Wanfala smol gele wea hem 4-fala year nomoa hem lukim smoke wea kamaot from wanfala factory. Datfala smoke hem luk olsem olketa cloud, so hem tingse datfala factory hem for wakem olketa cloud. Wei wea disfala pikinini minim rong datwan, maet hem here fani long iumi. Bat samfala taem, sapos man minim rong long wanfala samting, datwan savve kosim bigfala problem. Olsem example, sapos man minim rong instruction abaotem hao for iusim wanfala medicine, datwan savve spoelem health bilong hem or maet hem bae dae.

Sapos iumi minim rong long olketa scripture, datwan hem serious samting. Olsem example, samfala pipol minim rong long olketa samting wea Jesus teachim. (John 6:48-68) Sorre samting nao, datwan mekem olketa no laek for gohed lane abaotem wanem Jesus teachim!

Waswe, iu savve readim Bible? Datwan hem gudfala samting for duim. Nomata olsem, maet samfala taem pipol minim rong long samfala samting wea olketa readim. Bae iumi storyim thrifala scripture wea samfala savve minim rong.

• Samfala pipol minim rong long datfala komand long Bible wea sei for iumi “fraet long trufala God.” Olketa tingse datfala scripture sei olketa mas barava fraetem God. (Ecclesiastes 12:13) Bat God no laekem olketa wea worshipim hem for fraetem hem. Hem sei: “Iu no fraet bikos mi stap witim iu. Mi God bilong iu, so iu no wari. Mi bae strongim iu and helpem iu.” (Isaiah 41:10) So wei for fraet long God hem minim for tinghae long God and for barava respectim hem.

• Samfala pipol minim rong olketa verse wea sei: “Taem hem stap for evri samting, . . . taem for born and taem for dae.” Taem olketa readim datfala scripture, olketa tingse God markem finis barava taem wea each wan bae hem dae. (Ecclesiastes 3:1, 2) Bat datfala scripture hem storyim nomoa wanem hem savve happen long evriwan. Iumi laef, then gogo wanday iumi bae dae. Bible storyim tu hao olketa samting wea iumi disaedem savve mekem iumi for laef longtaem or nomoa. Olsem example, Bible sei: “Man wea fraet long Jehovah savve laef for longtaem.” (Proverbs 10:27; Psalm 90:10; Isaiah 55:3) Hao nao bae hem laef longtaem? Olsem example, sapos iumi followim wanem Bible talem, iumi bae no duim olketa samting wea savve spoelem health bilong iumi olsem wei for drunk and for durong.—1 Corinth 6:9, 10.

• Samfala pipol readim 2 Peter 3:7 wea sei skae and earth “mas finis long fire,” and olketa tingse datwan minim God bae distroem earth. Bat Bible sei God bae no letem eniwan for distroem disfala earth. God “hem wakem strongfala faondeson for disfala earth, and bae hem stap for olowe.” (Psalm 104:5; Isaiah 45:18) So taem 2 Peter 3:7 sei earth “mas finis long fire,” hem no minim disfala earth bae finis bat olketa nogud pipol nao bae finis for olowe, olsem taem fire hem bonem samting hem finis for olowe. And taem Bible storyim “skae” datwan savve minim ples wea sun, moon and olketa star stap or hem savve minim ples wea God hem stap. Hard for God finisim olketa samting hia.

Olsem iumi storyim finis, samfala pipol savve minim rong long olketa scripture wea olketa readim long Bible. Datwan mekem samfala for garem kaen tingting olsem: ‘Sapos God hem barava wise and hem savve long evri samting, why nao hem no givim iumi wanfala buk wea hem isi for iumi evriwan savve minim taem iumi readim?’ Bae iumi storyim thrifala reason why pipol minim rong samfala scripture long Bible.

