Taem iu savve long olketa samting wea wanfala man duim and hard taem wea hem winim, datwan helpem iu for savve hem wanem kaen man. Semsem tu witim God, sapos iu laek for savve gud long Hem, iu mas lanem olketa samting wea hem duim finis. Sapos iu duim datwan, bae iu faendaot staka samting wea God duim finis hem gohed helpem iumi distaem and long future tu.

Jehovah God nao wakem evri samting, and “olketa wei bilong hem showaot klia start long taem wea hem wakem world kam kasem distaem.” (Rome 1:20) “Hem nao wakem earth long paoa bilong hem. Long wisdom bilong hem evri samting long earth kamap, and long savve bilong hem, hem putim evri samting long skae.” (Jeremiah 10:12, NW) Olketa nambawan samting wea God wakem showimaot hem lovem iumi.

Tingim, laef bilong iumi barava spesol bikos Jehovah wakem iumi olketa man for “olsem hem.” (Jenesis 1:27) Datwan minim hem wakem iumi for showimaot olketa nambawan wei bilong hem. Hem wakem iumi for tinghae long olketa spiritual samting, wea minim iumi fit for savve long tingting and olketa standard bilong hem. Taem iumi traem best for followim olketa standard hia, bae iumi hapi and laef bilong iumi garem mining. Winim datwan, bae iumi savve fren gud witim hem.

Olketa samting wea God wakem long earth showimaot hem lovem iumi. Aposol Paul sei God “duim olketa gud samting for showimaot gudfala wei bilong hem long [iumi]. Hem givim rain for [iumi] and mekem garden bilong [iumi] barava grow gud. Hem givim staka kaikai and mekem [iumi] hapi.” (Acts 14:17) God no provaedem nomoa olketa samting wea iumi needim for laef. Hem provaedem staka difren kaen samting tu for mekem iumi savve enjoyim laef. Bat olketa samting hia hem lelebet part nomoa long wanem hem planim for iumi.

 Jehovah wakem earth for iumi olketa man stap olowe insaed. Bible sei: “[Earth] ya, hemi givim long man” and “hemi no mekem disfala [earth] fo stap nating, hemi mekem fo pipol i stap long hem.” (Sams 115:16; Aesaea 45:18) Wanem kaen pipol nao bae stap insaed and olketa bae stap for hao long? “Bae olketa stretfala pipol i onam lan wea [Jehovah] hemi bin promisim fo olketa, an bae olketa stap long hem olowe.”—Sams 37:29.

Jehovah wakem first man and woman, Adam and Eve, and putim tufala long paradaes long earth for “waka long datfala garden and for lukaftarem.” (Genesis 2:8, 15, NW) God givim assignment hia long tufala: “Garem plande pikinini and mekem earth fulap long pipol and lukaftarem earth.” (Genesis 1:28, NW) So Adam and Eve garem hope for laef olowe long earth. Sorre tumas, tufala disobeyim God, so tufala no garem chance for stap witim “stretfala pipol” wea “bae olketa stap long hem olowe.” Bat olsem bae iumi storyim bihaen, wanem tufala duim hem no changem plan bilong Jehovah for iumi and for disfala earth. Firstaem, bae iumi storyim nara samting wea God duim.

Bible hem toktok bilong God. Why nao Jehovah givim kam Bible for iumi? Main reason, hem for iumi lane abaotem hem. (Provebs 2:1-5) Hem tru, Bible no garem ansa for evri kwestin bilong iumi abaotem God, and no eni nara buk savve duim olsem. (Eklesiastes 3:11) Bat, evri samting wea Bible storyim helpem iumi for savve long God. Iumi savve hem wanem kaen God long hao hem deal witim pipol. Long Bible, iumi lanem pipol wea God laekem and no laekem wei bilong olketa. (Sams 15:1-5) Bible storyim tu tingting bilong God abaotem worship, wanem hem stret and no stret, and material samting. And tu, iumi savve lane abaotem olketa wei bilong Jehovah long Bible taem iumi lane abaotem olketa samting wea Son bilong hem, Jesus Christ, duim and talem.—John 14:9.

Nara reason why Jehovah givim kam Bible, hem for helpem iumi for savve wanem for duim for garem gudfala laef, wea hem nao laef wea garem mining. Jehovah iusim Bible for talem iumi hao for garem hapi famili, hao for satisfae, and hao for deal witim wari. And olsem disfala magasin bae storyim bihaen, Bible garem ansa for olketa important kwestin olsem: Why nao staka nogud samting kasem iumi? Wanem nao bae happen long future? Bible storyim tu wanem God duim for mek sure plan bilong hem mas kamap tru.

