Rosie sei: “Mi savve wari evritaem and tingim olketa nogud samting wea mi tingse bae happen.” Wanem scripture nao helpem hem? Wanfala hem Matthew 6:34 wea sei: “No warim samting wea bae happen tumoro, leavim go datwan for tumoro nao, bikos evri day bae olketa problem kamap. Tingim nomoa olketa problem wea iufala kasem tuday.” Rosie sei toktok wea Jesus talem long disfala scripture helpem hem for stop for wari abaotem samting wea hem tingse bae happen. Hem sei: “Mi garem staka problem finis. For wat nomoa mi warim olketa samting wea no happen yet, and wea maet bae no happen tu.”

Yasmine luksavve hem savve wari tumas and gogo datwan kontrolem tingting bilong hem. Hem sei: “Samfala day long week mi savve krae, and mi no savve sleep tu long samfala naet. Datfala nogud feeling hem mekem mi barava no hapi.” Wanem scripture nao helpem hem? Wan Peter 5:7 nao helpem hem, wea sei: “Putim evri wari bilong iufala long hand bilong [God] bikos hem tingim iufala.” Yasmine sei: “Mi gohed prea long Jehovah, and hem ansarem olketa prea bilong mi. Mi feel olsem Jehovah aotem wanfala hevi samting wea mi bin karem. Samfala taem mi savve wari bat distaem mi savve hao for deal witim.”

Wanfala woman wea nem bilong hem Isabella sei: “From dadi bilong mi hem man for delay for duim samting, ating datwan nao mekem mi for olsem. Mi savve delay for duim olketa important samting. Mi savve relax nomoa and lukluk TV. Hem wanfala nogud wei bikos hem savve mekem man for stress and for no duim gud long samting.” Bible principle wea helpem hem nao stap long 2 Timothy 2:15, wea sei: “Traem best bilong iu for duim samting wea bae mekem God hapi long iu, and for kamap wakaman wea no shame long waka bilong hem.” Isabella sei: “Mi no laek for delay for duim wanfala samting bikos bae mi duim nogud long hem and datwan mekem Jehovah shame long wanem mi duim.” Distaem Isabella no delay for duim samting.

Sem samting tu kasem Kelsey. Hem sei: “Mi garem project for duim bat bae mi leavim gogo kasem last minute bifor mi just duim. Mi bae krae, no savve sleep, and wari tumas. For delay for duim samting hem barava spoelem mi.” Proverbs 13:16 helpem Kelsey, wea sei: “Man wea wise bae tingting gud firstaem bifor hem duim samting, bat man wea krangge bae duim krangge samting.” (NW) Taem hem tingting followim datfala scripture, hem lanem diswan: “Man wea wise bae garem gudfala tingting and plan gud firstaem. Distaem mi keepim wanfala notebuk long desk bilong mi wea mi savve raetem olketa samting wea mi mas duim, and diswan helpem mi for organizem gud olketa waka bilong mi, and no leavim for last minute.”

Kirsten sei: “Hasband bilong mi lusim mi and fofala smol pikinini bilong mitufala.” Wanem Bible principle nao helpem hem? Proverbs 17:17, wea sei: “Gudfala fren hem showimaot love evritaem, and hem olsem brata wea iu savve depend long hem taem iu kasem hard taem.” (NW) Kirsten askem olketa nara Witness for helpem hem. Waswe, hem kasem help from olketa? Hem sei: “Olketa helpem mi long staka samting! Samfala kam leavim kaikai and flaoa front long door bilong haos bilong mifala. Thrifala taem wea mifala muv long olketa difren haos, staka nao kam helpem mifala. Wanfala faendem waka for mi. Olketa fren hia stanbae evritaem for helpem mi.”

Delphine wea iumi storyim finis tu stragol witim wei for feel lonely. Bihaen pikinini dae and hasband lusim hem, hem sei: “Taem mi lukim nara pipol garem famili and stap gud tugeta, datwan mekem mi feel sorre and barava lonely.” Psalm 68:6 nao helpem hem, wea sei: “God givim ples for stap long olketa wea stap seleva.” (NW) Delphine sei: “Mi savve datwan no minim nomoa wanfala haos for stap. Bat hem savve minim tu wei wea God helpem mi for garem olketa trufala fren wea lovem Jehovah, and mi garem wanfala spiritual famili. Bat mi savve sapos mi no fren gud witim Jehovah bae mi no savve fren gud witim pipol bilong hem. So Sams 37:4 nao helpem mi long diswan. Hem sei: ‘Yu mas faendem hapi blong yu long [Jehovah], an bae hemi givim yu olketa samting wea yu laekem tumas.’”

Delphine sei: “Mi luksavve mi mas strongim wei wea mi fren witim Jehovah. Hem nao best fren wea eniwan savve garem. Then mi mekem list bilong olketa samting wea mi laek for duim witim olketa narawan, mekem mi savve garem olketa fren wea lovem Jehovah. Mi lane for tingim gud saed bilong olketa narawan, and no tingim nogud saed bilong olketa.”

Olketa wea worshipim God tu no perfect. Olketa Jehovah’s Witness tu stragol witim olketa sem problem olsem olketa narawan. Bat Bible encouragem olketa for helpem narawan long taem wea fitim. Hem gud for garem olketa fren olsem. Bat waswe, olketa Bible principle savve helpem tu olketa wea kasem hard taem distaem, olsem olketa wea kasem big sik and olketa wea sorre bikos fren or famili member hem dae?