1.   God givim Bible for olketa wea willing for lane and wea hambol. Jesus sei olsem long Dadi bilong hem: “Mi praisem iu Dadi, wea iu nao rulim heven and earth, bikos iu haedem gud olketa samting hia from olketa wea wise and skul gud, and iu showimaot long olketa wea hambol olsem olketa smol pikinini.” (Luke 10:21) God helpem olketa man wea raetem Bible for raetem long wei wea olketa wea hambol savve minim wanem Bible hem storyim. Pipol wea “wise and skul gud” maet garem wei for praod, wea datwan savve mekem olketa for minim rong long Bible. Bat taem pipol wea readim Bible olketa hambol and laekem tumas for lanem samting, olsem “olketa smol pikinini,” olketa savve minim Bible. Bible hem barava spesol, iaman?

2. Bible hem for olketa wea laekem God for helpem olketa for minim. Jesus luksavve pipol bae needim help for minim olketa samting wea hem teachim long olketa. So wanem nao savve helpem olketa? Jesus sei: “Holy spirit wea Dadi bae sendem kam long nem bilong mi for helpem iufala bae teachim iufala evri samting.” (John 14:26) So God iusim holy spirit bilong hem, wea diswan hem paoa bilong hem, for helpem pipol for minim wanem olketa readim long Bible. And tu, holy spirit helpem samfala Christian wea minim gud olketa samting long Bible for helpem olketa narawan for minim olketa samting hia. (Acts 8:26-35) Bat God no givim holy spirit long pipol wea no depend long hem for helpem olketa, so staka taem olketa no minim wanem olketa readim.

3. Pipol bae minim samfala scripture long Bible long taem wea God laekem nomoa for olketa minim datwan. Olsem example, wanfala angel talem profet Daniel for raetem olketa samting wea pipol bae minim long future. Angel hia sei long hem: “Daniel, buk hia hem sat finis and toktok insaed hem mas stap haed go kasem taem bilong end.” Insaed plande handred year, staka pipol readim Bible buk bilong Daniel bat olketa no minim evri samting. Daniel tu hem no minim samfala samting wea hem raetem. Hem sei: “Mi herem, bat mi no minim.” Bat gogo, pipol minim profesi wea Daniel raetem long taem wea God laekem pipol for minim datwan. Datfala angel sei moa: “Go, Daniel, bikos buk hia hem sat finis and toktok insaed hem mas stap haed go kasem taem bilong end.” So hu nao bae minim olketa scripture insaed long Bible? Bible sei: “Olketa nogud man bae no minim, bat olketa wea garem wei for luksavve nao bae minim.” (Daniel 12:4, 8-10) Diswan showimaot God hem helpem pipol for minim samfala scripture long Bible long taem wea hem laekem nomoa for olketa minim.

Waswe, enitaem Olketa Jehovah’s Witness minim rong long samfala scripture long Bible? Yes. Nomata olsem, long taem wea God laekem olketa for minim stret olketa scripture hia, olketa willing for changem wei wea olketa minim olketa scripture hia. Taem olketa duim olsem, olketa followim example bilong olketa aposol bilong Jesus wea hambol and changem tingting bilong olketa taem Jesus stretem olketa.—Acts 1:6, 7.

Hem no big samting taem datfala smol gele wea iumi storyim finis tingse factory savve wakem olketa cloud. Bat hem barava important for iumi minim stret olketa samting wea Bible teachim. Hem hard for man readim Bible seleva and minim evri samting wea hem readim. So hem gud for askem samwan for helpem iu for minim wanem iu readim. Story witim Olketa Jehovah’s Witness or readim olketa article wea stap long jw.org website. Olketa Jehovah’s Witness studyim gud Bible, olketa depend long holy spirit bilong God for helpem olketa for minim Bible, and olketa luksavve iumi stap long taem wea God laekem iumi for minim olketa samting long Bible. Bible hem sei taem iu askem help for minim Bible, iu bae kasem stretfala savve.—Proverbs 2:3-5.