Olketa nara samting tu showimaot Bible hem barava spesol buk wea kam from God. Samting olsem 40-fala man nao raetem Bible insaed winim 1,600 year. Nomata olsem, full Bible mekhae long nem bilong God and rul bilong hem, wea diswan pruvim God nao givim kam Bible. (2 Timothy 3:16) Bible hem difren from olketa nara old buk, bikos nomata olketa copyim or transleitim insaed staka handred year wea go pas, hem stret evritaem, and staka thousand old Bible manuscript nao pruvim diswan. And tu, nomata pipol laek stopem wei for transleitim, printim, and readim Bible, olketa no fit for stopem. Distaem pipol evriwea long world garem Bible and hem stap long staka languis winim eni nara buk. Datwan pruvim “toktok blong God blong yumi bae hemi stap fo evritaem olowe.”—Aesaea 40:8.

God duim finis wanfala spesol samting wea showimaot plan bilong hem bae kamap tru. Olsem iumi storyim finis, plan bilong God hem for iumi olketa man laef olowe long earth. Bat taem Adam disobeyim God and hem sin, hem lusim nao chance for kasem laef olowe, and tu, olketa pikinini bilong hem wea bae born kam bihaen. Bible sei: “Sin hem kasem evriwan long world bikos long wanfala man nomoa. From olketa sin, olketa dae, dastawe evriwan dae bikos evriwan sin.” (Rome 5:12) From Adam sin, luk olsem plan bilong God bae no kamap tru nao. Wanem nao Jehovah duim long datfala taem?

Wanem Jehovah duim barava fitim nao olketa wei bilong hem. From hem tinghae long justice, hem panisim Adam and Eve for nogud samting wea tufala duim, bat hem duim samting for sevem  olketa pikinini bilong tufala. From hem garem wisdom, hem disaed for deal witim samting wea happen, and long semtaem hem talemaot wanem bae hem duim for stretem datwan. (Genesis 3:15, NW) Son bilong God, Jesus Christ nao bae mekem wei for olketa man free from sin and dae. Wanem nao insaed diswan?

For mekem olketa man free from olketa nogud samting wea kamaot from Adam sin againstim Jehovah, Jehovah sendem Jesus kam long earth for teachim pipol wanem olketa savve duim for kasem laef and for “givim laef bilong hem, wea datwan hem price for baem bak staka pipol.” * (Matthew 20:28; John 14:6) Jesus fit for provaedem datfala ransom bikos hem tu wanfala perfect man olsem Adam. Bat Jesus no olsem Adam, hem obeyim Jehovah go kasem taem hem dae. From hem no fitim for Jesus dae olowe, Jehovah mekem hem laef bak olsem wanfala spirit long heven. Jesus fit for givim samting wea Adam no fit for givim long olketa man wea obey, wea hem nao chance for kasem laef olowe. “From wanfala man no obeyim God, diswan mekem staka pipol sin. Olsem tu, from wanfala man hem obeyim God, diswan bae mekem staka pipol raeteous.” (Rome 5:19) Promis bilong God for olketa man laef olowe long earth bae kamap tru bikos long datfala ransom wea Jesus provaedem.

Iumi lanem staka samting abaotem Jehovah from wei wea hem deal witim olketa challenge wea kamap taem Adam disobeyim hem. Iumi lanem hao no eni samting savve stopem Jehovah for finisim wanem hem startim. Toktok wea hem talem “mas hapen nao olsem wea [hem] laekem.” (Aesaea 55:11) Iumi lanem tu bigfala love wea Jehovah showimaot for iumi. Bible sei: “Love wea God garem for iumi hem showaot taem hem sendem kam spesol Son bilong hem long world mekem iumi savve kasem laef bikos long hem. God sendem kam Son bilong hem olsem wanfala sakrifaes for olketa sin bilong iumi mekem iumi savve fren bak witim hem. Hem duim diswan bikos hem lovem iumi no bikos iumi lovem hem.”—1 John 4:9, 10.

God “no stopem Son bilong hem for safa bat hem letem hem dae for iumi evriwan,” so iumi sure God bae “hapi for givim iumi evri nara samting tu” wea hem promisim. (Rome 8:32) Wanem nao God promis for duim for iumi? Plis readim next article.