Iumi storyim finis olketa point wea helpem iumi for savve long ansa bilong disfala kwestin, Wanem nao truth abaotem God? First samting wea iumi lanem nao Bible sei nem bilong God hem Jehovah and main fasin bilong hem nao love. Iumi lanem tu wanem hem duim finis and wanem bae hem duim long future for iumi olketa man kasem gud samting. Staka samting stap yet for iumi lanem abaotem God, bat maet iu laek savve wanem gud samting nao bae iu kasem sapos iu duim datwan?

Jehovah sei “sapos yu lukaotem hem, bae yu save faendem hem.” (Fas Kronikols 28:9) Taem iu gohed for lane abaotem God gogo bae iu “fren gud witim [Jehovah].” (Psalm 25:14, NW) Datwan hem barava spesol samting! Hao nao wei for fren witim Jehovah savve helpem iu?

Bae iu hapi. Bible sei Jehovah hem “datfala hapi God.” (1 Timothy 1:11) Taem iu fren gud witim hem and followim olketa wei bilong hem, bae iu barava hapi and diswan savve helpem iu saed long feeling, tingting, and body tu. (Sams 33:12) Iu bae garem gudfala laef tu sapos iu obey and no duim olketa samting wea bae spoelem iu, keepim health bilong iu, and stap gud witim olketa narawan. Taem iu duim datwan, bae iu garem sem tingting olsem man wea raetem psalm, wea sei: “Hemi barava gud tumas fo [“mi fren gud witim God,” NW].”—Sams 73:28.

Hem tingim and interest long iu. Jehovah promis olsem for pipol bilong hem: “Bae mi gohed fo givim [“advaes,” NW] long yu, an mi gohed fo lukaftarem yu.” (Sams 32:8) Datwan minim Jehovah tingim olketa wea worshipim hem and bae hem givim wanem each wan needim. (Sams 139:1, 2) Taem iu fren gud witim Jehovah, bae iu lukim hem evritaem redi for helpem iu.

Bae iu garem nambawan future. Jehovah God savve helpem iu for garem gudfala laef distaem, and tu, hem promisim iu wanfala nambawan future. (Aesaea 48:17, 18) Bible sei: “For olketa kasem laef olowe, olketa mas lane abaotem iu, wea iu nomoa trufala God, and lane abaotem Jesus Christ, wea iu sendem kam.” (John 17:3) Long olketa hard taem distaem, datfala hope wea God givim long iumi hem olsem anka wea keepim iumi for “strong and stedy.”—Hebrew 6:19.

Olketa hia hem samfala gud samting wea iu savve kasem taem iu lane abaotem God and fren gud witim hem. Sapos iu laek for savve moa abaotem diswan, plis story witim eni Jehovah’s Witness or go long jw.org/pis.