SAMFALA SEI NOMOA. Wanfala doctor sei wei for followim advaes long Bible hem olsem wei for iusim science buk wea olketa raetem long olketa year bilong 1920 for teachim chemistry class distaem. Maet samwan wea no tinghae long Bible bae hem sei wei for followim advaes long Bible hem olsem wei for followim instruction buk bilong wanfala old computer long wanfala niu computer distaem. So samfala tingse Bible hem barava no fitim distaem.

Hao, bae eniwan laek followim advaes long wanfala old buk olsem wea olketa raetem longtaem finis long distaem wea klosap evriwan iusim technology? Staka pipol maet bae no laek for duim datwan bikos enikaen niu information stap long staka website and blog long Internet. Long olketa TV program man savve herem advaes bilong pipol wea raetem olketa buk, pipol wea studyim wei bilong olketa man, and pipol wea givim advaes saed long living. And olketa buk stoa salem enikaen buk wea garem advaes abaotem enikaen samting, wea datwan hem big bisnis.

From hem isi tumas for kasem niu information kwiktaem, waswe, bae pipol lukaotem advaes long buk wea olketa finis for raetem samting olsem 2,000 year go finis? Waswe, hem stret for sei wei for followim advaes long wanfala old buk hem olsem wei for iusim old science buk or instruction buk bilong old computer? For tok stret, kaen tingting olsem hem no stret. Science and technology savve change kwiktaem, bat waswe, olketa samting wea iumi olketa man needim hem change tu? Start long bifor kam kasem distaem pipol laek for savve long mining bilong laef, hapi, stap sef, stap gud witim famili, and garem olketa gud fren.

Nomata Bible hem buk wea olketa raetem longtaem finis, hem garem advaes wea savve helpem man long olketa samting hia and olketa nara samting tu. And tu, God wea wakem evri samting nao givim Bible for iumi. Bible savve helpem iumi long evri part long laef and hem savve helpem iumi for deal witim eni hard samting. (2 Timothy 3:16, 17) Advaes wea Bible givim hem fitim olketa wea stap bifor and distaem tu. Bible sei: “Toktok bilong God hem laef.”—Hebrew 4:12.

Waswe, evri samting hia abaotem Bible hem tru? Waswe, advaes long Bible no fitim distaem, or hem nomoa buk wea toktok bilong hem laef and barava fitim distaem? Goal bilong Wastaoa magasin hem for helpem iu kasem ansa for olketa kwestin olsem. Start witim disfala issue, each Wastaoa magasin bae storyim wanfala subject nomoa.