa samting wea no important for mekem iumi no strong for duim olketa spiritual samting.—10/15, page 18-20.